-
Xana U Ta Kumiwa U Ri Njhani eMahlweni Ka Xiluvelo Xo Avanyisa?Xihondzo xo Rindza—1995 | October 15
-
-
Xana U Ta Kumiwa U Ri Njhani eMahlweni Ka Xiluvelo Xo Avanyisa?
“Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima.”—MATEWU 25:31.
1-3. I xivangelo xihi xa ntshembo lexi hi nga na xona malunghana ni vululami?
‘U TIVONA NANDZU KUMBE A WU TIVONI NANDZU?’ Vo tala va hlamala loko va twa swiviko swa milandzu yin’wana ya le hubyeni. Vaavanyisi ni swirho swa komiti ya vuavanyisi va nga ha ringeta ku tshembeka, kambe xana hakanyingi vululami byi kona? Xana a wu si tshama u twa hi ku pfumaleka ka vululami ni ku ya hi nghohe eka fambiselo ro avanyisa? Ku pfumaleka ka vululami ko tano a hi nchumu lowuntshwa, hi laha hi nga swi vonaka ha kona eka xikombiso xa Yesu lexi kumekaka eka Luka 18:1-8.
2 Ku nga khathariseki ntokoto wa wena wa vululami bya munhu, xiya mahetelelo ya Yesu: “Xana Xikwembu a xi nga avanyiseri vahlawuriwa va xona, ni ku va lehisela mbilu, vona lava huwelelaka eka xona vusiku ni nhlekanhi, xana? Ndzi ri ka n’wina: Xi ta hatlisa ku va avanyisela. Kambe loko N’wana-wa-Munhu a ta, xana ú ta kuma ku pfumela ku ri kona emisaveni xana?”
3 Ina, Yehovha u ta vona leswaku malandza ya yena eku heteleleni ma endleriwa vululami. Yesu na yena wa katseka, ngopfu-ngopfu sweswi hikuva hi hanya “emasikwini ya makumu” ya mafambiselo lawa yo biha. Yehovha hi ku hatlisa u ta tirhisa N’wana wakwe wa matimba ku herisa vubihi byi nga ha vi kona emisaveni. (2 Timotiya 3:1; 2 Vatesalonika 1:7, 8; Nhlavutelo 19:11-16) Hi nga kuma vutlhari exiphen’wini xa Yesu eka xin’wana xa swikombiso swo hetelela leswi a swi nyikeleke, hakanyingi xi vitaniwa xifaniso xa tinyimpfu ni timbuti.
4. Xana hi wu twisise njhani nkarhi wa xifaniso xa tinyimpfu ni timbuti, kambe ha yini hi ta nyikela nyingiso eka xifaniso sweswi? (Swivuriso 4:18)
4 Khale a hi anakanya leswaku xifaniso lexi xi hlamusela Yesu a tshame tanihi Hosi hi 1914 naswona a avanyisa ku sukela enkarhini wolowo—vanhu lava fanaka ni tinyimpfu va kuma vutomi lebyi nga heriki, lava fanaka ni timbuti va fela makumu. Kambe ku xiyiwa nakambe ka xifaniso ku kombisa ndzulamiso wa matwisiselo mayelana ni nkarhi wa xona ni leswi xi swi fanekiselaka. Ndzulamiso wu kandziyisa nkoka wa ntirho wa hina wo chumayela ni nkoka wa ku angula ka vanhu. Leswaku hi vona xivangelo xa matwisiselo lawa yo enta ya xifaniso lexi, a hi kambisiseni leswi Bibele yi swi vulaka mayelana na Yehovha na Yesu, havambirhi tanihi Tihosi ni Vaavanyisi.
Yehovha Tanihi Muavanyisi La Tlakukeke
5, 6. Ha yini swi fanerile ku languta Yehovha tanihi Hosi ni Muavanyisi?
5 Yehovha u fuma vuako hinkwabyo naswona u lawula hinkwaswo. Leswi a nga riki na masungulo ni makumu, i “Hosi ya minkarhi hinkwayo.” (1 Timotiya 1:17; Pisalema 90:2, 4; Nhlavutelo 15:3) U ni matimba yo endla milawu ni ku lerisa leswaku yi hlayisiwa. Kambe matimba ya yena ma katsa ku va Muavanyisi. Esaya 33:22 yi ri: “Yehova i muav̌anyisi wa hina; Yehova i mulawuri wa hina; Yehova i hosi ya hina; o ta hi hlayisa!”
6 Malandza ya Xikwembu i khale ma xiye Yehovha tanihi Muavanyisi wa milandzu ni timhaka. Hi xikombiso, endzhaku ka loko ‘Muavanyisi wa misava hinkwayo’ a kambisise vumbhoni mayelana ni vubihi bya Sodoma na Gomora, u avanyise a kuma leswaku vaaki va faneriwa hi ku lovisiwa ivi a avanyisa hi ndlela yoleyo yo lulama. (Genesa 18:20-33; Yobo 34:10-12) Hakunene swi fanele ku hi tiyisekisa ku tiva leswaku Yehovha i Muavanyisi wo lulama loyi minkarhi hinkwayo a nga hetisisaka ku avanyisa ka yena!
7. Xana Yehovha u tirhe njhani tanihi Muavanyisi loko a tirhisana na Israyele?
7 Le Israyele wa khale, Yehovha minkarhi yin’wana a avanyisa hi ku kongoma. Xana a wu nga ta chaveleleka hi nkarhi wolowo ku tiva leswaku Muavanyisi la hetisekeke a a endla xiboho etimhakeni? (Levhitika 24:10-16; Tinhlayo 15:32-36; 27:1-11) Xikwembu xi tlhele xi nyikela ‘swiboho swa vuavanyisi’ leswi a swi ri swinene tanihi mimpimanyeto ya ku avanyisa. (Levhitika 25:18, 19; Nehemiya 9:13; Pisalema 19:9, 10; 119:7, 75, 164; 147:19, 20) I ‘Muavanyisi wa misava hinkwayo,’ kutani hinkwerhu ha khumbeka.—Vaheveru 12:23.
8. I xivono xihi xa nkoka lexi Daniyele a xi voneke?
8 Hi ni vumbhoni bya ‘timbhoni to swi vona hi mahlo’ lebyi khumbaka mhaka leyi. Muprofeta Daniyele u nyikiwe xivono xa swivandzana leswi nga ni khombo leswi yimelaka tihulumendhe kumbe mimfumo. (Daniyele 7:1-8, 17) U engeterile a ku: “Ŝiluv̌elo ŝi ko ŝi v̌ekiwa, kutani Nkulukumba wa masiku a ṭhamisa. Šifunengelo ša yena a ši basile kukotisa gamboko.” (Daniyele 7:9) Xiya leswaku Daniyele u vone swiluvelo “kutani Nkulukumba wa masiku [Yehovha] a ṭhamisa.” (Xiitaliki i xerhu.) Tivutise, ‘Xana laha Daniyele a a veka vumbhoni bya leswaku Xikwembu xi va Hosi?’
