“Mfumo Wa Wena A Wu Te”

Yehovha u tshembise a ku: ‘Ku rila, switlhavi, vuvabyi kumbe rifu a swi nge he vi kona. Ndzi ta sula mihloti hinkwayo ematihlweni ya vona. Swilo hinkwaswo swo biha leswi endlekeke enkarhini lowu hundzeke a va nge he swi tsundzuki.’

Yehovha u veke Adamu na Evha entangeni wa Edeni leswaku va hanya hi ku rhula ni ku tshama va tsakile. A va fanele va gandzela Tata wa vona wa le tilweni va tlhela va tata misava hi vana va vona. Adamu na Evha a va n’wi yingisanga Yehovha, kambe xikongomelo xakwe a xi cincanga. Ebukwini leyi, hi swi xiyile leswaku swilo hinkwaswo leswi Xikwembu xi swi tshembisaka swa hetiseka. Mfumo wa xona wu ta tisa mikateko yo tsakisa emisaveni, hilaha xi tshembiseke Abrahama hakona.

Ku nga ri khale, Sathana, madimona yakwe ni vanhu hinkwavo vo homboloka va ta herisiwa. Vanhu hinkwavo lava nga ta pona va ta gandzela Yehovha. A hi nge he vabyi kumbe ku fa. Ematshan’weni ya sweswo, siku rin’wana ni rin’wana loko hi pfuka hi ta va hi ri ni matimba ni ku tlhela hi tsakela vutomi. Misava yi ta va paradeyisi. Vanhu hinkwavo va ta va ni swakudya leswinene ni makaya lama sirhelelekeke. Vanhu va ta va ni musa naswona a va nge vi ni tihanyi. Hi ta tshama ni swiharhi swa nhova naswona a hi nge swi chavi.

Swi ta tsakisa swinene loko Yehovha a sungula ku pfuxa vanhu lava feke. Hi ta amukela vanhu lava feke khale vo tanihi Avele, Nowa, Abrahama, Sara, Muxe, Rhuti, Estere na Davhida. Hi ta pfunana na vona eku endleni ka leswaku Misava yi va paradeyisi. Mikarhi hinkwayo hi ta tiphina hi ku endla mitirho yo tala.

Yehovha u lava leswaku u va kona. U ta ya u n’wi tiva swinene ku tlula eku sunguleni. Siku ni siku, a hi tshineleni swinene eka Yehovha, sweswi ni hilaha ku nga heriki!