Eka makume ya malembe ya sweswinyana, vutomi bya mindyangu byi cince hi ku hatlisa ematikweni ya le Vupeladyambu. Ku ni minkarhi leyi vatswari a ku ri vona a va lawula emindyangwini, naswona vana a va landzela nkongomiso wa vona. Kambe sweswi emindyangwini yin’wana swilo swi cincile. Hi xikombiso, xiya swiendlakalo leswi landzelaka, hinkwaswo swi vulavula hi swilo leswi tolovelekeke.

• Loko xifanyetana xin’wana xa malembe ya mune xi ri exitolo ni mana wa xona, xi teke xilo xo tlangisa. Mana wa xona u ringete ku xi tshikisa, a ku: “U ni swo tlangisa swo tala, a hi swona?” Endzhaku u swi xiyile leswaku a a nga fanelanga a xi vutise xivutiso. Xifanyetana xi gungurile xi ku: “Kambe ndza xi lava.” Xi hlundzuke swinene, kutani mana wa xona hi ku chava leswaku xi ta kalakala, hiloko a xi tshika.

• Xinhwanyatana xa malembe ya ntlhanu xi kavanyeta tata wa xona loko a ri karhi a vulavula ni munhu lonkulu. Xi vulavulele ehenhla xi ku: “Ndzi phirhekile, ndzi lava ku ya ekaya.” Tata wa xona u yime a nga si heta ni ku vulavula, kutani a korhama a xi kombela hi rito ra le hansi a ku: “N’wananga ndzi nyike nkarhinyana.”

• James la nga ni malembe ya 12 u tlhele a lumbetiwa hi leswaku u delela mudyondzisi wakwe wa xisati. Tata wakwe u hlundzukele mudyondzisi. U byele James a ku: “Mudyondzisi wa wena u tshamela ku ku karhata, ndzi ta ya ndzi ya n’wi vika eka komiti ya xikolo.”

Swiendlakalo leswi nga laha henhla ko va mhaka leyi ngo anakanyiwa, kambe swa endleka. Swi kombisa xiphiqo xa xiviri lexi humelelaka emakaya laha vatswari va tiyiselelaka mavulavulelo lama nga riki manene ya vana, va va nyika leswi va swi lavaka ni ku va sirhelela loko va endle swo biha. Buku leyi nge, The Narcissism Epidemic yi ri: “I mhaka leyi tolovelekeke ku vona vatswari va tshika vana va lawula emindyangwini. Khalenyana vana a va swi tiva leswaku a hi vona va lawulaka ekaya.”

I ntiyiso leswaku vatswari vo tala va tikarhatela ku dyondzisa vana va vona milawu leyinene ya mahanyelo, ku nga ri hi ku va vekela xikombiso lexinene ntsena, kambe va tlhela va va nyika ndzayo leyi nga ni matimba hi ndlela ya rirhandzu loko swi laveka. Ku hambana ni sweswo, The Narcissism Epidemic yi ri: “Vatswari lava vonaka nkoka wo endla tano, va endla leswi hambaneke ni leswi endliwaka hi ku ya hi ndhavuko.”

Ha yini swilo se swi ri hi ndlela leyi? Ha yini se swi tika ku tshinya vana?

Vulawuri Bya Vatswari Bya Hunguteka

Van’wana va vula leswaku ku hunguteka ka vulawuri bya vatswari ku sungule hi va-1960, loko lava vuriwaka vativi va khutaza vatswari leswaku va nga hatli va hlundzukisiwa hi vana. Va te: ‘Vana munghana, ku nga ri munhu la vonakaka a ri ni vulawuri, ku va bumabumela swa antswa ku ri ni ku va tshinya. Ematshan’weni yo lulamisa swihoxo, languta ntsena loko va endle leswinene. Vativi va kombisa leswaku ematshan’wini yo ringanisela exikarhi ka ku bumabumela ni ku tshinya, ku solasola vana ku nga va heta matimba, naswona ku nga endla leswaku va hlundzukela vatswari va vona loko va ri karhi va kula.