9. Hi yihi nhlamuselo yin’wana ya ku ‘tshama’ exiluvelweni? Nyika swikombiso.
9 Ina, loko hi hlaya hi leswaku un’wana ‘a tshamisa’ exiluvelweni, hi nga ha anakanya hi ku va ka yena hosi, hikuva minkarhi yin’wana Bibele yi tirhisa marito wolawo. Hi xikombiso: “Loko [Zimri] a sungurile ku fuma, a ṭhamisile šiluv̌elweni ša yena, a . . .” (1 Tihosi 16:11; 2 Tihosi 10:30; 15:12; Yeremiya 33:17) Vuprofeta bya Vumesiya byi te: “O ta ṭhama a ri hosi e šiluvelweni ša yena.” (Xiitaliki i xerhu.) Hikwalaho, ku ‘tshama exiluvelweni’ swi nga vula ku va hosi. (Zakariya 6:12, 13) Yehovha u hlamuseriwa tanihi Hosi leyi tshamaka exiluvelweni. (1 Tihosi 22:19; Esaya 6:1; Nhlavutelo 4:1-3) I ‘Hosi leyi nga heriki.’ Kambe, tanihi leswi a tiyiseke mhaka leyintshwa ya vuhosi, a nga ha vuriwa tanihi loyi a veke Hosi, onge hi loko a tshama exiluvelweni hi vuntshwa.—1 Tikronika 16:1, 31; Esaya 52:7; Nhlavutelo 11:15-17; 15:3; 19:1, 2, 6.
10. A wu ri wihi ntirho lowukulu wa tihosi ta Israyele? Kombisa.
10 Kambe hi leyi yinhla-nkulu: Ntirho lowukulu wa tihosi ta khale a ku ri wa ku yingisela milandzu ni ku avanyisa. (Swivuriso 29:14) Tsundzuka ku avanyisa ka vutlhari ka Solomoni loko vavasati vambirhi va lwela n’wana. (1 Tihosi 3:16-28; 2 Tikronika 9:8) Wun’wana wa miako ya yena ya vuhosi a ku ri “rikupakupa ra šiluv̌elo laha a av̌anyisaka timhaka kona,” leri nakambe a ri vitaniwa “rikupakupa ra ku av̌anyisa.” (1 Tihosi 7:7) Yerusalema a ri hlamuseriwa tanihi ndhawu laha “ku v̌ekiweke ŝiluv̌elo ŝa ku av̌anyisa.” (Pisalema 122:5) Entiyisweni, ‘ku tshama exiluvelweni’ swi nga ha vula ku va ni matimba ya ku avanyisa.—Eksoda 18:13; Swivuriso 20:8.
11, 12. (a) Xana a yi ri yihi nhlamuselo ya ku tshama ka Yehovha, loku boxiweke eka Daniyele ndzima 7? (b) Xana tindzimana tin’wana ti swi tiyisekisa njhani leswaku Yehovha u tshamela ku avanyisa?
11 Sweswi a hi tlheleleni eka xiendlakalo lexi Daniyele a voneke ‘Nkulukumba wa Masiku a tshama ehansi.’ (Xiitaliki i xerhu.) Daniyele 7:10 ya engetela: “Kav̌a loko v̌aav̌anyisi v̌a ṭhama, kutani tibuku ti phendliwa.” Ina, Nkulukumba wa Masiku a a tshamele ku avanyisa mayelana ni vulawuri bya misava ni ku veka N’wana wa munhu tanihi loyi a fanelekelaka ku fuma. (Daniyele 7:13, 14) Kutani hi hlaya leswaku “ku fika Nkulukumba wa masiku, a av̌anyisela v̌ahlawuriwa” lava fanelekelaka ku fuma ni N’wana wa munhu. (Daniyele 7:22, xiitaliki i xerhu.) Eku heteleleni “[Huvo yi] ta fika kwalaho” kutani yi avanyisa hi ndlela leyi vavisaka eka mfumo wa misava wa makumu.—Daniyele 7:26.a
12 Hikwalaho, Daniyele a vona Xikwembu xi ‘tshama exiluvelweni’ a swi vula ku ta ka xona xi tela ku avanyisa. Eku sunguleni Davhida u yimbelerile a ku: “[Yehovha] u yimele timhaka ta mina ni tifanelo ta mina; u ṭhamisile šiluvelweni ša wena, u ri muav̌anyisi l’a lulameke.” (Pisalema 9:4, 7) Kutani Yuwele u tsale a ku: “V̌amatiko a v̌a pfuke, a v̌a te nkov̌eni wa Yosafat; hikuv̌a kona nḍi [Yehovha] ta ṭhamisa ku av̌anyisa matiko hikwawo.” (Yuwele 3:12; ringanisa Esaya 16:5.) Yesu na Pawulo a va ri eswiyin’weni swo avanyisa laha munhu a a tshamela ku twa nandzu ivi a avanyisa.b—Yohane 19:12-16; Mintirho 23:3; 25:6.
Xikhundlha Xa Yesu
13, 14. (a) I xitiyisekiso xihi lexi vanhu va Xikwembu va nga na xona xa leswaku Yesu u ta va Hosi? (b) Xana Yesu u tshame rini exiluvelweni xa yena, naswona u sungule ku fuma hi 33 C.E. ku ya emahlweni hi mukhuva wihi?
13 Yehovha i Hosi ni Muavanyisi. Ku vuriwa yini hi Yesu? Ntsumi leyi tiviseke ku velekiwa ka yena yi te: “Hosi Xikwembu xi ta n’wi nyika xiluvelo xa Davhida tata wa yena. . . . vuhosi bya yena byi nga ka byi nga vi na makumu.” (Luka 1:32, 33) Yesu a ta va mudyandzhaka wa xiviri wa vuhosi bya Davhida. (2 Samuwele 7:12-16) U ta fuma a ri etilweni, hikuva Davhida u te: “Yehova o te ka hosi ya mina [Yesu]: ‘Ṭhamisa e v̌okweni ra mina ra šinene, nḍi ko nḍi endla la’v̌a nga v̌alala eka wena e v̌unavelo bya mikonḍo ya wena.’ Yehova o ta ṭhambuluta hi le Sion e nhonga ya matimba ya wena: Tlhoma ku fuma ka wena e šikari ka v̌alala v̌a wena!”—Pisalema 110:1-4.
