Van’wasayense Va Hundzisele Ximhandzana eMahlweni Xa Wachi Ya Siku Ra Ku Herisiwa Ka Misava—Xana Bibele Yi Ri Yini Hi Mhaka Leyi?

Hi ti 24 ta January 2023, van’wasayense va sete nkarhi eka Wachi Ya Siku Ra Ku Herisiwa Ka Misavaa wu va ekusuhi ni awara ya khumembirhi ya matakuxa, leswi yimelaka makumu ya ku hela ka misava.

• “‘Wachi Ya Siku Ra Ku Herisiwa Ka Misava’ yi yimela makhombo lawa vanhu va ti vangelaka wona lama tlhelaka ma va vavisa. Hi Ravumbirhi van’wasayense va tshinete ximhandzana xa wachi yoleyo xi va ekusuhi swinene ni awara ya khumembirhi, va endle tano hikwalaho ka ku nyanya ka swiendlakalo leswi nga kona emisaveni swo tanihi hi nyimpi ya le Ukraine, ku chava ku sunguriwa ka nyimpi ya nyutliya ni makhombo lama vangiwaka hi ku cinca ka maxelo.”—AFP International Text Wire.

• “Hi Ravumbirhi, van’wasayense va tshinete ximhandzana xa Wachi Ya Siku Ra Ku Herisiwa Ka Misava lerova ku lo sala ti sekoni ta 90 xi fika eka awara ya khumembirhi ya matakuxa, nkarhi wa leswaku misava yi hela wu tshinele swinene.”—ABC News.

• “Ntlawa wa van’wasayense lava nga emisaveni hinkwayo va lemukise leswaku ku tlula rini na rini, vanhu va ya va va ekhombyeni lerikulu ra leswaku va ti herisa hi voxe.”—The Guardian.

Xana vanhu ni pulanete ya hina swi ta herisiwa ku nga ri khale? Xana hi fanele hi chava leswi nga ta endleka enkarhini lowu taka? Xana Bibele yi ri yini hi mhaka leyi?

Xana ku ta endleka yini enkarhini lowu taka?

Hi ku ya hi Bibele, “misava yi tshama hilaha ku nga heriki” naswona ku ta va ni vanhu lava nga ta “hanya eka yona hilaha ku nga heriki.” (Eklesiasta 1:4; Pisalema 37:29) Hikwalaho, vanhu a va nge swi koti ku herisa misava kumbe ku endla leswaku pulanete ya hina yi va ndhawu leyi swi nga kotekiki ku hanya eka yona.

Hambiswiritano, Bibele ya boxa leswaku ku ta va ni makumu. Hi xikombiso, yi vula leswaku “misava ya hundza.”—1 Yohane 2:17.

• Leswaku u twa leswi Bibele yi swi vulaka loko yi vulavula hi ku herisiwa ka misava, hlaya nhlokomhaka leyi nge: “Is the World Coming to an End? What Is the Apocalypse?”

• Leswaku u twa leswi Bibele yi swi vulaka mayelana ni nkarhi lowu swiendlakalo swa misava a swi ta sungula ha wona, hlaya nhlokomhaka leyi nge: “When Will the World End?”

Ku tshama hi ri ni langutelo lerinene

Bibele yi nga hi pfuna leswaku hi tshama hi ri ni langutelo lerinene hambiloko namuntlha ku ri ni swiphiqo swo tala emisaveni. Njhani?

• Bibele yi hi nyika xitsundzuxo lexi nga hi pfunaka evuton’wini bya hina bya siku ni siku. (2 Timotiya 3:16, 17) Hi xikombiso, hlaya nhlokomhaka leyi nge “How to Control Worry” ku vona ndlela leyi Bibele yi nga ku pfunaka hayona leswaku u tshama u ri ni langutelo lerinene hambileswi ku nga ni swiphiqo swo tala evuton’wini.

• Bibele yi hi nyika ntshembo wa xiviri hi vumundzuku. (Varhoma 15:4) Yi swi boxa hi ku kongoma leswi hi nga swi langutelaka sweswi ni le nkarhini lowu taka naswona sweswo swi hi pfuna leswaku hi va ni xivindzi xa ku langutana ni leswi endlekaka emisaveni namuntlha.

Leswaku u dyondza swo tala hi leswi swi kumekaka eBibeleni, ha ku rhamba hi mandlamambirhi leswaku u ringeta dyondzo ya hina ya mahala ya Bibele leyi nga ni mupfuni.