Xana U Nga Ma Tshemba Masingita Lama Nga eBibeleni?

LOKO u byeriwe mhaka yo hlamarisa, xana vutshembeki bya munhu loyi a ku byelaka yona a byi nga ta khumba ndlela leyi u faneleke u tshemba mhaka yoleyo ha yona kumbe u nga yi tshembi? Vutshembeki byo tano a byi katsi ndlela leyi munhu a hlamuselaka mhaka ha yona ntsena kambe ni ndhuma yakwe yo vulavula ntiyiso. Phela, loko ku ri leswaku eka malembe lama nga hundza a a ku byela ntiyiso nkarhi na nkarhi naswona a nga si tshama a ku hembela hi vomu, u nga va ni xivangelo lexi twalaka xo tshemba leswi a ku byelaka swona.

Swi tano ni hi masingita lama tsariweke eBibeleni. Ku hava ni un’we wa hina loyi a a hanya loko swiendlakalo leswi swi humelela. Kambe hi nga tiyiseka loko rungula ra Bibele ri tshembeka—ni loko ri ri ntiyiso. Njhani? Hi leswi swivangelo swin’wana leswi engetelaka vutshembeki bya marungula ya le Bibeleni lama vulavulaka hi masingita.

Masingita yo tala ma endliwe etindhawini ta mani na mani. Minkarhi yin’wana, a ma voniwa hi magidi loko ku nga ri timiliyoni ta vahlaleri. (Eksoda 14:21-31; 19:16-19) A ma endleriwanga exihundleni, ekule ni vanhu.

Masingita ya kona a ma endliwa hi ndlela yo olova. A ku nga ri ni switirhisiwa swo hlawuleka kumbe switeji leswi kokaka mahlo kumbe swiendlo swa vukanganyisi. Etindhawini to tala, masingita lama nga eBibeleni ma humelele swi nga hleriwanga naswona i vanhu lava a va ma kombela. (Marka 5:25-29; Luka 7:11-16) Eswiyin’weni swo tano, munhu loyi a endlaka masingita a a nga ta swi kota ku hlela swilo ka ha ri emahlweni.

Xikongomelo xa vanhu lava a va endla masingita a ku nga ri leswaku va tikumela ndhuma, ku dzunisiwa ni rifuwo. Ematshan’weni ya sweswo, a ku ri ku vangamisa Xikwembu. (Yohane 11:1-4, 15, 40) Matshalatshala man’wana ni man’wana ya vanhu yo lava ku pindzula rifuwo eka masingita yo tano ya matimba ma soriwile.—2 Tihosi 5:15, 16, 20, 25-27; Mintirho 8:18-23.

Masingita yo hambana-hambana lama nga eBibeleni ma kombisa leswaku vanhu a va nga ta ma endla hi matimba ya vona. Hi xikombiso, lwandle ni moya swi miyetiwile, mati ma cinciwe ma va vhinyo, mpfula yi yimisiwile yi tlhela yi na, vanhu lava vabyaka va horisiwile naswona vanhu lava nga voniki va tlhele va vona. Masingita lawa hinkwawo ni man’wana yo tala ma kombisa leswaku matimba lama tlulaka ya munhu lama nga tirhaka eka mixaka hinkwayo ya timhaka ma fanele ma tirhe eka masingita yo tano.—1 Tihosi 17:1-7; 18:41-45; Matewu 8:24-27; Luka 17:11-19; Yohane 2:1-11; 9:1-7.

Hambi ku ri vakaneti lava voneke masingita a va kalanga va vula leswaku a ma endlekanga. Loko Yesu a pfuxe munghana wakwe Lazaro, valala va Yesu va vukhongeri a va kanetanga leswaku Lazaro a a file. Xana a va ta kaneta njhani? Lazaro a a ri ni masiku ya mune a lahliwile. (Yohane 11:45-48; 12:9-11) Hambi ku ri eka malembe-xidzana endzhaku ka loko Yesu a file, vatsari va Talmud ya Xiyuda va hambete va pfumela leswaku Yesu a a ri ni matimba yo endla masingita. Va vutise laha matimba wolawo a a ma kuma kona. Hilaha ku fanaka, loko valandzeri va Yesu va yisiwa ehubyeni ya Vayuda, a va vutisiwanga xivutiso lexi nge “Xana mi endle singita?” Kambe va vutisiwe leswi: “Xana leswi mi swi endle hi matimba ya mani kumbe hi vito ra mani?”—Mintirho 4:1-13.

