Elizabeta a a ri ni xaka leri vuriwaka Mariya, leri a a ri tshama emutini wa Nazareta eGaleliya. Mariya a a tshembisiwe ku tekiwa hi Yosefa loyi a a ri muvatli. Loko Elizabeta a ri ni tin’hweti ta tsevu a tikile, ntsumi Gabriyele yi humelele eka Mariya. Yi te: ‘Xewani, Mariya! Yehovha u ku tsakerile swinene.’ Mariya a a nga swi twisisi leswi Gabriyele a a swi vula. Hiloko Gabriyele a ku: ‘U ta tika naswona u ta veleka n’wana wa jaha, u fanele u n’wi thya vito ra Yesu. U ta va Hosi. Mfumo wakwe wu ta va wa hilaha ku nga heriki.’

Mariya u te: ‘Kambe a ndzi si tshama ndzi etlela ni wanuna. Kutani ndzi ta n’wi kumisa ku yini n’wana?’ Gabriyele u te: ‘Yehovha a nga tsandziwi hi nchumu. Moya lowo kwetsima wu ta endla leswaku u veleka n’wana wa jaha. Xaka ra wena Elizabeta na yena u tikile.’ Hiloko Mariya a ku: ‘Ndzi hlonga ra xisati ra Yehovha. Onge swi nga endleka hilaha u vuleke hakona.’

Mariya u endzele Elizabeta etikweni leri a ri ri ni tintshava. Elizabeta u twe n’wana a tshukatshuka ekhwirini rakwe loko Mariya a n’wi xeweta. Moya lowo kwetsima wu susumetele Elizabeta ku vula a ku: ‘Mariya, Yehovha u ku katekisile. I nkateko ku endzeriwa hi mana wa Hosi ya mina.’ Mariya u te: ‘Ndzi dzunisa Yehovha hi mbilu ya mina hinkwayo.’ Mariya u tshame na Elizabeta tin’hweti tinharhu, endzhaku ka sweswo u tlhelele eNazareta.

Loko Yosefa a twa leswaku Mariya u tikile, u lave ku n’wi tshika. Kambe ntsumi yi humelele eka yena enorhweni ivi yi ku: ‘U nga chavi ku n’wi teka. A nga dyohanga nchumu.’ Yosefa u teke Mariya a va nsati wakwe ivi va tshama swin’we.

Khezari Awugusto, mufumi wa le Rhoma u lerise leswaku Vayuda hinkwavo va tlhelela ka rikwavo leswaku va ya tsarisiwa. Kutani Yosefa na Mariya va teke riendzo va ya eBetlehema, laha ndyangu wa ka va Yosefa a wu huma kona. Nkarhi wa leswaku Mariya a veleka se a wu fikile.

Loko va fika eBetlehema, va kume ndhawu yo tshama eka yona exivaleni. Mariya u veleke n’wana wakwe Yesu kwalaho. U n’wi phutsele hi tinguvu ivi a n’wi lata endhawini leyi swifuwo swi dyelaka eka yona.

Varisi van’wana a va ri enhoveni nivusiku ekusuhi ni le Betlehema, va ri karhi va rindza tinyimpfu ta vona. Hi xitshuketa, ntsumi yi fike yi yima emahlweni ka vona naswona a va rhendzeriwe hi ku vonakala loku humaka eka Yehovha. Varisi volavo a va chuhile, kambe ntsumi yi te: ‘Mi nga chavi. Ndzi mi khomele mahungu yo tsakisa. Ku velekiwe Mesiya eBetlehema namuntlha.’ Hi nkarhi wolowo, ku humelele tintsumi to tala emapapeni, ti ri karhi ti ku: ‘A ku dzunisiwe Xikwembu etilweni naswona a ku ve ni ku rhula emisaveni.’ Kutani tintsumi teto ti nyamalarile. Varisi volavo va endle yini?

Va nambe va ku: ‘A hi yeni eBetlehema sweswi.’ Va hatle va famba kutani va fika va kuma Yosefa na Mariya exivaleni ni n’wana wa vona loyi a ha ku velekiwa.

Hinkwavo lava tweke leswi ntsumi yi swi byeleke varisi va hlamarile. Mariya u anakanyisise hi marito ya ntsumi yoleyo naswona a nga ma rivalanga. Varisi volavo va tlhelele laha a ku ri ni tinyimpfu ta vona, va khensa Yehovha hikwalaho ka leswi va swi voneke ni leswi va swi tweke.

Etikweni ra le vuxeni bya Israyele a ku tshama vanhu lava a va tshemba leswaku tinyeleti ti nga swi kota ku va kongomisa. Hi vusiku byin’wana, vavanuna van’wana lava humaka eVuxeni va vone nchumu lowu a wu fana ni nyeleti yo vangama wu ri karhi wu famba empfhukeni, hiloko va wu landzelela. Nchumu wolowo lowu a wu fana ni nyeleti wu va yise eYerusalema. Vavanuna volavo va sungule ku vutisa vanhu va ku: ‘U kwihi n’wana loyi a nga ta va hosi ya Vayuda? Hi te laha leswaku hi ta n’wi khinsamela.’

Loko Heroda, hosi ya le Yerusalema a twa hi ta hosi leyi leyintshwa, u sungule ku karhateka. U vutise vaprista lavakulu a ku: ‘Xana hosi leyi yi ta velekeriwa kwihi?’ Hiloko va ku: ‘Vaprofeta va vule leswaku yi ta velekiwa eBetlehema.’ Kutani Heroda u vitane vavanuna lava humaka eVuxeni ivi a ku: ‘Fambani mi ya lava n’wana loyi eBetlehema. Loko mi n’wi kumile mi vuya mi ta ndzi vikela leswaku u kwihi. Na mina ndzi lava ku n’wi khinsamela.’ Kambe a a ri ku hembeni.

Nchumu lowu a wu fana ni nyeleti wu tlhele wu sungula ku famba. Vavanuna volavo va wu landzelerile ku kondza wu ya va fikisa eBetlehema. Wu fike wu yima ehenhla ka yindlu hiloko vavanuna volavo va nghena endlwini yoleyo. Va kume Yesu a ri ni mana wakwe Mariya. Va khinsamele n’wana yoloye ivi va n’wi nyika tinyiko ta nsuku, murhi wa risuna ni mira. Xana Yehovha a ku ri yena loyi a rhume vavanuna volavo leswaku va lava Yesu? Doo!

Vusiku byebyo, Yehovha u byele Yosefa enorhweni a ku: ‘Heroda u lava ku dlaya Yesu. Teka nsati wa wena ni n’wana mi balekela Egipta. Mi fanele mi tshama kona ku fikela loko ndzi ta mi byela leswaku mi nga tlhelela endzhaku.’ Yosefa u teke ndyangu wakwe va balekela Egipta hi nkarhi wolowo.

Yehovha u byele vavanuna va le Vuxeni leswaku va nga ha tlheleli eka Heroda. Heroda u hlundzukile loko a xiya leswaku vavanuna va le Vuxeni a va ha vuyi. Leswi a nga n’wi kumangiki Yesu, u lerise leswaku vana va vafana hinkwavo va le Betlehema lava a va ringana na Yesu hi malembe va dlayiwa. Kambe Yesu a a hlayisekile Egipta.

Hi ku famba ka nkarhi Heroda u file. Kutani Yehovha u byele Yosefa a ku: ‘U nga tlhelela ka rikwenu.’ Yosefa, Mariya na Yesu va tlhelele eIsrayele naswona va fike va tshama emutini wa Nazareta.

Yosefa na Mariya a va tshama eNazareta swin’we na Yesu ni vana van’wana va vona va majaha ni va vanhwanyana. Yosefa a a wundla ndyangu wakwe hi ku endla ntirho wo vatla, naswona u dyondzise ndyangu wakwe hi Yehovha ni hi Nawu wakwe. Nkarhi ni nkarhi ndyangu wakwe a wu ya esinagogeni leswaku wu ya gandzela naswona a wu ya Yerusalema leswaku wu ya tlangela Paseka lembe ni lembe.

Loko Yesu a ri ni malembe ya 12, ndyangu wa ka vona wu teke riendzo ro leha wu ya eYerusalema hilaha a wu tolovele ku endla hakona. Emutini wa Yerusalema a ku ri vanhu vo tala lava a va tele ku ta tlangela Paseka. Loko Paseka yi herile, Yosefa na Mariya va teke riendzo va tlhelela ekaya, va anakanya leswaku Yesu a a ri exikarhi ka ntlawa lowu a va famba na wona. Kambe loko va n’wi lava exikarhi ka maxaka ya vona a va n’wi kumanga.

