Tinyiko Leti A Ti Fanela Ku Va Ti Nyikiwa Hosi

XANA hi yihi nyiko leyi u nga yi hlawulelaka munhu wa nkoka leswaku u n’wi nyika yona? Eminkarhini ya ku tsariwa ka Bibele mirhi yin’wana yo nun’hwela a yi ri ya nkoka ku fana ni nsuku—a yi ri ya nkoka swinene lerova a yi fanela ku va yi nyikiwa hosi.a Hi yona mhaka leyi tinyiko timbirhi leti vangoma va swilo swa le mpfhukeni va ti nyikeke “hosi ya Vayuda” a ku ri mirhi yo nun’hwela.—Matewu 2:1, 2, 11.

Bibele yi tlhela yi vula leswaku loko hosi ya xisati ya le Xeba yi endzela Solomoni, “yi [nyike] hosi titalenta ta nsuku ta 120, ni mafurha ya balsama yo tala ngopfu ni maribye ya risima; a ma vanga kona mafurha ya balsama lama fanaka ni lawa hosi ya xisati ya Xeba yi ma nyikeke Hosi Solomoni.”b (2 Tikronika 9:9) Tihosi na tona ti rhumele Solomoni mafurha ya balsama ku kombisa leswaku ta n’wi amukela.—2 Tikronika 9:23, 24.

Ha yini mirhi yoleyo yo nun’hwela ni swimilana a swi ri swilo swa nkoka ni leswi durhaka eminkarhini ya ku tsariwa ka Bibele? Hikuva a swi tirhisiwa eka mintirho ya nkoka, yo tanihi ku sasekisa, eka mintirho ya vukhongeri ni le ka swilahlo. (Hlaya bokisi leri nge, “Ku Tirhisiwa Ka Mirhi Yo Nun’hwela Eminkarhini Ya Ku Tsariwa Ka Bibele.”) Handle ka ku va yi laviwa swinene, mirhi yo nun’hwela a yi durha ku yi xava ni ku yi yisa endhawini yin’wana.

KU YA EKWANDZASINI RA ARABIYA

Hi minkarhi ya ku tsariwa ka Bibele, swimilana swin’wana swo nun’hwela a swi mila eNkoveni wa Yordani. Kambe, swin’wana a swi xaviwa ematikweni man’wana. Bibele yi vulavula hi mixaka yo hambanahambana ya mirhi yo nun’hwela. Eka leyi tolovelekeke ku na safroni, mhangani, sinamoni, mirhi ya risuna ni mira. Handle ka leyi, ku na leyi a yi cheriwa eka swakudya ku nga kumini, ntungufana ni aneta.

Xana mirhi yo nun’hwela leyi a yi nga tolovelekanga a yi huma kwihi? Timhangani, khasiya ni sinamoni a yi huma laha namuntlha ku nga Chayina, Indiya ni le Sri Lanka. Mirhi yo nun’hwela yo fana ni mira ni mirhi ya risuna yi kumeka emirhini ni le ka swimilana leswi milaka endhawini leyi nga kwandzasi ku sukela edzongeni wa Arabiya ku ya fika le Somalia laha Afrika. Kasi narda yi huma eIndiya naswona a yi kumeka etintshaveni ta Himalaya.

Leswaku yi fika eIsrayele, mirhi yo tala yo nun’hwela yi tleketliwa yi tsemakanyisiwa Arabiya. Hikokwalaho ka sweswo, emalembeni ya va-2000 na va-1000 B.C.E., buku leyi nge, The Book of Spices yi vula leswaku Arabiya “hi yona a yi tleketla nhundzu ku suka eVuxeni ni le Vupela-dyambu.” Madoroba ya khale, makhokholo ni laha tikharavhani a ti yima kona a swi kumeka eNegev le dzongeni wa Israyele laha a ku ri ni mimfungho leyi a yi kombisa laha van’wamabindzu a va yima kona. Xiviko xa World Heritage Centre of UNESCO xi vula leswaku tindhawu leti ti tlhela ti “kombisa laha a ku kumiwa mali yo tala kona . . . ku suka edzongeni wa Arabiya ku ya eMediteraniya.”

Nkarhi na nkarhi tikharavhani leti a ti rhwale mirhi yo nun’hwela a ti famba tikhilomitara ta kwalomu ka 1 800 ti tsemakanya eArabiya. (Yobo 6:19) Bibele yi vulavula hi tikharavhani ta van’wamabindzu va Vaiximayele lava a va rhwale mirhi yo nun’hwela yo fana ni “labidanumi, balsama ni rihanti ra nhlaka” va huma na swona eGiliyadi va ya aEgipta. (Genesa 37:25) Vana va Yakobe va majaha va xavise Yosefa leswaku a ya va hlonga eka vanhu lava.