Madzolonga Eka Swa Tipolitiki—⁠Xana Bibele Yi Ri Yini Hi Mhaka Leyi?

Madzolonga ma ya ma nyanya hikwalaho ka tipolitiki.

Hikwalahokayini ku ri ni madzolonga yo tala eka swa tipolitiki? Xana ma ta hela? Xana Bibele yi ri yini hi mhaka leyi?

Ku avana loku vangiweke hi swa tipolitiki i khale ku profetiwile

Bibele yi vule khale leswaku emikarhini ya hina ku nga ‘masiku yo hetelela’, vanhu va ta va ni madzolonga va tlhela va nga twanani.

• “Emasikwini yo hetelela ku ta fika mikarhi yo nonon’hwa leyi swi tikaka ku hanya eka yona. Hikuva vanhu va ta va lava. . . nga khensiki, lava nga tshembekiki, . . . lava nga tiyimiselangiki ku pfumelelana ni van’wana, . . . lava nga ni tihanyi, . . . vaxengi, lava omeke tinhloko, lava tikukumuxaka.”—2 Timotiya 3:1-4.

Bibele yi tlhele yi profeta leswaku emikarhini ya hina ku ta va ni swikavanyeto leswi vangaka hasahasa eka swa tipolitiki. (Luka 21:9) Hambiswiritano, madzolonga eka swa tipolitiki ni ku avana swi nge tshami hilaha ku nga heriki.

Ku herisiwa ka madzolonga eka swa tipolitiki

Bibele yi hlamusela leswaku Xikwembu xi ta siva mifumo hinkwayo ya vanhu hi mfumo wa xona wa le tilweni.

• “Xikwembu xa le tilweni xi ta simeka mfumo lowu nga . . . ta pfotlosa wu herisa mifumo leyi hinkwayo, kambe wona wu ta fuma hilaha ku nga heriki.”—Daniyele 2:44.

Hakunene, Mfumo wa Xikwembu wu ta endla leswaku vanhu va va ni vun’we ni ku tlhela wu tisa ku rhula emisaveni hinkwayo.

• Hosi ya wona ku nga Yesu Kreste u vitaniwa “Hosana Ya Ku Rhula” naswona u ta tiyisekisa leswaku ku va ni “ku rhula hilaha ku nga heriki.”—Esaya 9:6, 7.

• Hambi ku ri sweswi, vanhu lava fumiwaka hi mfumo lowu va dyondza ku hanyisana hi ku rhula. Hikwalaho ka sweswo, Bibele yi ri: “Va ta hundzula mabanga ya vona ma va swikomu Ni matlhari ya vona ma va swikhutulo. Tiko a ri nge he tlakusi banga ku lwa ni tiko rin’wana, Naswona a va nge he dyondzi nyimpi.”—Esaya 2:3, 4.

Leswaku u dyondza leswi engetelekeke, hlaya nhlokomhaka leyi nge “I Yini Leswi Mfumo Wa Xikwembu Wu Nga Ta Swi Endla?” u tlhela u hlalela vhidiyo leyi nge Mfumo Wa Xikwembu I Yini?