Xana u tshama u lava ku hlaya Bibele kambe u titwa ku fana ni vanhu lava boxiweke laha henhla? Vo tala va teka ku hlaya Bibele ku ri ndzhwalo. Ku vuriwa yini loko ku ri leswaku ku hlaya Bibele swi nga ku pfuna leswaku u va ni ntsako ni ku hanya vutomi lebyi enerisaka? Ku ni tindlela tin’wana leti nga ku pfunaka leswaku u tsakela ku hlaya Bibele. Xana u nga swi tsakela ku twa tindlela leti Bibele yi nga ku pfunaka ha tona?

Twana leswi vanhu van’wana lava pfunekeke hi ku hlaya Bibele va swi vulaka.

Ezekiel, wa malembe ya kwalomu ka 20, u ri: “Khale a ndzi hanya vutomi lebyi nga riki na xikongomelo, kambe ku hlaya Bibele swi ndzi pfune swinene evuton’wini. Yi ni switsundzuxo leswi pfunaka, leswi ndzi nga swi tirhisaka siku ni siku.”

Frieda, ku nga nhwanyana wa malembe ya kwalomu ka 20, u ri: “Khale a ndzi ri xipandzanhloko, kambe Bibele yi ndzi pfunile leswaku ndzi kota ku tikhoma. Yi tlhele yi ndzi pfuna leswaku ndzi kota ku hanyisana ni vanhu van’wana, naswona sweswi ndzi ni vanghana vo tala.”

Eunice, loyi a nga ni malembe ya kwalomu ka 50, loko a vulavula hi Bibele, u ri: “Yi ndzi pfuna leswaku ndzi antswisa vumunhu bya mina ni ku tshika mikhuva yo biha.”

Ku fana ni vanhu lava ha ha ku vulavulaka ha vona, swin’we ni van’wana va timiliyoni lava Bibele yi va pfuneke, ku yi hlaya swi nga ku pfuna leswaku u tiphina evuton’wini. (Esaya 48:17, 18) Yi nga tlhela yi ku pfuna leswaku u (1) Endla swiboho leswinene, (2) u kuma vanghana lavanene, (3) u kota ku langutana ni ntshikilelo, (4) naswona xa nkoka swinene u dyondza ntiyiso malunghana ni Xikwembu. Nkongomiso lowu nga eBibeleni wu huma eka Xikwembu, hikokwalaho a wu nge tisoli loko u wu yingisa. Xikwembu a xi nge pfuki xi hi hambukisile.

Xa nkoka swinene i ku kota ku sungula ku yi hlaya. Hi swihi swilo leswi nga ku pfunaka leswaku u kota ku sungula ku yi hlaya u tlhela u tiphina evuton’wini?

Hi tihi tindlela leti nga ku pfunaka leswaku u tsakela ku hlaya Bibele? Xiya swiringanyeto swa ntlhanu leswi pfuneke vanhu vo tala.

Lava ndhawu leyinene yo hlayela eka yona. Kuma ndhawu leyi nga riki na pongo. Leswaku u dzikisa mianakanyo ya wena eka leswi u swi hlayaka, papalata swilo leswi nga ku kavanyetaka. Loko u hlayela endhawini leyi nga ni rivoni leri vonaka kahle naswona u kota ku beriwa hi moya, u ta tsakela rungula leri u ri hlayaka.

Vana ni langutelo lerinene. Leswi Bibele yi humaka eka Tata wa hina wa le tilweni, u ta vuyeriwa swinene loko u titsongahata ku fana ni n’wana lontsongo loyi a tiyimiseleke ku dyondza eka mutswari wakwe. Papalata langutelo leri hoxeke hi Bibele ivi u pfumelela Xikwembu leswaku xi ku dyondzisa.—Pisalema 25:4.

Khongela u nga si sungula ku yi hlaya. Leswi Bibele yi humaka eka Xikwembu, a swi hlamarisi leswi hi lavaka mpfuno wa xona leswaku hi ta kota ku yi twisisa. Yehovha u tshembisa leswaku u ta va “nyika moya lowo kwetsima lava n’wi kombelaka!” (Luka 11:13) Moya lowo kwetsima wu nga ku pfuna leswaku u twisisa Bibele. Hi nkarhi lowu faneleke, wu ta ku pfuna leswaku u kota ku twisisa “swilo leswi enteke swa Xikwembu.”—1 Vakorinto 2:10.

Hlaya hi xikongomelo xo twisisa. U nga jaheli ku heta. Anakanyisisa hi leswi u swi hlayaka. Tivutise swivutiso swo tanihi leswi: ‘Hi tihi timfanelo leti ndzi ti xiyaka eka munhu loyi ndzi hlayaka ha yena? Ndzi nga ti tirhisa njhani evuton’wini bya mina?’

