17, 18. Xana Yehovha u nyika nkongomiso hi ndlela yihi hambi ku ri eminkarhini ya maxangu?

¹⁷ Loko Esaya a ya emahlweni ni marito yakwe, u tsundzuxe vayingiseri vakwe leswaku ntshikilelo a wa ha ta. Eka vona “maxangu ma va xinkwa ni ntshikilelo wu va mati.” (Esaya 30:20a) Maxangu ni ntshikilelo lowu a va ta va na wona loko va hlaseriwa a wu ta toloveleka ku fana ni xinkwa ni mati. Hambiswiritano, Yehovha a a swi lunghekerile ku lamulela vanhu va timbilu letinene. “Muleteri wa n’wina Lonkulu a nge he tifihli naswona mahlo ya n’wina ma ta va mahlo lama vonaka Muleteri Lonkulu wa n’wina. Tindleve ta n’wina ti ta twa rito endzhaku ka n’wina ri ku: ‘Ndlela hi leyi. Fambani hi yona,’ loko mo tshuka mi ya exineneni kumbe mi tshuka mi ya eximatsini.”—Esaya 30:20b, 21.b

¹⁸ Yehovha hi yena “Muleteri . . . Lonkulu.” A nga kona mudyondzisi la fanaka na yena. Kambe, xana vanhu va n’wi ‘vona’ ni ku n’wi “twa” hi ndlela yihi? Yehovha u tipaluxa hi ku tirhisa vaprofeta va yena, lava marito ya vona ma tsariweke eBibeleni. (Amosi 3:6, 7) Namuntlha, loko vagandzeri vo tshembeka va hlaya Bibele, swi fana ni loko rito ra Xikwembu leri kotisaka ra tatana ri va byela ndlela leyi va faneleke va famba ha yona ni ku va khutaza leswaku va lulamisa ndlela leyi va tikhomaka ha yona leswaku va ta famba eka yona. Mukreste un’wana ni un’wana u fanele a yingisa khwatsi loko Yehovha a vulavula hi ku tirhisa Bibele ni hi ku tirhisa tibuku leti sekeriweke eBibeleni leti lunghiseleriwaka hi “hlonga ro tshembeka ni ro tlhariha.” (Matewu 24:45-47) Onge un’wana ni un’wana a nga tikarhatela ku dyondza Bibele, hikuva ‘swi vula vutomi bya yena.’—Deteronoma 32:46, 47; Esaya 48:17.