14 Xana swoleswo swi ta endleka rini? Yesu a nga fumanga tanihi Hosi loko a ha ri munhu. (Yohane 18:33-37) Hi 33 C.E., u file, a pfuxiwa, kutani a tlhandlukela etilweni. Vaheveru 10:12 yi ri: “Kriste ú humesile kan’we gandzelo rin’we ro susa swidyoho, a ri humesela vanhu va minkarhi hinkwayo, kutani ú yile a ya tshama evokweni ra xinene ra Xikwembu.” Xana Yesu a a lawula yini? “[Xikwembu] xi engeta xi n’wi veka evokweni ra xona ra xinene ehenhla matilweni. Kriste wa fuma kona, ehenhla ka hinkwaswo leswi nga ni vundhuna, ni ku fuma, ni matimba, ni vuhosi; . . . xi tlhela xi n’wi nyika [evandlheni], a ri nhloko ya hinkwaswo.” (Vaefesa 1:20-22) Hikuva enkarhini wolowo Yesu a a ri ni matimba ya vuhosi ehenhla ka Vakreste, Pawulo u tsale leswaku Yehovha “ú hi humesile ematimbeni ya munyama, a hi rhurhisela eku fumeni ka N’wana wa yena loyi a rhandzekaka.”—Vakolosa 1:13; 3:1.
15, 16. (a) Ha yini hi vula leswaku Yesu a nga vanga Hosi ya Mfumo wa Xikwembu hi 33 C.E.? (b) Xana Yesu u sungule rini ku fuma eMfun’weni wa Xikwembu?
15 Hambi swi ri tano, hi nkarhi wolowo Yesu a a nga ri Hosi ni Muavanyisi ehenhla ka matiko. A a tshame etlhelo ka Xikwembu, a yimele nkarhi wo tirha tanihi Hosi ya Mfumo wa Xikwembu. Pawulo u tsale ha yena a ku: “Xana Xikwembu xi tshama xi byela yihi ntsumi xi ku: ‘Tshama evokweni ra mina ra xinene, ndzi kondza ndzi veka valala va wena ehansi ka minkondzo ya wena’ xana?”—Vaheveru 1:13.
16 Timbhoni ta Yehovha ti huwelele vumbhoni byo tala bya leswaku nkarhi wa Yesu wa ku rindza wu hele hi 1914, loko a va mufumi wa Mfumo wa Xikwembu ematilweni lama nga vonakiki. Nhlavutelo 11:15, 18 yi ri: “Matimba ya ku fuma misava, sweswi ma nyikiwile Hosi ya hina ni Mesiya wa yona, kutani ú ta fuma hilaha ku nga heriki.” “Vanhu va matiko a va tele ku hlundzuka, kambe siku ra vukari bya wena ri fikile.” Ina, matiko ma hlundzukelanile hi nkarhi wa Nyimpi yo Sungula ya Misava. (Luka 21:24) Tinyimpi, ku tsekatseka ka misava, mintungu, ku pfumaleka ka swakudya ni swilo leswi fanaka na swona hi leswi hi swi voneke ku sukela hi 1914, swi tiyisa leswaku sweswi Yesu wa fuma eMfun’weni wa Xikwembu, naswona makumu ya misava leyi ma tshinele.—Matewu 24:3-14.
17. I tinhla-nkulu tihi leti se hi ti tivisiweke?
17 Hi nkatsakanyo wo koma: Ku nga vuriwa leswaku Xikwembu xi tshame exiluvelweni tanihi Hosi, kambe hi ndlela yin’wana xi nga tshama exiluvelweni xa xona leswaku xi avanyisa. Hi 33 C.E., Yesu u tshame evokweni ra xinene ra Xikwembu, naswona sweswi i Hosi ya Mfumo. Kambe xana Yesu la fumaka tanihi Hosi, u tlhela a tirha tanihi Muavanyisi? Naswona ha yini leswi swi fanele swi hi khumba, ngopfu-ngopfu enkarhini lowu?
18. I vumbhoni byihi lebyi nga kona bya leswaku Yesu na yena u ta va Muavanyisi?
18 Yehovha, loyi a nga ni mfanelo yo veka vaavanyisi, u hlawule Yesu tanihi Muavanyisi loyi a fikelelaka mimpimanyeto ya Yena. Yesu u kombise leswi loko a vulavula hi vanhu lava sungulaka ku hanya hi tlhelo ra moya a ku: “Tatana a nga avanyisi munhu ni un’we, kambe ú nyikile N’wana ntirho hinkwawo wo avanyisa.” (Yohane 5:22) Kambe, xiphemu xa Yesu xa vuavanyisi xi tlula xa muxaka wolowo wa ku avanyisa, hikuva i muavanyisi wa lava hanyaka ni lava feke. (Mintirho 10:42; 2 Timotiya 4:1) Pawulo u tshame a ku: “[Xikwembu] xi vekile siku leri xi nga ta avanyisa misava eku lulameni, hi [Yesu] wanuna loyi xi n’wi hlawuleke; kutani xi kombisile vanhu hinkwavo ku tiya ka mhaka leyi hi ku pfuxa munhu loyi exikarhi ka vafi.”—Mintirho 17:31; Pisalema 72:2-7.
19. Ha yini swi lulamile ku vulavula hi Yesu a ri la tshameke tanihi Muavanyisi?
19 Xana hi vula swona loko hi gimeta hi leswaku Yesu u tshama exiluvelweni lexi kwetsimaka hi xikongomelo xo karhi xa ku va Muavanyisi? Ina. Yesu u byele vaapostola a ku: “Loko swilo hinkwaswo swi ta va swi vuyeteriwile, ni loko N’wana-wa-munhu a tshamisile exiluvelweni xa yena lexo kwetsima, n’wina lava mi ndzi landzeke, na n’wina mi ta tshama eswiluvelweni swa 12, mi avanyisa tinyimba ta Israele leta 12.” (Matewu 19:28, xiitaliki i xerhu.) Hambi leswi sweswi Yesu a nga Hosi ya Mfumo ntirho wa yena lowu engetelekeke lowu boxiweke eka Matewu 19:28 wu ta katsa ku tshama exiluvelweni a avanyisa hi Gidi ra Malembe. Hi nkarhi wolowo u ta avanyisa vanhu hinkwavo, lavo lulama ni lava nga lulamangiki. (Mintirho 24:15) Swa pfuna ku tsundzuka leswi tanihi leswi hi yisaka nyingiso wa hina eka xin’wana xa swifaniso swa Yesu leswi fambelanaka ni nkarhi wa hina ni vutomi bya hina.
Xana Xifaniso Lexi Xi Vula Yini?
20, 21. I yini leswi vaapostola va Yesu va swi vutiseke leswi fambelanaka ni nkarhi wa hina, leswi swi tlakusa swivutiso swihi?
20 Emahlweninyana ka ku fa ka Yesu, vaapostola va yena va n’wi vutisile va ku: “Xana timhaka leti ti ta humelela rini xana? Xana xikombiso xa ku vuya ka wena ni xa ku hela ka minkarhi xi ta va xihi ke?” (Matewu 24:3) Yesu u vhumbhe swiendlakalo leswi xiyekaka leswi nga ta humelela emisaveni ‘ku nga si fika makumu.’ Emahlweninyana ka makumu wolawo, matiko ma ta “vona N’wana-wa-Munhu a ta emapapeni ya le tilweni, hi matimba ni ku kwetsima lokukulu.”—Matewu 24:14, 29, 30.
