Loko ndyangu wa Yakobo wu ri le Egipta, wu sungule ku vitaniwa Vaisrayele. Endzhaku ka loko Yakobo na Yosefa va file, Faro un’wana u sungule ku fuma. Loko a vona Vaisrayele va andza ku tlula Vaegipta, u sungule ku chava. Kutani u endle Vaisrayele mahlonga. U va sindzise ku baka switina a tlhela a va tirhisa hi ndlela yo vava emasin’wini. Kambe loko Vaegipta va va sindzisa ku tirha mintirho yo vava, Vaisrayele a va ya va tala. Leswi Faro a a nga swi tsakeli sweswo, u lerise leswaku ku dlayiwa vana hinkwavo va vafana va Vaisrayele. Xana u ehleketa leswaku Vaisrayele a va ri njhani hi ku chuha?

Wansati wa Muisrayele loyi a a vuriwa Yokebedi a a ri ni n’wana wo saseka wa mufana. Leswaku a n’wi sirhelela u n’wi hoxe emancini ivi a n’wi tumbeta exikarhi ka tinhlanga ta Nambu wa Nayili. Sesi wa n’wana yoloye, ku nga Meriyamu, a a ri ekusuhi ni laha n’wana loyi a a ri kona leswaku a ta vona leswi a swi ta humelela hi yena.

Loko n’wana wa Faro wa nhwanyana a ya enambyeni leswaku a ya hlamba, u vone manci wolowo. Endzeni ka manci wolowo u kume n’wana a ri karhi a rila, hiloko a n’wi twela vusiwana. Meriyamu u n’wi vutisile a ku: ‘Xana ndzi nga ku lavela wansati leswaku a ta ku mamisela n’wana loyi?’ Loko n’wana wa Faro a pfumerile, Meriyamu u ye a ya vitana mana wakwe, ku nga Yokebedi. N’wana wa Faro u byele Yokebedi a ku: ‘Teka n’wana loyi u ndzi mamisela yena, ndzi ta ku hakela.’

Loko n’wana yoloye se a kurile, Yokebedi u n’wi tlherisele eka n’wana wa Faro, loyi a n’wi thyeke vito ra Muxe naswona u n’wi kurise tanihi n’wana wakwe. Muxe u kurisiwe tanihi n’wana wa le vuhosini naswona a ta kuma xin’wana ni xin’wana lexi a a xi lava. Kambe Muxe a nga n’wi rivalanga Yehovha. A a swi tiva leswaku a a ri Muisrayele ku nga ri Muegipta. Kutani u hlawule ku tirhela Yehovha.

Loko a ri ni malembe ya 40, Muxe u teke xiboho xo pfuna vanhu va rixaka ra ka vona. Loko a vona Muegipta a ba hlonga ra Muisrayele, Muxe u be Muegipta yoloye a n’wi dlaya. U paletele ntsumbu wakwe esaveni. Loko Faro a twa mhaka yoleyo, u lave ku dlaya Muxe. Kambe Muxe u balekile a ya tshama etikweni ra Midiyani. Yehovha u n’wi hlayisile loko a ri etikweni rero.

Muxe u tshame eMidiyani malembe ya 40. U teke nsati a tlhela a va ni vana. Siku rin’wana loko a ri karhi a risa tinyimpfu takwe ekusuhi ni Ntshava ya Sinayi, u vone nchumu wun’wana lowu hlamarisaka. U vone xihlahla xa mitwa xi ri karhi xi pfurha kambe xi nga tshwi! Loko a tshinela ku ta vona leswaku hikwalahokayini xihlahla xexo xi nga tshwi xi hela, u twe rito ri huma exihlahleni xexo ri ku: ‘Muxe! U nga tshineli. Hluvula maphaxani ya wena hikuva ndhawu leyi u yimeke eka yona ya kwetsima.’ A ku ri Yehovha loyi a a vulavula hi ku tirhisa ntsumi.

