Ku Vumbuluka Ka Babilona eNtshurini

3. Hlamusela vukulu bya Mfumo wa Misava wa Babilona.

³ Twana marito lawa ya Xikwembu lama tlhavaka mbilu: “Rhelela u tshama ehansi entshurini, Wena nhwana wa Babilona la nga tivangiki wanuna. Tshama ehansi emisaveni laha ku nga riki na xiluvelo, Wena nhwanyana wa Vakalidiya. Hikuva a swi nge he endleki leswaku vanhu va ku vitana lowo olova ni la tisasekiseke.” (Esaya 47:1) Se a swi hlaya malembe muti wa Babilona wu ri mfumo lowu lawulaka misava hinkwayo. A wu ri “xikhavisi xa mimfumo”—xitiko lexi hisaka hi tlhelo ra vukhongeri, mabindzu ni swa nyimpi. (Esaya 13:19) Loko se muti wa Babilona wu ri emaninginingini ya wona, mfumo wa wona wu nave wu kala wu ya khegela ndzilakano wa le dzongeni wa Egipta. Naswona loko wu hlula Yerusalema hi 607 B.C.E., a swi tikomba onge Xikwembu a xi nga ta swi kota ku xaxisa ku hlula ka wona! Kutani a wu tivona wu ri “nhwana” loyi a ku nga ri na tiko ni rin’we leri a ri ta n’wi mpfhumpfhela.b

4. Xana muti wa Babilona a wu ta humeleriwa hi yini?

⁴ Kambe vukosi bya “nhwana” loyi a tinyungubyisaka a byi ta dzudzeka a nga ha vi mfumo lowukulu wa misava, kutani a ‘tshamisiwa entshurini’ a khomiwe hi tingana. (Esaya 26:5) A a nga ha ta tekiwa a ri “lowo olova ni la tisasekiseke,” ku fana ni nkosikazi leyi khomiwaka bya tandza. Hikwalaho Yehovha u humesa xileriso lexi nge: “Teka ribye u sila mapa. Funungula nturhu wa wena. Hluvula nguvu yo leha. Funungula nenge. Pela milambu.” (Esaya 47:2) Leswi Babilona a a rhwale tiko hinkwaro ra Yuda a ya ri fumba evuhlongeni, se a ku ta khawurisiwa yena sweswi, a endliwa hlonga! Vameda ni Vaperesiya lava a va ta n’wi hudula exikhundlheni xakwe xa vuhosi, a va ta n’wi sindzisa hi nkani ya marahani leswaku a va endlela ntirho lowu a wu ta n’wi chicha xiyimo.