Kutani, xana u nga swi tshemba leswi Bibele yi hi byelaka swona malunghana ni masingita? Leswi hi swi kambisiseke swi swi kombisa kahle leswaku marungula ya Bibele malunghana ni masingita ya tshembeka. Ku ni swivangelo swin’wana swo tshemba marungula lawa ya le Bibeleni. Hi xikombiso, loko Bibele yi vulavula hi xiendlakalo xo karhi, hakanyingi yi hi byela nkarhi, ndhawu ni mavito ya vanhu lava katsekeke. Hambi ku ri vaxopaxopi va Bibele va hlamarisiwe hi ku pakanisa ka vuxokoxoko bya matimu lama kumekaka eBibeleni. Vuprofeta bya madzana lebyi nga eBibeleni byi hetisekile. Ku engetela kwalaho, Bibele yi ni nkongomiso wo tala malunghana ni ndlela ya ku va ni vuxaka lebyinene exikarhi ka vanhu—nkongomiso lowu pfuneke vanhu vo tala va malembe yo hambana-hambana ni va swiyimo swo hambana-hambana. Loko swi ta eka vuxaka bya vanhu, nkongomiso lowu humaka eBibeleni wu tikombe wu nga ringanisiwi na nchumu.

Loko ku ri hileswaku a wu si yi tshemba hi ku helela Bibele, ha yini u nga tinyiki nkarhi wo yi kambisisa hi vukheta? Loko u ya u yi tiva, u ta ya u yi tshemba. (Yohane 17:17) U ta swi xiya leswaku u nga tshemba leswi yi ku byelaka swona malunghana ni masingita lama endlekeke enkarhini lowu hundzeke. Loko u kala u tshemba marungula wolawo, u ta va ni xisekelo lexinene xo tshemba leswi Bibele yi vulaka leswaku swi ta humelela enkarhini lowu taka.

[Xifaniso lexi nga eka tluka 7]

Vakaneti va Yesu a va kanetanga leswaku Lazaro a a file

Masingita Lama Nga Ekusuhi Ni Ku Endleka

LOKO ku ri hileswaku dokodela a a fanele a ku endla vuhandzuri lebyi rharhanganeke, xana a wu ta titwa njhani loko u kuma leswaku dokodela wa kona a nga si tshama a endla vuhandzuri bya muxaka lowu? Swi le rivaleni leswaku a wu ta karhateka. Kambe ku vuriwa yini loko u kuma leswaku dokodela loyi hi yena loyi a fambaka emahlweni hi vuhandzuri naswona u byi endle kahle vuhandzuri bya madzana byo fana ni lebyi wena u lavaka ku endliwa byona? Xana a wu nga ta va ni ntshembo lowu tiyeke wa leswaku u ta ku pfuna?

Misava leyi vabyaka leyi hi hanyaka eka yona namuntlha yi lava “vuhandzuri” lebyikulu. ERitweni rakwe, ku nga Bibele, Yehovha Xikwembu u tshembise leswaku u ta vuyetela Paradeyisi laha misaveni. (2 Petro 3:13) Kambe leswaku sweswo swi endleka, ku ta rhanga ku susiwa vanhu vo homboloka, va herisiwa hi ku helela. (Pisalema 37:9-11; Swivuriso 2:21, 22) Swiyimo hinkwaswo leswi nga ni khombo leswi hi swi vonaka swi fanele swi herisiwa emahlweni ko va paradeyisi yi tlhela yi simekiwa. Entiyisweni ku ta endleka singita leswaku sweswo swi humelela!—Nhlavutelo 21:4, 5.

