HI RIHI rito leri u nga ri hlawulaka leswaku u hlamusela vumunhu bya Yehovha Xikwembu? Hi lembe-xidzana ra vunhungu B.C.E., muprofeta Esaya u vone xivono lexi eka xona a tweke swivumbiwa swa moya swi dzunisa Yehovha, swi tirhisa rito leri hlamuselaka vumunhu Byakwe, ku nga ku kwetsima. Leswi Esaya a swi voneke ni ku swi twa swi fanele swi hi susumetela ku xixima Yehovha ni ku tshinela eka yena. Loko hi ri karhi hi kambisisa marito lama nga eka Esaya 6:1-3, tivone hi mahlo ya mianakanyo u ri kwalaho.

Esaya u tlhele a vona nchumu lowu kumbexana a wu nga si tshama wu voniwa hi munhu un’wana exivonweni. U te: “Ehenhla ka yena [Yehovha] a ku yime tiserafi. Yin’wana ni yin’wana a yi ri ni timpapa ta tsevu. Timbirhi a yi tifunengeta xikandza ha tona, timbirhi a yi tifunengeta milenge ha tona, kutani timbirhi a yi haha ha tona.” (Ndzimana 2) Tiserafi i swivumbiwa swa moya leswi nga ni xikhundlha lexi tlakukeke. Eka vatsari hinkwavo va Bibele, Esaya hi yena ntsena loyi a vulavuleke ha tona. Tiserafi ti tshama ti lunghekele ku endla xin’wana ni xin’wana lexi Yehovha a lavaka leswaku ti xi endla. Ti tifunengeta swikandza ni milenge ya tona leswaku ti xixima Yehovha, loyi ti nga ni lunghelo ro yima emahlweni ka yena.