HILTON a a rhandza ku ba xibakele. Loko a ri ni malembe ya nkombo, a a rhandza ku lwa loko a ri endhawini yo lwela eka yona xibakela ni loko a nga ri eka yona! Loko a ri exikolweni xa le henhla, a a rhendzeleka ni vanghana va yena a lava loyi a nga lwaka na yena. U ri: “A ndzi yiva, ndzi gembula, ndzi hlalela swilo swo navetisa timhaka ta masangu, ndzi xanisa vavasati ni ku rhuketela vatswari va mina. Mahanyelo ya mina a ma bihe ngopfu lerova vatswari va mina a va nga ha tshembi leswaku ndzi nga cinca. Endzhaku ka loko ndzi hete xikolo xa le henhla, ndzi sukile ekaya.”

Loko Hilton a vuya endzhaku ka malembe ya 12, vatswari va yena a va nga tshembi leswaku hi yena n’wana wa vona! A a ri munhu wo rhula, la kotaka ku tilawula a tlhela a xixima. I yini leswi nga endla leswaku a kota ku cinca? Loko a ha fambile, u sungule ku anakanyisisa hi leswi vutomi bya yena byi n’wi khomeleke swona. U tlhele a hlaya Bibele ku vona loko yi ta n’wi pfuna leswaku a cinca mahanyelo ya yena. Hilton u ri: “Ndzi hanye hi milawu ya Bibele naswona sweswo swi endle leswaku ndzi cinca mahanyelo ya mina ya khale ni ku yingisa xileriso lexi nga eka Vaefesa 6:2, 3 lexi vulaka leswaku ndzi fanele ndzi xixima vatswari va mina. I ro sungula evuton’wini bya mina ku va ndzi kuma ntsako wa xiviri naswona ndzi endla leswaku papa na mama va tsaka, ku nga ri ku va vangela nhlomulo!”

Mhaka ya Hilton yi kombisa leswaku milawu ya Bibele ya pfuna naswona ya swi kota ku hundzula vutomi bya munhu. (Vaheveru 4:12) A hi xiyeni timfanelo tin’wana leti nga ta nkoka—ku tshembeka, ku tikhoma, ku tshembeka evukatini, rirhandzu ni ndlela leyi ti nga antswisaka vutomi bya hina ha yona.

NAWU WA BIBELE: “I mani la nga ta va muendzi entsongeni wa wena [Xikwembu]? . . . Hi loyi a fambaka a nga ri na xihoxo naswona a hanyaka hi ku lulama la vulavulaka ntiyiso embilwini ya yena.”—Pisalema 15:1, 2.

VUYELO BYA KONA: Vanhu vo tala va teka ku tshembeka ku ri ka nkoka. Ku vuriwa yini hi loko munhu o vona xilo xo karhi ivi a xi yiva kambe a nga voniwi hi munhu? Hi yena a nga ta kingindziwa hi ripfalo.

Raquel loyi ntirho wa yena a wu katsa ku xava swilo, u ri: “Vanhu van’wana lava tirhaka ku xavisa va ndzi tshembise ku ndzi nyika xifumbarheriso. Va vule leswaku loko ndzi xava eka vona swilo swa khampani leyi ndzi tirhaka eka yona, mali leyi va nga ta yi hunguta yi ta va ya mina. Kambe ndzi tsundzuke ndzayo ya le Bibeleni leyi vulavulaka hi ku tshembeka kutani ndzi ala. Muthori wa mina u twe hi mhaka yoleyo naswona u ye a ndzi tshemba swinene.”

Loko Raquel a a kokiwe hi xifumbarheriso xexo, a a ta va a ve ni mali yo tala hi nkarhinyana. Kambe xana a ku ta endleka yini loko muthori wakwe a a lo swi tiva? Xana Raquel a a ta va a ha tirha kwalaho? A ku ta endleka yini hi ndhuma yakwe loko a ya lava ntirho wun’wana? Leswi a swi ri swa nkoka eka Raquel a ku ri ku va ni ripfalo leri baseke ni ndhuma leyinene. Swivuriso 22:1 yi ri: “Ku va ni vito lerinene, swi tlula ku va ni rifuwo lero tala, ku tsakeriwa, swi tlula silivhere ni nsuku.” Bibele—Mahungu Lamanene.

