Eka Vatswari

Eka vantshwa, ku kula ku nga fana ni ku dyondza ku gada xikanyakanya. Loko va sungula a va titwi va ntshunxekile naswona va chava. Tanihi mutswari u navela onge n’wana wa wena a nga tiva ku xi fambisa a nga kalanga a wa. Kambe swoleswo a swi nge koteki, nilokoswiritano u nga swi kota ku n’wi pfuna leswaku a kota ku xi fambisa kahle.

I ntiyiso leswaku a swi olovi ku endla tano. Tolo kunene, xifanyetana xa wena a xi ri xihlangi lexi a xi rhandza ku vulavula kambe namuntlha leswi se xi sunguleke ku tlhariha, xi fambela ekule na wena naswona a xa ha tali ku vulavula na wena. Tolo kunene xinhwanyetana xa wena a xi lava ku famba na wena hinkwako laha u yaka kona, kambe namuntlha a xi swi lavi ku voniwa xi yime na wena.

Sweswo a swi vuli leswaku a wu mutswari lonene. U ni xihlovo xa vutlhari lebyi nga ni nkongomiso lowu tshembekaka, lowu nga ku pfunaka ni n’wana wa wena. Xihlovo xexo i Rito ra Xikwembu, ku nga Bibele.

Buku leyi, leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, yi endleriwe ku pfuna n’wana wa wena leswaku a kota ku anakanyisisa hi vutlhari lebyi humaka eMatsalweni. Eka matluka 4 na 5, ku ni swihloko swo hambana-hambana leswi ku nga ta buriwa hi swona eka buku leyi. Kambe a swi heleli kwalaho. Hi xikombiso:

(1) Buku leyi yi ta lava leswaku n’wana wa wena a endla swo karhi loko a ri karhi a hlaya. Ku ni tindhawu to tala laha a nga ta komberiwa ku tsala swo karhi ni ku hlamula swivutiso swo karhi. Hi xikombiso, ku ni laha ku nge “Ku Tilunghiselela Ku Langutana Ni Ntshikilelo Wa Tintangha,” eka matluka 132 na 133, laha n’wana wa wena a nga ta pfuniwa ku anakanya hi swiphiqo swo karhi leswi a langutanaka na swona ni ku kuma ndlela yo swi hlula. Nakambe ku ni tluka leri nge “Tinhla Ta Mina,” eka swiyenge swa kaye swa buku leyi, laha n’wana wa wena a nga ta tsala leswi a swi anakanyaka ni ndlela leyi a titwaka ha yona hi leswi a swi hlayeke eka xiyenge xexo.

(2) Buku leyi yi tlhela hi khutaza vantshwa ku bula ni vatswari va vona. Hi xikombiso, eka matluka 63 na 64, ku ni bokisi leri nge “Xana Ndzi Nga Bula Njhani Na Tatana Kumbe Manana Hi Timhaka Ta Masangu?” Nakambe emakumu ka ndzima yin’wana ni yin’wana, ku ni bokisi leri nge “U Nga Ku Yini?” Muntshwa a nga tirhisa bokisi leri ku pfuxeta leswi a swi hlayeke, kambe mi nga tlhela mi bula hi rona tanihi ndyangu. Nakambe ndzima ha yin’we yi ni bokisi leri nge “Leswi Ndzi Tiyimiseleke Ku Swi Endla!” laha xiyenge xo hetelela eka rona xi khutazaka muntshwa ku tsala swo karhi laha ku nge “Leswi Ndzi Lavaka Ku Vutisa (Va-)mutswari Wa Mina Hi Mhaka Leyi . . . ” Sweswo swi ta khutaza vantshwa leswaku va kombela mpfuno eka vatswari va vona loko va ri karhi va kula.

Xitsundzuxo: Leswaku vantshwa va nga titwi va chava ku tsala ndlela leyi va titwaka ha yona, u nga languti leswi va swi tsaleke. Hi ku famba ka nkarhi va ta bula na wena hi leswi va swi tsaleke.

Tikumele buku ya wena kutani u yi hlaya hi vukheta. Loko u ri karhi u yi hlaya, ringeta ku anakanya leswi na wena u langutaneke na swona loko wa ha kula. Loko swi fanerile, bula ni n’wana wa wena hi swona. Sweswo swi ta n’wi khutaza leswaku a ntshunxeka ku bula na wena. Loko a vulavula, yingisa! Loko u ringeta ku bula na yena kambe a nga lavi ku vula swo tala, u nga heli matimba. Hambiloko vana va vonaka onge a va swi rhandzi ku vulavula, kambe va teka ndzayo ya vatswari va vona yi ri ya nkoka ku tlula ya tintangha ta vona.

I ntsako lowukulu eka hina ku humesa buku leyi leyi sekeriweke eBibeleni, leyi nga ta pfuna wena ni vana va wena naswona hi khongela leswaku yi mi tisela mikateko yo tala.

Vakandziyisi