“U Wansati Lonene Ngopfu”

Marito lawa yo bumabumela a ma kongomisiwe eka nhwanyana wa Mumowabu. A a ri noni leyi vitaniwaka Rhuti, n’wingi wa Nawomi, wansati wa Muisrayele. Rhuti loyi a hanyeke etikweni ra Israyele kwalomu ka malembe ya 3000 lama hundzeke, hi nkarhi wa ku fuma ka vaavanyisi, u tiendlele vito lerinene. (Rhuti 3:11) Xana ndhuma leyi leyinene u yi kumise ku yini? I vamani lava nga vuyeriwaka eka xikombiso xa yena?

Rhuti a a nga “dyi xinkwa xa vulolo,” a a tirha nkarhi wo leha hi ku gingiriteka tanihi mukhwaji emasin’wini, migingiriko leyi hi yona yi endleke leswaku a va ni ndhuma leyi. Hambiloko a vevukiseriwa ntirho, u hambete a tirha hi matimba ku tlula leswi a swi languteriwile eka yena. Leswi swi n’wi endla a faneriwa hi nhlamuselo ya le Bibeleni ya wansati la dzunekaka, la nga ni vuswikoti ni la gingiritekaka.—Swivuriso 31:10-31; Rhuti 2:7, 15-17.

I timfanelo ta Rhuti ta moya—ku titsongahata kakwe, langutelo ra yena ra ku tinyiketela ni rirhandzu ra yena ro tshembeka—leti endleke leswaku a va ni ndhuma leyinene. U siye vatswari vakwe ni tiko ra ka vona, a nga swi tivi leswaku a nga tlhela a kuma vukati lebyinene, kambe a nga swi lavanga ku hambana na Nawomi. Hi nkarhi lowu fanaka, Rhuti a a navela ku tirhela Yehovha, Xikwembu xa n’wingi wa yena. Loko Matsalwa ma kandziyisa ntikelo wakwe ma vula leswaku a “antsw[a] eka [Nawomi] ku tlula vana va nkombo.”—Rhuti 1:16, 17; 2:11, 12; 4:15.

Hambileswi rhekhodo ya Rhuti ya ku va lonene exikarhi ka vanghana va yena a yi xiyeka swinene, nchumu lowu xiyekaka ku tlurisa i ndlela leyi Xikwembu xi vulavulaka kahle ha yona hi timfanelo ta yena letinene, xi tlhela xi n’wi nyika lunghelo ro va kokwa wa Yesu Kreste. (Matewu 1:5; 1 Petro 3:4) Rhuti i xikombiso lexinene hakunene eka vavasati va Vakreste ni le ka vanhu hinkwavo lava vulaka leswaku va gandzela Yehovha!