Va tlhelele eYerusalema naswona va hete masiku manharhu va ri karhi va n’wi lava. Eku heteleleni va ye etempeleni. Va kume Yesu a tshame ni vadyondzisi, a va yingisele hi vukheta a tlhela a va vutisa swivutiso leswi twalaka. Vadyondzisi volavo va hlamarisiwe hi Yesu lerova va sungule ku n’wi vutisa swivutiso. Va tlhele va hlamarisiwa hi tinhlamulo takwe. A va swi vona leswaku Yesu a a wu twisisa Nawu wa Yehovha.

Yosefa na Mariya a va karhatekile swinene. Mariya u te: ‘N’wananga, a hi lavana na wena hinkwakonkwako! A wu ri kwihi?’ Yesu u te: ‘Xana a mi nga swi tivi leswaku ndzi fanele ku va endlwini ya Tatana?’

Yesu u muke ni vatswari vakwe eNazareta. Yosefa u dyondzise Yesu ntirho wo vatla. U anakanya leswaku Yesu a a ri munhu wa muxaka muni loko a ha ri xifanyetana? Loko Yesu a ri karhi a kula, u ye a va ni vutlhari naswona a a tsakeriwa hi Xikwembu ni vanhu.

Yohane, n’wana wa Zakariya na Elizabeta u ve muprofeta loko a kurile. Yehovha u tirhise Yohane ku dyondzisa vanhu leswaku Mesiya u le ku teni. Kambe ematshan’weni yo dyondzisa emasinagogeni kumbe emadorobeni, Yohane a a chumayela emananga. Vanhu a va ta va huma eYerusalema ni le tikweni hinkwaro ra Yudiya leswaku va ta dyondzisiwa hi Yohane. U va dyondzise leswaku loko va lava ku tsakisa Xikwembu, a va fanele va tshika ku endla swilo swo biha. Endzhaku ka loko va n’wi yingisile, vo tala va hundzukile eswidyohweni swa vona naswona Yohane u va khuvule eNambyeni wa Yordani.

Yohane a a hanya vutomi byo olova. A a ambala swiambalo leswi endliweke hi voya bya kamela a tlhela a dya tinjiya ni vulombe bya nhova. Vanhu a va lava ku tiva swo tala hi Yohane. Hambi ku ri Vafarisi lava tikukumuxaka ni Vasaduki va tile leswaku va ta n’wi vona. Yohane u te: ‘Mi fanele mi cinca mahanyelo ya n’wina kutani mi hundzuka. Mi nga ehleketi leswaku mi hlawulekile hikwalaho ka leswi mi vulaka leswaku mi vana va Abrahama. Leswi a swi vuli swona leswaku mi vana va Xikwembu.’

Vo tala va te eka Yohane kutani va n’wi vutisa va ku: ‘Hi fanele hi endla yini leswaku hi tsakisa Xikwembu?’ Yohane u byele Vayuda a ku: ‘Loko u ri ni tinguvu timbirhi, yin’wana yi nyike munhu loyi a nga riki na yona.’ Xana wa swi tiva leswaku hikwalaho ka yini a vule sweswo? A a lava vadyondzisiwa vakwe va tiva leswaku loko va lava ku tsakisa Xikwembu, va fanele va rhandza vanhu.

Yohane u byele vahlengeleti va xibalo a ku: ‘Tshembekani naswona mi nga kanganyisi munhu.’ U byele masocha a ku: ‘Mi nga amukeli xifumbarheriso kumbe mi hemba.’

Vaprista ni Valevhi na vona va ye eka Yohane kutani va n’wi vutisa va ku: ‘Hi wena mani? Un’wana ni un’wana u lava ku tiva.’ Yohane u te: ‘Hi mina rito ra le mananga, leri kongomisaka vanhu eka Yehovha, hilaha Esaya a profeteke hakona.’

Vanhu a va swi rhandza leswi Yohane a a va dyondzisa swona. Vo tala a va tivutisa loko Yohane ku nga ri yena Mesiya. Kambe u te: ‘Munhu un’wana loyi a nga nkulu eka mina u le ku teni. A swi ndzi lulamelanga hambi ku ri ku n’wi hluvula maphaxani. Ndzi khuvula hi mati, kambe yena u ta khuvula hi moya lowo kwetsima.’

Yohane a a chumayela a ku: ‘Wanuna loyi a nga ta ta i nkulu.’ Loko Yesu a ri ni malembe ya kwalomu ka 30, u suke eGaleliya a ya eNambyeni wa Yordani laha Yohane a a khuvulela vanhu kona. Yesu a a lava leswaku Yohane a n’wi khuvula kambe Yohane u te: ‘A hi mina ndzi faneleke ndzi ku khuvula. Hi wena u faneleke ku khuvula mina.’ Yesu u te: ‘Yehovha u lava leswaku wena u ndzi khuvula.’ Kutani va nghene eNambyeni wa Yordani ivi Yohane a n’wi nyuperisa ematini.

Endzhaku ka loko Yesu a hume ematini u khongerile. Hi nkarhi wolowo, matilo ma pfulekile kutani moya wa Xikwembu wu xikela eka yena ku fana ni tuva. Kutani Yehovha u vulavule a ri etilweni a ku: “Loyi i N’wananga, la rhandzekaka, loyi ndzi n’wi amukeleke.”

Loko moya wa Yehovha wu fike eka Yesu, wu endle leswaku a va Kreste kumbe Mesiya. Se a a ta sungula ntirho lowu Yehovha a n’wi rhumeke leswaku a ta wu endla emisaveni.

Loko Yesu a ha ku khuvuriwa, u ye emananga laha a nga fika a heta masiku ya 40. Loko a vuyile u endzele Yohane. Loko Yesu a tshinela eka yena, Yohane u te: ‘Lexi i Xinyimpfana xa Xikwembu lexi nga ta susa xidyoho xa misava.’ Hi ku vula marito lawa, Yohane a a tivisa vanhu leswaku Yesu a a ri Mesiya. Xana wa swi tiva leswi humeleleke eka Yesu loko a ri emananga? A hi voneni.

Endzhaku ka loko Yesu a khuvuriwile, moya lowo kwetsima wu endle leswaku a ya emananga. U hete masiku ya 40 a nga dyi nchumu kutani a a khomiwe hi ndlala swinene. Hiloko Diyavulosi a ya eka Yesu leswaku a n’wi ringa, a ku: ‘Loko u ri N’wana wa Xikwembu hakunene, hundzula maribye lawa ma va xinkwa.’ Kambe Yesu u n’wi hlamule hi ku tirhisa Matsalwa a ku: ‘Ku tsariwile leswaku a hi swakudya ntsena leswi endlaka leswaku munhu a hanya. U fanele u yingisa rito rin’wana ni rin’wana leri Yehovha a ri vulaka.’

Diyavulosi u tlhele a ringa Yesu a ku: ‘Loku u ri N’wana wa Xikwembu hakunene, tlulela ehansi u suka laha lwangwini ra tempele. Ku tsariwile leswaku Xikwembu xi ta rhumela tintsumi ta xona leswaku ti ta ku khoma leswaku u nga weli hansi.’ Kambe Yesu u tlhele a hlamula hi ku tirhisa Matsalwa a ku: ‘Ku tsariwile leswaku a wu fanelanga u ringa Yehovha.’

Endzhaku ka sweswo, Sathana u kombe Yesu mifumo hinkwayo ya misava ni rifuwo ni ku vangama ka yona kutani a ku: ‘Ndzi ta ku nyika mifumo leyi hinkwayo ni ku vangama ka yona loko wo ndzi gandzela kan’we ntsena.’ Kambe Yesu u te: ‘Suka Sathana! Ku tsariwile leswaku u fanele u gandzela Yehovha ntsena.’

Endzhaku ka sweswo, Diyavulosi u fambile ivi tintsumi ti ta ti ta nyika Yesu swakudya. Ku sukela kwalaho, Yesu u chumayele mahungu lamanene ya Mfumo. A ku ri ntirho lowu a a rhumiwe leswaku a ta wu endla laha misaveni. Vanhu va swi rhandzile leswi Yesu a a va dyondzisa swona naswona va n’wi landzerile hinkwako laha a a ya kona.

Hi ximun’wana xa lembe ra 30 C.E., Yesu u ye eYerusalema. Vanhu vo tala a va te emutini lowu leswaku va ta tlangela Paseka. Loko va ri karhi va tlangela nkhuvo lowu, a va endla magandzelo hi swiharhi etempeleni. Van’wana a va ta ni swiharhi kambe van’wana a va fika va swi xava eYerusalema.