21 Kambe, xana ku ta humelela yini hi vanhu va matiko wolawo loko N’wana wa munhu a fika eku kwetsimeni ka yena? A hi swi kambisiseni exifanisweni xa tinyimpfu ni timbuti, lexi sungulaka hi marito lama nge: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena.”—Matewu 25:31, 32.
22, 23. I tinhla tihi leti kombisaka leswaku xifaniso xa tinyimpfu ni timbuti a xi sungulanga ku hetiseka hi 1914?
22 Xana xifaniso lexi xi vulavula hi loko Yesu a tshama ematimbeni ya mfumo hi 1914, hi laha a hi swi twisisa ha kona? Matewu 25:34 yi vulavula hi yena a ri Hosi, kutani xifaniso lexi hi laha ku faneleke xi tirha ku sukela loko Yesu a ve Hosi hi 1914. Kambe i ku avanyisa kwihi loku a ku endleke hi ku hatlisa endzhakunyana ka sweswo? A ku nga ri ku avanyisa ka “matiko hinkwawo.” Ematshan’weni ya sweswo, u yise nyingiso wa yena eka lava tivulaka lava endlaka “yindlu ya Xikwembu.” (1 Petro 4:17, xiitaliki i xerhu.) Hi ku pfumelelana na Malakiya 3:1-3, Yesu, tanihi murhumiwa wa Yehovha, hi nawu u kambisise Vakreste lava totiweke lava saleke emisaveni. Nakambe a ku ri nkarhi wo avanyisa Vujagana, lebyi hi vunwa byi tivuleke “yindlu ya Xikwembu.”c (Nhlavutelo 17:1, 2; 18:4-8) Kambe ku hava lexi kombisaka leswaku hi nkarhi wolowo kumbe hikwalaho ka mhaka yoleyo, Yesu u tshamele ku avanyisa vanhu va tinxaka hinkwato ro hetelela tanihi tinyimpfu kumbe timbuti.
23 Loko hi kambisisa ntirho wa Yesu exifanisweni lexi, eku heteleleni hi n’wi vona a avanyisa matiko hinkwawo. Xifaniso lexi a xi kombisi leswaku ku avanyisa koloko ku ta heta malembe yo tala, onge hi loko munhu un’wana ni un’wana la feke eka malembe-khume lama hundzeke a avanyisiwile tanihi la faneriwaka hi rifu ra makumu kumbe vutomi lebyi nga heriki. Swi vonaka onge vo tala lava feke eka malembe-khume ya sweswinyana va ye esirheni ra munhu leri tolovelekeke. (Nhlavutelo 6:8; 20:13) Kambe, xifaniso lexi xi hlamusela nkarhi lowu Yesu a nga ta avanyisa vanhu va “matiko hinkwawo” lava nga ta va va hanya enkarhini wolowo naswona va langutane ni ku avanyisiwa hi yena.
24. Xana xifaniso xa tinyimpfu ni timbuti xi ta hetiseka rini?
24 Hi marito man’wana, xifaniso lexi xi kombetela enkarhini lowu taka loko N’wana wa munhu a ta ta eku kwetsimeni ka yena. U ta tshamisa leswaku a avanyisa vanhu lava nga ta va va hanya. Ku avanyisa ka yena ku ta va ku titshege hi leswi va nga ta va va tikombise va ri swona. Enkarhini wolowo “ku hambana lo’ku nga kona e ka l’a lulameke ni lo’wo biha” ku ta va se ku tiviwa. (Malakiya 3:18) Ku huweleriwa ni ku avanyisa hi koxe a ku nge heti nkarhi wo leha. Yesu u ta endla swiboho swo lulama leswi sekeriweke eka ndlela leyi vanhu va vonakeke ha yona.—Nakambe vona 2 Vakorinto 5:10.
25. Xana Matewu 25:31 yi hlamusela yini loko yi vulavula hi N’wana wa munhu a tshame exiluvelweni lexo kwetsima?
25 Kutani, leswi swi vula leswaku ku ‘tshama ka [Yesu] exiluvelweni xa yena xo kwetsima’ leswaku a ta avanyisa, loku boxiweke eka Matewu 25:31, ku tirha enkarhini lowu taka loko Hosi leyi ya matimba yi ta tshama leswaku yi tivisa ni ku avanyisa matiko. Ina, xiendlakalo xa ku avanyisa lexi katsaka Yesu eka Matewu 25:31-33, 46 xi fana ni xiendlakalo lexi nga eka Daniyele ndzima 7 laha Hosi leyi fumaka, Nkulukumba wa Masiku, a tshamaka leswaku a endla ntirho wa yena wa ku va Muavanyisi.
26. I nhlamuselo yihi leyintshwa ya xifaniso leyi vaka erivaleni?
26 Ku twisisa xifaniso xa tinyimpfu ni timbuti hi ndlela leyi swi kombisa leswaku ku avanyisiwa ka tinyimpfu ni timbuti i nchumu wa nkarhi lowu taka. Ku ta endleka endzhaku ka loko “nhlomulo” lowu boxiweke eka Matewu 24:29, 30 wu sungula ni loko N’wana wa munhu a ‘fika eku kwetsimeni ka yena.’ (Ringanisa Marka 13:24-26.) Kutani, hi ku herisiwa ka mafambiselo layo biha hinkwawo, Yesu u ta vitana huvo ivi a ahlula ni ku avanyisa.—Yohane 5:30; 2 Vatesalonika 1:7-10.
27. I yini lexi hi faneleke hi tsakela ku xi tiva mayelana ni xifaniso xa Yesu xo hetelela?
27 Leswi swi olovisa matwisiselo ya hina hi nkarhi wa xifaniso xa Yesu, lexi kombisaka leswaku tinyimpfu ni timbuti ti ta avanyisiwa rini. Kambe xana swi hi khumba njhani hina lava chumayelaka mahungu lamanene ya Mfumo hi ku hiseka? (Matewu 24:14) Xana swi endla ntirho wa hina wu nga vi wa nkoka kumbe swi tisa vutihlamuleri lebyikulu? A hi voneni ndlela leyi hi khumbekaka ha yona eka xihloko lexi landzelaka.
-
-
Hi Byihi Vumundzuku Bya Tinyimpfu Ni Timbuti?Xihondzo xo Rindza—1995 | October 15
-
-
Hi Byihi Vumundzuku Bya Tinyimpfu Ni Timbuti?
“Ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.”—MATEWU 25:32.
1, 2. Ha yini xifaniso xa tinyimpfu ni timbuti xi fanele xi hi tsakisa?
YESU KRESTE kahle-kahle a a ri Mudyondzisi lonkulu emisaveni. (Yohane 7:46) Yin’wana ya tindlela ta yena to dyondzisa a ku ri ku tirhisa swifaniso kumbe swikombiso. (Matewu 13:34, 35) A swi olova swi tlhela swi va ni matimba eku paluxeni ka mintiyiso ya moya ni ya vuprofeta.