Jessie na yena a a tshembeka naswona sweswo swi endle leswaku a va ni vito lerinene eka muthori wakwe. Vuyelo byi ve byihi? A nga nyikiwanga xikhundlha xa ku va mininjhere ntsena, kambe a a nyikiwe ni ntshunxeko lowu engetelekeke entirhweni wakwe. Sweswo swi endle leswaku a va ni nkarhi lowu engetelekeke wo va ni nsati ni vana vakwe ni wo endla mintirho ya vugandzeri.

Loko vathori van’wana va lava vatirhi, va languta vanhu lava tiviwaka hi ku tshembeka. Hi xikombiso, mininjhere wa khampani ya le Philippines u tsalele hofisi ya kwalaho ya Timbhoni ta Yehovha, a kombela leswaku Timbhoni ti endla xikombelo xo ya tirha eka khampani yakwe. U te: Va “tirha hi matimba, va tshembeka naswona va tinyiketela entirhweni.” Hambiswiritano, ku dzuneka ku ya eka Yehovha Xikwembu, loyi a hi dyondzisaka ku ‘venga leswo biha’ kutani hi “rhandza leswinene.”—Amosi 5:15.

NAWU WA BIBELE: “Xihunguki xi humesa moya wa xona hinkwawo, kambe lowo tlhariha u tshama a rhulile ku fika emakumu.”—Swivuriso 29:11.

VUYELO BYA KONA: Swi tele swinene leswi ku tikhoma ku hi vuyerisaka ha swona! Entiyisweni, mfanelo leyi yi nga sirhelela rihanyo ra hina. Bibele yi ri: “Mbilu leyi tsakeke, yi horisa miri.” Yi tlhela yi ku: “Ku tsaka ka mbilu, swi tshungula miri.” (Swivuriso 14:30; 17:22, Bibele—Mahungu Lamanene) Kahle-kahle, ndzavisiso wu kombisa leswaku vanhu lava tshamelaka ku hlundzuka ni ku va ni xikhomela, va veka vutomi bya vona ekhombyeni ro khomiwa hi mavabyi ya mbilu. Entiyisweni, ku tikhoma ku hi pfuna eka rihanyo ni le ka swin’wana.

Cassius, loyi sweswi a nga emalembeni ya va-30, wa tsundzuka: “A ndzi rhandza timholovo, ndzi hlundzuka hi ku hatlisa naswona minkarhi yin’wana a ndzi lwa. A ndzi nga tixiximi. Kambe sweswo hinkwaswo swi cincile loko ndzi sungula ku tirhisa milawu ya Bibele. Ndzi dyondze ku lawula ku hlundzuka ka mina ni ku hlakulela ku titsongahata ni ku rivalela. Handle ka swona, a ndzi ta va ndzi ri ejele. Hakunene, ndzi titwa onge hiloko ndzi pone ku fa!”

NAWU WA BIBELE: “Vukati a byi xiximeke exikarhi ka hinkwavo, ni sangu ra vukati ri nga vi ni xilo lexi nyamisaka.”—Vaheveru 13:4.

VUYELO BYA KONA: Vanhu van’wana va teka marito lawa ma hundzeriwe hi nkarhi. Kambe wolowo a hi ntiyiso. Namuntlha ku nga tshembeki evukatini ku twisa ku vava swinene hi ndlela leyi a swi ri ha yona loko ku tsariwa Bibele.—Swivuriso 6:34, 35.

Jessie, loyi a nga nuna tlhelo tatana, u tsale a ku: “Ku tshembeka evukatini ku hi pfunile mina ni nsati wa mina leswaku vuxaka bya hina byi tiya swinene ni ku va ni ntsako. Hakunene ku tshembeka evukatini i ka nkoka swinene. Ku nga tshembeki evukatini ku endla leswaku ku tshembana ku nga vi kona” naswona swi khumba vana swinene.

