Vutlhari Bya Vukwembu Xana Byi Voniwa Hi Ndlela Yihi?

“VUTLHARI bya loyi a pfumalaka byi languteriwa ehansi, ni marito yakwe a ma yingisiwi.” Hi marito lawa, Hosi Solomoni wo tlhariha a a gimeta mhaka ya munhu la titsongahataka kambe la tlhariheke, la poniseke muti hinkwawo leswaku wu nga lovisiwi. Kambe lexi twisaka ku vava, “a ku na munhu la tsundzukeke wanuna yoloye la pfumalaka.”—Eklesiasta 9:14-16.

Vanhu va tala ku va langutela ehansi vanhu lava pfumalaka, hambiloko swisiwana leswi swi endle mintirho yo hlamarisa. Yesu u humeleriwe hi mhaka leyi fanaka. Esaya u profete leswi malunghana na yena: “A a languteriwa ehansi, a papalatiwa hi vanhu, a a ri munhu wa switlhavi ni la tshamelaka ku vabya.” (Esaya 53:3) Yesu a a languteriwa ehansi hi vanhu van’wana hi leswi ntsena a a nga dumanga ku fana ni varhangeri lava tlakukeke va le sikwini rakwe. Kambe, a tlharihe ku tlula vanhu hinkwavo lava nga ni vudyoho. Vanhu va le tikweni ra ka va Yesu a va nga pfumeli leswaku “n’wana wa muvatli” u ni vutlhari byo tano naswona u endle mintirho ya matimba swonghasi. Kambe, xexo a ku ri xihoxo lexikulu, hikuva rungula ri ya emahlweni ri vula leswaku Yesu “a nga endlanga mintirho yo tala ya matimba hikwalaho ka ku pfumala ka vona ripfumelo.” Kunene vanhu volavo va lahlekeriwe ngopfu!—Matewu 13:54-58.

A hi xiyeni leswaku hi nga endli xihoxo lexi fanaka. Yesu u te: “Vutlhari byi kombisiwa byi ri lebyi lulameke hi mintirho ya byona.” Vanhu lava endlaka ntirho wa Xikwembu naswona va tswongaka vutlhari bya le tilweni a va hlawulekisiwi hi ndhuma kumbe xikhundla, kambe va hlawulekisiwa hi “mbhandzu lowunene” lowu va wu kombisaka—ku nga ripfumelo ra vona leri sekeriweke eBibeleni ni hi swiendlo swa vona.—Matewu 7:18-20; 11:19.