2 Exifanisweni xa tinyimpfu ni timbuti, Yesu u kombetele enkarhini wa yena wo teka goza hi ndlela leyi hlamarisaka a ku: “Siku N’wana-wa-Munhu a taka hi ku kwetsima ka yena, ni . . .” (Matewu 25:31) Leswi swi fanele swi hi tsakisa hikuva i xifaniso lexi ha xona Yesu a gimetaka nhlamulo ya yena eka xivutiso lexi nge: “Xana xikombiso xa ku vuya ka wena ni xa ku hela ka minkarhi xi ta va xihi ke?” (Matewu 24:3) Kambe leswi swi vula yini eka hina?
3. Eku sunguleni ka nkulumo ya yena, xana Yesu u vule leswaku ku ta humelela yini endzhakunyana ka ku sungula ka nhlomulo lowukulu?
3 Yesu u vhumbhe hi swiendlakalo leswi xiyekaka leswi nga ta ta “kan’we-kan’we [endzhaku]” ka ku sungula ka nhlomulo lowukulu, swiendlakalo leswi hi swi yimeleke. U vule leswaku enkarhini wolowo “xikombiso xa N’wana-wa-Munhu” xi ta humelela. Leswi swi ta khumba ngopfu “vanhu va tinxaka hinkwato ta misava” lava nga ta “vona N’wana-wa-Munhu a ta emapapeni ya le tilweni, hi matimba ni ku kwetsima lokukulu.” N’wana wa munhu u ta va a ri ni “tintsumi ta yena.” (Matewu 24:21, 29-31)a Ku vuriwa yini hi xifaniso xa tinyimpfu ni timbuti? Tibibele ta manguva lawa ti swi veka kahle eka ndzima 25, kambe i xiphemu xa nhlamulo ya Yesu loko a nyikela vuxokoxoko lebyi engetelekeke mayelana ni ku ta ka yena hi ku kwetsima naswona a tela ku avanyisa “matiko hinkwawo.”—Matewu 25:32.
Vumunhuhatwa eXifanisweni
4. Xana eku sunguleni ka xifaniso xa tinyimpfu ni timbuti Yesu u boxiwa hi ndlela yihi, naswona i mani un’wana la boxiwaka?
4 Yesu u sungula xifaniso hi ku vula leswi: “Siku N’wana-wa-Munhu a taka.” A swi kanakanisi leswaku wena wa n’wi tiva loyi “N’wana-wa-Munhu” a nga yena. Vatsari va tievhangheli hakanyingi a va tirhisa xiga xolexo ku vula Yesu. Hambi ku ri Yesu hi yexe u endle tano, a swi kanakanisi leswaku a a tsundzuka xivono xa Daniyele xa “uṅwana l’a fanaka ni ṅwana wa munhu” a tshinelela Nkulukumba wa Masiku leswaku a nyikiwa “ku fuma, ni ku kwetsima, ni v̌uhosi.” (Daniyele 7:13, 14; Matewu 26:63, 64; Marka 14:61, 62) Hambi leswi Yesu a nga lonkulu exifanisweni lexi, a nga yexe. Eku sunguleni ka nkulumo leyi, hi laha swi tshahiweke ha kona eka Matewu 24:30, 31, u vule leswaku loko N’wana wa munhu ‘a ta hi matimba ni ku kwetsima lokukulu,’ tintsumi ta yena ti ta endla ntirho wa nkoka. Hi ku fanana, xifaniso xa tinyimpfu ni timbuti xi kombisa tintsumi ti ri na Yesu loko a ‘tshama exiluvelweni xa yena lexo kwetsima’ leswaku a avanyisa. (Ringanisa Matewu 16:27.) Kambe Muavanyisi ni tintsumi ta yena va le tilweni, kutani xana ni vanhu lava ku vulavuriwaka ha vona exifanisweni lexi va le tilweni ke?
5. Xana hi nga va tivisa ku yini “vamakwavo” va Yesu?
5 Loko ku kambisisiwa xifaniso lexi xi paluxa mintlawa minharhu leyi hi faneleke ku yi hlamusela. Ku tlhandlekela eka tinyimpfu ni timbuti, N’wana wa munhu u engetela ntlawa wa vunharhu lowu ku wu tiva swi nga swa nkoka leswaku u tiva tinyimpfu ni timbuti. Yesu u vitana ntlawa lowu wa vunharhu vamakwavo wa yena va moya. (Matewu 25:40, 45) Va fanele va ri vagandzeri va ntiyiso, hikuva Yesu u te: “Un’wana ni un’wana la endlaka ku rhandza ka Tata wa mina . . . , hi yena makwerhu wa xinuna, ni wa xisati, na manana.” (Matewu 12:50; Yohane 20:17) Lexi swi yelanisaka swinene, Pawulo u tsale hi Vakreste lava nga xiphemu xa “mbewu ya Abrahama” (NW) ni lava nga vana va xinuna va Xikwembu. U va vitane “vamakwavo” va Yesu ni lava “averiw[e]k[e] ku vitaniwa ka le tilweni.”—Vaheveru 2:9–3:1; Vagalatiya 3:26, 29.
6. I vamani “lavatsongo” va vamakwavo va Yesu?
6 Ha yini Yesu a boxe “lavatsongo” va vamakwavo va yena? Marito wolawo ma phindha leswi vaapostola va n’wi tweke a swi vula eku sunguleni. Loko a hambanisa Yohane Mukhuvuri, loyi a feke emahlweni ka Yesu loyi hi ndlela yoleyo a nga ni ntshembo wa laha misaveni, ni lava nga ta kuma vutomi bya le tilweni, Yesu u te: “A ku humelelanga loyi a tlulaka Yohane Mukhuvuri; kasi la nga lontsongo eka hinkwavo eMfun’weni wa matilo i nkulukumba eka yena.” (Matewu 11:11) Van’wana lava yaka etilweni swi nga ha endleka a va ri vanhu lava tivekaka evandlheni, ku fana ni vaapostola, ni van’wana, kambe hinkwavo i vamakwavo va moya va Yesu. (Luka 16:10; 1 Vakorinto 15:9; Vaefesa 3:8; Vaheveru 8:11) Xisweswo, hambi loko van’wana a va vonaka va nga ri va nkoka emisaveni, a va ri vamakwavo va yena naswona a va fanele ku khomiwa kahle.
I Vamani Tinyimpfu Ni Timbuti?
7, 8. Xana Yesu u vule yini hi tinyimpfu, kutani hi nga gimeta hi ku yini mayelana na tona?