Muxe a a chava kutani u tipfale xikandza. Rito rero ri te: ‘Ndzi ku vonile ku xaniseka ka Vaisrayele. Ndzi ta va ponisa eka Vaegipta ndzi va yisa etikweni lerinene. Hi wena u nga ta rhangela vanhu va mina u va humesa etikweni ra Egipta.’ Mhaka yoleyo yi n’wi hlamarise ngopfu Muxe!

Muxe u te: ‘Ndzi fanele ndzi ku yini loko vanhu va ndzi vutisa leswaku ndzi rhume hi mani?’ Xikwembu xi te: ‘Va byele leswaku u rhumiwe hi Yehovha Xikwembu xa Abrahama, Xikwembu xa Isaka ni Xikwembu xa Yakobo.’ Kutani Muxe u te: ‘Ndzi fanele ndzi endla yini loko vanhu va nga ndzi yingisi?’ Yehovha u tiyisekise Muxe leswaku U ta n’wi pfuna. U n’wi byele leswaku a lahlela nhonga leyi a yi khomile ehansi. Nhonga yoleyo yi hundzuke nyoka! Loko Muxe a khoma nyoka yoleyo hi ncila, yi tlhele yi hundzuka nhonga. Yehovha u te: ‘Loko u endla singita leri, va ta swi vona leswaku hi mina ndzi ku rhumeke.’

Muxe u te: ‘A ndzi swi koti kahle ku vulavula.’ Yehovha u n’wi tshembise a ku: ‘Ndzi ta ku byela leswi u faneleke u swi vula naswona ndzi ta rhuma Aroni makwenu leswaku a ku pfuna.’ Leswi a a tshemba leswaku Yehovha u ta n’wi seketela, Muxe u teke nsati ni vana vakwe va majaha ivi a tlhelela Egipta.

Vaisrayele a va sindzisiwa ku tirha tanihi mahlonga. Yehovha u rhume Muxe na Aroni leswaku va ya byela Faro va ku: ‘Tshika vanhu va mina va famba leswaku va ya ndzi gandzela emananga.’ Hi ku tikukumuxa Faro u hlamule a ku: ‘A ndzi na mhaka ni leswaku Yehovha u ri yini, naswona a ndzi nge va tshiki Vaisrayele va famba.’ Kutani Faro u va sindzise ku tirha mitirho yo tika swinene. Yehovha a a lava ku dyondzisa Faro dyondzo yo karhi. Wa swi tiva leswaku a a ta n’wi dyondzisa hi ndlela yihi? U tisele Vaegipta Makhombo ya Khume. Yehovha u byele Muxe a ku: ‘Faro a nga ndzi yingisi. Nimixo u ta va a ri eNambyeni wa Nayili. Famba u ya n’wi byela leswaku leswi a aleke ku tshika vanhu va mina va famba, mati hinkwawo lama nga enambyeni wa Nayili ma ta hundzuka ngati.’ Muxe u yingisile kutani a ya eka Faro. Faro u swi vonile loko Aroni a ba mati ya nambu wa Nayili hi nhonga yakwe ivi ma hundzuka ngati. Nambu wu sungule ku nun’hwa, tihlampfi ti file naswona mati ya nambu wolowo a ma nga ha nweki. Nilokoswiritano, Faro a nga va tshikanga Vaisrayele va famba.

Endzhaku ka masiku ya nkombo, Yehovha u tlhele a rhuma Muxe eka Faro leswaku a ya n’wi byela leswi: ‘Loko u nga va tshiki vanhu va mina va famba, tiko ra Egipta ri ta tala hi machela.’ Aroni u tlakusele nhonga yakwe ehenhla kutani machela ma funengeta tiko hinkwaro. Vanhu va kume tiyindlu, mibedo ni swibya swa vona swi tele hi machela. Machela a ma tale ni tiko hinkwaro! Faro u byele Muxe leswaku a kombela Yehovha a yimisa khombo rero. Faro u tshembise leswaku u ta tshika Vaisrayele va famba. Yehovha u yimise khombo rero ivi Vaegipta va hlengeleta machela lama feke ma va tinhulu to tala swinene. Tiko hinkwaro ri sungule ku nun’hwa. Kambe, Faro u tlhele a ala ku tshika Vaisrayele va famba.

