Watchtower LAYIBURARI YA LE KA WEB SITE

“Va Tsaka Swinene Ni Ku Tala Moya Lowo Kwetsima”

“Komba Vumbhoni Lebyi Heleleke” Hi Mfumo Wa Xikwembu
- 5. Xana Barnaba na Sawulo va boheke ku endla yini leswaku va kota ku chumayela exihlaleni xa Kipra?
  
  ⁵ Barnaba na Sawulo va fambe hi milenge va ya ehlalukweni ra Selukiya, ekusuhi ni le Antiyoka kutani va khandziya xikepe lexi yaka exihlaleni xa Kipra, ku nga mpfhuka lowu nga vaka tikhilomitara ta kwalomu ka 200.d Tanihi leswi Barnaba a a ri muaki wa le Kipra, a swi kanakanisi leswaku a a swi langutele hi mahlo-ngati ku ya chumayela mahungu lamanene eka vanhu va rikwavo. Loko va fika emutini lowu nga le ribuweni ra le vuxeni bya xihlala xexo wa Salami, a va ha yimayimanga. Va nambe “va sungula ku dyondzisa rito ra Xikwembu emasinagogeni ya Vayuda.”e (Mit. 13:5) Barnaba na Sawulo va fambe xihlala hinkwaxo xa Kipra, swi nga endleka leswaku loko va ri karhi va famba, a va chumayela miti leyikulu ya xihlala xexo. A swi tiveki leswaku hi yihi ndlela leyi va fambeke hi yona kambe swi nga endleka leswaku va be hi nenge tikhilomitara ta kwalomu ka 220!
  
  EMASINAGOGENI YA VAYUDA
  
  Hi ku kongoma rito leri nge, “sinagoga” ri vula ku “hlanganisa.” Ri vula nhlengeletano kumbe vandlha ra Vayuda naswona ri hetelele ri vula ndhawu kumbe muako lowu nhlengeletano a yi khomeriwa kona.
  
  Ku vuriwa leswaku tisinagoga ti sunguriwe loko Vayuda va ri evuhlongeni eBabilona, laha va heteke malembe ya 70, kumbe loko va ha ku huma kona. Etisinagogeni vanhu a va leteriwa, va gandzela, va hlayeriwa Matsalwa ni ku khutaziwa. Hi lembe-xidzana ro sungula muti wun’wana ni wun’wana wa le Palestina a wu ri ni sinagoga ya wona. Emitini leyikulu a ku ri ni tisinagoga to tlula yin’we naswona eYerusalema a ti tele.
  
  A hi Vayuda hinkwawo lava tlheleleke ePalestina loko va ntshunxiwa evuhlongeni bya le Babilona. Vo tala va rhurhele ematikweni man’wana hi timhaka ta mabindzu. Vayuda va sungule ku kumeka eswifundzheni swa 127 swa Mfumo wa Peresiya ku sukela hi lembe-xidzana ra vuntlhanu B.C.E. (Est. 1:1; 3:8) Hi ku famba ka nkarhi miganga ya Vayuda a yi kumeka exifundzheni hinkwaxo xa Mediteraniya. Vayuda lava tshameke etindhawini to hambana-hambana ePalestina a va simeka tisinagoga hinkwako laha a va fika va tshama kona.
  
  Etisinagogeni a ku hlayiwa Nawu wu tlhela wu hlamuseriwa Savata yin’wana ni yin’wana. Wanuna la hlayaka Nawu a a yima exitejini naswona vayingiseri va tshame exineneni, eximatsini ni le mahlweni ka yena. Wanuna un’wana na un’wana la nga Muyuda la tinyiketeleke evukhongerini bya Vayuda a a pfumeleriwa ku hlaya, ku chumayela ni ku khutaza.

“Va Tsaka Swinene Ni Ku Tala Moya Lowo Kwetsima”

“Komba Vumbhoni Lebyi Heleleke” Hi Mfumo Wa Xikwembu
- d Hi lembe-xidzana ro sungula, xikepe a xi famba tikhilomitara ta kwalomu ka 150 hi siku loko moya wu hungela laha xi yaka kona. Kambe loko xi langutane ni moya a xi hlwela ku fika laha xi yaka kona.