Xiviko Xa Misava Hinkwayo

◼ AFRIKA

Nhlayo ya matiko: 56

Nhlayo ya vaaka-tiko: 770 301 093

Nhlayo ya vahuweleri: 983 057

Nhlayo ya tidyondzo ta Bibele: 1 769 182

Xana a wu swi tiva leswaku mahungu lamanene ma le ku chumayeriweni le Sahara? Nafissatou la nga ni malembe ya 17 hi vukhale u tshama exidorobanini lexi nga ni timayini en’walungwini wa tiko ra Niger. Loko vadyondzi-kulobye va sungula ku bula hi swilo swo naveta rimbewu, Nafissatou u lo nyaku, a va siya. Nhwanyana un’wana u n’wi landzile, a n’wi vutisa leswaku ha yini a suka. Nafissatou u n’wi byele leswaku u nyangatsiwa hi bulo ra vona. Eku sunguleni nhwanyana yoloye u n’wi hlekurile, a vula leswaku ku languta swilo sweswo swo naveta rimbewu a swi nge n’wi vavisi helo. Nafissatou u n’wi byele leswaku sweswo i xidyoho lexikulu hikuva Muvumbi a nga swi tsakeli swilo swo tano. Kutani a humesa buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, ebegeni yakwe ivi a n’wi komba laha yi vulavulaka hi makhombo ya swilo swo naveta rimbewu. Endzhaku ka sweswo a humesa Bibele yakwe a n’wi hlayela 2 Vakorinto 7:1. Nhwanyana yoloye u pfumerile leswaku loko a hlalela tivhidiyo ta ku tikhoma loko biha, u titwa hi ndlela yin’wana leyi nga hlamuselekiki. U kombele buku leyi nge Vantshwa Va Vutisa. Nafissatou u n’wi nyikile, endzhakunyana u hlamusele a ku: “Siku rin’wana ndzi n’wi vone a titshamele yexe, kutani ndzi n’wi vutisa leswaku vanghana vakwe va kwihi. U te, ‘Munghana wa mina i buku leyi.’ Ndzi sungule ku dyondza na yena, naswona u tile eXitsundzuxweni.”

Eka malembe ya 15 lama hundzeke, wansati un’wana u dyondze Bibele ni makwerhu wa xisati la nga murhumiwa le Tanzania. Dyondzo yoleyo yi teke malembe yo hlaya. Wansati yoloye a a kanakana ku yimela ntiyiso hikwalaho ka leswi a a kanetiwa hi vandyangu wakwe, kutani dyondzo yi hetelela yi yimile. Hambiswiritano, swinhwanyetana swa yena swimbirhi a swi hamba swi rhiya ndleve loko mana wa swona a ri eku dyondzeni. Loko nhwanyana wa yena lonkulu a ri ni malembe ya 18 u rhurhile ekaya, naswona a nga ha dyanga nkarhi u lo vhela a kongoma eHolweni ya Mfumo ivi a kombela ku dyondzeriwa. U endle nhluvuko hi ku hatlisa kutani a khuvuriwa. Ndzisana ya yena na yona yi kombele ku dyondzeriwa Bibele, ivi yi khuvuriwa. Vanhwanyana lava va khutaze mana wa vona, kutani a endla xiboho xo tlhela a sungula ku dyondzeriwa Bibele. Kambe enkarhini lowu a a nga ha chavi munhu, hikuva hi swona leswi eku sunguleni swi n’wi tlheriseleke endzhaku, naswona u khuvuriwe enhlengeletanweni ya xifundzha hi May 2004.

