Mahungu Lama Tshembekaka Ma Tlhela Ma Tiyisa Ripfumelo

Timbhoni ta Yehovha ta khathala swinene hi Vakrestekulobye. (1 Petro 2:17) Vo tala hi titwa hi ndlela leyi makwerhu wa xisati Tannis wa le Kenya a titwaka hayona. U ri: “Ndzi rhandza ku tiva leswi endlekelaka vamakwerhu lava rhandzekaka emisaveni hinkwayo.” Xana Tannis ni Timbhoni tin’wana ta timiliyoni va swi tiva njhani leswi endlekelaka vamakwerhu? Hi 2013 hi kote ku endla tano hi ku tirhisa xiyenge xa Mahungu eka website ya hina ya jw.org.

Xiyenge xa Mahungu xi ni swiviko leswi tshembekaka swa Timbhoni ta Yehovha swo tanihi ku humesiwa ka Tibibele, ntirho wo phalala, tiprojeke to aka ni swiendlakalo swin’wana swa nkoka. Xi hi tivisa hi vamakwerhu lava khomiweke hikwalaho ka ripfumelo ra vona. Xiyenge xa Mahungu xi tlhela xi va ni mitokoto leyi khutazaka leyi fambisanaka ni matsima yo chumayela ni swiviko swa Xitsundzuxo. I vamani lava endlaka ndzavisiso hi tinhlokomhaka leti ta mahungu naswona va tilunghiselela njhani?

Ku Lavisisa Ni Ku Vika Mahungu

Xiyenge xa Mahungu xi languteriwa hi Ndzawulo ya Public Information (OPI). Ndzawulo leyi yi le ntsindza wa misava hinkwayo naswona yi kongomisiwa hi Komiti Ya Vahlanganisi ya Huvo leyi Fumaka. Yi vumbiwa hi vamakwerhu va xinuna ni vaxisati vo tlula 100, vo tala va vona va tirha va ri emakaya, va katsa vatsari, valavisisi, vateki va swifaniso ni vahundzuluxeri. Van’wana va vulavurisana ni vatirhelamfumo, vaprofesa, mathicara ni vateki va mahungu. Ndzawulo leyi yi pfuniwa hi Tindzawulo ta Information Desk (PID) to tlula 80 leti nga emarhavini emisaveni hinkwayo.

Leswaku yi lunghiselela mahungu, ndzawulo ya OPI yi tirhisana ni tindzawulo ta PID. Loko vamakwerhu va kuma mahungu yo karhi, va endla ndzavisiso ni ku hlengeleta rungula leri tshembekaka. Leswi swi nga ha katsa leswaku va burisana ni lava va ma tivaka kahle mahungu wolawo. Endzhaku ka loko ku hlengeletiwe vumbhoni, mahungu wolawo ma tsariwa, ma editiwa, ma hlayiwa, ku tekiwa swifaniso kutani swi rhumeriwa eka Komiti Ya Vahlanganisi leswaku yi nyika mpfumelelo.

Marito Yo Khensa

Vamakwerhu va titwa njhani hi xiyenge lexi xa Mahungu? Cheryl, makwerhu wa xisati wa le Philippines u ri: “Ndza swi rhandza swinene ku sungula siku hi ku hlaya mahungu lama vulavulaka hi nhlangano wa Yehovha ni vanhu vakwe.”

Vahlayi vo tala va vulavula hi ku hambana loku nga kona eka xiyenge xa Mahungu xa le ka jw.org ni swiyenge swin’wana swa mahungu. Tatiana wa le Kazakhstan u ri: “Swa ndzi tsakisa hi leswi ndzi tshembaka mahungu ya le ka jw.org. Ya tshembeka naswona i ya ntiyiso.” Alma makwerhu wa xisati wa le Mexico u ri: “Ku hambana ni mahungu man’wana lama tsemaka nhlana, xiyenge xa Mahungu xa khutaza swinene.”

Xiyenge xa Mahungu a xo tshembeka ntsena; xi tlhela xi tiyisa ripfumelo. Bernard wa le Kenya u ri: “Xiyenge xa Mahungu xi ndzi pfune ndzi teka vamakwerhu emisaveni hinkwayo va ri ndyangu wa mina, swi nga ri na mhaka leswaku va tshama kwihi. Ndzi kota ku boxa mavito ya vona ni swiyimo leswi va langutanaka na swona loko ndzi khongela.” Makwerhu wa xisati la vuriwaka Bybron loyi na yena a tshamaka eKenya u ri: “Mikarhi hinkwayo ndza tsaka loko ndzi vona mahungu ya ku humesiwa ka Bibele hi ririmi rin’wana! Mahungu lawa ma ndzi tsundzuxa leswaku Yehovha a nga na xihlawuhlawu.”

Hambi ku ri mahungu lama vulavulaka hi vamakwerhu lava xanisiwaka, na wona ma nga hi khutaza. Jackline wa le Kenya u ri: “Loko ndzi anakanyisisa hi xivindzi lexi va xi kombiseke, swi tiyise ripfumelo ra mina. Nkarhi hinkwawo ndzi ringeta ku dyondza leswi va pfuneke va tiyisela. Ndzi dyondze leswaku hambi ku ri ‘swilo switsongo’ swo tanihi xikhongelo, ku hlaya Bibele hambi ku ri ku yimbelela swi nga endla leswaku vamakwerhu va ya emahlweni va tiyisela.”

Makwerhu wa xisati wa le Costa Rica la vuriwaka Beatriz wa ma rhandza mahungu lama vulavulaka hi timhangu ta ntumbuluko. U ri: “Xiyenge xa Mahungu xi ndzi endla ndzi vona ndlela leyi nhlangano wa hina wu pfunaka vamakwerhu hi xihatla, hi nkarhi lowu faneleke ni hi ndlela ya rirhandzu. Leswi swi endla ndzi tiyiseka leswaku lowu i nhlangano wa Yehovha.”

Swa tsakisa ku kuma mahungu ya sweswinyana ya vamakwerhu emisaveni hinkwayo! Leswi a swi nga ta koteka loko a ku nga ri minyikelo ya wena eka ntirho wa misava hinkwayo, leyi yo tala ya yona yi nyikeriwaka hi ku tirhisa donate.jw.org. Ha yi khensa minyikelo ya wena.