I Yini Kumbe I Mani “Alfa Na Omega”?

Nhlamulo ya Bibele

Yehovha Xikwembu xa Matimba Hinkwawo hi yena “Alfa na Omega.” Xiga lexi xi humelela kanharhu eBibeleni.—Nhlavutelo 1:8; 21:6; 22:13.a

Hikwalahokayini Xikwembu xi tivitana “Alfa na Omega”?

Alfa na Omega i maletere yo sungula ni yo hetelela eka tialfabete ta Xigriki, ku nga ririmi leri tirhisiweke ku tsala tibuku to karhi ta Bibele leti vuriwaka Testamente Leyintshwa, leti katsaka na buku ya Nhlavutelo. Leswi maletere lawa ku nga yo sungula ni yo hetelela eka tialfabete ta Xigriki, swi kombisa leswaku Yehovha a ri yexe hi yena masungulo ni makumu. (Nhlavutelo 21:6) A a ri Xikwembu xa Matimba Hinkwawo enkarhini lowu nga riki na masungulo naswona u ta tshama a ri Xikwembu xa Matimba Hinkwawo hilaha ku nga heriki. Hi yena ntsena a nga Xikwembu “hilaha ku nga heriki.”—Pisalema 90:2.

I mani “wo sungula ni wo hetelela”?

Bibele yi tirhisa xiga lexi loko yi vulavula hi Yehovha Xikwembu ni N’wana wakwe Yesu kambe a xi tirhisiwi ku fana eka vona vambirhi. Xiya swikombiso swimbirhi.

• Eka Esaya 44:6, Yehovha u ri: “Hi mina wo sungula ni wo hetelela. A ku na Xikwembu xin’wana handle ka mina.” Laha Yehovha u kandziyisa leswaku hi yena Xikwembu xa ntiyiso xa hilaha ku nga heriki naswona a ku na un’wana handle ka yena. (Deteronoma 4:35, 39) Eka tsalwa leri, xiga “wo sungula ni wo hetelela” xa ha vula “Alfa na Omega.”

• Ku engetela kwalaho, xiga “wo Sungula [pro’tos, ku nga ri alfa] ni wo Hetelela [e’skha·tos, ku nga ri omega]” xi kumeka eka Nhlavutelo 1:17, 18 na 2:8. Eka matsalwa lawa, mongo wu kombisa leswaku loyi ku vulavuriwaka ha yena a a file a tlhela a pfuxiwa. Hikwalaho, matsalwa lawa a ma vulavuli hi Xikwembu hikuva a xi si tshama xi fa. (Habakuku 1:12) Hambiswiritano, Yesu a a file a tlhela a pfuxiwa. (Mitirho 3:13-15) Hi yena munhu wo sungula ku pfuxeriwa ku hanya etilweni a ri xivumbiwa xa moya lexi nga fiki, laha sweswi a hanyaka “hilaha ku nga heriki.” (Nhlavutelo 1:18; Vakolosa 1:18) Nakambe u nyikiwe ntirho wo pfuxa lava feke. (Yohane 6:40, 44) Hikwalaho, Yesu u ve munhu wo hetelela loyi Yehovha a n’wi pfuxeke hi yexe. (Mitirho 10:40) Hi yona mhaka, Yesu swa n’wi fanela ku va a vuriwa “wo Sungula ni wo Hetelela.”

Xana Nhlavutelo 22:13 yi kombisa leswaku Yesu i “Alfa na Omega”?

Doo! Eka Nhlavutelo 22:13 a swi tiveki leswaku ku vulavula mani naswona ku vulavula vanhu vo tala eka ndzima leyi. Profesa William Barclay u tsale leswi hi tsalwa ra Nhlavutelo: “Swilo a swi tsariwanga hi ku landzelelana ka swona, . . . hikwalaho swa tika ku tiva leswaku i mani a vulavulaka.” (The Revelation of John, Vholumo 2, Revised Edition, tluka 223) Hikwalaho, xiga lexi nge “Alfa na Omega” lexi kumekaka eka Nhlavutelo 22:13, xi vula Munhu un’we loyi ku vulavuriwaka ha yena eka Nhlavutelo, ku nga Yehovha Xikwembu.