Xana A A Ku Ri Vamani “Tintlhari Tinharhu Ta Le Vuxeni”?

Swivono leswi kombisaka ta ku velekiwa ka Yesu, hakanyingi swi kombisa vavanuna vanharhu lava ambaleke swiambalo swo hatima va ri ni tikamela ta vona, va fika exivaleni laha Yesu a latiweke exidyelweni. Vaendzi lava va ambaleke leswo hatima hakanyingi va vitaniwa tintlhari tinharhu ta le vuxeni. Xana Bibele yi ri yini ha vona?

Hi ku ya hi Bibele, lava va vuriwaka vavanuna vo tlhariha a va ‘huma etindhawini ta le vuxeni,’ naswona hi kona laha va tweke hi ta ku velekiwa ka Yesu. (Matewu 2:1, 2, 9) Va fanele va teke nkarhi wo leha ku ya eYudiya. Loko va hetelele va kume Yesu, a a nga ha ri ricece leri a ri ri exivaleni. Kambe vavanuna lava va kume Mariya ni “n’wana lontsongo” endlwini.—Matewu 2:11.

Bibele yi vitana vavanuna lava leswaku i tintlhari ta le vuxeni, kumbe “vangoma va swilo swa le mpfhukeni,” naswona a yi boxi leswaku a va ri vangani. The Oxford Companion to the Bible yi ri: “Ku fambisana exikarhi ka masalamusi ni vungoma bya swilo swa le mpfhukeni byi tikombise loko vaendzi lava va xiye nyeleti leyi yi va kongomiseke eBetlehema.” Bibele yi ala masalamusi hinkwawo ni mukhuva wa le Babilona wo ringeta ku kuma rungula eka tinyeleti.—Deteronoma 18:10-12; Esaya 47:13.

Rungula leri byeriweke vavanuna lava a ri tisanga vuyelo lebyinene. Ri pfuxe vukarhi bya Hosi Heroda. Leswi swi vangele leswaku Yosefa, Mariya na Yesu va balekela aEgipta kutani ku sala ku dlayeteriwa vana va vafana hinkwavo va le Betlehema “lava sukelaka eka malembe mambirhi hi vukhale ku ya ehansi.” Heroda u ringete ku kumisisa siku ra ku velekiwa ka Yesu endzhaku ka loko a twe leswi vuriweke hi vangoma va swilo swa le mpfhukeni. (Matewu 2:16) Loko hi languta mpfilumpfilu lowu vangiweke hi ku endza ka vona, swa twala ku gimeta hileswaku nyeleti leyi va yi voneke ni mahungu ya ta “loyi a nga velekeriwa ku va hosi ya Vayuda” a ma huma eka Sathana Diyavulosi, nala wa Xikwembu, loyi a a lava ku dlaya Yesu.—Matewu 2:1, 2.