Loko vandlha ri yingisa nawu wa ku “khathalela lava nga riki na vatswari ni tinoni enhlomulweni wa tona,” Yehovha wa ri katekisa hakunene. (Yak. 1:27) Sweswo swi ve tano evandlheni ra le Lesotho. Mapolo loyi a a ri un’wana wa vahuweleri lava khuvuriweke evandlheni, a a nga ri na nuna naswona a a ri ni vana va mune va vafana. Mapolo a a swi tiva leswaku u khomiwe hi vuvabyi lebyi nga tshungulekiki, hiloko a pfuna vana va yena leswaku va lunghekela ku sala va tiwundla. U va dyondzise Bibele, a famba na vona eminhlanganweni a tlhela a va dyondzisa ku endla mikukulu leyi a va yi xavisa etlhelo ka patu. Loko Mapolo a fa hi 1998 vafana vakwe lava saleke va ri swisiwana va sale va kurisiwa hi kokwa wa vona. Makwerhu wa xisati la nga murhumiwa, loyi a pfuneke Mapolo kukondza a va Mbhoni leyi khuvuriweke, u ye eka nhlangano lowu tirhanaka ni swiyimo swa vanhu a ya vulavulela vana lava leswaku va ta kuma mali yo hakelela xikolo. Timbhoni tin’wana ti va nyike swiambalo. Kokwa wa vona na yena u hetelele a file. Kutani makwerhu un’wana wa le vandlheni ra vona u dyondze na vona Bibele a tlhela a va hakelela ni rhente. Vafana lava hi vumune bya vona va va kona eminhlanganweni hinkwayo. Vambirhi va vona i vahuweleri lava khuvuriweke, Rantso ku nga yena lonkulu sweswi u ni malembe ya 20 hi vukhale naswona u khuvuriwe enhlengeletanweni ya xifundzha hi March 2004. U dyondze Bibele ni muzala wakwe Retselisitsoe, loyi va khuvuriweke hi siku rin’we. Rantso u ri tlangela ngopfu rirhandzu leri vamakwerhu va va kombiseke rona hi malembe yo tala.

Murhumiwa un’wana le Cameroon wa vika: “Vhiki ni vhiki loko ndzi ri karhi ndzi dyondza Bibele ni jaha rin’wana, a ndzi hamba ndzi twa un’wana a ri karhi a yimbelela tinsimu ta kereke hala ndlwini. Ndzi vutise jaha leri ndzi ku, ‘I mani la yimbelelaka hala ndlwini?’ A ku ri buti wa rona Stephen la feke mahlo. Ndzi sungule ku dyondza Bibele na yena hi ku tirhisa tikhasete ta broxara leyi nge I Yini Leswi Xikwembu Xi Swi Languteleke Eka Hina? Pakani ya hina a ku ri leswaku a nhlokohata tsalwa rin’we ra Bibele eka dyondzo ha yin’we. Stephen a swi n’wi olovela ku nhlokohata naswona u dyondze matsalwa yo tala ya Bibele. Nakambe u va kona eminhlanganweni naswona wa hlamula minkarhi yo tala. Wa ha ku nyikela nkulumo yakwe yo sungula eka Xikolo xa Vutirheli bya le Tilweni. A ku ri nkulumo ya ku hlaya ka Bibele, kutani leswi a nga swi kotiki ku hlaya Braille, u boheke ku yi nhlokohata. Ndzi swi langutele hi mahlo-ngati ku tirha na Stephen ensin’wini ndzi n’wi khome hi voko. Rin’wana ra matsalwa ya Bibele lawa Stephen a ma rhandzaka ngopfu i Esaya 35:5 leyi nge: “Mahlo ya lava nga voniki ma ta pfuriwa.” Stephen wa tsaka leswi mahlo ya yena ya moya ma pfuriweke, kutani sweswi se u yimbelela tinsimu to dzunisa Yehovha, a n’wi nkhensa leswi enkarhini lowu taka mahlo yakwe ya xiviri ma nga ta pfuleka.”

Etikweni ra Liberia leri hlakatiweke hi nyimpi, wansati un’wana la vuriwaka Nancy u ye eka Mbhoni yin’wana a ya kombela ku dyondzisiwa Bibele. Mufundhisi wakwe u n’wi byele leswaku Xikwembu xi ta yisa Timbhoni ta Yehovha etiheleni hikuva i Vakreste va mavunwa. Hambiswiritano, leswi a a akelane ni Timbhoni, naswona a voneke leswaku minkarhi hinkwayo loko ku duvulana ku yimilenyana, vakulu a va famba va kamba vamakwerhu loko va ha hlayisekile. U xiye nileswaku loko ku rhurilenyana Timbhoni a ti famba ti chumayela. Nancy swin’we ni van’wana vo tala eximutanini a va tsakile loko va vona movha lowu humaka erhavini ku ri wona wo sungula ku tsemakanya ndzilakana wa masocha ni vapfukeri, wu rhwale swilo swo phalala leswi a swi yimeriwe hi mahlo-ngati, leswi a swi nyikeriwe hi Timbhoni ta le Furwa ni ta le Belgium. U te: “Ndzi ehleketa leswaku n’wina mi ni ntiyiso.” U endle nhluvuko lowunene eka dyondzo yakwe.

