Vuprofeta byo sungula: “Hikwalaho ka leswi mi [Vaisrayele] nga ma yingisangiki marito ya mina [Xikwembu], . . . ndzi [mi] rhumela eka Nebukadretsara hosi ya Babilona, . . . naswona ndzi ta va tisa [Vababilona] va ta lwa ni tiko leri ni vaaki va rona . . . Kutani tiko leri hinkwaro ri ta va ndhawu leyi onhakeke, ri va xihlamariso, kutani matiko lawa ma ta tirhela hosi ya Babilona malembe ya 70.”—Yeremiya 25:8-11.

Ku hetiseka ka byona: Nebukadnetsara u hlasele muti wa Yerusalema hi 607 B.C.E., endzhaku ka masiku yo hlayanyana a wu rhendzerile. U tlhele a hlula miti yin’wana ya le Yudiya, ku katsa ni wa Lakixi ni wa Azeka. (Yeremiya 34:6, 7) Lava poneke u va yise eBabilona leswaku va ya heta malembe ya 70 va ri mahlonga.

● Buku leyi nge The Bible and Archaeology yi vula leswaku vuyimburi ni minkambisiso ya le Lakixi swi kombisa leswi: “Ndzoviso wo hetelela a wu ri ni madzolonga naswona ndzilo lowu heriseke muti [wa Lakixi] a wu ri ni matimba lerova makhumbi lama chuchutiweke ya miako ma ve nkuma.”