Endzhaku ka sweswo, Yehovha u byele Muxe a ku: ‘Aroni u fanele a ba misava hi nhonga yakwe, kutani ritshuri ri ta hundzuka tinhongana letitsongo leti lumaka.’ Hi ku hatlisa a ku tele tinhongana toleto etikweni hinkwaro. Malandza man’wana ya Faro ma te: ‘Khombo leri ri huma eka Xikwembu.’ Nilokoswiritano, Faro a nga pfumelanga ku tshika Vaisrayele va famba.

Xikwembu xi tlhele xi rhuma Muxe na Aroni leswaku va ya byela Faro, va ku: ‘Loko u nga va tshiki vanhu va mina va famba, ndzi ta endla leswaku tiko ri tala hi mabawa.’ Tiyindlu hinkwato ta Vaegipta, ta swisiwana ni ta swifumi, a ti tele hi mabawa. Tiko hinkwaro a ri tele hi mabawa. Kambe eGoxeni, laha Vaisrayele a va tshama kona, a ku nga ri na mabawa. Ku sukela eka khombo leri ra vumune, makhombo hinkwawo a ma hlasela Vaegipta ntsena. Faro u byele Muxe na Aroni a ku: ‘Kombelani Yehovha a susa mabawa lawa. Ndzi ta tshika vanhu va n’wina va famba.’ Kambe loko Yehovha a suse mabawa wolawo, Faro u tlhele a ala ku tshika Vaisrayele va famba. Xana Faro a a ta hetelela a dyondze swo karhi?

Yehovha u te: ‘Loko Faro a nga va tshiki vanhu va mina va famba, swifuwo swa Vaegipta swi ta vabya ivi swi fa.’ Hi xa mundzuku wa kona, swifuwo swi sungule ku fa. Kambe swifuwo swa Vaisrayele a swi fanga. Nilokoswiritano, Faro a nga va tshikanga va famba.

Kutani Yehovha u byele Muxe leswaku a tlhelela eka Faro ivi a haxa nkuma emoyeni. Nkuma wolowo wu hundzuke ritshuri leri hlaseleke Vaegipta hinkwavo. Ritshuri rero ri endle leswaku Vaegipta ni swifuwo swa vona va hlaseriwa hi marhumba. Nilokoswiritano, Faro u arile ku tshika Vaisrayele va famba.

Yehovha u tlhele a rhuma Muxe leswaku a ya byela Faro a ku: ‘Xana wa ha ala ku tshika vanhu va mina va famba? Mundzuku ku ta na xihangu etikweni hinkwaro.’ Hi siku leri landzeleke, Yehovha u endle leswaku ku va ni xihangu, ku dzindza ka tilo ni ndzilo. A ku ri ro sungula ematin’wini leswaku ku va ni xidzedze xo tano le Egipta. Misinya ni swimilana hinkwaswo swi file kambe eGoxeni a ku endlekanga nchumu. Hiloko Faro a ku: ‘Kombelani Yehovha leswaku a yimisa khombo leri! Kutani ndzi ta mi tshika mi famba.’ Kambe endzhaku ka loko xihangu ni mpfula swi yimile, Faro a nga va tshikanga va famba.

Muxe u te: ‘Sweswi, tinjiya ti ta dya swimilana hinkwaswo leswi poneke xihangu.’ Tinjiya to tala ti dye swimila hinkwaswo leswi a swi sele emasin’wini ni matluka lawa a ma sele emisinyeni. Faro u te: ‘Kombelani Yehovha leswaku a herisa tinjiya leti.’ Endzhaku ka loko Yehovha a herise tinjiya, Faro u arile ku tshika Vaisrayele va famba.