7 Ha hlaya mayelana ni ku avanyisiwa ka tinyimpfu: “[Yesu u] ta byela lava nge vokweni ra [yena] ra xinene [a] ku: ‘Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka; hikuva a ndzi ri ni ndlala, kutani mi ndzi fihlutile; a ndzi ri ni torha, mi ndzi siyele ndzi nwa; a ndzi ri muendzi, mi ndzi rhurherile; a ndzi swerile, mi ndzi ambexile; a ndzi vabya, mi ndzi ongorile; a ndzi ri ekhotsweni, mi tile mi ta ndzi kamba.’ Hi kona lava lulameke va nga ta hlamula, va ku: ‘Hosi, hi tshama hi ku vona rini u ri ni ndlala, kutani hi ku fihluta, kumbe u ri ni torha, hi ku siyela u nwa ke? Hi ku vone rini u ri muendzi, hi va hi ku rhurhela, kumbe u swerile, hi ku ambexa ke? Hi ku vone rini u ri karhi u vabya, kumbe u ri ekhotsweni, kutani hi ta hi ta ku kamba ke?’ Hosi yi ta va hlamula, yi ku: ‘Ndzi tiyisile ndzi ri ka n’wina, loko mi tshame mi endla swilo leswi eka un’wana wa vamakwerhu lavatsongo lava, mi swi endlele mina.’” (Xiitaliki i xerhu.)—Matewu 25:34-40.
8 Handle ko kanakana, tinyimpfu leti ti faneriwaka hi ku va etlhelweni ra xinene ra Yesu ra ku dzuneka ni ku amukeriwa ti fanekisela ntlawa wa vanhu. (Vaefesa 1:20; Vaheveru 1:3) Xana va endle yini naswona rini? Yesu u vula leswaku va n’wi nyike swakudya, swakunwa ni tinguvu hi tintswalo, hi xichavo na hi malwandla, va n’wi pfuna loko a vabya kumbe loko a ri ekhotsweni. Loko tinyimpfu ti vula leswaku leswi a ti swi endlanga eka Yesu hi yexe, u hlamusela leswaku va seketele vamakwavo wa yena va moya, masalela ya vatotiwa va Vakreste, kutani hi ndlela yoleyo va swi endlele yena.
9. Ha yini xifaniso xi nga tirhi hi nkarhi wa Gidi ra Malembe?
9 Xifaniso lexi a xi tirhi hi nkarhi wa Gidi ra Malembe, hikuva vatotiwa va ta va va nga ha ri vanhu lava xanisiwaka hi ndlala, torha, vuvabyi kumbe ku khotsiwa. Kambe, vo tala va vona va tokote swoleswo eku heleni ka mafambiselo lawa ya swilo. Ku sukela loko Sathana a lahleriwe emisaveni, u karihele masalela hi ku kongoma, a va endla va hlekuriwa, va xanisiwa ni ku dlayiwa.—Nhlavutelo 12:17.
10, 11. (a) Ha yini swi nga twali ku ehleketa leswaku tinyimpfu ti katsa un’wana ni un’wana la endlaka xiendlo lexinene eka vamakwavo va Yesu? (b) Xana hi laha ku fanelaka tinyimpfu ti fanekisela vamani?
10 Xana Yesu u vula leswaku un’wana ni un’wana la endlelaka un’wana wa vamakwavo va yena musa wutsongo, tanihi ku n’wi nyika xinkwa kumbe mati, u fanelekela ku va un’wana wa tinyimpfu leti? Entiyisweni, ku endla musa wo tano swi nga ha kombisa tintswalo ta vumunhu, kambe handle ko kanakana swi tikomba onge ku katseka swo tala hi tinyimpfu ta xifaniso lexi. Hi xikombiso, Yesu handle ko kanakana a a nga vulavuli hi lava alaka vukona bya Xikwembu kumbe vafundhisi lava tshameke va endlela un’wana wa vamakwavo va yena xiendlo lexinene. Ku hambana ni sweswo, kambirhi, Yesu u vitane tinyimpfu “lava lulameke.” (Matewu 25:37, 46) Kutani tinyimpfu ku fanele ku ri lava hi nkarhi wo karhi va pfuneke—hi ku hiseka va seketeleke—vamakwavo va Kreste naswona va kombiseke ripfumelo lerova va tekiwa va lulamile emahlweni ka Xikwembu.
11 Hi malembe-xidzana, vo tala vo tanihi Abrahama a va ri ni xiyimo xo lulama. (Yakobo 2:21-23) Nowa, Abrahama ni van’wana vo tshembeka va katsiwa exikarhi ka “tinyimpfu tin’wana” leti nga ta kuma vutomi eParadeyisini ehansi ka Mfumo wa Xikwembu. Eminkarhini ya sweswinyana timiliyoni to tala ti ve tinyimpfu tin’wana hi ku va vagandzeri va ntiyiso naswona ti ve “ntlhambi wun’we” ni vatotiwa. (Yohane 10:16; Nhlavutelo 7:9) Lava va nga ni ntshembo wa laha misaveni va xiya vamakwavo va Yesu tanihi vayimeri va Mfumo naswona va va pfunile—hi ku kongoma na hi tlhelo ra moya. Yesu u swi teka tanihi leswi endleriwaka yena leswi tinyimpfu tin’wana ti swi endlelaka vamakwavo wa yena lava nga laha misaveni. Vanhu vo tano lava nga ta va va hanya loko a ta ku ta avanyisa matiko va ta tekiwa tanihi tinyimpfu.
12. Ha yini tinyimpfu ti nga ha vutisaka ndlela leyi ti endleleke Yesu musa ha yona?
12 Loko ku ri leswaku tinyimpfu tin’wana ta karhi ta chumayela mahungu lamanene sweswi ni vatotiwa naswona ta karhi ta va pfuna, ha yini ti vutisa ti ku: “Hosi, hi tshama hi ku vona rini u ri ni ndlala, kutani hi ku fihluta, kumbe u ri ni torha, hi ku siyela u nwa ke?” (Matewu 25:37) Ku nga ha va ku ri ni swivangelo swo hambana-hambana. Lexi i xifaniso. Hi ku tirhisa xona, Yesu u kombisa ku khathalela vamakwavo wa yena va moya hi mpimo lowukulu; u khumbeka na vona, u xaniseka na vona. Eku sunguleni Yesu u te: “Loyi a mi rhurhelaka, wa ndzi rhurhela; ni loyi a ndzi rhurhelaka, ú rhurhela la ndzi rhumeke.” (Matewu 10:40) Exifanisweni lexi, Yesu u ndlandlamuxa nsinya wa nawu, a kombisa leswaku leswi swi endliwaka (leswinene kumbe swo biha) eka vamakwavo va yena swi fika ni le tilweni; onge hi loko swi endleriwa yena etilweni. Nakambe, Yesu laha u kandziyisa mpimanyeto wa Yehovha wo avanyisa, a swi veka erivaleni leswaku ku avanyisa ka Xikwembu, hambi ka tsakisa kumbe ka vavisa, ku tiyile ku tlhela ku lulama. Timbuti ti nge nyiki xivangelo xa leswaku, ‘Loko a hi lo ku vona hi ku kongoma.’