Loko Yesu a nghena etempeleni, u vone vanhu va xavisa swiharhi etempeleni. A va tiendlela mali endlwini yo gandzela ya Yehovha! Xana leswi swi n’wi khome njhani Yesu? U endle nkhavi hi ku tirhisa tintambu ivi a hlongola tinyimpfu ni tihomu leti a ti ri etempeleni. U tlhele a wisetela matafula ya vacincisi va mali ivi a hangalasa mali ya vona ehansi. Yesu u byele lava a va xavisa matuva a ku: ‘Humesani swilo leswi laha! Mi nga endli yindlu ya Tata wa mina yi va ndhawu yo xavisela eka yona!’

Vanhu lava a va ri etempeleni va hlamarisiwe hi leswi Yesu a swi endleke. Vadyondzisiwa vakwe va tsundzuke vuprofeta lebyi a byi vulavula hi Mesiya loko byi ku: ‘Ndzi ta hisekela yindlu ya Yehovha.’

Endzhakunyana hi lembe ra 33 C.E., Yesu u tlhele a basisa tempele ra vumbirhi. A nga pfumelanga leswaku vanhu va delela yindlu ya Tata wakwe.

Endzhaku ka loko ku hundze Paseka, Yesu ni vadyondzisiwa vakwe va tsemakanye hi le Samariya loko va tlhelela eGaleliya. Loko va ri ekusuhi ni muti wa Sikari, Yesu u fike a yima endhawini leyi a yi vuriwa xihlovo xa Yakobo. Loko a ha wisile kwalaho, vadyondzisiwa vakwe va ye emutini va ya xava swakudya.

Ku fike wansati exihlobyeni a ta ka mati. Hiloko Yesu a ku eka yena: “Ndzi kombela mati ndzi nwa.” Wansati u te: ‘Ha yini u vulavula na mina? Ndzi Musamariya. Vayuda a va fanelanga va vulavula ni Vasamariya.’ Kutani Yesu a ku eka yena: ‘Loko a wu swi tiva leswaku hi mina mani, a wu ta kombela mati eka mina naswona a ndzi ta ku nyika mati lama nyikaka vutomi.’ Hiloko wansati a n’wi vutisa a ku: ‘Xana u vula yini? A wu khomanga hambi ku ri bakiti ro ka mati.’ Kutani Yesu a ku eka yena: ‘Un’wana ni un’wana loyi a nwaka mati lawa ndzi n’wi nyikaka wona a nge he tlheli a twa torha.’ Hiloko wansati a ku: “Nkulukumba, ndzi kombela u ndzi nyika mati ya kona.”

Kutani Yesu a ku eka yena: ‘Tana ni nuna wa wena laha xihlobyeni.’ Wansati loyi u te: ‘A ndzi na nuna.’ Hiloko Yesu a ku: ‘U vulavula ntiyiso. A wu tekiwile ku ringana ka ntlhanu naswona sweswi u tshama ni wanuna loyi a nga ku tekangiki.’ Wansati u te: ‘Ndza swi vona leswaku u muprofeta. Vanhu va rixaka ra ka hina va tshemba leswaku hi nga gandzela Xikwembu entshaveni leyi kambe Vayuda va vula leswaku hi nga xi gandzela eYerusalema ntsena. Ndza tshemba leswaku loko Mesiya a fika, u ta hi dyondzisa ndlela leyi hi nga gandzelaka ha yona.’ Endzhaku ka sweswo Yesu u n’wi byele leswi a nga si tshamaka a byela munhu, u te: ‘Hi mina Mesiya.’

Hi ku hatlisa wansati loyi u ye emutini lowu a tshamaka eka wona kutani a byela Vasamariya a ku: ‘Ndzi ehleketa leswaku ndzi kume Mesiya. U tiva timhaka ta mina hinkwato. Tanani mi ta n’wi vona!’ Hiloko va famba na yena exihlobyeni kutani va yingisela loko Yesu a dyondzisa.

Vasamariya va kombele Yesu leswaku a tshama emutini wa vona. U hete masiku mambirhi a ri karhi a dyondzisa kwalaho naswona vanhu vo tala va ve ni ripfumelo eka yena. Hiloko va byela wansati wa Musamariya va ku: ‘Endzhaku ko yingisela wanuna loyi, se ha swi tiva leswaku hakunene hi yena muponisi wa misava.’

Endzhakunyana ka loko Yesu a khuvuriwile, u sungule ku chumayela a ku: ‘Mfumo wa Xikwembu wu le kusuhi.’ Vadyondzisiwa va n’wi landzerile loko a ri karhi a ya eGaleliya na le Yudiya. Loko Yesu a tlhelela emutini wa ka vona eNazareta, u ye esinagogeni, a fika a pfula buku leyi songiwaka ya Esaya ivi a yi hlayela ehenhla a ku: ‘Yehovha u ndzi nyike moya lowo kwetsima leswaku ndzi ta kota ku chumayela mahungu lamanene.’ Xana sweswo a swi vula yini? A swi vula leswaku hambileswi vanhu a va lava ku n’wi vona a endla masingita, xikongomelo xo va a nyikiwe moya lowo kwetsima a ku ri leswaku a chumayela mahungu lamanene. Kutani u byele vayingiseri vakwe a ku: ‘Namuntlha vuprofeta lebyi byi hetisekile.’

Loko Yesu a suka kwalaho, u ye eLwandle ra Galeliya laha a nga fika a hlangana ni vadyondzisiwa vakwe va mune, lava a va ri vaphasi va tinhlampfi. Yesu u va rhambile a ku: ‘A hi fambeni swin’we ndzi ta mi endla vaphasi va vanhu.’ Mavito ya vona a ku ri Petro, Andriya, Yakobo na Yohane. Hi ku hatlisa va tshike bindzu ra vona ro phasa tinhlampfi ivi va n’wi landzela. Va fambe etikweni hinkwaro ra Galeliya, va chumayela hi Mfumo wa Yehovha. Va chumayele emasinagogeni, etimakete ni le switarateni. A va landzeriwa hi ntshungu lowukulu kun’wana ni kun’wana laha a va ya kona. Mahungu lama khumbaka Yesu ma hangalake hinkwakonkwako, ku ya fika ni le Siriya.

Hi ku famba ka nkarhi, Yesu u nyike van’wana va valandzeri vakwe matimba yo horisa vanhu lava vabyaka ni yo hlongola madimona. Van’wana va fambe na yena loko a ri karhi a chumayela eka doroba rin’wana ni rin’wana ni le matikoxikaya. Vavasati vo hlaya vo tshembeka ku katsa na Mariya Magadala, Yowana, Suzana ni van’wana va khathalele Yesu ni valandzeri vakwe.

Endzhaku ka loko a letele vadyondzisiwa vakwe, Yesu u va rhume leswaku va ya chumayela. Loko va ri karhi va famba etikweni hinkwaro ra Galeliya, vanhu vo tala va ve vadyondzisiwa ivi va khuvuriwa. Vo tala a va lava ku va vadyondzisiwa lerova Yesu u va fanise ni nsimu leyi lunghekeleke ku tshoveriwa. U te: ‘Khongelani eka Yehovha leswaku a rhumela vatirhi lava engetelekeke leswaku va ta tshovela.’ Hi ku famba ka nkarhi u hlawule vadyondzisiwa va 70 ivi a va rhuma hi vambirhimbirhi leswaku va ya chumayela etikweni hinkwaro ra Yudiya. Va dyondzise vanhu va mixaka hinkwayo hi Mfumo wa Xikwembu. Loko vadyondzisiwa va vuya, a va hisekela ku byela Yesu leswi humeleleke. A xi nga ri kona lexi Diyavulosi a ta xi endla leswaku a sivela ntirho wo chumayela.

Yesu a a tiyiseka leswaku vadyondzisiwa vakwe a va ta ya emahlweni va endla ntirho lowu wa nkoka loko se a tlhelele etilweni. U te: ‘Chumayelani mahungu lamanene emisaveni hinkwayo. Dyondzisani vanhu Rito ra Xikwembu, mi tlhela mi va khuvula.’