Yehovha u byele Muxe a ku: ‘Tshambulutela voko ra wena ehenhla.’ Hiloko xibakabaka xi hundzuka munyama. Vaegipta va hete masiku manharhu va nga koti ku vona nchumu. Kambe Vaisrayele a va voningeriwa emakaya ya vona.

Faro u byele Muxe a ku: ‘Wena ni vanhu va wena mi nga famba. Kambe siyani swifuwo swa n’wina.’ Muxe u te: ‘Hi fanele hi famba ni swifuwo swa hina leswaku hi ta endlela Xikwembu xa hina magandzelo ha swona.’ Sweswo swi n’wi hlundzukise ngopfu Faro. Hiloko a huwelela a ku: ‘Sukani emahlweni ka mina! Loko ndzo tlhela ndzi mi vona, ndzi ta mi dlaya.’

Muxe u tshembise Faro leswaku a nge he tlheleli eka yena. Kambe loko a nga si famba, u byele Faro a ku: ‘Vana hinkwavo va mativula va le Egipta va majaha va ta dlayiwa exikarhi ka vusiku bya namuntlha, ku suka eka n’wana wa Faro ku ya eka vana va mahlonga ya Vaegipta.’

Yehovha u byele Vaisrayele leswaku va endla nkhuvo wo hlawuleka. U te: ‘Dlayani nyimpfu ya xinuna leyi nga ni lembe rin’we kumbe mbuti kutani mi teka ngati yin’wana ya yona mi yi tota eka tifureme ta tinyangwa ta n’wina. Oxani nyama ya kona mi yi dya ni xinkwa xo kala comela. Mi va mi ambale maphaxani, mi lunghekele ku famba. Namuntlha nivusiku ndzi ta mi tshunxa mi famba.’ Xana u ehleketa leswaku Vaisrayele a va ri njhani hi ku tsaka?

Exikarhi ka vusiku, ntsumi ya Yehovha yi nghene emitini hinkwayo ya le Egipta. Emitini leyi tifureme ta tinyangwa a ti nga totiwanga ngati, vana hinkwavo va mativula va dlayiwile. Kambe ntsumi a yi endlanga nchumu emitini leyi tifureme ta yona a ti totiwe ngati. Mindyangu hinkwayo ya le Egipta, ya swifumi ni ya swisiwana, yi feriwe hi vana. Kambe a swi vanga tano emitini hinkwayo ya Vaisrayele.

Hambi ku ri n’wana wa Faro wa jaha u file. Faro a a nga ha lavi ku twa nchumu. U nambe a byela Muxe na Aroni a ku: ‘Sukani. Fambani mi ya gandzela Xikwembu xa n’wina. Tekani swifuwo swa n’wina mi famba!’

Vaisrayele va hume Egipta va ri karhi va voningeriwa hi n’weti naswona a va famba hi mindyangu ni hi tinxaka. A ku ri ni vavanuna va 600 000 va Vaisrayele ni vavasati vo tala ku katsa ni vana. Vanhu vambe va fambe na vona leswaku na vona va ta gandzela Yehovha. Vaisrayele se a va tshunxiwile!

Leswaku va tsundzuka ndlela leyi Yehovha a va kutsuleke ha yona, a va fanele va endla nkhuvo wolowo wo hlawuleka lembe ni lembe. A wu vuriwa Paseka.

Loko Faro a twa leswaku Vaisrayele va fambile Egipta, u tisorile hileswi a va tshikeke va famba. U byele masocha yakwe a ku: ‘Lunghiselelani makalichi ya mina hinkwawo ya nyimpi, hi va hlongorisa! A hi nga fanelanga hi va tshike va famba.’ Kutani yena ni vavanuna vakwe va sungule ku hlongorisa Vaisrayele.

Yehovha a a kongomisa vanhu vakwe hi ku tirhisa papa ninhlikanhi kasi nivusiku a a tirhisa ndzilo. U va kongomise eLwandle ro Tshwuka naswona u va byele leswaku va dzima mixaxa.

