• U Nga Languti “Swilo Swa Le Ndzhaku”
    Xihondzo xo Rindza—2012 | March 15

    • 12. Pawulo u titwe njhani hi swilo leswi a swi tshikeke?

      12 Muapostola Pawulo u tshike swilo swo tala leswaku a va mulandzeri wa Kreste. (Filp. 3:4-6) U titwe njhani hi swilo leswi a swi tshikeke? U te: “Swilo leswi veke mpindzulo eka mina, ndzi swi teke ku ri ku lahlekeriwa hikwalaho ka Kreste.” Ha yini a vule tano? U tlhele a ku: “Hakunene ndzi tlhela ndzi teka swilo hinkwaswo ku ri ku lahlekeriwa hikwalaho ka ntikelo lowu tlurisaka wa ku tiva Kreste Yesu Hosi ya mina. Hikwalaho ka yena ndzi pfumele ku lahlekeriwa hi swilo hinkwaswo naswona ndzi swi teka ku ri nhulu ya thyaka, leswaku ndzi kuma Kreste.”a (Filp. 3:7, 8) Ku fana ni munhu loyi a nga tisoliki loko a lahle thyaka, Pawulo a nga tisolanga hileswi a tshikeke malunghelo lawa a a ri na wona khale. U ma teke ma ri lama nga pfuniki nchumu.

      13, 14. Hi nga xi tekelela njhani xikombiso xa Pawulo?

      13 I yini leswi nga hi pfunaka loko hi tshamela ku ehleketa hi swilo leswi hi swi tshikeke enkarhini lowu hundzeke? I ku tekelela xikombiso xa Pawulo. Hi nga xi tekelela njhani? Hi ku ehleketa hi ndlela leyi swilo leswi hi nga na swona sweswi swi nga swa nkoka ha yona. Hi ni vuxaka lebyinene na Yehovha naswona hi tiakele vito lerinene hileswi hi tshembekaka eka yena. (Hev. 6:10) Xana swi kona swilo swa nyama leswi misava leyi yi nga hi nyikaka swona leswi nga pimanisiwaka ni mikateko ya moya leyi hi tiphinaka ha yona sweswi ni leyi hi nga ta tiphina ha yona enkarhini lowu taka?—Hlaya Marka 10:28-30.

  • U Nga Languti “Swilo Swa Le Ndzhaku”
    Xihondzo xo Rindza—2012 | March 15

    • a Rito ra ririmi ro sungula leri laha ri hundzuluxeriweke ri va “thyaka” ri tlhela ri vula swilo leswi “lahleriwaka timbyana,” “vulongo” ni “thyaka ra munhu.” Mukambisisi un’wana wa Bibele u vula leswaku Pawulo u tirhise rito leri ku kombisa “xilo lexi nga pfuniki nchumu lexi munhu a xi tshikaka hi ku helela ni lexi nyenyetsaka lexi a nga laviki ku tlhela a xi vona.”