Xana Timbhoni Ta Yehovha Ti Va Khoma Njhani Vanhu Lava A Va Ri Swirho Swa Vukhongeri Bya Tona?

Hi tikarhatela ku komba van’wana rirhandzu, musa ni ku va xixima. Loko un’wana wa hina a nga ha ti nkarhi na nkarhi eminhlanganweni ya hina kumbe a tshike hi ku helela ku hlangana na hina, hi ya eka yena,a hi n’wi tiyisekisa leswaku ha n’wi rhandza ni ku n’wi pfuna leswaku a tlhela a va ni vuxaka lebyinene na Yehovha.—Luka 15:4-7.

Eka swiyimo swin’wana, swilo leswi munhu a swi endlaka swi nga endla leswaku a hetelela a susiwile evandlheni. (1 Vakorinto 5:13) Hambiswiritano, leswi hi va rhandzaka swinene lava hi gandzelaka na vona, hi tikarhatela ku va pfuna leswaku va nga susiwi. Hambiloko va susiwile, hi ya emahlweni hi va komba rirhandzu ni ku va xixima hilaha Bibele yi hi khutazaka hakona.—Marka 12:31; 1 Petro 2:17.

I yini lexi endlaka leswaku munhu a hetelela a susiwile evandlheni?

Bibele yi vula leswaku loko Mukreste a endle xidyoho lexikulu naswona ala ku hundzuka, u fanele a susiwa evandlheni. (1 Vakorinto 5:11-13) Bibele yi hi byela hi swidyoho leswikulu leswi nga endlaka munhu a hetelela a susiwile. Hi xikombiso, yi hi byela hi ku tikhoma ko biha hi swa masangu, vudakwa, ku dlaya, ku xanisa swirho swa ndyangu ni ku yiva.—1 Vakorinto 6:9, 10; Vagalatiya 5:19-21; 1 Timotiya 1:9, 10.

Nilokoswiritano, a hi hatliseli ku n’wi susa munhu loyi a endleke xidyoho lexikulu evandlheni. Vakulu evandlheni va rhanga va n’wi pfuna leswaku a cinca mahanyelo yakwe.b (Varhoma 2:4) Va vulavula na yena hi ndlela yo rhula ni ku n’wi komba musa. (Vagalatiya 6:1) Loko munhu loyi a endleke xidyoho lexikulu a khomiwa hi ndlela leyi, swi nga endla leswaku a xiya swihoxo swakwe ivi a hundzuka. (2 Timotiya 2:24-26) Loko a ya emahlweni a tlula milawu ya Bibele naswona a nga hundzuki hambiloko vakulu va ringete ku n’wi pfuna ko hlaya, u fanele a susiwa evandlheni. Vakulu va ta tivisa vandlha leswaku a nga ha ri un’wana wa Timbhoni ta Yehovha.

Vakulu vambirhi va ri karhi va pfuna muntshwa wa xinuna hi ku n’wi hlayela tindzimana ta le Bibeleni. Un’wana wa vona u n’wi khome katla loko a ri karhi a vulavula na yena. — Vakulu va tikarhatela ku fikelela mbilu ya mudyohi hi ku vulavula na yena hi ndlela yo rhula ni ku n’wi komba musa

Xana swi pfuna yini loko munhu loyi a hanyaka hi xidyoho a susiwa evandlheni? Vandlha ra vuyeriwa hikuva ri ta tshama ri basile ni ku hanya hi milawu ya Xikwembu ya mahanyelo naswona swi ri sirhelela eka nkucetelo wo biha wa munhu yoloye. (1 Vakorinto 5:6; 15:33; 1 Petro 1:16) Ku engetela kwalaho, swi nga ha susumetela mudyohi leswaku a tshika ku hanya hi xidyoho ivi a hundzuka.—Vaheveru 12:11.

Timbhoni ta Yehovha ti va khoma njhani lava susiweke evandlheni?

Bibele yi vula leswaku Vakreste va fanele va ‘tshika ku tihlanganisa ni munhu loyi a susiweke evandlheni naswona ‘hambi ku ri ku dya va nga dyi na yena.’ (1 Vakorinto 5:11) Hikwalaho ka sweswo, a hi hungasi na yena munhu loyi a susiweke. Nilokoswiritano, a hi n’wi papalati hi ku helela. Ha n’wi xixima. U amukelekile ku ta etinhlengeletanweni ta hina ta vugandzeri naswona loko a tile hi nga n’wi xeweta.c A nga tlhela a kombela vakulu va n’wi pfuna leswaku a vuya evandlheni.

Vatekani lava nga Timbhoni va ri karhi va xeweta wansati la susiweke evandlheni. — Lava susiweke evandlheni va amukelekile ku ta etinhlengeletanweni ta hina

Xana ku humelela yini hi wanuna loyi a susiweke evandlheni kambe nsati ni vana vakwe va ha riki Timbhoni ta Yehovha? Hambileswi a nga ha endleki swa vugandzeri ni ndyangu wakwe kambe wa ha ta tama a ri xirho xa ndyangu. Leswi va tshamaka endlwini yin’we, vuxaka lebyi a nga na byona ni nsati ni vana vakwe a byi cinci naswona va fanele va ya emahlweni va kombisana rirhandzu.

