Xiendlakalo xin’wana lexi kandziyisaka leswaku Rahele a a nga okelani ndzilo na Leya, hi loko Ruveni, n’wana wa Leya a kume timandrake. A ku anakanyiwa leswaku loko u dya mbhandzu lowu u ta kuma vana. Loko Rahele a kombela tin’wana ta tona, Leya u n’wi hlamule a hlundzukile a ku: “Xana i mhaka yitsongo leswi u nga ndzi tekela nuna wa mina, kasi sweswi u ndzi tekela ni timandrake ta n’wana wa mina?” Van’wana va anakanya leswaku marito ya Leya ma kombisa leswaku Yakobe a a heta nkarhi wo tala a ri na Rahele ku tlula lowu a wu hetaka na Leya. Kumbexana Rahele u vone ndlela leyi Leya a a hlundzuke ha yona, kutani a ku eka yena: “Hikwalaho ka sweswo u ta etlela na wena vusiku bya namuntlha leswaku ndzi kuma timandrake ta n’wana wa wena.” Loko Yakobe a vuya nimadyambu, Leya u te eka yena: “U ta etlela na mina, hikuva ndzi ku thole hi ku kongoma hi timandrake ta n’wana wa mina.”—Genesa 30:15, 16.

Timandrake a ti pfunanga. Endzhaku ka malembe ya tsevu Rahele a ri evukatini, u hetelele a ve ni n’wana kutani a n’wi thya Yosefa, hikuva Yehovha u n’wi “tsundzukile” kutani a hlamula xikhongelo xa yena. Hi nkarhi wolowo Rahele u te: “Xikwembu xi suse ndzhukano wa mina!”—Genesa 30:22-24.