Leswi Nga Dyondziwaka Eka Matimu Ya Le Rhoma

“LOKO, ku fana ni vanhu, ndzi lwe ni swivandzana le Efesa.” Van’wana va ehleketa leswaku marito wolawo lama tsariweke eka 1 Vakorinto 15:32, ma vula leswaku muapostola Pawulo a a gweveriwe ku lwa erivaleni ra mintlango ra le Rhoma. Swi nga khathariseki leswaku u lwile kumbe a nga lwanga, hi nkarhi wolowo a swi tolovelekile leswaku munhu a lwa kukondza a fela etimbaleni ta mintlangu. Xana matimu ma hi byela yini malunghana ni timbala ta mintlango ni leswi a swi endliwa kona?

U nga ha vutisa, ‘I vamani lava a va dodombisana?’ Swi nga ha endleka leswaku a ku ri mahlonga, swigevenga leswi gweveriweke rifu, vabohiwa lava kumiweke enyimpini kumbe vavanuna va tiko lava a va rhandza ntsako kumbe va ri ni ntshembo wa leswaku va ta kuma ndhuma ni rifuwo. Hinkwavo a va leteriwa eswikolweni leswi fanaka ni khotso. Buku leyi nge Giochi e spettacoli (Mintlango Ni Swiendlakalo) yi vika leswaku lava nga eku leteriweni ko dodombisana “a va tshama va vekiwe tihlo hi varindzi naswona a va hanya ehansi ka milawu yo tika ni ku xupuriwa hi ndlela yo vava swinene . . . Hakanyingi ndlela leyi a va khomiwa ha yona a yi va vangela leswaku va tidlaya ni ku xandzuka.” Xikolo lexikulu xo dyondzisa ku dodombisana xa le Rhoma a xi ri ni switokisi leswi a swi rhurhela kwalomu ka gidi ra vabohiwa. Mubohiwa ha un’we a a ri ni vuswikoti byo karhi. Van’wana a va lwa va tisirhelerile, va tamele switlhangu ni savula, van’wana a va lwa va tamele rikoka ni tlhari ra meno manharhu. Kasi muxaka wun’wana lowu dumeke wa ntlango wolowo a wu koxa leswaku van’wana va leteriwa ku langutana ni swiharhi, leswi vulaka leswaku a va fanele va swi hlota. Xana swi nga endleka leswaku Pawulo a a vulavula hi xiendlakalo xexo?

Mixo wun’wana ni wun’wana hi siku ra ntlango a ku hlotiwa. Swiharhi swa tinxaka-nxaka a swi sindzisiwa ku nghena erivaleni ra mintlango. Nchumu lowu vahlaleri a va wu rhandza swinene a ku ri ku lwa ka nkunzi ni bere. Hakanyingi a swi boheleriwa swin’we leswaku swi lwa kukondza xin’we xi fa, kutani lexi nga ta hlula a xi hetisiwa hi muhloti. Mphikizano wun’wana lowu a wu tolovelekile a ku ri ku qega tinghala ni tiyingwe, kumbe tindlopfu ni tibere. Vahloti a va kombisa vuswikoti bya vona hi ku dlaya swiharhi swa matimba leswi humaka ematikweni hinkwawo ya mfumo wolowo, ku nga khathariseki leswaku swi koxa mali muni ku swi tisa—ku nga tiyingwe, timhelembe, timpfuvu, tinhutlwa, timhisi, tikamela, mahlolwa, tinguluve ta nhova ni tinhongo.

Leswi endliwaka erivaleni ra mintlango a swi endla leswaku ku hlota ku nga rivaleki. A ku tirhisiwa maribye, swidziva leswitsongo ni mirhi leswaku ku languteka onge hi le khwatini. Etimbaleni tin’wana ta mintlango, swiharhi a swi humelela onge ko va salamusi, swi tisiwa hi switlakusi leswi humaka ehansi ka misava kasi swin’wana a swi gogeriwe etihokweni. Xin’wana lexi a xi tsakisa hiloko swiharhi swi cinca hi xitshuketa, kambe lexi a xi endla leswaku ku hlota ku nyanyula ngopfu i ku khomiwa ka swona hi tihanyi.