Kutani Vaisrayele va vone Faro ni masocha yakwe va ri karhi va va hlongorisa. Va tikume va ri exikarhi ka lwandle ni masocha ya Vaegipta, ku nga ha ri na lexi a va ta xi endla. Va rilele Muxe va ku: ‘Hi ta fa! A wu fanele u hi tshike eEgipta.’ Kambe Muxe u te: ‘Mi nga chavi. Yimani mi vona ndlela leyi Yehovha a nga ta hi ponisa ha yona.’ Muxe a a tshemba Yehovha hi mbilu yakwe hinkwayo, a hi swona?

Yehovha u byele Vaisrayele leswaku va hahlula mixaxa. Hi vusiku byebyo, Yehovha u endle leswaku ku va ni papa exikarhi ka Vaegipta ni Vaisrayele. Etlhelo ra Vaegipta a ku ri ni munyama. Kambe etlhelo ra Vaisrayele a ku ri ni ku vonakala.

Yehovha u byele Muxe leswaku a tshambulutela voko rakwe elwandle. Kutani Yehovha u endle leswaku ku va ni moya wa matimba vusiku hinkwabyo. Lwandle ri avanile kutani ku va ni ndlela exikarhi ka rona. Vaisrayele va timiliyoni a va famba endhawini leyi omeke exikarhi ka lwandle.

Loko masocha ya Faro ma vona Vaisrayele va famba exikarhi ka lwandle, ma va sale endzhaku. Hiloko Yehovha a endla leswaku masocha wolawo ma pfilunganyeka. Makalichi ya wona ma sungule ku hlomuka mavhilwa. Masocha wolawo ma huwelerile ma ku: ‘A hi humeni laha! Yehovha u le ku va lweleni.’

Yehovha u byele Muxe a ku: ‘Tshambulutela voko ra wena elwandle.’ Hi ku hatlisa mati ya lwandle ma funengete masocha ya Vaegipta. Faro swin’we ni masocha yakwe hinkwawo va file. A ku ponanga munhu.

Eribuweni ra lwandle, vanhu vo tala swinene a va ri karhi va dzunisa Xikwembu hi risimu va ku: “Yimbelelela Yehovha, hikuva u hlule hi ndlela yo hlamarisa. U hoxe hanci ni mugadi wa yona elwandle.” Loko vanhu va ri karhi va yimbelela, vavasati a va chaya swingomana va tlhela va cina. Hinkwavo a va tsakile hileswi a va tshunxiwile.

Endzhaku ka kwalomu ka tin’hweti timbirhi Vaisrayele va hume Egipta, va fike eNtshaveni ya Sinayi kutani va dzima mixaxa. Yehovha u vitane Muxe loyi a yeke entshaveni kutani a ku eka yena: ‘Ndzi ponise Vaisrayele. Loko vo ndzi yingisa va tlhela va hlayisa milawu ya mina, va ta va vanhu va mina vo hlawuleka.’ Hiloko Muxe a tlhelela eka Vaisrayele kutani a va byela leswi Yehovha a swi vuleke. Xana va te yini? Va te: ‘Hi ta endla hinkwaswo leswi Yehovha a hi byelaka leswaku hi swi endla.’

Muxe u tlhele a tlhelela entshaveni. Kwalaho Yehovha u te: ‘Ndzi ta vulavula na wena endzhaku ka masiku manharhu. Tsundzuxa vanhu volavo leswaku va nga ringeti ku khandziya Ntshava ya Sinayi.’ Muxe u rhelerile kutani a byela Vaisrayele leswaku va lunghekela ku twa leswi Yehovha a nga ta swi vula.

Endzhaku ka masiku manharhu, Vaisrayele va vone rihati ni papa ra ntima entshaveni. Va tlhele va twa ku dzindza lokukulu ni mpfumawulo wa mhalamhala. Kutani Yehovha a rhelela entshaveni hi ndzilo. Vaisrayele a va chuhile swinene lerova va rhurhumela. Ntshava hinkwayo a yi ninginika swinene naswona a yi funengete hi musi. Mpfumawulo wa mhalamhala a wu ya wu twala swinene. Kutani Xikwembu xi te: ‘Hi mina Yehovha. Mi nga tshuki mi gandzela swikwembu swin’wana.’