Jaha rin’wana ri ye eximutanini xin’wana eUganda ri ya endla ntirho wo aka endlwini leyi vamakwerhu a va khomela eka yona minhlangano. Un’wana wa maphayona u ri chumayerile, naswona rungula ra kona ri tsakise jaha leri. Ku nga ri khale a ri fanele ri tlhelela eximutanini xa rikwavo lexi nga le henhla etintshaveni. Leswi a ku nga ri na Timbhoni laha jaha leri a ri tshama kona, phayona ri ri byele lomu ri nga ta yi kuma kona Holo ya Mfumo. Jaha rero ri khandziye xikanyakanya xa rona ri famba tikhilomitara ta kwalomu ka 30 eswindledyanini swo lala, ri rhelela ntshava ri ya lava vamakwerhu. Leswi ri nga kumangiki munhu eHolweni ya Mfumo, ri hoxe xipapilana ehansi ka nyangwa, lexi vulaka leswaku ri kombela ku dyondzeriwa Bibele. Phayona rin’wana leri endzhakunyana ri nga ya ri ya lava jaha rero eximutanini xa rikwavo ri hlamarile ku kuma vanhu va kwalomu ka 200 va yimele ku twa rungula ra Bibele! Vo tala va vona va vule leswaku va lava ku dyondzeriwa Bibele. Sweswi se ku khomiwa minhlangano endhawini leyi ya le kule.

Siku rin’wana nimadyambu eximutanini xin’wana lexi nga ni vanhu va 600 en’walungu-vuxa wa Nigeria, vaaki va vone ku vonakala loku a ku ri exibakabakeni ku ri karhi ku vangama ematini ya nambu. Ku vonakala koloko a ku tikomba ku ri karhi ku tshinela hala va nga kona, hiloko va tsutsuma va ya tumbela. Vo tala a va ehleketa leswaku a ku ri ndzoviso lowu Timbhoni ta Yehovha ti chumayeleke ha wona, hiloko va tsutsumela eHolweni ya Mfumo, va ri karhi va ku, “Armagedoni a yi nge wu lovisi muako lowu.” Eku heteleleni, kwalomu ka awara ya khume ni vusiku, vaaki va swi xiyile leswaku ku vonakala koloko a ku ri ka ritshwa. Loko vamakwerhu va vutisa vaaki leswaku ha yini va nga balekelanga etikerekeni leti nga ekusuhi, wanuna un’wana u hlamule a ku: “Tikereke letin’wana i thyaka ntsena. Armagedoni ya n’wina yi ta ti lovisa kambe Holo ya Mfumo yi ta sala.”

Makwerhu wa xisati la nga phayona ra nkarhi hinkwawo ekampeni ya vahlapfa eGuinea u ri: “Loko ndzi ri karhi ndzi famba hi yindlu ni yindlu, ndzi kume xinhwanyetana xa malembe ya nhungu lexi nga kotiki ku famba. Xi ndzi byele leswaku hi ntolovelo vatswari va xona va xi khiyela endlwini va xi siya xi ri xoxe siku hinkwaro. Ndzi xi byele leswaku ndzi lava xi va munghana wa mina. Kutani ndzi xi vutisa leswaku xi lava leswaku Xikwembu xi xi endlela yini. Xi ndzi byele leswaku xi lava leswaku Xikwembu xi xi endla xi kota ku famba. Ndzi xi pfulele Bibele eka Esaya 35:5, 6, ndzi xi komba leswaku Yehovha u tshembisa leswaku loyi a lamaleke u ta tlhela a kota ku famba. Kutani ndzi pfula broxara leyi nge Tsakela Vutomi eMisaveni Hilaha Ku Nga Heriki! eka xifaniso lexi kombisaka Yesu a ri karhi a hanyisa munhu la vabyaka. Ndzi xi byele leswaku mikateko yoleyo xi nga yi kuma loko xo dyondza Bibele naswona xi endla leswi Yehovha a swi languteleke eka xona. Xi amukele dyondzo ya Bibele. Hi hete broxara leyi nge Vutomi eMisaveni naswona se hi le kusuhi ni ku heta broxara leyi nge U Nga Va Munghana Wa Xikwembu! Endzhaku ko dyondza mavhiki manharhu, xi vule leswaku xi navela ku ya eminhlanganweni. Leswi xi nga kotiki ku tiyela eminhlanganweni, ndza xi bebula hi kongoma eminhlanganweni. Xi yi rhandza ngopfu minhlangano lerova loko ndzi nga xi landzangi xa khunguvanyeka xi pfanga no rila.”

