Misava Yi Le Ku Onhiweni—Bibele Yi Ri Yini Hi Mhaka Leyi?

António Guterres matsalana wa United Nations, eka xiviko xa Intergovernmental Panel on Climate Change, lexi veke kona hi ti 4 ta April, 2022 u te: “Ku nga ri khale vanhu va ta endla swilo leswi nga ta onha ntumbuluko. Madoroba lamakulu ma ta mbombomela endzeni ka mati. Ku ta hisa swinene. Ku ta va ni swidzedze leswi chavisaka. Ku ta va ni ku kayivela ka mati. Mixakaxaka ya swiharhi na swimilana swo tala swi ta va swi nga ha ri kona. Mhaka leyi a ko va tsheketo kumbe ku hundzeleta swilo. Leswi hi leswi van’wasayense va vulaka leswaku swi ta endleka loko vafumi va nga cinci ndlela leyi va endlaka swilo hayona.”

Phephahungu ra The New York Times ra ti 15 ta June 2022 eka hlokomhaka leyi nge,“Flooding Chaos in Yellowstone, a Sign of Crises to Come,” ri te: Van’wasayense va hi lemukisa ka ha ri emahlweni leswaku eka malembe lama taka ku ta va ni ku cinca ka tinguva loku nga ta kavanyeta mitanga ya swihari ya kwalomu ka 423, eUnited States, leswi swi ta vangiwa hikwalaho ka ku hisa lokukulu loku nga ta va ku ri kona. Swilo swo biha leswi nga ta endleka swi fana ni makhombo lama hi nga ha va ka hi hlaye ha wona eBibeleni yo tanihi: mindzilo ni mikhukhulo, ku n’oka ka tindhawu leti nga ayisi, ku tlakuka ka ndzingano wa lwandle ni ku hisa ka dyambu.”

Xana swiphiqo swa ku onhiwa ka mbangu laha misaveni swi ta lulamisiwa? Loko swi ri tano, i mani loyi a nga ta swi lulamisa? Twana leswi Bibele yi swi vulaka hi mhaka leyi.

Ku profetiwa ka ku onhiwa ka mbangu

Bibele yi vula leswaku Xikwembu xi ta “lovisa lava onhaka misava.” (Nhlavutelo 11:18) Ndzimana leyi ya Bibele yi hi dyondzisa swilo swinharhu:

1. 1. Vanhu va ta onha misava.

2. 2. Ku onhiwa ka misava ku ta hela.

3. 3. Xikwembu hi xona xi nga ta lulamisa ku onhiwa ka mbangu, ku nga ri vanhu.

Ku nga ri khale misava ya hina yi ta va leyinene

Bibele yi vula leswaku “misava yi tshama hilaha ku nga heriki.” (Eklesiasta 1:4) Yi ta tshama yi ri kaya ra hina.

• “Lavo lulama va ta tshama emisaveni, Va ta hanya eka yona hilaha ku nga heriki.”—Pisalema 37:29.

Misava ya hina yi ta vuyeteriwa yi tlhela yi va leyinene.

• “Mananga ni ndhawu leyi nga riki na mati swi ta tsaka, Ni ndhawu leyi nga mananga yi ta tsaka, yi rhumbuka kukota safroni.”—Esaya 35:1.