6, 7. Hi byihi vumbhoni bya leswaku Yesu a a nga tshami hi mavoko?

⁶ I khale Yesu a ri karhi a tirha hi matimba. Loko a nga si ta emisaveni u tirhe ni Xikwembu eku vumbeni ka swilo hinkwaswo “ematilweni ni le henhla ka misava,” a ri “mutirhi la nga ni vuswikoti.” (Swivuriso 8:22-31; Vakolosa 1:15-17) Loko a ri laha misaveni, u ye emahlweni a tirha hi matimba. Evuntshweni bya yena u dyondze ntirho wo aka hiloko a tiveka tanihi “muvatli.”a (Marka 6:3) Ntirho lowu a ku nga ri matlangwana naswona a wu lava leswaku munhu a va ni vutivi bya swilo swin’wana—ngopfu-ngopfu leswi hi nkarhi wolowo a ku nga ri na michini yo tsema timhandzi ni ya gezi swin’we ni switolo swo xavisa nhundzu yo aka. Anakanya Yesu a nghena enhoveni a ya tsema timhandzi kutani a ti koka a vuya na tona laha a nga ta vatlela kona! Anakanya a ri karhi a aka tindlu, a belela timhandzi ta lwangu, a endla minyangwa a tlhela a vatla fanichara ya yindlu yoleyo! A swi kanakanisi leswaku u wu tsakerile ntirho lowu a wu endleke hi vutshila.