Yesu u te emisaveni leswaku a ta vula mahungu lamanene ya Mfumo wa Xikwembu. Leswaku Yehovha a kombisa leswi Yesu a nga ta swi endla loko se a ri Hosi, u n’wi nyike moya lowo kwetsima leswaku a endla masingita. A a kota ku horisa mavabyi hinkwawo. Hinkwako laha a ya kona, vanhu lava vabyaka a va ta eka yena leswaku a va pfuna naswona hinkwavo u va horisile. U endle leswaku lava feke mahlo va vona, lava feke tindleve va twa, lava lamaleke va famba a tlhela a hlongola madimona eka lava a va karhatiwa hi wona. Hambiloko va khumba ntsena emakumu ka nguvu yakwe a va hola. Vanhu va landzele Yesu hinkwako laha a ya kona. Hambiloko mikarhi yin’wana Yesu a lava ku va yexe, a nga va tlherisanga vanhu loko va ya eka yena.

Siku rin’wana, vanhu va tise wanuna la lamaleke endlwini leyi Yesu a a tshama eka yona. Va kume leswaku a ku tele swinene lerova a va nga ta kota ku nghena. Kutani va boxe lwangu ivi va nghenisa wanuna loyi leswaku a ya eka Yesu. Kutani Yesu u byele wanuna loyi a ku: ‘Pfuka u famba.’ Loko a endla tano, vanhu va hlamarile swinene.

Siku rin’wana loko Yesu a ya endhawini leyi nga ematikoxikaya, vavanuna va khume lava a va ri ni nhlokonho va yime ekulenyana kutani va huwelela va ku: ‘Yesu, hi pfune!’ Emasikwini wolawo, vanhu lava nga ni nhlokonho a va nga pfumeleriwi ku tshinela laha ku nga ni vanhu van’wana. Yesu u byele vavanuna lava leswaku va ya etempeleni, ku nga leswi Nawu wa Yehovha a wu vula leswaku vanhu lava nga ni nhlokonho va fanele va swi endla endzhaku ko horisiwa. Loko va ri karhi va ya kona va horisiwile. Loko un’wana wa lava a va ri ni nhlokonho a xiye leswaku u horile, u tlhelele eka Yesu a ya n’wi khensa a tlhela a dzunisa Xikwembu. I un’we ntsena eka lava khume a yeke eka Yesu a ya khensa.

Wansati un’wana loyi se a a ri ni malembe ya 12 a vabya a a lava ku horisiwa hi mbilu hinkwayo. U te hi le ndzhaku ka Yesu exikarhi ka ntshungu ivi a a khumba emakumu ka nguvu ya Yesu ya le handle. Hi nkarhi wolowo u horisiwile. Loko sweswo swi endleka Yesu u vutise a ku: “Ndzi khumbe hi mani?” Wansati loyi a a chuhile, kambe u yile eka Yesu ivi a n’wi byela ntiyiso. Yesu u n’wi chavelerile a ku: ‘Famba hi ku rhula n’wananga.’

Mutirhelamfumo loyi a vuriwaka Yayiro u kombele Yesu a ku: ‘Ndzi kombela u ta endlwini ya mina! Xinhwanyatana xa mina xa vabya swinene’ Kambe loko Yesu a nga si fika endlwini ya Yayiro, xinhwanyatana xolexo xi file. Loko Yesu a fika u kume leswaku vanhu vo tala va le ku rileni. Hiloko Yesu a ku eka vona: ‘Tshikani ku rila; hikuva n’wana loyi a nga fanga kambe u lo etlela.’ Hiloko a khoma voko ra xinhwanyatana a ku: “N’wananga, pfuka!” Hi nkarhi wolowo xi pfukile ivi Yesu a byela vatswari va xona leswaku va xi nyika swakudya. Anakanya ndlela leyi vatswari va xinhwanyatana lexi va titweke ha yona!

Loko se ku hundze kwalomu ka lembe ni hafu Yesu a ri karhi a chumayela, a a fanele a endla xiboho xa nkoka. I vamani lava a a ta va hlawula leswaku va tirhisana na yena? I vamani lava a a ta va letela leswaku va kongomisa vandlha ra Vukreste? Leswaku Yesu a endla swiboho leswi, a a lava nkongomiso wa Yehovha. Kutani u ye entshaveni laha a ta va a ri yexe, ivi a khongela vusiku hinkwabyo. Nimixo Yesu u vitane van’wana va vadyondzisiwa vakwe ivi a hlawula vaapostola vakwe va 12. Hi wahi mavito ya vona lawa u ma tsundzukaka? Mavito ya vona a ku ri Petro, Andriya, Yakobo, Yohane, Filipi, Bartolomi, Tomasi, Matewu, Yakobo n’wana wa Alfiya, Tadiya, Simoni na Yudasi Iskariyota.

Lava va 12 a va ta fambafamba na yena. Endzhaku ka loko a va leterile, u va rhumile leswaku va ya chumayela va ri voxe. Yehovha u va nyike matimba yo hlongola madimona ni yo horisa lava vabyaka.

Yesu u vule leswaku lava 12 i vanghana vakwe naswona a a va tshemba. Vafarisi a va anakanya leswaku vaapostola a va nga dyondzekanga naswona a vo va vanhu lava tolovelekeke. Kambe Yesu u va leterile leswaku va endla ntirho wa vona. A va ta va na Yesu eka mikarhi ya nkoka evuton’wini bya yena, hi nkarhi wa le mahlweni ko va a fa ni le ndzhaku ka loko a pfuxiwile. Ku fana na Yesu, vo tala va lava 12 a va huma eGaleliya. Van’wana va vona a va ri ni vasati.

Vaapostola a va ri vanhu lava nga hetisekangiki naswona a va endla swihoxo. Mikarhi yin’wana a va vulavula handle ko anakanya naswona a va endla swiboho leswi hoxeke. Mikarhi yin’wana a va nga lehisi mbilu. Va tlhele va phikizana hi leswaku i mani a ri wa nkoka swinene eka vona. Kambe a va ri vanhu lavanene lava a va rhandza Yehovha. A va ta va masungulo ya vandlha ra Vukreste endzhaku ka loko Yesu a fambile.

Endzhaku ka loko Yesu a hlawule vaapostola va 12, u ye eka ntshungu lowukulu lowu a wu hlengeletanile ehansi ka ntshava. Ntshungu lowu a wu huma eGaleliya, Yudiya, Tiri, Sidoni, Siriya ni le tindhawini tin’wana ta le Yordani. Wu tise vanhu lava a va vabya ni lava a va ri ni madimona. Yesu u va horisile hinkwavo. Hiloko a tshama hi le tlhelo lerin’wana ra ntshava a sungula ku vulavula. U hlamusele leswi hi faneleke hi swi endla loko hi lava ku va vanghana va Xikwembu. Hi fanele hi swi xiya leswaku hi lava mpfuno wa Yehovha naswona hi fanele hi dyondza ku n’wi rhandza. Kambe a hi nge swi koti ku rhandza Xikwembu loko hi nga va rhandzi vanhu van’wana. Hi fanele hi va ni musa hi tlhela hi khoma vanhu van’wana kahle hambiloko va ri valala va hina.

Yesu u te: ‘A swi ringananga ku rhandza vanghana va wena ntsena. U fanele u rhandza ni valala va wena u tlhela u rivalela swi huma embilwini. Loko u khunguvanyise munhu un’wana, yana eka yena u ya kombela ku rivaleriwa hi xihatla. Khoma van’wana hi ndlela leyi u lavaka va ku khoma ha yona.’

Yesu u tlhele a nyika vanhu xitsundzuxo lexinene hi rifuwo. U te: ‘I swa nkoka ngopfu ku va munghana wa Yehovha ku tlula ku va ni mali yo tala. Khamba ri nga yiva mali ya wena, kambe a nga kona la nga endlaka leswaku u nga ha vi munghana wa Yehovha. Tshikani ku vilela hi leswi mi nga ta swi dya kumbe leswi mi nga ta swi nwa ni leswaku mi ta ambala yini. Xiyisisani swinyenyana. Mikarhi hinkwayo Xikwembu xi swi nyika swakudya leswi eneleke. Ku vilela a ku nge ku lehiseli vutomi. Tsundzuka, Yehovha wa swi tiva leswi u swi lavaka.’

Ntshungu a wu nga si tshama wu twa munhu a vulavula ku fana na Yesu. Varhangeri va vona va vukhongeri a va nga si tshama va va dyondzisa tidyondzo leti. Ha yini Yesu a a ri mudyondzisi lonene? Hikuva swilo hinkwaswo leswi a a swi dyondzisa a swi huma eka Yehovha.

