Nongonoko Wa JW Broadcasting ‘Wu Endla Leswaku Hi Va Ni Matimba Wu Tlhela Wu Hi Phyuphyisa!’

KU SUKELA loko nongonoko wa le ka Internet lowu vuriwaka JW Broadcasting wu sungurile hi 2014, wu khutaze ni ku tlhela wu phyuphyisa vahlaleri vo tala emisaveni hinkwayo. Sweswi nongonoko lowu wu kumeka hi tindzimi to tlula 90. Hi xikombiso, sweswi nongonoko lowu wu hundzuluxeriwe hi Xiewe, Xiga ni Xitwi (hilaha swi kombisiweke ha kona), naswona sweswo swi endle leswaku vahuweleri lava tlulaka 130 000 va le Benin, Côte d’Ivoire, Ghana ni le Togo va tsaka.a

Agatha, la nga nsati wa mulanguteri wa muganga eGhana u ri: “Loko ndzi yingisela swirho swa Huvo leyi Fumaka ni vapfuneti va swona, ndzi twa onge Yehovha u vulavula na mina hi ku kongoma ekamareni ra mina. Loko a ku nga ri nongonoko lowu, xana nhwanyana wa xisiwana xo fana na mina a ta ri kuma kwihi lunghelo ro fana ni leri? Wu endla leswaku hi va ekusuhi swinene ni vamakwerhu lava hi va rhandzaka emisaveni hinkwayo.”

Xiviko lexi humaka eZambia xi te: “Hambileswi mavandlha yo tala ma nga riki na mali, vahuweleri va endla matshalatshala leswaku va hlalela nongonoko wa JW Broadcasting. Hi xikombiso, Vandlha ra Misako ri kwalomu ka tikhilomitara ta 32 ku suka edorobeni leri nga ekusuhi naswona ri le ndhawini leyi nga purasi leyi eka yona ku va ka ni swinambyana hi nguva ya mpfula.” Simon loyi a nga nandza wa vutirheli loyi a teke evandlheni rero leswaku a ta tirha laha a ku ri ni xilaveko lexikulu, u ri: “N’hweti ni n’hweti un’wana evandlheni u famba tiawara timbirhi leswaku a ya laha ku khandziyeriwaka kona swo famba kutani loko a fika kwalaho u khandziya a ya edorobeni leri vamakwerhu va kotaka ku kopa minongonoko kona. Mukhalabye wa malembe ya 70 ni vana vakwe vambirhi va majaha a va nga si tshama va ya eminhlanganweni ya Timbhoni ta Yehovha, kambe mukhalabye yoloye a tsakile loko a twa leswaku ku ta hlaleriwa tivhidiyo eminhlanganweni leyi khomeriwaka ematikoxikaya. Mukhalabye yoloye u te: ‘Leyi i ndlela leyi ndzi nga dyondzaka hi Xikwembu ha yona.’”

Papila ro tlangela leri humaka eRhaxiya ri ri: “Se swi endla lembe hi ri karhi hi hlalela nongonoko wa JW Broadcasting naswona swa hi tsakisa ku va ni lunghelo ro tano. Endzhaku ka loko hi hlalele nongonoko wo sungula, hi ku hatlisa hi titwe hi ri ni vun’we ni vamakwerhu emisaveni hinkwayo! A wu tsakisa! Hi swi xiyile leswaku hi ndyangu wun’we lowukulu! A hi tsakile swinene loko hi vona vamakwerhu lava hi va rhandzaka va Huvo leyi Fumaka. Hi mbilu hinkwayo, va tikarhatela ku hi lunghiselela nongonoko hi nkarhi lowu faneleke naswona va hi lunghiselela hinkwerhu. Hi wu langutela hi mahlongati nongonoko wun’wana ni wun’wana. Ha tinyungubyisa swinene ku vitaniwa Timbhoni ta Yehovha. Ha nkhensa vamakwerhu lava rhandzekaka! Hi nkhensa Yehovha na Kreste hikwalaho ka mintirho ya vona hinkwayo yo hlamarisa. Swi endla leswaku hi va ni matimba hi tlhela hi phyuphya!”

Horst na Helga, ku nga vatekani lava dyuhaleke va tlhela va vabya lava tshamaka eJarimani, va tsale va ku: “Nongonoko wa JW Broadcasting wa tsakisa. Hi khutaziwa hi mintokoto, ngopfungopfu ya vamakwerhu lava lamaleke. Swikombiso swa vona swi hi khutaza leswaku hi endla leswi nga ematimbeni ya hina ku nga khathariseki swiphiqo swa hina swa rihanyo. Loko hi vona makwerhu la lamaleke a ri nkulu, ha swi xiya leswaku un’wana ni un’wana a nga swi kota ku nyika Yehovha swilo swa nkoka. Swikombiso swa vamakwerhu vo tano, swi hi endla hi nkhensa Yehovha naswona hi khongelela leswaku a va katekisa swinene.”

Kodi, loyi a tshamaka eNghilandhi, u ri: “Ndzi nkhensa nkarhi ni matshalatshala ya n’wina yo endla jw.org, JW Broadcasting ni tivhidiyo ta Kalebe na Belina. Ndza nkhensa leswi mi endleke leswaku Bibele yi olova ku yi twisisa. A ndzi ri ni malembe ya nhungu loko ndzi khuvuriwa. Loko ndzi kula ndzi lava ku pfuneta ku aka Tiholo ta Mfumo! Ndzi lava ni ku ya tirha eBethele. Sweswi ndzi ni malembe ya kaye, a ka ha salanga malembe yo tala leswaku ndzi sungula tipakani ta mina.”

Arabella, loyi a nga ni malembe ya nhungu la tshamaka eNghilandhi u tsale a ku: “Ndzi nkhensa tivhidiyo ni switoloveto. Swi ndzi pfuna leswaku ndzi tiva Yehovha swinene. Matluka ya switoloveto lama nga eka jw.org ma ndzi pfuna ku dyondza hi Yehovha loko hi hala tlhela ndzi ri karhi ndzi tiphina. Ma swi kota ku endla tinsimu leti un’wana ni un’wana a kotaka ku tinhlokohata. Tivhidiyo ta Kalebe na Belina na tona ta ndzi pfuna. Ndza wu nkhensa ntirho wa n’wina.”