13. Ha yini vanhu lava fanaka ni timbuti va nga ha vitanaka Yesu tanihi “Hosi”?
13 Loko hi twisisa leswaku ku avanyisa loku kombisiweke eka xifaniso lexi ku endleka rini, hi kuma nhlamuselo leyi nga erivaleni ya leswaku i vamani lava nga timbuti. Ku hetiseka ku ta endleka loko “xikombiso xa N’wana-wa-Munhu xi . . . ta vonaka etilweni; vanhu va tinxaka hinkwato ta misava va ta ba nkosi, kutani va ta vona N’wana-wa-Munhu a ta . . . , hi matimba ni ku kwetsima lokukulu.” (Matewu 24:29, 30, xiitaliki i xerhu.) Vaponi va nhlomulo wa Babilona Lonkulu lava khomeke vamakwavo va Hosi hi ndlela ya tihanyi, sweswi va nga vula Muavanyisi hi ndlela yo heleriwa hi ntshembo va ku i “Hosi,” va tshemba leswaku u ta ponisa vutomi bya vona.—Matewu 7:22, 23; ringanisa Nhlavutelo 6:15-17.
14. Xana Yesu u ta avanyisa tinyimpfu ni timbuti exisekelweni xihi?
14 Hambi swi ri tano, ku avanyisa ka Yesu a ku nga lawuriwi hi leswi khale ka vangheni va tikereke, lava alaka vukona bya Xikwembu kumbe van’wana va swi vulaka. (2 Vatesalonika 1:8) Ematshan’weni ya sweswo, muavanyisi u ta kambisisa xiyimo xa timbilu ni swiendlo swa nkarhi lowu hundzeke swa vanhu hambi ku ri eka “un’wana wa [vamakwavo va yena] lavatsongo.” Entiyisweni, nhlayo ya vatotiwa va Vakreste lava saleke emisaveni ya hunguteka. Hambi swi ri tano, ntsendze loko vatotiwa lava vumbaka “nandza la tshembekaka, wo tlhariha,” va ya emahlweni va phamela swakudya swa moya ni nkongomiso, lava nga ha vaka tinyimpfu va ni nkarhi wo endla leswinene eka ntlawa wa nandza, tanihi laha ‘ntshungu lowukulu lowu humaka ematikweni, etinxakeni ni le ka vanhu hinkwavo’ wu endleke ha kona.—Nhlavutelo 7:9, 14.
15. (a) Xana vo tala va tikombise tanihi timbuti hi ndlela yihi? (b) Ha yini hi fanele hi papalata ku vula loko un’wana a ri nyimpfu kumbe mbuti?
15 Xana va khomiwe njhani vamakwavo va Kreste swin’we ni timiliyoni ta tinyimpfu tin’wana leti hlanganeke na vona va vumba ntlhambi wun’we? Vanhu vo tala va nga ha va vona hi voxe va nga hlaselanga vayimeri va Kreste, kambe a va va khomanga hi rirhandzu vanhu va yena. Hi ku rhandza misava leyi yo biha, vanhu lava fanaka ni timbuti va ala rungula ra Mfumo, ku nga ha va ku ri ku ri twa hi ku kongoma kumbe hi ndlela yin’wana. (1 Yohane 2:15-17) Kavula, eku heteleleni, Yesu hi yena la hlawuriweke leswaku a avanyisa. A hi swa hina ku vula leswaku i vamani va nga tinyimpfu ni lava nga timbuti.—Marka 2:8; Luka 5:22; Yohane 2:24, 25; Varhoma 14:10-12; 1 Vakorinto 4:5.
I Vumundzuku Byihi Bya Ntlawa Ha Wun’we?
16, 17. I vumundzuku byihi lebyi tinyimpfu ti nga ta va na byona?
16 Yesu u vule xiboho xa ku avanyisa ka yena tinyimpfu: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.” Mawaku xirhambo lexi kufumelaka—“Tanani”! Kwihi? Evuton’wini lebyi nga heriki, hi laha a vuleke ha kona emakumu a ku: “Lavo lulama va ta ya evutomini lebyi nga heriki.”—Matewu 25:34, 46.
17 Exifanisweni xa titalenta, Yesu u kombise leswi lavekaka eka lava nga ta fuma na yena etilweni, kambe exifanisweni lexi u kombisa leswi languteriweke eka vafumiwa va Mfumo. (Matewu 25:14-23) Kahle-kahle, hikwalaho ka ku seketela ka vona vamakwavo va Yesu hi mbilu hinkwayo, tinyimpfu ti ta kuma ndhawu exivandleni xa laha misaveni xa Mfumo wa yena. Va ta tsakela vutomi emisaveni ya paradeyisi—ntshembo lowu Xikwembu xi va lunghiseleleke wona “ku sukela loko misava [ya vanhu lava ponisekaka] yi tumbuluka.”—Luka 11:50, 51.
18, 19. (a) Yesu u ta avanyisa timbuti hi ndlela yihi? (b) Xana hi nga tiyiseka njhani leswaku timbuti ti nge xanisiwi hi laha ku nga heriki?
18 Vona ku hambana ka ku avanyisiwa loku tisiwaka eka timbuti! “Kutani Hosi yi ta byela lava nge vokweni ra yona ra ximatsi yi ku: ‘Sukani ka mina, n’wina lava rhukaniweke hi Xikwembu; yanani endzilweni lowu nga timekiki, lowu lunghiseriweke Diyavulosi ni tintsumi ta yena; hikuva a ndzi ri ni ndlala, a mi ndzi fihlutanga; a ndzi ri ni torha, a mi ndzi siyelanga ndzi nwa; a ndzi ri muendzi, a mi ndzi rhurhelanga; a ndzi swerile, a mi ndzi ambexanga; a ndzi ri eku vabyeni ni le khotsweni, a mi tanga mi ta ndzi pfuxela.’ Hi laha na vona va nga ta hlamula, va ku: ‘Hosi, hi tshama hi ku vona rini u ri ni ndlala, kumbe u vabya, kumbe u ri ni torha, kumbe u ri muendzi, kumbe u swerile, kumbe u ri ekhotsweni, kutani hi nga ku pfuni ke?’ Kutani Hosi yi ta va hlamula, yi ku: ‘Ndzi tiyisile ndzi ri ka n’wina, loko mi nga endlelanga un’wana wa lavatsongo lava, na mina a mi ndzi endlelanga.’”—Matewu 25:41-45.
19 Swichudeni swa Bibele swa swi tiva leswaku leswi swi nge vuli swona leswaku mimoya-xiviri leyi nga fiki ya vanhu lava fanaka ni timbuti yi ta xanisiwa hi ndzilo hi laha ku nga heriki. E-e, hikuva vanhu i mimoya-xiviri; a va na mimoya-xiviri leyi nga fiki. (Genesa 2:7; Eklesiasta 9:5, 10; Ezekiyele 18:4) Hi ku gwevela timbuti “endzilweni lowu nga timekiki,” Muavanyisi u vula ku lovisiwa handle ka ntshembo wa vumundzuku, leswi ku nga ta tlhela ku va ku helela makumu ka Diyavulosi ni mademona yakwe. (Nhlavutelo 20:10, 14) Hikwalaho, Muavanyisi wa Yehovha u tisa ku avanyisa loku nga faniki. U byela tinyimpfu a ku, “Tanani”; eka timbuti a ku, “Sukani ka mina.” Tinyimpfu ti ta kuma “[vutomi] lebyi nga heriki.” Timbuti ti ta kuma “ku [biwa] loku nga heriki.”—Matewu 25:46.b
Xana Swi Vula Yini Eka Hina?