Ku nga ri khale vativi va mahanyelo ya vana va tlhele va vulavula hi ndlela leyi ku titshemba ku nga ka nkoka ha yona. A swi tikomba onge ku kumiwe ndlela yo kurisa ni ku khathalela vana naswona ndlela ya kona a yi ku: Endla leswaku vana va wena va titwa va ri vanhu lavanene. I swa nkoka ku endla leswaku va titshemba. Vativi lava va hundzelete swilo hi ku byela vatswari hi nkoka wa ku titshemba va ku: ‘Papalatani ku tirhisa marito lama nga riki manene yo tanihi lama nge, e-e na bihile.’ ‘Tshamani mi ri karhi mi byela vana va n’wina leswaku i va nkoka nileswaku va nga va xin’wana ni xin’wana lexi va lavaka ku va xona.’ Swi tikomba onge ku va munhu a titwa a ri kahle i swa nkoka ngopfu ku tlula ku va munhu a va lonene.

Eku heteleleni, van’wana va vula leswaku minhlangano leyi khutazaka ku titshemba a yi va pfunanga vana kambe yi endla leswaku va titwa va ri ni vulawuri. Buku leyi nge, Generation Me yi ri: ‘Minhlangano leyi yi tlhele yi siya vantshwa’ “va nga lunghekelanga swilo leswi va nga ta ka va nga koti ku swi balekela evuton’wini ni ku tsandzeka eka swilo swo karhi.” Tatana un’wana la tshahiweke eka buku leyi u ri: “Vanhu lava nga entirhweni a va nge khathali hi ku titshemba ka wena. . . . Loko u tisa xiviko lexi nga riki xinene eka muthori entirhweni, a nge vuli leswaku, ‘ndzi tsakela leswi u swi endlaka.’ Ku pfumelela vana leswaku va tilawula swa va onha swinene.”

Mavonelo Lama Cincacincaka

Eka makume ya malembe lama hundzeke, tindlela to kurisa vana ti kombise ku cincacinca ka mavonelo ya vanhu. Mudyondzisi Ronald G. Morrish u tsale a ku: “Ndzayo yi tshamela ku cinca. “Yi kombisa ku cinca loku nga kona evanhwini.”a Swa olova ku va vatswari va va hi ndlela leyi Bibele yi va hlamuselaka ha yona loko yi ku: “Hi ndlengandlengisiwa hi magandlati ni ku yingayingisiwa hi mheho yin’wana ni yin’wana ya ku dyondzisa.”—Vaefesa 4:14.

Swi le rivaleni leswaku sweswi ku tshinya hi ndlela leyi ku vulavuriweke ha yona laha henhla, ku ve ni vuyelo byo biha. Ku hungute vulawuri bya vatswari ku tlhela ku siya vana va nga ri na nkongomiso lowunene lowu nga ta va pfuna leswaku va ta kota ku endla swiboho leswinene ni ku langutana ni vutomi hi ku titshemba.

Xana ku ni ndlela yo antswa?

I NTIYISO leswaku ku va mutswari a hi matlangwana. Kambe loko n’wana u nga n’wi tshinyi loko swi fanela, swi ta endla leswaku swi tika ngopfu ku n’wi kurisa. Ha yini? Hikuva loko vana u nga va tshinyi (1) va ya emahlweni va lava ku lawula naswona sweswo swi karharisa vatswari naswona (2) vatswari va hetelela va nga ha ringaniseli ivi vana va pfilunganyeka.

Kambe loko vatswari va ri ni rirhandzu, va ringanisela loko va tshinya n’wana, sweswo swi ta endla leswaku a va ni mahanyelo lamanene. Swi ta tlhela n’wi pfuna leswaku a titwa a sirhelelekile a tlhela a kula a ri munhu loyi a nga ni mahanyelo lamanene. Kambe, u nga wu kuma kwihi nkongomiso lowu pfunaka wa ku tshinya vana va wena?

Nkoka Wa Milawu Ya Bibele

Vatsari va magazini lowu, ku nga Timbhoni ta Yehovha, va tiyiseka leswaku i Bibele hikuva ya vula leswaku yi “pfuna ku dyondzisa, ku tshinya, ku lulamisa swilo, ku laya eku lulameni.” (2 Timotiya 3:16) Bibele a ko va buku ntsena le yi ku dyondzisaka ndlela ya ku va mutswari lonene. Xiya swikombiso swin’wana.

