Nhlamuselo ya le hansi

a Loko Timbhoni ta Yehovha ti ri karhi ti twarisa hi Mfumo wa Xikwembu, a ti ngheni etimhakeni ta tipolitiki kumbe ku kucetela vanhu leswaku va xandzukela vafumi va misava leyi, hambi ku ri ematikweni lama Timbhoni ti yirisiweke eka wona kumbe ti xanisiwaka. (Tito 3:1) Ematshan’weni ya sweswo, ti ringeta ku byela vanhu timhaka ta moya hi ndlela leyi akaka, leyi nga fambisaniki ni tipolitiki, hilaha Yesu ni vadyondzisiwa va yena va lembe-xidzana ro sungula va endleke hakona. Timbhoni ti ringeta ku pfuna vanhu lavanene lava voyameleke eka leswi lulameke etindhawini to hambana-hambana leti va tshamaka eka tona leswaku va landzela nkongomiso wa Bibele, ku fana ni ku va ni rirhandzu endyangwini, vutshembeki, mahanyelo lamanene ni ku tshembeka entirhweni. Xikongomelo xa tona i ku dyondzisa vanhu ku landzela misinya ya milawu leyi nga eBibeleni ni ku langutela Mfumo wa Xikwembu tanihi ntshembo wa xiviri wa vanhu.