20, 21. (a) Vakreste va ni ntirho wihi wa nkoka wo wu endla? (b) I ku hambanisa kwihi loku endlekaka sweswi? (c) Xana xiyimo xa vanhu xi ta va xihi loko xifaniso xa tinyimpfu ni timbuti xi sungula ku hetiseka?
20 Vaapostola va mune lava tweke nhlamulo ya Yesu mayelana ni xikombiso xa vukona bya yena ni xa makumu ya mafambiselo lawa a va ri ni swo tala swo swi xiya. A va fanele va tshama va xalamukile naswona va hiteka. (Matewu 24:42) Nakambe a va fanele va endla ni ntirho wo veka vumbhoni lowu boxiweke eka Marka 13:10. Timbhoni ta Yehovha ti endla ntirho wolowo hi ku chivirika namuntlha.
21 Kambe, xana ku twisisa loku lokuntshwa ka xifaniso xa tinyimpfu ni timbuti ku vula yini eka hina? Phela, vanhu ana se va tihlawulela. Van’wana va le ‘ndleleni leyo anama leyi yisaka eku lovisiweni,’ loko van’wana va ringeta ku tshama ‘endleleni leyo khuma leyi yisaka evuton’wini.’ (Matewu 7:13, 14) Kambe nkarhi lowu Yesu a nga ta tisa ku avanyisa ka makumu eka tinyimpfu ni timbuti loku hlamuseriweke exifanisweni wa ha ta. Loko N’wana wa munhu a ta hi ntirho wo va Muavanyisi, u ta endla xiboho xa leswaku Vakreste vo tala va ntiyiso—entiyisweni “ntshungu lowukulu” wa tinyimpfu leti tinyiketeleke—va ta fanelekela ku hundza xiphemu xo hetelela xa “nhlomulo lowukulu” (NW) va ya emisaveni leyintshwa. Sweswi ntshembo wolowo wu fanele wu hi tsakisa. (Nhlavutelo 7:9, 14) Hi hala tlhelo, nhlayo leyikulu leyi humaka “ematikweni hinkwawo” yi ta va yi tikombise tanihi timbuti leti sihalalaka. Yi ta “ya eku biweni loku nga heriki.” Mawaku ku ntshunxeka emisaveni!
22, 23. Tanihi leswi ku tirha ka xifaniso ku nga ka nkarhi lowu taka, ha yini ntirho wa hina wo chumayela wu ri wa nkoka namuntlha?
22 Hambi leswi ku avanyisa loku hlamuseriweke exifanisweni ku nga ta humelela enkarhini lowu taka lowu tshineleke, hambi ku ri sweswi ku ni swin’wana swa nkoka leswi endlekaka. Hina Vakreste hi nghenele ntirho wa ku ponisa vutomi wa ku huwelela rungula leri avanisaka vanhu. (Matewu 10:32-39) Pawulo u tsarile: “Hikuva, ‘un’wana ni un’wana la khongelaka vito ra Hosi, ú ta ponisiwa.’ Kambe va ta khongerisa ku yini eka loyi va nga pfumelangiki ka yena xana? Va ta pfumerisa ku yini eka loyi va nga twangiki ta yena ke? Va ta ti twisa ku yini, loko va nga ri na mudyondzisi xana?” (Varhoma 10:13, 14) Vutirheli bya hina bya le rivaleni byi fikelela vanhu ematikweni yo tlula 230 hi vito ra Xikwembu ni rungula ra xona ro ponisa. Vamakwavo va Kreste va vatotiwa va ha rhangela entirhweni lowu. Tinyimpfu tin’wana ta kwalomu ka ntlhanu wa timiliyoni ti va joyinile. Naswona vanhu emisaveni hinkwayo va angula kahle eka rungula leri huweleriwaka hi vamakwavo va Yesu.
23 Vo tala va twa rungula ra hina loko hi ri karhi hi chumayela hi yindlu na yindlu kumbe hi xitshuketa. Van’wana va nga ha dyondza hi Timbhoni ta Yehovha ni leswi ti nga swona hi tindlela leti hina hi nga ti tirhisiki. Loko nkarhi wa ku avanyisa wu fika, xana Yesu u ta xiya vutihlamuleri bya vaaki ni ku fundzhiwa ka ndyangu ku fikela kwihi? A hi nge vuli nchumu emhakeni yoleyo, naswona a swi pfuni nchumu ku mbambela. (Ringanisa 1 Vakorinto 7:14.) Vo tala sweswi va honisa hi vomu, va hlekula kumbe va hlanganyela eku xaniseni ka vanhu va Xikwembu hi ku kongoma. Hikwalaho lowu i nkarhi wa nkoka; vanhu vo tano va nga wela eka lava Yesu a nga ta va avanyisa tanihi timbuti.—Matewu 10:22; Yohane 15:20; 16:2, 3; Varhoma 2:5, 6.
24. (a) Ha yini swi ri swa nkoka eka vanhu leswaku va angula kahle eku chumayeleni ka hina? (b) Wena hi wexe dyondzo leyi yi ku pfune leswaku u va ni langutelo rihi evutirhelini bya wena?
24 Kambe lexi tsakisaka, vo tala va angula kahle, va dyondza Rito ra Xikwembu, ivi va va Timbhoni ta Yehovha. Van’wana lava sweswi va tikombaka onge i timbuti va nga ha cinca ivi va va tinyimpfu. Yinhla hi leswaku lava angulaka kahle va tlhela va seketela masalela ya vamakwavo va Kreste hi ku chivirika sweswi va nyikela vumbhoni lebyi nga ta va xisekelo xa vona xo vekiwa evokweni ra xinene ra Yesu loko eka vumundzuku lebyi tshineleke, a tshama exiluvelweni xa yena leswaku a avanyisa. Vanhu volavo va katekisiwa naswona va ta ya emahlweni va katekisiwa. Xisweswo, xifaniso lexi xi fanele xi hi susumetela ku chivirika swinene entirhweni wa vutirheli bya Vukreste. Nkarhi wu nga si hela, hi lava ku endla hinkwaswo leswi hi nga swi kotaka ku huwelela mahungu lamanene ya Mfumo naswona hi ndlela yoleyo hi nyika van’wana nkarhi wo angula kahle. Kutani swi le ka Yesu ku avanyisa, hi ndlela leyi vavisaka kumbe leyi tsakisaka.—Matewu 25:46.
-