◼ MATIKO YA AMERIKA

Nhlayo ya matiko: 56

Nhlayo ya vaaka-tiko: 868 871 739

Nhlayo ya vahuweleri: 3 165 925

Nhlayo ya tidyondzo ta Bibele: 3 089 453

Marie wa le Guadeloupe wa vika: “Eribuweni ra lwandle ekusuhi ni hotela leyi ndzi tirhaka eka yona, vaendzi van’wana va ndzi byele leswaku ku ni swiambalo ni tintangu leswi se ku hundzeke masiku mambirhi swi siyiwe kwalaho. Ndzi swi landzile ndzi ri ni ntshembo wa leswaku ndzi ta kuma swi ri ni makhadi lama nga ni rungula ra n’wini wa swona. Ku ri ni ku kuma makhadi, ndzi kume xipachi lexi a xi ri ni tiyuro ta 1 067 [R8 258]! Vo tala lava a va ri kwalaho va ndzi byele leswaku ndzi avelana mali yoleyo na vona. A ndza ha dyanga nkarhi, ndzi vhele ndzi va byela leswaku ndzi Mbhoni ya Yehovha, naswona ripfalo ra mina a ri ndzi pfumeleli ku va la nga tshembekiki. Hiloko ndzi yisa hinkwaswo evuamukelweni bya vaendzi ehotela. Vatirhi va kwalaho na vona va hlamale ngopfu leswi ndzi nga yi tekangiki mali yoleyo. Na vona ndzi va byele hi ta ripfumelo ra mina. Loko ndzi tlhelela eribuweni, vanhu van’wana se a va lava ku tiva swo tala hi ta vukhongeri bya hina. Ndzi va hlamule hi Bibele. Un’wana wa vona i wansati la nga te, ‘Ndzi ta thola Timbhoni ta Yehovha ntsena.’” Ku sukela kwalaho, ku laviwe n’wini wa swilo sweswo ivi a kumeka, naswona maphorisa ma bumabumele makwerhu loyi wa xisati hikwalaho ka vutshembeki bya yena.

Antonio la nga eBethele ya le Mexico u tirhisa nkarhi wun’wana ni wun’wana lowu a wu kumaka, ku chumayela vanhu. Sweswinyana, loko a ri karhi a ya eminhlanganweni hi bazi, u hlangane ni jaha ni ntombhi lava a va ambale kahle ivi a va nyika xiphephana. Endzhaku ka sweswo va dye mabulo yo tsakisa. Antonio u ri: “Loko ndzi fika laha ndzi chikaka kona ndzi va byele leswaku va famba kahle, kambe lexi ndzi hlamariseke, va chike na mina leswaku hi ya emahlweni ni bulo ra hina, hambileswi a ku nga ri xona xitichi lexi va chikaka eka xona. Loko hi chikile, hi ye emahlweni ni mabulo ya hina, kutani ndzi va lela. Hiloko va ku, ‘Xana u ya kwihi?’ Ndzi va hlamule ndzi ku, ‘Ndzi ya eminhlanganweni ya vandlha.’ Hiloko va langutana kutani va ku, ‘Xana hi nga famba na wena?’ Ndzi ku, ‘A hi fambeni!’” Ntombhi yoleyo leyi nga gqweta, swin’we ni muzala wa yona loyi a nga xichudeni eyunivhesiti, a va tshame va chumayeriwa emalembeni lama hundzeke kambe a va tekanga goza hikwalaho ka ku kanetiwa hi vandyangu. Loko va ri endleleni yo ya eminhlanganweni swin’we na Antonio va navele onge va nga fika va hlangana ni munhu loyi a va chumayeleke ro sungula. Swi tsakise ngopfu loko va fika va n’wi kuma kwale! Va tsake ngopfu leswi va koteke ku ya, naswona a va lava dyondzo ya Bibele hi mahlo-ngati. Ntombhi yoleyo yi te: “Hi kongomisiwe hi Yehovha emutini lowu, kutani ku sukela sweswi hi ta hamba hi ta.” Ku endliwe malunghiselelo ya dyondzo, leyi fambisiwaka kambirhi hi vhiki.

