“Minkarhi Yin’wana Ndzi Vona Onge Ndza Lorha!”

Lourdes u languta doroba hi fasitere ra yindlu yakwe, a tikhome nomu lowu tshavatanaka. I wansati wa le Latin-Amerika loyi a xanisiweke hi nuna wakwe la rhandzaka madzolonga, la vuriwaka Alfredo, hi malembe lama tlulaka 20. Alfredo u pfuniwile leswaku a cinca. Kambe, swa ha n’wi tikela Lourdes ku vulavula hi ku vava loku a ku tweke.

Lourdes u vula hi rito ra le hansi a ku: “Swi sungule hi ri ni mavhiki mambirhi hi tekanile. U tshame a ndzi gula meno mambirhi. Siku rin’wana ndzi tshame ndzi vhika, kutani xibakela xakwe xi ya mbeya wodurobo. Kambe leswi a swi vava ngopfu hiloko a ndzi khovolela. A ndzi vitana ‘thyaka ra thyaka’ naswona a ndzi khoma onge ndzo va phuphula. A ndzi lava ku n’wi siya, kambe a ndzi ta n’wi siya njhani ndzi ri ni vana vanharhu?”

Alfredo u mbuwetela Lourdes. U ri: “Mina ndzi mutivi lonkulu. Ndzi khomiwe hi tingana loko ndzi nyikiwa papila leri ndzi vitanelaka ehubyeni kutani ndzi lerisiwa leswaku ndzi nga bi nsati wa mina. Ndzi ringetile ku cinca, kambe matshalatshala ya mina a ma tlhaveriwanga hi dyambu.”

Xana swilo swi cince njhani? Lourdes, loyi sweswi a vonakaka a tsakilenyana wa hlamusela: “Wansati la tshamaka ekhonweni ya vhengele leriya i Mbhoni ya Yehovha. U kombele ku ndzi pfuna leswaku ndzi twisisa Bibele. Ndzi dyondze leswaku Yehovha Xikwembu u teka vavasati va ri va risima. Ndzi sungule ku va kona eminhlanganweni ya Timbhoni ta Yehovha, hambileswi Alfredo a a hlundzuka eku sunguleni. A ku ri nchumu lowuntshwa eka mina ku va ni vunghana ni van’wana eHolweni ya Mfumo. Ndzi hlamarile ku xiya leswaku a ndzi ri ni lunghelo ro kholwa tidyondzo leti ndzi lavaka ku ti kholwa, ni lunghelo ra ku ti vulavula ndzi ntshunxekile, hambi ku ri ku ti dyondzisa van’wana. Ndzi xiye leswaku ndzi wa risima emahlweni ka Xikwembu. Leswi swi ndzi nyike xivindzi.

“Timhaka ti cince hi ndlela leyi ndzi nga taka ndzi nga yi rivali. Alfredo a ha ya eka Masa ya Khatoliki Sonto yin’wana ni yin’wana, naswona a a nga swi rhandzi leswi a ndzi swi endla ni Timbhoni ta Yehovha. Ndzi n’wi langute hi ku kongoma ni xivindzi kutani hi ku titsongahata ndzi ku: ‘Alfredo, leswi u swi ehleketaka a hi swona leswi ndzi swi ehleketaka.’ Naswona a nga ndzi banga! Endzhaku ka loko se ndzi khuvuriwile, ku hele malembe ya ntlhanu a nga si ndzi ba.”

Kambe leswikulu a swa ha ta. Alfredo wa hlamusela: “Endzhaku ka malembe manharhu Lourdes a khuvuriwile, munghana wa mina la nga Mbhoni ya Yehovha u n’wi rhambele ekaya rakwe, kutani u ndzi hlamusele timhaka to tsakisa leti kumekaka eBibeleni. Ndzi sungule ku dyondza na yena Bibele nsati wa mina a nga swi tivi. Ku nga ri kungani a ndzi famba na Lourdes eminhlanganweni. Tinkulumo to tala leti ndzi titweke eminhlanganweni yoleyo a ti vulavula hi vutomi bya ndyangu, naswona hakanyingi a ti khomisa tingana.”

Alfredo u tsakisiwe hi ku vona swirho swa vandlha, ku katsa ni swa xinuna, swi ri karhi swi kukula endzhaku ka minhlangano. Loko a endzela emakaya ya swona, u vone vavanuna va pfuna vasati va vona ku hlantswa swibya. Swiendlo leswi leswitsongo swi kombise Alfredo ndlela leyi rirhandzu ra ntiyiso ri kombisiwaka ha yona.

Endzhakunyana ka nkarhi, Alfredo u khuvuriwile, naswona yena ni nsati wakwe i vatirheli va nkarhi hinkwawo sweswi. Lourdes u ri: “Minkarhi yo tala wa ndzi pfuna ku susa swibya etafuleni loko hi heta ku dya ni ku deka mubedo. Wa ndzi bumabumela loko ndzi swekile, naswona wa ndzi tshika ndzi hlawula leswi ndzi swi rhandzaka—ku fana ni vuyimbeleri lebyi ndzi rhandzaka ku byi yingisa kumbe swilo leswi hi lavaka ku swi xava swa le ndlwini. Alfredo a a nga ta pfuka a swi endlile leswi eku sunguleni! Sweswinyana, a ku ri ro sungula a ndzi xavela xiputsa xa swiluva. Minkarhi yin’wana ndzi vona onge ndza lorha!”

[Xifaniso lexi nga eka tluka 10]

“Ndzi swi lemukile leswaku Xikwembu xi ndzi teka ndzi ri wa risima. Sweswo swi ndzi nyike xivindzi”

[Xifaniso lexi nga eka tluka 10]

Alfredo a a tsakisiwe ngopfu hi ku vona swirho swa vandlha, ku katsa ni vavanuna, swi ri karhi swi kukula endzhaku ka minhlangano

[Xifaniso lexi nga eka tluka 10]

U vone vavanuna van’wana va ri karhi va pfuna vasati va vona ku hlantshwa swibya

[Xifaniso lexi nga eka tluka 10]

“Wa ha ku ndzi xavela xiputsa xa swiluva ro sungula”