Muxe u tlhelele entshaveni kutani Yehovha a n’wi nyika milawu leswaku a yi byela vanhu malunghana ni ndlela leyi va faneleke va N’wi gandzela ha yona ni leyi va faneleke va tikhoma ha yona. Muxe u yi tsale hansi milawu yoleyo ivi a yi hlayela Vaisrayele. Va tshembise va ku: ‘Hi ta endla hinkwaswo leswi Yehovha a hi byeleke leswaku hi swi endla.’ A va endle xitshembiso eka Xikwembu. Kambe xana a va ta xi hetisisa?

Yehovha u byele Muxe a ku: ‘Tana eka mina entshaveni. Ndzi ta tsala milawu ya mina eka swiphepherhele swa maribye kutani ndzi ku nyika swona.’ Muxe u khandziye ntshava kutani a tshama kwalaho ku ringana masiku ya 40 ni vusiku bya 40. Loko a ha ri kwalaho, Yehovha u tsale Milawu ya Khume eka swiphepherhele swimbirhi swa maribye kutani a swi nyika Muxe.

Endzhaku ka nkarhi, Vaisrayele a va anakanya leswaku Muxe u va siyile. Va byele Aroni va ku: ‘Hi lava loyi a nga ta hi rhangela. Hi endlele xikwembu!’ Aroni u te: ‘Ndzi nyikeni nsuku wa n’wina.’ U n’okise nsuku wolowo kutani a endla xifaniso xa rhole. Vanhu va te: ‘Rhole leri i Xikwembu xa hina lexi hi rhangeleke leswaku hi huma Egipta!’ Va sungule ku gandzela rhole ra nsuku va tlhela va endla ni nkhuvo. Xana sweswo a swi hoxile? Ina hikuva vanhu a va tshembise Yehovha leswaku va ta gandzela yena ntsena. Kambe sweswi a va nga ha xi hetisisi xitshembiso xexo.

Yehovha a a swi vona leswi a swi ri karhi swi humelela kutani u byele Muxe a ku: ‘Famba u ya eka vanhu. A va ndzi yingisi naswona va gandzela xikwembu xa mavunwa.’ Muxe u rhelele hi ku hatlisa entshaveni, a khome swiphepherhele swimbirhi.

Loko Muxe a ri ekusuhi ni mixaxa, u twe vanhu va ri karhi va yimbelela. Kutani u va vone va ri karhi va cina ni ku tlhela va khinsamela rhole. Muxe a a hlundzukile swinene. U lahlele swiphepherhele sweswo swimbirhi ehansi kutani swi fayeka. U faye xifaniso xexo hi nkarhi wolowo. Hiloko a vutisa Aroni a ku: ‘Xana vanhu lava va ku khorwise njhani leswaku u endla nchumu wo biha wo fana ni lowu?’ Aroni u te: ‘U nga hlundzuki. Wa swi tiva leswaku vanhu lava va njhani. A va lava xikwembu kutani ndzi hoxe nsuku wa vona endzilweni ivi ku huma rhole leri!’ Aroni a a nga fanelanga a endle tano. Muxe u tlhelele entshaveni kutani a kombela Yehovha leswaku a rivalela vanhu vakwe.

Yehovha u rivalele lava a va tiyimisele ku n’wi yingisa. Xana wa swi vona leswaku a swi ri swa nkoka ku fikela kwihi eka Vaisrayele leswaku va yingisa nkongomiso wa Muxe?

Loko Muxe a ri eNtshaveni ya Sinayi, Yehovha u n’wi byele leswaku a aka tende ro hlawuleka leri vuriwaka tabernakela, laha Vaisrayele a va ta N’wi gandzela kona. A va ta kota ku rhwala tabernakela loko va ri karhi va famba.