Le Haiti, Jacqueline, nsati wa mulanguteri wa xifundzha, a a tirha nsimu ni phayona ra xisati loko va vona ntombhi yin’wana yi tshame yoxe etlhelo ka patu yi ri eku rileni. Vamakwerhu va yi tshinelerile ivi va yi vutisa leswaku ha yini yi ri ni gome swonghasi. Eku sunguleni a yi va hlamulanga, kambe leswi va nga yi helelangiki mbilu, yi hetelele yi va hlamurile yi ku, “Ndzi endle leswi a ndzi swi lava.” Hiloko swi fika hi xihatla emiehleketweni ya Jacqueline leswaku yi fanele yi dye chefu, kutani a yi vutisa loko swi ri tano hakunene, hiloko yi pfumela hi nhloko. Vamakwerhu va yi tsutsumisele exibedlhele leswaku yi ya tshunguriwa. Vhiki leri landzeleke phayona rero ri tlhelele eka yona ri ya yi khutaza. Kutani va sungula ku dyondza Bibele.

Loko Lourdes a ri eku hakeleni exitolo le Paraguay u chuhe ngopfu loko a twa leswaku mali leyi a hakelaka hi yona i ya vukanganyisi. Loyi a baka muchini u hatlise a vitana murindzi. Lourdes na Ingrid ku nga n’wana wakwe wa malembe ya ntlhanu, va yisiwe exikamaranini xin’wana va ya yimela maphorisa. Mininjhere wa xitolo ni murindzi va sindzise makwerhu leswaku a va byela laha a yi kumeke kona mali yoleyo. Lourdes a a nga ha tsundzuki lomu a yi kumeke kona, u va byele leswaku a a nga swi tivi leswaku i mali ya vukanganyisi. Ingrid u xondzolote mininjhere ni murindzi, ivi a ku: “Mi hi endla makhamba. Manana a hi khamba. Hina hi Timbhoni ta Yehovha, naswona a hi hembeli munhu.” Mininjhere u vutise Lourdes loko a ri Mbhoni hakunene, kutani a pfumela. Vavanuna lava va khorwile leswaku Lourdes a a ri Mbhoni hakunene endzhaku ka loko va be riqingho va ri kongomisa erhavini ra Timbhoni ta Yehovha. Va kombele ku rivaleriwa hikwalaho ka leswi va nga va hlwerisa ivi va va tshika va tifambela. Endzhaku ka sweswo Ingrid u vule leswaku mhaka yo vava hi leswaku a va ha swi kotanga ku xava mbvacha lowu a a wu navele ngopfu.

Makwerhu un’wana le Costa Rica a a ri eku chumayeleni, hiloko a ehleketa ku ya chumayela muakelani wa yena la nga Mukhatoliki. Makwerhu a a chava hikuva wanuna yoloye a a nga ti rhandzi Timbhoni; nkarhi wun’wana a a ti holovela. Lexi hlamariseke makwerhu, hi leswaku wanuna yoloye u n’wi amukerile endlwini yakwe kutani a hlamusela leswi cinceke langutelo rakwe. Munghana wakwe u tshame a n’wi rhamba leswaku va ya ekerekeni ya Protestente leyi nga eximutanini xin’wana xa le kule. Loko a ri kwalaho u komberiwe leswaku a tivula “vumbhoni.” U lo na vula ntsena leswaku a a ri Mukhatoliki. Hiloko swirho swa kereke swi nga swi tsakeli sweswo kutani swi n’wi hlongola ekerekeni, swi byela munghana wakwe leswaku u tlanga hi ndzilo, hikuva a nga ha hlongoriwa ekerekeni hikwalaho ka ku va munghana wa Mukhatoliki. Wanuna yoloye u humile ekerekeni, kambe leswi a a ri ekule ni le kaya naswona a ri endhawini leyi a nga yi tolovelangiki, a a nga swi tivi leswaku u ta ri lata kwihi rivambu. Hikwalaho, u gongondze emutini wun’wana ivi a va hlamusela leswi nga n’wi humelela, kutani va n’wi amukela. Va n’wi phamerile va n’wi nyika ni byetlelo vusiku byebyo. Vini va muti na vona va n’wi chumayerile. Phela, a va ri Timbhoni ta Yehovha. Wanuna loyi u tsakile swinene loko a vona leswaku Timbhoni ta va rhandza hakunene vaakelani va tona! Sweswi u dyondza Bibele ni Timbhoni.

