“Ndzi Endla Leswi Ndzi Nga Swi Kotaka”

Irma, loyi a tshamaka eJarimani, u ni malembe ya kwalomu ka 90. Endzhaku ko wa ka mbirhi ni vuhandzuri, sweswi a nga ha swi koti ku chumayela hi yindlu ni yindlu. Irma sweswi u chumayela swirho swa ndyangu ni vanhu lava a va toloveleke hi ku tirhisa mapapila. Mapapila ya Irma a ma khutaza vanhu ni ku va tshandzisa eka swiyimo swo tika leswi va langutaneke na swona, vanhu a va ma tsakela naswona nkarhi na nkarhi a va n’wi fonela ku vutisa leswaku u ta ma tisa rini mapapila lamantshwa. Vanhu va n’wi khensa, va n’wi kombela leswaku a tsala man’wana. Irma, u ri, “Hinkwaswo sweswo swa ndzi tsakisa ni ku ndzi hlohlotela ku ya emahlweni ndzi chumayela.”

Irma a a rhumela mapapila etindhawini to hlayisela vadyuhari. Loko a hlamusela u ri: “Kokwana un’wana u ndzi bele riqingho a vula leswaku papila leri ndzi n’wi nyikeke rona ri n’wi tiyisile loko nuna wa yena a lova. Papila rero u ri hoxa eBibeleni naswona u ri hlaya nkarhi na nkarhi nimadyambu. Wansati un’wana loyi nuna wa yena a ha ku hundza emisaveni, u vule leswaku papila ra mina rin’wi pfunile swinene, ku tlula mimbulavulo ya vafundhisi. A ri na swivutiso swo tala, u tlhele a vutisa loko swi ta koteka leswaku a ni endzela.”

Wansati u n’wana loyi Irma a n’wi toloverile loyi a nga ri mbhoni a rhurheleke endhawini yin’wana leyi nga le kule na laha Irma a tshama kona, hikwalaho u kombele Irma leswaku a n’wi tsalela papila. Irma u ri, “wansati loyi u ma hlayisile mapapila hinkwawo lama a ndzi n’wi tsalela wona, endzhaku ka loko a lovile, ntombhi yakwe yi ni bele riqingho. Yi ndzi byele leswaku yi ma hlayile mapapila lama a ndzi ma tsalela mana wa yona na yena hi ku titsongahata u ndzi kombele leswaku ndzi n’wi tsalela mapapila lama khomeke rungula ra Bibele.”

Irma a wu rhandza ntirho wakwe wo chumayela. U ri, “ndzi khongela eka Yehovha leswaku a hambeta a ndzi nyika matimba yo n’wi tirhela, hambileswi ndzi nga swi kotiki ku famba hi yindlu ni yindlu kambe ndzi endla leswi ndzi nga swi kotaka.