Ligayaa u endle leswaku vukati byakwe byi va ekhombyeni. U ri: “Ndzi sungule ku va ni vanghana vo biha, naswona sweswo swi endle leswaku ndzi ya etiphatini ta nivusiku ni ku va ni swigangu.” Xana ndlela leyi a a hanya ha yona yi n’wi tisele ntsako? Yena ni nuna wakwe a va tshamela ku holova naswona a a nga tsakanga. U tlhele a ku: “Loko ndzi anakanya hi ndlela leyi khomisaka tingana leyi ndzi tikhomeke ha yona, ndzi swi xiyile leswaku vatswari va mina a va tiyisile loko va tshamela ku ndzi byela leswaku ‘vanghana vo biha va nghenisana ekhombyeni.’”—1 Vakorinto 15:33.

Ligaya u ya emahlweni a ku: “Loko xiyimo xi nga si biha ngopfu, ndzi tshike swiendlo swa mina swo biha kutani ndzi dyondza Bibele ni ku tirhisa leswi yi swi dyondzisaka.” Vuyelo byi ve byihi? Ligaya a nga dlayanga vukati, naswona nuna wakwe u sungule ku n’wi khoma hi musa ni ku n’wi xixima. U ri: “Bibele yi hundzule vutomi bya mina naswona a ndzi tisoli leswi ndzi tshikeke mahanyelo ya mina ya khale ni vanghana vo biha.”

NAWU WA BIBELE: “Ambalani rirhandzu, hikuva i xiboho lexi hetisekeke xa vun’we.”—Vakolosa 3:14.

VUYELO BYA KONA: Hakanyingi rirhandzu leri Bibele yi vulavula ha rona, a hi rona leri vanhu va rimbewu leri hambaneke va vaka na rona. Kambe, i rirhandzu leri fambisanaka ni timfanelo to fana ni ntwelavusiwana, ku rivalela, ku titsongahata, ku tshembeka, musa, ku rhula ni ku lehisa mbilu. (Mikiya 6:8; Vakolosa 3:12, 13) Ku hambana ni rirhandzu ra nyanyuko wa rimbewu leri helaka hi ku famba ka nkarhi, rirhandzu leri ri nga ya ri kula swinene.

Brenda, loyi se a nga ni malembe ya kwalomu ka 30 a nghenele vukati, u ri: “Rirhandzu leri vanhu lava ha ku tekanaka va vaka na rona a hi nchumu loko ri ringanisiwa ni rirhandzu leri vaka kona loko se mi tekane nkarhi wo leha.”

Sam, wanuna loyi se a nga ni malembe yo tlula 12 a tekile, u ri: “Minkarhi hinkwayo mina ni nsati wa mina hi tshama hi tsakile naswona swa hi hlamarisa loko hi vona ndlela leyi ndzayo ya Bibele yi tirhaka ha yona yi tlhela yi olova! Loko u yi tirhisa, swilo swi famba kahle. Kambe, minkarhi yin’wana a swi ndzi tikeli ku yi tirhisa, eka swiyimo swin’wana swa ndzi tikela, ku fana niloko ndzi hlundzukile swinene, loko ndzi nga anakanyeli kumbe loko ndzi karhele. Hi minkarhi yo tano, ndzi khongela eka Yehovha leswaku a ndzi pfuna ndzi herisa ku titwa koloko loku nga riki kunene. Hi ku famba ka nkarhi, ndzi angarha nsati wa mina naswona hi xihatla ndzi twa onge a ku nga humelelanga nchumu!”

Yesu Kreste u vule leswaku “vutlhari byi kombisiwa byi ri lebyi lulameke hi mintirho ya byona.” (Matewu 11:19) Hikokwalaho, Bibele hi yona yi endlaka leswaku munhu a va ni vutlhari bya xiviri. Tidyondzo ni milawu ya yona swa tirha naswona a swi hundzeriwi hi nkarhi. Swi tlula mindhavuko ni mikhuva ya vanhu. Nakambe ndlela leyi vutivi bya Bibele byi tirhaka ha yona, ya vonaka eka vanhu naswona byi kombisa leswaku byi huma eka Xihlovo lexi tlakukeke—ku nga Muvumbi wa hina Yehovha Xikwembu. Vuyelo bya kona bya vonaka loko munhu a tirhisa milawu ya yona. Hikokwalaho, Bibele ya hi rhamba leswaku hi ‘nantswa hi vona leswaku Yehovha hi lonene.’ (Pisalema 34:8) Xana u ta xi amukela xirhambo xolexo?