Hinkwaswo leswi Vafarisi a va swi endla a va swi endlela ku tsakisa vanhu. Loko va endla swilo leswinene, a va lava ku voniwa hi vanhu. A va khongela etindhawini leti vanhu a va ta va vona. Vafarisi a va tiva swikhongelo swo leha hi nhloko kutani va swi phindhaphinda emasinagogeni ni le tikhonweni ta switarata laha vanhu a va ta va twa. Vanhu va hlamarile loko Yesu a ku: ‘Mi nga khongeli ku fana ni Vafarisi. Va ehleketa leswaku Xikwembu xi tsakisiwa hi marito ya vona yo tala, kambe a ma xi tsakisi. Xikhongelo xi fanele xi va exikarhi ka n’wina na Yehovha. Mi nga phindhaphindhi marito loko mi khongela. Yehovha u lava u n’wi byela ndlela leyi u titwaka ha yona.

‘Mi fanele mi khongela hi ndlela leyi: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona ematilweni.”’ Yesu u tlhele a va byela leswaku va fanele va khongelela ku kuma swakudya swa siku, ku rivaleriwa swidyoho swa vona ni swin’wana.

Yesu u te: ‘Mi nga tshiki ku khongela. Yanani emahlweni mi kombela swilo leswinene eka Yehovha Tata wa n’wina. Mutswari un’wana ni un’wana u lava ku nyika n’wana wakwe swilo leswinene. Loko n’wana wa wena a kombela xinkwa, xana u nga n’wi nyika ribye? Loko a kombela nhlampfi, xana u nga n’wi nyika nyoka?’

Kutani Yesu u vule dyondzo leyi: ‘Loko n’wina mi kota ku nyika vana va n’wina tinyiko letinene, xana Yehovha Tata wa n’wina a nge mi nyiki moya lowo kwetsima? Leswi mi faneleke mi swi endla i ku kombela.’ Xana wa xi yingisa xitsundzuxo xa Yesu? I swilo swa njhani leswi u swi khongelelaka?

Vaapostola a va huma eku chumayeleni, emahlweni ka Paseka ya lembe ra 32 C.E. A va karhele, kutani Yesu u fambe na vona eBetsayida, leswaku va ya wisa. Kambe loko xikepe xi fika kusuhi ni ribuwa, Yesu u kume vanhu va magidi va va yimerile. Hambileswi Yesu a a lava ku va ni vaapostola vakwe ntsena, u va amukele hi malwandla vanhu volavo. U horise lava vabyaka kutani a sungula ku va dyondzisa. Yesu u va dyondzise hi Mfumo wa Xikwembu siku hinkwaro. Loko dyambu ri pela, vaapostola vakwe va te eka yena va ku: ‘Vanhu lava va fanele va twa ndlala va byele va ya eswimitanini va ya tixavela swakudya.’

Yesu u te: ‘Va nga fambi n’wina va nyikeni swakudya.’ Vaapostola va vutise Yesu va ku: ‘U lava leswaku hi ya va xavela xinkwa?’ Filipi, un’wana wa vaapostola u te: ‘Hambiloko a hi ri ni mali yo tala, a hi nga ta swi kota ku xavela ntshungu lowu xinkwa.’

Yesu u te: ‘Hi ni swakudya swo tanihi kwihi?’ Andriya u te: ‘Hi ni swinkwa swa ntlhanu ni tihlampfi timbirhi letitsongo. A swi nge va ringani.’ Yesu u te: ‘Tisani swinkwa ni tihlampfi teto.’ U byele vanhu leswaku va tshama ebyanyini hi mintlawa ya 50 ni ya 100. Yesu u teke swinkwa ni tinhlampfi teto kutani a languta etilweni a khongela. Hiloko a nyika vaapostola swakudya leswaku va swi phamela vanhu. Vavanuna va 5 000 ni vavasati ni vana, va dyile va xurha. Endzhaku, vaapostola va hlengelete leswi a swi sele. Swi tate swirhundzu swa 12! Hakunene leri a ku ri singita ro hlamarisa, a swi tano ke?

Vanhu a va tsake ngopfu lerova va lava ku veka Yesu a va hosi ya vona. Kambe Yesu a a swi tiva leswaku a wu nga si fika nkarhi wa Yehovha wa leswaku a va hosi. Kutani u byele mitshungu leswaku yi hangalaka a tlhela a byela vaapostola vakwe leswaku va ya etlhelo lerin’wana ra Lwandle ra Galeliya. Va fambe hi xikepe kutani Yesu a ya entshaveni a ri yexe. Ha yini? Hikuva a a lava nkarhi wo khongela eka Tata wakwe. Hambileswi Yesu a a tshama a khomekile, mikarhi hinkwayo a tinyika nkarhi wo khongela.

Yesu a a horisa vanhu lava vabyaka, a pfuxa lava feke a tlhela a lawula xidzedze ni mpfula. Loko Yesu a heta ku khongela entshaveni u vone xidzedze eLwandle ra Galeliya. Vaapostola vakwe a va ri exikepeni xa vona, swi ri karhi swi va tikela ku xi fambisa hikwalaho ka moya. Yesu u rhelele entshaveni kutani a sungula ku famba ehenhla ka mati a ya exikepeni lexi a va ri eka xona. Loko vaapostola va vona munhu a ri karhi a famba ehenhla ka mati va sungule ku chuha. Kambe Yesu u te: ‘Hi mina. Mi nga chavi.’

Petro u te: ‘Hosi, loko ku ri wena, ndzi pfumelele leswaku ndzi ta eka wena.’ Yesu u byele Petro a ku: ‘Tana eka mina.’ Hambileswi a ku ri ni xidzedze Petro u chike exikepeni, a famba ehenhla ka mati a ya eka Yesu. Kambe loko a ri karhi a tshinela eka yena, Petro u langute xidzedze ivi a sungula ku chava. U sungule ku mbombomela. Petro u huwelele a ku: ‘Hosi, ndzi ponise!’ Yesu u khome voko rakwe a ku: ‘Hikwalaho ka yini mi chava, n’wina va ripfumelo leritsongo?’

Yesu na Petro va khandziye xikepe naswona hi nkarhi wolowo xidzedze xi yimile. Xana u ehleketa leswaku vaapostola va titwe njhani? Va te: “Hakunene u N’wana wa Xikwembu.”

Yesu a a nga sunguli ku lawula maxelo. Siku rin’wana, loko yena ni vaapostola vakwe va fambe hi xikepe va ya etlhelo lerin’wana ra lwandle, Yesu u etlele endzhaku ka xikepe. Loko a ha etlele, ku ve ni xidzedze lexikulu. Magandlati ma be xikepe kutani xi tala hi mati. Vaapostola va pfuxe Yesu va ri karhi va huwelela va ku: ‘Mudyondzisi, ha fa! Hi pfune!’ Yesu u pfukile kutani a byela lwandle a ku: “Miyela!” Xidzedze xi miyele hi nkarhi wolowo. Yesu u vutise vaapostola a ku: ‘Ri kwihi ripfumelo ra n’wina?’ Kutani vaapostola va byelane va ku: “Hambi ku ri moya ni lwandle swa n’wi yingisa.” Vaapostola va dyondze leswaku loko va tshemba Yesu hi ku helela, a va nga fanelanga va chava nchumu.

Vafarisi a va venga Yesu naswona a va lava xivangelo xo n’wi khoma. Va vule leswaku a a nga fanelanga a horisa vanhu hi Savata. Siku rin’wana hi Savata, Yesu u kume wanuna loyi a a nga voni a ri karhi a kombela exitarateni. U byele vadyondzisiwa vakwe a ku: ‘Vonani ndlela leyi matimba ya Xikwembu ma nga ta n’wi pfuna ha yona wanuna loyi.’ Kutani Yesu u hlanganise marha yakwe ni misava swi va vumba ivi a tota wanuna loyi ematihlweni. Yesu u te: ‘Famba u ya hlamba edan’wini leri vuriwaka Silowama.’ Wanuna yoloye u endle tano naswona u sungule ku vona ro sungula evuton’wini byakwe.

Vanhu va hlamarile. Va te: ‘Xana loyi i wanuna loyi a a hamba a tshama exitarateni a kombela kumbe hi un’wana la fanaka na yena?’ Wanuna loyi u te: ‘Hi mina loyi a a nga voni.’ Vanhu va n’wi vutise va ku: ‘I yini lexi endleke leswaku se u vona?’ Loko a va byele leswi endlekeke, va n’wi yise eka Vafarisi.

Wanuna loyi u byele Vafarisi a ku: ‘Yesu u tote matihlo ya mina hi misava leyi pfanganeke ni marha, kutani ndzi ya hlamba hiloko ndzi sungula ku vona.’ Vafarisi va te: ‘Loko Yesu a horisa vanhu hi Savata, matimba yakwe a ma humi eka Xikwembu.’ Kambe van’wana va te: ‘Loko matimba yakwe a ma nga humi eka Xikwembu, a nga ta swi kota ku horisa vanhu.’

