1 Vakorinto 10:13—“Xikwembu Xa Tshembeka”

“A mi si weriwa hi ndzingo lowu hambaneke ni lowu welaka vanhu van’wana. Kambe Xikwembu xa tshembeka, a xi nge mi tshiki mi ringiwa hi ndzingo lowu mi nga ta tsandzeka ku wu tiyisela, kambe loko mi ringiwa xi ta mi nyika ndlela yo huma leswaku mi kota ku wu tiyisela.”—1 Vakorinto 10:13, Bibele—Matsalwa Yo Kwetsima Ya Misava Leyintshwa.

“A mi si humeleriwa hi miringo leyi tlulaka matimba ya munhu. Xikwembu xa tshembeka, xi nga ka xi nga pfumeri leswaku mi hlangana ni ndzingo lowu wu mi hlulaka; loko wo tshuka wu mi tela, xi ta mi nyika matimba ya ku tiyisela, mi ko mi huma eka wona.”—1 Vakorinto 10:13, Bibele Ya Mahungu Lamanene.

Leswi 1 Vakorinto 10:13 Yi Vulaka Swona

Vhese leyi yi vulavula hi nchumu wa nkoka lowu Xikwembu xi nga na wona, ku nga ku tshembeka. Vagandzeri vo tshembaka va Xikwembu va nga tiyiseka leswaku xi ta va pfuna ngopfungopfu loko va ri emiringweni.

“A mi si weriwa hi ndzingo lowu hambaneke ni lowu welaka vanhu van’wana.” Vagandzeri va Xikwembu va nga ha ringeka ku endla swilo leswi nga xi tsakisiki. Hambiloko miringo yo tano yi tika, ya fana ni leyi welaka vanhu vo tala. Hikwalaho, vagandzeri va Xikwembu va nga tiyiseka leswaku va nga swi kota ku tiyisela miringo yo tano.

“Xikwembu xa tshembeka.” Yehovhaa Xikwembu wa tshembeka naswona hi nga titshega hi yena. Mikarhi hinkwayo u endla leswi a swi tshembiseke ku nga leswaku a nge pfuki a va tshikile la va n’wi rhandzaka, va tshembekaka ni lava n’wi yingisaka. (Deteronoma 7:9; Pisalema 9:10; 37:28) Hikwalaho, la va n’wi gandzelaka va nga tiyiseka leswaku u ta tlhela a endla switshembiso swimbirhi leswi khutazaka leswi kumekaka eka vhese leyi landzelaka.

“A xi nge mi tshiki mi ringiwa hi ndzingo lowu mi nga ta tsandzeka ku wu tiyisela.” Xikwembu xi kombisa leswaku xi tshembekile hi ku ka xi nga pfumeleli miringo yi tika swinene lerova swi nga koteki ku munhu a kota ku tiyisela. Xa swi tiva leswi vagandzeri va xona va nga kotaka ku swi tiyisela.—Pisalema 94:14.

“Loko mi ringiwa xi ta mi nyika ndlela yo huma leswaku mi kota ku wu tiyisela.” Xikwembu xi nga susa ndzingo kumbe xi nyika vagandzeri va xona leswi va swi lavaka leswaku va kota ku wu tiyisela. Hi xikombiso, xi nga va kongomisa hi moya lowo kwetsima, xi va chavelela hi ku tirhisa Bibele kumbe xi va pfuna hi ku tirhisa vapfumerikulobye.—Yohane 14:26; 2 Vakorinto 1:3, 4; Vakolosa 4:11.

Mongo wa 1 Vakorinto 10:13

Vhese leyi yi humelela eka papila le ri muapostola Pawulo a ri tsaleleke vandlha ra le Korinto. Eka xiphemu xa papila rakwe, Pawulo u tirhise matimu ya Vaisrayele ku dyondzisa Vakorinto leswi va faneleke va swi papalata. (1 Vakorinto 10:11) Pawulo u xaxameta miringo leyi Vaisrayele va langutaneke na yona, leyi katsaka ku gandzela swikwembu swa hava ni ku tikhoma ko biha hi swa masangu. (1 Vakorinto 10:6-10) Van’wana va vona va phasiwile hi miringo leyi. Pawulo u tirhise xikombiso xa vona ku lemukisa Vakreste leswaku va nga titshembi ku tlula mpimo hi ku tibyela ku a va nge pfuki va phasiwile hi miringo yoleyo. (1 Vakorinto 10:12) Hambiswiritano, u ya emahlweni a va tiyisekisa hi marito lama nga eka 1 Vakorinto 10:13. Vagandzeri va Xikwembu vo tshembeka va nga swi kota ku langutana ni ndzingo wun’wana ni wun’wana.

Hlalela vhidiyo leyi yo koma leswaku u vona nkatsakanyo wa buku ya 1 Vakorinto.