Ku nga si hela tin’hweti tinharhu, ndhuna-nkulu ya Murhoma leyi lawulaka Siriya, ku nga Cestius Gallus, u gwirimile a ya edzongeni a ri ni masocha yo ringana 30 000 leswaku a ya herisa nxandzuko wa Vayuda. Vuthu ra yena ri fike eYerusalema hi nkarhi wa Nkhuvo wa Mitsonga naswona hi ku hatlisa ri nghene emitini leyi rhendzeleke ntsindza. Kutani vaxandzuki va Vayuda lava a va ri vatsongo loko va ringanisiwa ni vuthu leri, va ye va ya tumbela ekhokholweni ra tempele. Hiloko masocha ya Varhoma ma sungula ku wisa khumbi ra tempele. Vayuda va chuhile. Phela, masocha ya vahedeni se a ma nyamisa ndhawu ya Vayuda leyi kwetsimaka ngopfu! Kambe Vakreste lava nga emutini wolowo va tsundzuke marito ya Yesu loko a ku: ‘Loko mi vona nchumu lowu nyenyetsaka lowu onhetelaka, wu yime endhawini yo kwetsima, kutani lava nga eYudiya a va balekele etintshaveni.’ (Matewu 24:15, 16) Xana a va ta va ni ripfumelo eka marito ya vuprofeta ya Yesu kutani va teka goza hi ku hatlisa? Phela vutomi bya vona a byi titshege hi ku endla tano. Kambe a va ta swi endla njhani?

Hi xitshuketa, ku ri hava ni xivangelo, Cestius Gallus u humese mavuthu ya yena a kongoma eribuweni ra lwandle, vaxandzuki va Vayuda va n’wi sale endzhaku va n’wi hlongorisa. Lexi hlamarisaka, masiku ya nhlomulo emutini ma hungutiwile! Vakreste va ve ni ripfumelo loko va yingise xilemukiso xa vuprofeta xa Yesu, xa ku baleka eYerusalema va ya ePela, emutini lowu a wu ri exikarhi ka tintshava entsungeni wa Nambu wa Yordani. Ku baleka ka vona ku fike hi nkarhi. Endzhakunyana vaxandzuki va Vayuda va tlhelele eYerusalema kutani va sindzisa vaaki lava saleke leswaku va hlanganyela na vona eka nxandzuko.a Hi nkarhi wolowo, Vakreste lava hlayisekeke ePela, va rindzile va vona leswi nga ta endleka endzhaku.