Vafarisi va vitane vatswari va wanuna loyi kutani va va vutisa va ku: ‘Swi tise ku yini leswaku n’wana wa n’wina a kota ku vona sweswi?’ Vatswari vakwe a va chava, tanihi leswi Vafarisi a va vule leswaku loyi a nga ta kombisa ripfumelo eka Yesu u ta hlongoriwa esinagogeni. Kutani va te: ‘A hi swi tivi. Vutisani yena.’ Vafarisi va vutise wanuna loyi swivutiso swo tala ku kondza a ku: ‘Ndzi mi byele hinkwaswo leswi ndzi swi tivaka. Ha yini mi ya emahlweni mi ndzi vutisa?’ Vafarisi a va hlundzukile, kutani va n’wi hlongola.

Yesu u fambe a ya lava wanuna loyi kutani a n’wi vutisa a ku: ‘Xana u ni ripfumelo eka Mesiya?’ Wanuna loyi u te: ‘Loko a ndzi tiva leswaku i mani a ndzi ta va na rona.’ Kutani Yesu a ku: ‘Hi mina Mesiya.’ Xana leswi a swi nga kombisi leswaku Yesu u na musa? Yesu a nga lo horisa wanuna loyi ntsena kambe u tlhele a n’wi pfuna leswaku a va ni ripfumelo.

Yesu a a ri ni vanghana vanharhu lavakulu lava a va tshama eBetaniya. A ku ri Lazaro ni vamakwavo vakwe vambirhi va xisati, ku nga Mariya na Marta. Siku rin’wana loko Yesu a ri eka tlhelo lerin’wana ra Yordani, Mariya na Marta va n’wi rhumele rungula ra xihatla va ku: ‘Lazaro wa vabya swinene. Hi kombela u ta hi ku hatlisa!’ Kambe Yesu a nga fikanga hi nkarhi wolowo. Endzhaku ka masiku mambirhi u byele vadyondzisiwa vakwe a ku: ‘A hi yeneni eBetaniya. Lazaro u etlele ndzi lava ku ya n’wi pfuxa.’ Vadyondzisiwa vakwe va te: ‘Loko Lazaro a etlele, u ta pfuka.’ Kutani Yesu u va byele hi ku kongoma a ku: ‘Lazaro u file.’

Loko Yesu a fika eBetaniya, Lazaro se a a ri ni masiku ya mune a lahliwile. Mitshungu ya vanhu a yi tile yi ta chavelela Marta na Mariya. Loko Marta a twa leswaku Yesu u fikile, u tsutsume a n’wi hlanganisa. U te: “Hosi, loko a wu ri kona, makwerhu a a ta va a nga fanga.” Yesu u te: ‘Makwenu u ta tlhela a hanya. Xana wa swi tshemba sweswo, Marta?’ Yena a ku: ‘Ndza tshemba leswaku u ta pfuka loko ku pfuxiwa vafi.’ Yesu a ku: “Hi mina ndzi pfuxaka vafi ndzi tlhela ndzi va nyika vutomi.”

Endzhaku ka sweswo Marta u ye eka Mariya a fika a ku: ‘Yesu u fikile.’ Mariya u tsutsume a ya eka Yesu kutani ntshungu wu n’wi landzela. U fike a wela emilengeni yakwe a ri karhi a rila. U te: ‘Hosi loko a wu ri kona, makwerhu a ta va a nga fanga!’ Loko Yesu a vona ndlela leyi Mariya a twa ku vava ha yona, na yena u sungule ku rila. Loko ntshungu wu n’wi vona a rila, wu te: ‘Hakunene Yesu a a n’wi rhandza Lazaro.’ Kambe van’wana va te: ‘Ha yini a nga n’wi horisanga munghana wakwe?’ Xana Yesu a a ta endla yini?

Yesu u ye esirheni ra Lazaro leri a ri pfariwe hi ribye lerikulu. Kutani a ku: ‘Susani ribye leri.’ Marta u te: ‘Kambe se swi endla masiku ya mune a file! Miri wa yena wu fanele wu nun’hwa.’ Nilokoswiritano, va suse ribye rero kutani Yesu a khongela a ku: ‘Ndza khensa Tatana hi leswi u ndzi yingiseke. Ndza swi tiva leswaku mikarhi hinkwayo wa ndzi twa, kutani ndzi vulavula erivaleni leswaku vanhu lava va ta swi tiva leswaku u ndzi rhumile.’ Hiloko a huwelela a ku: “Lazaro, huma!” Ku endleke nchumu lowu hlamarisaka: Lazaro u humile esirheni, a tsondzeriwe hi malapi. Kutani Yesu u te: “N’wi tshunxeni, mi n’wi tshika a famba.”

Vo tala lava voneke leswi va ve ni ripfumelo eka Yesu. Kambe van’wana va ye va ya byela Vafarisi. Ku sukela kwalaho, Vafarisi a va lava ku dlaya Lazaro na Yesu. Yudasi Iskariyota loyi a a ri un’wana wa vaapostola va 12, u ye eka Vafarisi exihundleni a fika a ku eka vona: ‘Mi ta ndzi nyika mali muni loko ndzo mi pfuna ku kuma Yesu?’ Va vule leswaku va ta n’wi nyika swiphemu swa silivhere swa 30, kutani Yudasi a sungula ku lava nkarhi lowunene wo nyiketa Yesu eka Vafarisi.

Vayuda a va tlangela Paseka lembe ni lembe hi siku ra vu-14 hi n’hweti ya Nisani. A yi va tsundzuxa ndlela leyi Yehovha a va tshunxeke ha yona evuhlongeni le Egipta a va yisa eTikweni leri Tshembisiweke. Hi lembe ra 33 C.E., Yesu ni vaapostola vakwe va tlangele Paseka ekamareni ra le henhla eYerusalema. Loko va hete ku dya, Yesu u te: ‘Un’wana wa n’wina u ta ndzi xavisa.’ Vaapostola va hlamarile, kutani va vutisa Yesu va ku: ‘I mani?’ Yesu u te: ‘Hi loyi ndzi n’wi nyikaka xinkwa lexi.’ Kutani u nyike Yudasi Iskariyota xinkwa. Yudasi u nambe a huma a famba.

Yesu u khongerile, a phema xinkwa kutani a xi nyika vaapostola vakwe lava saleke. Kutani a ku: ‘Dyanani xinkwa lexi. Xi fanekisela miri wa mina, lowu ndzi nga ta wu nyikela hikwalaho ka n’wina.’ Kutani u khongelele vhinyo ivi a yi nyika vaapostola vakwe. U te: ‘Nwanani vhinyo leyi. Yi fanekisela ngati ya mina, leyi ndzi nga ta yi nyikela leswaku mi rivaleriwa swidyoho swa n’wina. Ndza mi tshembisa leswaku mi ta va tihosi na mina etilweni. Endlani leswi lembe ni lembe leswaku mi ndzi tsundzuka.’ Valandzeri va Yesu va ha hlangana lembe ni lembe hi siku leri fanaka. Sweswi nhlangano wolowo wu vitaniwa Xilalelo xa Hosi.

Endzhaku ka xilalelo, vaapostola va phikizane hi leswaku i mani wa nkoka exikarhi ka vona. Kambe Yesu u te: ‘Lonkulu eka n’wina hi loyi a titekaka a ri lontsongo.

‘Mi vanghana va mina. Ndzi mi byela swilo hinkwaswo leswi Tatana a lavaka leswaku ndzi mi byela swona. Ku nga ri khale ndzi ta ya eka Tatana etilweni. Ndzi ta mi siya kambe vanhu va ta tiva leswaku mi vadyondzisiwa va mina loko mi rhandzana. Mi fanele mi rhandzana hilaha na mina ndzi mi rhandzeke hakona.’

Eku heteleleni, Yesu u khongerile a kombela Yehovha leswaku a sirhelela vadyondzisiwa vakwe. U kombele Yehovha leswaku a va pfuna va tirha hi vun’we. U khongelele leswaku vito ra Yehovha ri kwetsimisiwa. Kutani Yesu ni vaapostola vakwe va yimbelele tinsimu va dzunisa Yehovha kutani va humela ehandle. Nkarhi wa leswaku Yesu a khomiwa a wu ri kusuhi.