Munhu loyi a susiweke a nga kombela ku endzeriwa hi vakulu lava nga ta n’wi nyika ndzayo ya rirhandzu ya le Matsalweni naswona hi ndlela ya musa va ta n’wi khutaza leswaku a hundzuka ivi a tlhelela eka Xikwembu. (Zakariya 1:3) Loko a tshika mahanyelo yakwe yo biha naswona a tikarhatela ku hanya hi milawu ya Bibele u amukelekile ku tlhela a va xirho xa vandlha. Vandlha ri ta ‘n’wi rivalela hi musa ri tlhela ri n’wi chavelela’ ku fana ni ndlela leyi Vakreste va le Korinto va endleke hayona eka mudyohi loyi a hundzukeke.—2 Vakorinto 2:6-8.

Xana lava tshameke va susiwa va titwa njhani?

Xiya swin’wana leswi vuriweke hi van’wana va Timbhoni ta Yehovha lava a va susiwile evandlheni ivi endzhaku va teka xiboho xo tlhelela eka Xikwembu.

“Loko ndzi teke xiboho xo tlhelela evandlheni, a ndzi ehleketa leswaku vakulu va ta lava ku tiva hinkwaswo leswi ndzi swi endleke eka malembe lawa a ndzi susiwile. Ematshan’weni ya sweswo va te, ‘Hi lava u ehleketa ngopfu hi leswi u nga ta swi endla ku sukela sweswi.’ Endzhaku ka sweswo ndzi titwe ndzi phyuphyile.”—Maria, wa le United States.

“Vamakwerhu a va tsakile hileswi ndzi vuyeke evandlheni. A ndzi titwa ndzi ri wa nkoka. Vamakwerhu va ndzi pfune ndzi swi xiya leswaku Yehovha u ndzi rivalerile ni ku tshika ku titwa nandzu. Vakulu a va tshama va ri karhi va ndzi pfuna leswaku ndzi va ni vuxaka lebyinene na Yehovha. Va ndzi tiyisekisile ni ku ndzi pfuna ndzi vona leswaku ndzi wa nkoka eka Yehovha naswona wa ndzi rhandza.”—Malcom, wa le Sierra Leone.

“Swa ndzi tsakisa ku vona leswaku Yehovha wa va rhandza vanhu vakwe naswona u lava leswaku nhlangano wakwe wu tshama wu basile. Hambiloko van’wana va vona onge a hi swinene ku susa munhu evandlheni, i swa nkoka naswona swi kombisa rirhandzu. Ndza swi tlangela leswi Tata wa hina wa le tilweni a nga Xikwembu lexi nga ni rirhandzu ni lexi rivalelaka.”—Sandi, wa le United States.

Leswi vativi va swa nawu lava nga riki Timbhoni ta Yehovha va swi vuleke

Xana tikhoto ni vativi va swa nawu va ri yini hileswi Timbhoni ta Yehovha ti susaka vadyohi lava nga hundzukiki emavandlheni ya tona? Twana leswi va swi vuleke.

“Swa twala ku va mitlawa ya vukhongeri leyi kongomisiwaka ni ku landzela misinya ya milawu ya Matsalwa [yi susa mudyohi loko swi fanerile]. Leswi a swo twala ntsena kambe i swa nkoka hikuva loko munhu a nga tiyimiselanga ku hanya hi misinya ya milawu ya Matsalwa a nga faneleki ku va xirho xa ntlawa wa vukhongeri byo karhi naswona loko a nga susiwi a nga va ni nkucetelo wo biha eka lava hanyaka hi milawu yoleyo ya Matsalwa.”—Khotokulu ya Vuavanyisi ya le England na Wales, June 7, 2019.
“Tikhoto ta le Yuropa ni tindhawu tin’wana ti vula leswaku Timbhoni ta Yehovha ti ni mfanelo yo [susa] vanhu hi ku ya hi vukhongeri bya tona naswona tikhoto a ti fanelanga ti nghenelela timhaka teto.”—Profesa Paulo Pinto de Albuquerque, khale ka muavanyisi wa Huvo ya le Yuropa ya Timfanelo ta Vanhu.

a Hambileswi nhlokomhaka leyi yi kombetelaka eka va xinuna kambe rungula leri ra tirha ni le ka vaxisati.

b Vakulu i vavanuna lava wupfeke lava nga Vakreste lava dyondzisaka leswi nga eMatsalweni ni ku risa vanhu va Yehovha ni ku va khutaza. A va hakeriwi hi leswi va swi endlaka.—1 Petro 5:1-3.

c Eka swiyimo swin’wana leswi nga tolovelekangiki swo biha, munhu a nga ha tshika ku tihlanganisa na vandlha ivi a ringeta ku ri onha vito kumbe a kucetela van’wana ku tikhoma ku biha. Loko sweswo swi endleka, hi landzela xileriso xa le Bibeleni lexi nge, a hi fanelanga hi “n’wi xeweta” munhu yoloye.—2 Yohane 9-11.