Tivekele tipakani to karhi. Leswaku u vuyeriwa eka ku hlaya ka wena ka Bibele, tivekele pakani yo dyondza swilo leswintshwa leswi nga ta ku pfuna evuton’wini. U nga ha tivekela tipakani to tanihi leti landzelaka: ‘Ndzi lava ku dyondza swo tala hi Xikwembu.’ ‘Ndzi lava ku antswisa vumunhu bya mina, ku va nuna kumbe nsati lonene.’ Hlaya rungula ra Bibele leri nga ta ku pfuna leswaku u fikelela tipakani ta wena.a

Swiringanyeto leswi swa ntlhanu, swi ta ku pfuna leswaku u kota ku sungula ku hlaya Bibele. Xana u nga endla njhani leswaku u swi tsakela swinene ku hlaya Bibele? Xihloko lexi landzelaka xi ta ku nyika swiringanyeto leswi nga ku pfunaka.

Xana ku hlaya Bibele swa phirha kumbe swa tsakisa? Swi titshege hi ndlela leyi u yi hlayaka ha yona. A hi xiyeni swilo leswi nga ku pfunaka leswaku u tsakela ku yi hlaya.

Hlawula Bibele leyi tsariweke hi ririmi leri u kotaka ku ri twisisa kahle. Loko u hlaya rungula leri tsariweke hi marito yo tika kumbe hi ndlela ya xikhale, swi ta endla leswaku u nga ri tsakeli rungula leri u ri hlayaka. Hikokwalaho, kuma Bibele leyi tsariweke hi ririmi leri u kotaka ku ri twisisa kahle naswona yi nga ta ku fikelela mbilu. Yi fanele yi va yi hundzuluxeriwe hi vukheta yi tlhela yi pakanisa.a

Tirhisa thekinoloji. Namuntlha Bibele ya kumaka ni le ka Internet, u nga ha yi kopa hi khompyuta, tablet kumbe foni leswaku u ta tihlayela yona. Tibibele tin’wana ti ni switirhisiwa leswi nga ku pfunaka leswaku u kota ku vona tindzimana tin’wana ta Tibibele tin’wana kumbe u pimanisa ndlela leyi ti hundzuluxeriweke ha yona. Loko u tsakela ku yingisela rungula ra Bibele leri rhekhodiweke, ra kumeka hi tindzimi tin’wana eka Internet. Vanhu vo tala va tsakela ku yingisela Bibele loko va tirhisa swo famba swa mani na mani, loko va ri karhi va hlantswa kumbe va endla mintirho yin’wana leyi endlaka leswaku va kota ku yingisela. Hlawula ndlela yin’we leyi u nga kotaka ku yi tirhisa.

Tirhisa swilo leswi nga ku pfunaka ku twisisa Bibele. Ku tirhisa swilo leswi nga ku pfunaka leswaku u hlaya Bibele swi nga ku pfuna leswaku u tsakela ku yi hlaya. Bibele yi ni mimepe ya tindhawu leti ku vulavuriwaka ha tona eBibeleni, leyi nga ku pfunaka leswaku u kota ku vona tindhawu leti u hlayaka ha tona. Swihloko leswi fanaka ni leswi nga eka magazini lowu kumbe leswi nga ehansi ka nhlokomhaka leyi nge “Tidyondzo Ta Bibele,” eka website ya jw.org/ts, swi nga ku pfuna leswaku u twisisa Bibele.

Ringeta tindlela to hambanahambana. Loko u vona onge swi ta ku tikela ku hlaya Bibele ku sukela eku sunguleni, hlawula xiphemu xo karhi xa yona lexi ku tsakisaka leswaku u sungula hi xona. Loko u lava ku hlaya hi vanhu lava dumeke eBibeleni, ringeta ku lava matsalwa lawa ma vulavulaka hi vona. Eka bokisi leri nge, “Tiva Vanhu Lava Ku Vulavuriwaka Hi Vona eBibeleni,” ku ni swikombiso swa ndlela leyi u nga swi endlaka ha yona sweswo. Kumbexana u nga ha yi hlaya hi ku ya hi tinhlokomhaka, kumbe hi ku landzelana ka ndlela leyi timhaka ti endlekeke ha yona. Hlawula yin’we eka tindlela leti, leyi u vonaka onge yi nga ku pfuna.