Yehovha u te: ‘Byela vanhu leswaku va nyikela hi leswi va nga swi kotaka leswaku ku akiwa tabernakela.’ Vaisrayele va nyikele hi nsuku, silivhere, koporo, maribye ya risima ni swin’wetsin’wetsi. Va tlhele va nyikela hi voya, malapi, madzovo ya swiharhi ni hi swilo swin’wana swo tala. Va nyikele lerova Muxe a kala a ku: ‘Swi ringene! Mi nga ha tisi swin’wana.’

Vavanuna ni vavasati vo tala lava nga ni vuswikoti va pfunetile eku akiweni ka tabernakela. Yehovha u endle leswaku va va ni vutlhari byo endla ntirho wolowo. Van’wana a va rhunga va tlhela va luka. Van’wana a va veka maribye, va tirha hi nsuku kumbe mitsandza leyi vatliweke.

Vanhu va ake tabernakela hilaha Yehovha a va byeleke hakona. Va endle lapi ro saseka leri a ri avanyisa tabernakela hi swiyenge swimbirhi, ku nga Ndhawu yo Kwetsima ni Ndhawu yo Kwetsima Ngopfu. ENdhawini yo Kwetsima Ngopfu a ku ri ni areka ya ntwanano leyi endliweke hi ntsandza wa munga ni nsuku. ENdhawini yo Kwetsima a ku ri ni xo tlhoma rivoni xa nsuku, tafula ni alitari yo hisela murhi wa risuna. Endhawini leyi nga erivaleni a ku ri ni xihlambelo xa koporo ni alitari leyikulu. Areka ya ntwanano a yi tsundzuxa Vaisrayele xitshembiso lexi va xi endleke xo yingisa Yehovha. Xana wa swi tiva leswaku ntwanano i yini? I xitshembiso xo hlawuleka.

Yehovha u hlawule Aroni ni vana vakwe va majaha leswaku va tirha etabernakeleni tanihi vaprista. A va fanele va yi khathalela ni ku tlhela va nyikela magandzelo eka Yehovha eka yona. I Aroni ntsena loyi a a ri muprista lonkulu, loyi a a pfumeleriwa ku nghena eNdhawini yo Kwetsima Ngopfu. A a endla leswi kan’we hi lembe leswaku a nyikela gandzelo ra swidyoho swakwe, swa ndyangu wakwe ni swa tiko hinkwaro ra Israyele.

Vaisrayele va hete tabernakela endzhaku ka loko va ri ni lembe va hume Egipta. Sweswi se a va ri ni ndhawu yo gandzela Yehovha eka yona.

Yehovha u endle leswaku tabernakela yi tala hi ku vangama kakwe naswona a ku ri ni papa leri a ri ri ehenhla ka yona. Loko ntsena papa ri ri ehenhla ka tabernakela, Vaisrayele a va nga ta ya helo. Kambe loko papa ri suka, a va swi tiva leswaku va fanele va famba. A va fanele va hahlula tabernakela kutani va landzela papa.

Vaisrayele va suke eNtshaveni ya Sinayi va famba hi le mananga ya Parani va ya endhawini leyi vuriwaka Kadexi. Kwalaho, Yehovha u byele Muxe a ku: ‘Rhuma vavanuna va 12, lava humaka eka rixaka rin’wana ni rin’wana leswaku va ya kambela tiko ra Kanana, ku nga tiko leri ndzi nga ta ri nyika Vaisrayele.’ Kutani Muxe u hlawule vavanuna va 12 ivi a ku: ‘Fambani etikweni ra Kanana, mi ya kamba loko ri ri tiko lerinene ro byala swakudya eka rona. Mi vona loko vanhu va kona va tsanile kumbe va ri ni matimba ni loko va tshama ematendeni kumbe emitini.’ Tinhlori ta 12 leti katsaka Yoxuwa na Kalebe ti sukile ti ya eKanana.