Timbhoni ta Yehovha ti tshemba leswaku ku cinca koloko lokukulu ku ta endleka ku nga ri khale. Ha yini? Hikuva masingita lawa Yehovha Xikwembu se a ma endleke ma kombisa leswaku u ni matimba yo hetisisa switshembiso swakwe. Ringanisa masingita ya tsevu lama tsariweke eBibeleni ni switshembiso leswi yi swi tshembisaka hi vumundzuku.

Onge u nga hambeta u dyondza hi switshembiso swa Bibele swa vumundzuku bya hina. Loko ripfumelo ra wena ri ri karhi ri kula, ni ntshembo wa wena wu ta va tano—ntshembo wo hanya hi nkarhi lowu u nga ta vuyeriwa hi masingita lama Yehovha a ma endlaka.

[Bokisi/Swifaniso leswi nga eka matluka 9, 10]

SINGITA:

YESU U PHAMELE VANHU VA MAGIDI HI SWINKWA NI TINHLAMPFI TI NGA RI TINGANI.—MATEWU 14:13-21; MARKA 8:1-9; YOHANE 6:1-14.

XITSHEMBISO:

“Kunene misava yi ta humesa swimila swa yona; Xikwembu, Xikwembu xa hina xi ta hi katekisa.”—PISALEMA 67:6.

LESWI XI VULAKA SWONA EKA HINA:

A NGA KONA LOYI A NGA TA TLHELA A SIKA HI NDLALA.

SINGITA:

YESU U ENDLE LESWAKU LAVA FEKE MAHLO VA TLHELA VA VONA.—MATEWU 9:27-31; MARKA 8:22-26.

XITSHEMBISO:

“Mahlo ya lava nga voniki ma ta pfuriwa.”—ESAYA 35:5.

LESWI XI VULAKA SWONA EKA HINA:

VANHU HINKWAVO LAVA FEKE MAHLO VA TA VONA.

SINGITA:

YESU U HANYISE VANHU LAVA LAMALEKE.—MATEWU 11:5, 6; YOHANE 5:3-9.

XITSHEMBISO:

“La khutaka u ta tlula kukota mhunti.”—ESAYA 35:6.

LESWI XI VULAKA SWONA EKA HINA:

VANHU HINKWAVO LAVA LAMALEKE VA TA HANYISIWA.

SINGITA:

YESU U HORISE VUVABYI BYO HAMBANA-HAMBANA.—MARKA 1:32-34; LUKA 4:40.

XITSHEMBISO:

“Ku hava munhu la tshamaka kona la nga ta ku: ‘Ndza vabya.’”—ESAYA 33:24.

LESWI XI VULAKA SWONA EKA HINA:

VUVABYI HINKWABYO BYI TA HERISIWA. HI TA TIPHINA HI RIHANYO LERI HETISEKEKE.

SINGITA:

YESU U LAWULE MHEHO.—MATEWU 8:23-27; LUKA 8:22-25.

XITSHEMBISO:

“Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge tirheli swa hava hi matimba.”—ESAYA 65:21, 23.

“U ta va ekule ni ntshikilelo—hikuva a wu nge chavi nchumu—ni xin’wana ni xin’wana lexi chavisaka, hikuva a xi nge tshineli eka wena.”—ESAYA 54:14.

LESWI XI VULAKA SWONA EKA HINA:

TIMHANGU TA NTUMBULUKO A TI NGE HE VI KONA.

SINGITA:

YESU U PFUXE VAFI.—MATEWU 9:18-26; LUKA 7:11-17.

XITSHEMBISO:

“Hinkwavo lava nga eka masirha-bako ya xitsundzuxo va . . . [ta] huma.”—YOHANE 5:28, 29.

“Lwandle ri humesa vafi lava nga eka rona, rifu ni Hayidesi swi humesa vafi lava nga eka swona.”—NHLAVUTELO 20:13.

LESWI XI VULAKA SWONA EKA HINA:

VARHANDZIWA VA HINA LAVA FEKE VA TA PFUXIWA.