Yesu ni vaapostola vakwe va tsemakanye Nkova wa Kedroni va ya eNtshaveni ya Mitlhwari. A ku ri exikarhi ka vusiku naswona n’weti a wu lo nkee, wu ri xirhendzevutana. Loko va fika entangeni wa Getsemani, Yesu u te: “Salani kwala, mi tshama mi rindzile.” Kutani Yesu u ye ekulenyana a fika a khinsama. U khongele eka Yehovha a karhatekile a ku: “A ku endleke ku rhandza ka wena.” Kutani Yehovha u rhumele ntsumi yi ta khutaza Yesu. Loko Yesu a tlhelela eka vaapostola vakwe u va kume va etlele. U te: ‘Pfukani! Lowu a hi nkarhi wa ku etlela! Nkarhi wa leswaku ndzi nyiketiwa eka valala va mina wu fikile.’

Hi ku hatlisa Yudasi u te ni ntshungu lowukulu wu khome mabanga ni swigombo. A a swi tiva leswaku u ta n’wi kuma kwihi Yesu hikuva mikarhi yo tala a va ya entangeni wa Getsemani. Yudasi u byele masocha leswi a ta swi endla eka Yesu leswaku ma n’wi tiva. U ye eka Yesu a fika a ku: ‘Xewani, Mudyondzisi,’ kutani a n’wi tswontswa. Yesu u te: ‘Yudasi, xana wa ndzi xavisa hi ku ndzi tswontswa?’

Yesu u ye eka ntshungu kutani a fika a wu vutisa a ku: “Mi lava mani?” Wu te: “Yesu wa le Nazareta.” Yesu a ku: “Hi mina loyi,” kutani vavanuna lava va tlhelela endzhaku va wa. Yesu u tlhele a vutisa ntshungu wolowo a ku: “Mi lava mani?” Ntshungu lowu wu tlhele wu ku: “Yesu wa le Nazareta.” Yesu u te: ‘Ndzi te hi mina loyi. Tshikani vavanuna lava va famba.’

Loko Petro a vona leswi a swi endleka, u humese banga kutani a tsema ndleve ya Malko, hlonga ra muprista lonkulu. Kambe Yesu u khumbe ndleve ya wanuna loyi a n’wi horisa. Kutani Yesu u byele Petro a ku: ‘Veka banga ra wena. Loko u lwa hi banga, u ta dlayiwa hi banga.’ Masocha ma khome Yesu ma n’wi boha mavoko kutani vaapostola va baleka. Kutani ntshungu wu n’wi yise eka muprista lonkulu Anasi. Anasi u fike a vutisa Yesu swivutiso kutani a n’wi yisa endlwini ya Muprista Lonkulu Kayafasi. Ku endleke yini hi vaapostola?

Loko Yesu a ri ni vaapostola vakwe ekamareni ra le henhla, u te: ‘Hinkwenu mi ta ndzi landzula namuntlha.’ Petro u te: ‘Mina a ndzi nge ku landzuli! Hambiloko lavan’wana vo ku tshika, mina a ndzi nge pfuki ndzi ku tshikile.’ Kambe Yesu u byele Petro a ku: ‘Loko nkuku wu nga si ringa, u ta va u ndzi landzule kanharhu.’

Loko masocha ma yisa Yesu endlwini ya Kayafasi, vaapostola vo tala va balekile. Kambe vaapostola vambirhi va sale ntshungu hi le ndzhaku. Un’wana wa vona a ku ri Petro. U ye endhawini leyi ku tshamiwaka eka yona ehandle emutini wa Kayafasi a fika a orha ndzilo. Nhwanyana la nga nandza u vone Petro kutani a ku: ‘Ndza ku tiva wena! A wu ri na Yesu!’

Petro u te: ‘Doo, a hi mina! A ndzi swi tivi leswaku u vulavula hi yini!’ U sukile a ya egedeni. Endzhaku ka sweswo, nhwanyana un’wana la nga nandza u vone Petro kutani a byela ntshungu a ku: ‘Wanuna loyi a a ri na Yesu!’ Petro u te: ‘A ndzi n’wi tivi Yesu!’ Wanuna un’wana u te: ‘U un’wana wa vaapostola vakwe! Ya twala ni ndlela leyi u vulavulaka ha yona leswaku u huma eGaleliya, ku fana na Yesu.’ Kambe Petro u kanetile a ku: ‘A ndzi n’wi tivi!’

Nkuku wu ringile hi nkarhi wolowo. Petro u vone Yesu a n’wi languta. U tsundzuke leswi Yesu a n’wi byeleke swona, hiloko a humela ehandle a ya rila hi xiviti.

Hi nkarhi wolowo, huvo ya Sanedri yi hlangane ekaya ka Kayafasi leswaku yi ta tengisa Yesu. A yi endle xiboho xo dlaya Yesu kutani sweswi a yi lava xivangelo xo n’wi dlaya. Kambe a yi xi kumanga. Eku heteleleni, Kayafasi u vutise Yesu a ku: ‘Xana u N’wana wa Xikwembu?’ Yesu u te: ‘Ina ndzi yena.’ Kayafasi u te: ‘A ka ha laveki vumbhoni byin’wana. Leswi i xisandzu!’ Huvo yi pfumerile yi ku: ‘Wanuna loyi u fanele a fa.’ Va be Yesu hi timpama, va n’wi tshwutela, va n’wi pfala mahlo kutani va n’wi ba, va ku: ‘Loko u ri muprofeta, hi byele leswaku u biwe hi mani!’

Loko ri xa, va teke Yesu va n’wi yisa eholweni ya Sanedri kutani va tlhela va n’wi vutisa va ku: ‘Xana u N’wana wa Xikwembu?’ Yesu u te: ‘N’wina mi vula leswaku ndzi yena.’ Va n’wi vone nandzu wo va musandzi kutani va n’wi teka va n’wi yisa endlwini ya vuhosi ya Pontiyo Pilato, loyi a a ri mufumi wa Murhoma. Ku endleke yini endzhaku ka sweswo? Hi ta dyondza swo tala eka ndzima leyi landzelaka.

Vaprista lavakulu va yise Yesu ekaya ka Pilato. Pilato u va vutise a ku: ‘Xana u dyohe yini wanuna loyi?’ Va te: ‘U vula leswaku hi yena hosi!’ Pilato u vutise Yesu a ku: “Xana u Hosi ya Vayuda?” Yesu u te: “Mfumo wa mina a hi xiphemu xa misava leyi.”

Kutani Pilato u yise Yesu eka Heroda, mufumi wa le Galeliya, leswaku a ya kambisisa nandzu wakwe. Heroda a nga kumanga nchumu xo biha eka Yesu kutani u n’wi tlherisele eka Pilato. Pilato u byele vanhu a ku: ‘Mina na Heroda a hi kumanga nchumu xo biha eka munhu loyi. Ndza n’wi tshunxa.’ Ntshungu wu huwelele wu ku: ‘N’wi dlaye! N’wi dlaye!’ Masocha ma be Yesu hi tisamboko ma tlhela ma n’wi tshwutela. Ma n’wi tlhandleke harhi ya mitwa enhlokweni ma n’wi sandza ma ku: ‘Xewani, Hosi ya Vayuda.’ Pilato u tlhele a byela ntshungu a ku: ‘A ndzi kumi nchumu xo biha eka munhu loyi.’ Kambe ntshungu wu huwelele wu ku: “N’wi belele emhandzini!” Kutani Pilato u byele masocha leswaku ma n’wi teka a ya dlayiwa.

Ma teke Yesu ma n’wi yisa endhawini leyi vuriwaka Golgota, ma fika ma n’wi belela emhandzini kutani ma yi tlakusa. Yesu u khongele a ku: ‘Tatana, va rivalele, hikuva a va swi tivi leswi va swi endlaka.’ Vanhu va endle xihlekiso hi Yesu, va ku: ‘Loko u ri N’wana wa Xikwembu, chika emhandzini yoleyo. Tiponise.’

Xigevenga xin’wana lexi a xi beleriwe etlhelo ka yena xi te: “U ndzi tsundzuka loko u nghena eMfun’weni wa wena.” Yesu u xi tshembise a ku: “U ta va na mina eParadeyisini.” Ninhlikanhi, ku ve ni munyama etikweni hinkwaro ku ringana tiawara tinharhu. Van’wana va vadyondzisiwa va Yesu va yime ekusuhi ni mhandzi leyi a a beleriwe eka yona, ku katsa na Mariya mana wakwe. Yesu u byele Yohane leswaku a sala a khathalela Mariya, onge hiloko a a ri mana wakwe.