Endzhaku ka masiku ya 40, tinhlori ti vuye ni makuwa, magrenada ni madiriva. Tinhlori ti te: ‘I tiko lerinene, kambe vanhu va kona va ni matimba naswona miti ya vona yi ni makhumbi yo leha.’ Kutani Kalebe u te: ‘Hi nga va hlula. A hi nambeni hi famba!’ Xana wa swi tiva leswaku ha yini Kalebe a vule sweswo? Hikuva yena na Yoxuwa a va tshemba Yehovha. Kambe tinhlori letin’wana ta khume ti te: ‘A hi yi! Vanhu lavaya i swihontlovila! Eka vona a hi fana ni tinjiya.’

Vaisrayele va hele matimba. Va sungule ku gungula naswona va byelana va ku: ‘A hi tihlawuleleni murhangeri un’wana kutani hi tlhelela Egipta. Ha yini hi fanele hi ya endhawini leyi leswaku hi ya dlayiwa?’ Kutani Yoxuwa na Kalebe va te: ‘Yingisani Yehovha naswona mi nga chavi. Yehovha u ta hi sirhelela.’ Kambe Vaisrayele a va yingisanga. A va lava hambi ku ri ku dlaya Yoxuwa na Kalebe!

Yehovha u endle yini? U byele Muxe a ku: ‘Vaisrayele a va ndzi yingisi hambiloko ndzi va endlele swilo swo tala. Kutani va ta tshama emananga malembe ya 40 naswona va ta fela kona. I vana va vona swin’we na Yoxuwa na Kalebe ntsena lava nga ta nghena etikweni leri ndzi tshembiseke ku va nyika rona.’

Endzhaku ka nkarhi loko Vaisrayele va ha ri emananga, Kora, Dathani, Abirama ni vanhu van’wana va 250 va xandzukele Muxe. Va te: ‘Hi karhele hi wena! Ha yini u fanele u va murhangeri wa hina kutani Aroni a va muprista lonkulu? Yehovha u na hina hinkwerhu, ku nga ri wena na Aroni ntsena.’ A swi n’wi tsakisanga Yehovha sweswo. U swi teke swi fana niloko va xandzukela yena!

Muxe u byele Kora ni vaseketeri vakwe a ku: ‘Mundzuku tanani etabernakeleni, mi ta ni swilo swa n’wina swo tamela ndzilo swi ri ni murhi wa risuna. Yehovha u ta hi komba loyi a n’wi hlawuleke.’

Hi siku leri landzelaka, Kora ni vavanuna va 250 va ye va ya hlangana na Muxe etabernakeleni. Va fike va hisa mirhi ya risuna onge hiloko va ri vaprista. Yehovha u byele Muxe na Aroni a ku: ‘Tihambaniseni na Kora ni vavanuna vakwe.’

Hambileswi Kora a yeke eka Muxe etabernakeleni, Dathani, Abirama ni mindyangu ya vona va ale ku ya. Yehovha u byele Vaisrayele leswaku va suka ematendeni ya Kora, Dathani na Abirama. Hi ku hatlisa, Vaisrayele va sukile. Dathani, Abirama ni mindyangu ya vona a va yime ehandle ka matende ya vona. Hi ku copeta ka tihlo misava yi pfulekile kutani yi va mita! Etabernakeleni, ku ve ni ndzilo lowu a wu huma etilweni kutani wu hisa Kora ni vavanuna vakwe va 250.

Endzhaku ka sweswo Yehovha u byele Muxe a ku: ‘Teka nhonga ya murhangeri un’wana ni un’wana wa rixaka kutani u tsala vito ra yena eka yona. Kambe eka nhonga ya rixaka ra Levhi, tsala vito ra Aroni. Ti veke endzeni ka tabernakela naswona nhonga ya wanuna loyi ndzi n’wi hlawuleke yi ta mila swiluva.’

Hi siku leri landzelaka, Muxe u te ni tinhonga hinkwato kutani a ti komba varhangeri. Nhonga ya Aroni a yi ri ni swiluva ni tialmondi leti wupfeke. Hi ndlela yoleyo, Yehovha a a tiyisekisa leswaku u hlawule Aroni ku va muprista lonkulu.