Bibele a yi fani ni tibuku tin’wana. Yi ni nkongomiso lowu humaka eka Muvumbi wa hina. (2 Timotiya 3:16) Rungula ra yona ri nga hi pfuna swinene evuton’wini. Entiyisweni, Bibele yi ri: “Rito ra Xikwembu ra hanya naswona ri ni matimba.” (Vaheveru 4:12) Yi ni matimba yo antswisa vutomi bya hina hi tindlela timbirhi ta nkoka, yi nyikela nkongomiso wa ndlela leyi hi nga hanyaka ha yona sweswi ni ku hi pfuna leswaku hi tiva Xikwembu swin’we ni switshembiso swa xona.—1 Timotiya 4:8; Yakobo 4:8.

Yi nga antswisa vutomi bya wena sweswi. Bibele yi nga ku pfuna etimhakeni hinkwato ta vutomi. Yi nga ku nyika nkongomiso lowu nga ku pfunaka malunghana ni leswi landzelaka.

• Ku va ni vuxaka lebyinene ni vanhu van’wana. —Vaefesa 4:31, 32; 5:22, 25, 28, 33.

• Rihanyo lerinene.—Pisalema 37:8; Swivuriso 17:22.

• Mahanyelo lamanene.—1 Vakorinto 6:9, 10.

• Ndlela ya ku tihanyisa.—Swivuriso 10:4; 28:19; Vaefesa 4:28.a

Vatekani van’wana lava ha riki vantshwa va le Asia, va wu tlangele swinene nkongomiso lowu va wu kumeke eBibeleni. Ku fana ni vanhu vo tala lava ha ku tekanaka, a swi va tikela ku tolovelana ni ku vulavurisana kahle. Kambe va sungule ku hanya hi ku pfumelelana ni leswi a va swi hlaya eBibeleni. Xana vuyelo byi ve byihi? Nuna wa kona Vicent, u ri: “Leswi ndzi swi hlayeke eBibeleni swi ndzi pfunile leswaku ndzi kota ku langutana ni swiphiqo evukatini bya hina. Ku tirhisa milawu ya Bibele, swi endle leswaku hi va ni ntsako evukatini bya hina.” Nsati wakwe Annalou, u ri: “Ku hlaya hi swikombiso swa vanhu lava nga eBibeleni swi hi pfunile swinene. Sweswi ndzi titwa ndzi tsakile ndzi tlhela ndzi eneriseka evukatini bya hina.”

Hi tiva Xikwembu. Vicent a nga vulavulanga hi ndlela leyi a pfunekeke ha yona emhakeni ya vukati ntsena, kambe u tlhele a ku: “Ku hlaya Bibele swi endle leswaku ndzi va ni vuxaka lebyinene na Yehovha ku tlula eku sunguleni.” Vicent u boxe mhaka ya nkoka swinene, ya leswaku Bibele yi nga ku pfuna leswaku u va munghana wa Xikwembu. Loko na wena u endla tano, Xikwembu xi ta ku kongomisa naswona u ta tlhela u xi tiva ku antswa tanihi munghana wa wena. U ta swi xiya leswaku xi ku tshembisa vumundzuku lebyinene, ku nga nkarhi lowu u nga ta tiphina hi ‘vutomi bya xiviri’ hilaha ku nga heriki. (1 Timotiya 6:19) A yi kona buku yin’wana leyi tshembisaka swilo leswi.

Loko u hambeta u hlaya Bibele, na wena u ta vuyeriwa swinene hi ku va u antswisa vutomi bya wena ni ku va u tiva Xikwembu. Hambiswiritano, minkarhi yin’wana loko u ri karhi u hlaya Bibele, swi ta endleka leswaku u pfa u va ni swivutiso swo tala. Loko sweswo swi endleka, tsundzuka ndhunankulu ya Muetopiya, leyi hanyeke eka malembe ya 2 000 lama hundzeke. A a yi ri ni swivutiso swo tala malunghana ni Bibele. Loko yi vutisiwa leswaku ya swi twisisa swilo leswi a yi ri eku swi hlayeni, yi te: “Xana ndzi nga swi tivisa ku yini, handle ka loko ndzi kongomisiwa hi un’wana?”b Kutani yi pfumele leswaku Filipi a yi pfuna, loyi a ri mudyondzisi wa Bibele naswona a a ri un’wana wa vadyondzisiwa va Yesu vo sungula. (Mintirho 8:30, 31, 34) Hilaha ku fanaka, na wena loko u lava ku tiva leswi engetelekeke hi Bibele, hi kombela u endla xikombelo eka website ya www.jw.org/ts, kumbe u tsalela eka adirese ya tiko ra ka n’wina leyi kumekaka eka magazini lowu. U nga tlhela u kombela Timbhoni ta Yehovha ta laha u tshamaka kona, kumbe u ya eHolweni ya tona. Sungula ku hlaya Bibele namuntlha u tlhela u yi pfumelela leswaku yi ku kongomisa evuton’wini bya wena.