Eku heteleleni, Yesu u te: “Swi hetisekile!” U korhamise nhloko kutani a hefemula ro hetelela. Hi nkarhi wolowo, ku ve ni ku tsekatseka lokukulu ka misava. Nguvu yo tika ya le tempeleni leyi a yi hambanisa Ndhawu yo Kwetsima ni Ndhawu yo Kwetsima Ngopfu yi handzuke hi le xikarhi. Ndhuna ya vuthu yi te: ‘Hakunene loyi a ku ri N’wana wa Xikwembu.’

Loko Yesu a file, wanuna un’wana la fuweke la vuriwaka Yosefa u kombele Pilato leswaku a n’wi pfumelela a hawula ntsumbu wa Yesu emhandzini. Yosefa u tsondzele ntsumbu wakwe hi lapi ro durha a tlhela a wu tota swilo swo wu nun’hwerisa kutani a wu lata esirheni lerintshwa. U pfale sirha rakwe hi ribye lerikulu. Vaprista lavakulu va byele Pilato va ku: ‘Hi chava leswaku van’wana va vadyondzisiwa va Yesu va nga teka ntsumbu wakwe kutani va vula leswaku u pfuxiwile.’ Kutani Pilato u te: ‘Pfalani sirha mi ri rindza.’

Endzhaku ka masiku manharhu nimixo swinene, vavasati van’wana va ye esirheni naswona va kume leswaku ribye ri susiwile. Endzeni ka sirha va kume ntsumi leyi yi nga te: ‘Mi nga chavi. Yesu u pfuxiwile. Fambani mi ya byela vadyondzisiwa vakwe leswaku va ya hlangana na yena eGaleliya.’

Mariya Magadala u tsutsume a ya lava Petro na Yohane. U fike a ku: ‘Ku ni munhu la tekeke ntsumbu wa Yesu!’ Petro na Yohane va tsutsumele esirheni. Loko va kuma leswaku ntsumbu wa Yesu a wa ha ri kona, va tlhelele emakaya.

Loko Mariya a tlhelela esirheni, u vone tintsumi timbirhi ti ri endzeni ka sirha kutani a ku eka tona: ‘A ndzi swi tivi leswaku va wu yise kwihi ntsumbu wa Hosi ya mina.’ Kutani u vone wanuna wo karhi, naswona leswi a a ehleketa leswaku a ku ri mutirhi wa le ntangeni u te: ‘Nkulukumba, ndzi kombela u ndzi byela laha u nga wu yisa kona ntsumbu wa Yesu.’ Kambe loko wanuna loyi a ku, “Mariya!” u nambe a swi tiva leswaku i Yesu. U huwelele a ku: “Mudyondzisi,” kutani a n’wi khoma. Yesu u te: ‘Famba u ya byela vamakwerhu leswaku u ndzi vonile.’ Xikan’wekan’we, Mariya u tsutsume a ya eka vadyondzisiwa kutani a va byela leswaku u vone Yesu.

Endzhaku ka sweswo hi rona siku rero, vadyondzisiwa vambirhi a va ri karhi va famba va ya Emawusi va suka eYerusalema. Wanuna un’wana u fambisane na vona kutani a va vutisa leswaku a va vulavula hi yini. Va te: ‘Xana a wu swi twanga? Yesu u ni masiku manharhu a dlayiwile hi vaprista lavakulu. Sweswi vavasati van’wana va ri u pfuxiwile!’ Wanuna loyi u vutise a ku: ‘Xana a mi va tshembi vaprofeta? Va vule leswaku Kreste a a ta dlayiwa a tlhela a pfuxiwa.’ U ye emahlweni a va hlamusela Matsalwa. Loko va fika Emawusi, vadyondzisiwa va kombele wanuna loyi leswaku a famba na vona. Endzhaku ka loko a khongerile loko va lava ku dya swakudya swa nimadyambu, va swi xiyile leswaku a ku ri Yesu. Kutani u nyamalarile.

Vadyondzisiwa lavambirhi va tsutsumele eYerusalema endlwini leyi vaapostola a va hlengeletane eka yona kutani va va byela leswi nga endleka. Loko va ri kwalaho Yesu u tlhele a humelela eka vona hinkwavo. Eku sunguleni, vaapostola a va nga tshembi leswaku i Yesu. Kutani u te: ‘Langutani mavoko ya mina; ndzi khumbeni. Ku tsariwile leswaku Kreste a a ta pfuxiwa eku feni.’

Endzhaku ka loko Yesu a humelele eka vaapostola, Petro u ye a ya phasa tihlampfi eLwandle ra Galeliya. Tomasi, Yakobo, Yohane ni vadyondzisiwa van’wana va fambe na yena. Va ringete ku phasa tihlampfi vusiku hinkwabyo kambe a va phasanga nchumu.

Hi siku leri landzelaka nimixo, va vone wanuna a yime eribuweni. U va huwelele va ri ematini a ku: ‘Xana ku ni tihlampfi leti mi ti phaseke?’ Va te: ‘A hi phasanga nchumu.’ Wanuna loyi u te: “Hoxani nete etlhelweni ra xinene ra xikepe.” Loko va endle tano, va phase tihlampfi to tala lerova va nga ha swi koti ku humesa rikoka ematini. Yohane u hatle a swi xiya leswaku wanuna loyi a ku ri Yesu, kutani u te: “I Hosi!” Xikan’wekan’we Petro u tlulele ematini a hlambela a ya eribuweni. Vadyondzisiwa lavan’wana va n’wi landzele va ri exikepeni.

Loko va fika eribuweni, va vone xinkwa ni tihlampfi leti a ti ri eku oxiweni. Yesu u va byele leswaku va engetela tihlampfi leti a ti ri eku oxiweni. Endzhaku u te: ‘Tanani mi ta fihlula.’

Loko va heta ku dya, Yesu u vutise Petro a ku: ‘Xana u ndzi rhandza ku tlula ku phasa tihlampfi?’ Petro u te: ‘Ina, Hosi, wa swi tiva leswaku ndza ku rhandza.’ Yesu a ku: ‘Phamela swinyimpfana swa mina.’ Yesu u tlhele a n’wi vutisa a ku: ‘Petro, xana wa ndzi rhandza?’ Petro u te: ‘Hosi wa swi tiva leswaku ndza ku rhandza.’ Yesu u te: “Risa swinyimpfana swa mina.” Yesu u tlhele a n’wi vutisa ra vunharhu. Hiloko Petro a hela matimba. U te: ‘Hosi, u tiva swilo hinkwaswo. Wa swi tiva leswaku ndza ku rhandza.’ Yesu u te: “Phamela swinyimpfana swa mina.” Kutani u byele Petro a ku: “U nga tshiki ku ndzi landzela.”

Loko a ri eGaleliya, Yesu u hlangane ni valandzeri vakwe. U va nyike xileriso xa nkoka swinene, a ku: ‘Fambani mi ya endla vanhu va matiko hinkwawo va va vadyondzisiwa. Va dyondziseni swilo leswi ndzi mi dyondziseke swona mi tlhela mi va khuvula.’ Kutani u va tshembise a ku: ‘Tsundzukani, ndzi ta va na n’wina mikarhi hinkwayo.’

Endzhaku ka masiku ya 40 Yesu a pfuxiwile eku feni, u humelele eka vadyondzisiwa vakwe vo tala eGaleliya ni le Yerusalema. U va dyondzise tidyondzo ta nkoka a tlhela a endla masingita yo tala. Endzhaku Yesu u hlangane ni vaapostola vakwe ro hetelela eNtshaveni ya Mitlhwari. U te: ‘Mi nga suki eYerusalema. Tshamani mi rindzele leswi Tatana a swi tshembiseke.’

Vaapostola vakwe a va nga swi twisisi leswi a a swi vula. Va te: ‘Xana u ta va Hosi ya Israyele sweswi?’ Yesu u te: ‘A wu si fika nkarhi lowu Yehovha a wu vekeke leswaku ndzi va Hosi. Ku nga ri khale moya lowo kwetsima wu ta mi nyika matimba naswona mi ta va timbhoni ta mina. Fambani mi ya chumayela eYerusalema, eYudiya, eSamariya ni le tindhawini tin’wana ta le kule.’

Kutani Yesu u tlhandlukele ehenhla, hiloko papa ri n’wi pfala. Vadyondzisiwa vakwe va hambete va languta epapeni kambe a a nga ha vonaki.

Vadyondzisiwa volavo va suke eNtshaveni ya Mitlhwari va ya eYerusalema. A va tolovele ku hlengeletana ekamareni ra le henhla kutani va khongela. A va yimele leswaku Yesu a va nyika swileriso leswi engetelekeke.