BIBELE YI RI: “Vuphukuphuku byi tsimbiwe embilwini ya mufana.”—Swivuriso 22:15.

Hambileswi vana va anakanyelaka ni ku va ni musa, va tlhela va va ni mukhuva wa ku endla swilo swa vuphukuphuku. Hikwalaho, vana va fanele va tshinyiwa. (Swivuriso 13:24) Loko u tsundzuka sweswo, swi ta ku pfuna leswaku u hetisisa vutihlamuleri bya wena tanihi mutswari.

BIBELE YI RI: “U nga tshiki ku nyika mufana ndzayo.”—Swivuriso 23:13.

A wu fanelanga u chava leswaku ku tshinya vana va wena swi ta va onha kumbe swi va endla va ku venga loko se va kurile. Loko u tshinya vana va wena hi rirhandzu, swi ta va pfuna leswaku va dyondza ku amukela ku lulamisiwa hi ku titsongahata—sweswo swi ta va pfuna hambiloko se va kurile.—Vaheveru 12:11.

BIBELE YI RI: “Xin’wana ni xin’wana lexi munhu a xi byalaka, u ta tlhela a tshovela xona.”—Vagalatiya 6:7.

Hi ntumbuluko, vatswari va lava ku sirhelela vana va vona. Hambiswiritano, va fanele va ringanisela. A va fanelanga va lava ku tsakisa vana va vona hi ku va phula ekhombyeni loko va endle swo biha kumbe va va yimelela eka mudyondzisi kumbe munhu un’wana lonkulu loko va endle xihoxo. Kambe vanhu volavo mi fanele mi va teka tanihi vanghana. Loko mi endla tano, mi va mi dyondzisa vana va n’wina leswaku va xixima vulawuri—ku katsa ni vulawuri bya n’wina tanihi vatswari.—Vakolosa 3:20.

BIBEKE YI RI: “Mufana la tshikiweke a ntshunxekile u ta n’wi khomisa tingana mana wakwe.”—Swivuriso 29:15.

I ntiyiso leswaku vatswari a va fanelanga va khoma vana va vona hi voko ra nsimbi kambe sweswo a swi vuli leswaku va fanele va debyisa voko va pfumelela xin’wana ni xin’wana. Buku leyi nge The Price of Privilege yi ri: “Vana lava vatswari va vona va debyisaka voko, a va na mhaka ni leswaku vatswari va vona hi vona va nga ni vulawuri ekaya.” Loko wena tanihi mutswari u nga byi kombisi vulawuri bya wena, n’wana u ta anakanya leswaku hi yena a lawulaka ekaya. U ta endla swiboho swa vuphukuphuku leswi nga ta n’wi nghenisa ekhombyeni naswona sweswo swi ta ku twisa ku vava.—Swivuriso 17:25; 29:21.

BIBELE YI RI: “Wanuna u ta . . . namarhela nsati wakwe, kutani lavambirhi va ta va nyama yin’we.”—Matewu 19:5.

Hi ku ya hi Bibele, wanuna ni wansati va fanele va sungula va tekana va nga si va ni vana naswona va fanele va ya mahlweni va tshama swin’we hambiloko vana se va kurile kumbe se va sukile ekaya. (Matewu 19:5, 6) Sweswo swi vula leswaku munhu u sungula a va nuna kumbe nsati ivi a va mutswari. Loko n’wana wa wena a nga swi tivi sweswo, u ta ‘tiehleketelela ku tlula mpimo lowu a faneleke ku tiehleketelela ha wona.’ (Varhoma 12:3) Loko endyangwini vana va tiendlela ku rhandza ka vona, swi nga endla leswaku vukati byi nga tsakisi.

Leswi Nga Pfunaka Vatswari

Leswaku u wu endla kahle ntirho wa wena tanihi mutswari, ku tshinya ka wena ku fanele ku fambisana ni leswi landzelaka:

Vanani ni rirhandzu. “Mi nga dyisi vana va n’wina mbitsi, leswaku va nga heli mbilu.”—Vakolosa 3:21.

Mi nga cincacinci. “Ina wa n’wina a a ve Ina, E-e wa n’wina a va E-e.”—Matewu 5:37.

Mi ringanisela. “Ndzi ta ku lulamisa hi mpimo lowu faneleke.”—Yeremiya 30:11.a