Makwerhu un’wana wa xisati le Trinidad u tsale a ku: “Loko ndzi ri karhi ndzi chumayela exitarateni, wansati un’wana u tile eka mina a ta kombela timagazini letintshwa. Endzhaku ko n’wi nyika timagazini to hlayanyana, ndzi kombele ku dyondza na yena Bibele. U vule leswaku a a dyondzeriwa kambe wa ha ku rhurhela endhawini yoleyo. Ndzi n’wi vutise vito ni lomu a tshamaka kona, kambe a ala ku ndzi byela, a vula leswaku loko hakunene hi tirhela Xikwembu, xi ta ndzi komba laha a tshamaka kona. Hi xamundzuku xa kona loko hi ri karhi hi tirha hi yindlu ni yindlu, ndzi gongondze eka yindlu yin’wana kutani ku pfula yena wansati luya. Loko a hi vona, u fe hi ku hleka a hlamarile ivi a ku, ‘Swi tise ku yini leswaku mi hatla mi ndzi kuma?’ Ndzi n’wi vutisile loko a ha swi tsundzuka leswi a nga ndzi byela swona hi xa tolo xa kona. U hi rhurhele endlwini ivi hi sungula ku dyondza. Sweswi wansati yoloye i muhuweleri la nga khuvuriwangiki.”

◼ ASIA NI LE MIDDLE EAST

Nhlayo ya matiko: 47

Nhlayo ya vaaka-tiko: 3 971 703 969

Nhlayo ya vahuweleri: 574 927

Nhlayo ya tidyondzo ta Bibele: 444 717

Ghanshyam i phayona ra nkarhi hinkwawo le Nepal. U tihanyisa hi ku rhwala vanhu hi thekisi. Ntirho wakwe wu n’wi endla a vona vanhu va swiyimo swo hambana-hambana, naswona vo tala va vona va va va jahile, hambi ku ri nivusiku, naswona a nga koti ku bula na vona nkarhi wo leha. Hambiswiritano, u ringeta hi matimba ku sungula bulo na vona. Loko swi koteka, u va nyika xiphephana lexi faneleke ni adirese ya Holo ya Mfumo leyi nga ekusuhi ni lomu va kumekaka kona. Vakhandziyi vo tala va swi tlangela sweswo. Ntlhanu wa vona sweswi u dyondza na vona Bibele.

Wanuna un’wana le Taiwan hakanyingi a a holovela nsati wakwe la nga Mbhoni hi rito ra yena lerikulu, ngopfu-ngopfu loko nsati wakwe a lava ku ya eminhlanganweni ya vandlha. Siku rin’wana u ome rihlanguti ivi a ya etlela exibedlhele. Nsati wakwe u n’wi khathalerile a nga heli mbilu ivi hi vutlhari a tirhisa nkarhi wolowo ku n’wi pfuna leswaku a twisisa ntiyiso wa Bibele. Makwerhu u te: “Ndzi ta ku byela swo karhi, ivi wena u ringeta ku swi tsundzuka leswaku byongo bya wena byi tshama byi ri eku tirheni.” Leswi a a swi tiva leswaku a a fanele a titoloveta ku tirhisa mianakanyo yakwe, u pfumerile. Makwerhu u tirhise rungula leri humaka eka tibroxara to hamba-hambana leswaku a n’wi dyondzisa tidyondzo ta xisekelo ta Bibele, to fana ni vito ra Xikwembu ni timfanelo ta xona ni nhloko-mhaka ya Bibele. Ku engetela kwalaho, vamakwerhu vo tala va n’wi endzerile va va ni musa eka yena. Sweswo swi n’wi khumbhe mbilu swinene lerova loko a huma exibedlhele u amukele dyondzo ya Bibele. Sweswi u sungule ku ya eminhlanganweni hi xitulu xa lava lamaleke, naswona rito rakwe lerikulu se u ri tirhisela ku hlamula ha rona.

Rohana la nga phayona ro hlawuleka ensin’wini ya le makaya le Sri Lanka, a a kanetiwa ngopfu hi wanuna un’wana la fambisaka xikanyakanya xa mavhilwa manharhu lexi nga ni xitulu xo tshamisa vanhu van’wana vambirhi. Loko a vona Rohana a ri ensin’wini, a a tlatlarhuka a n’wi rhuketela. Siku rin’wana u xungete Rohana a ku, loko a nga tshiki ku chumayela endhawini yoleyo u ta tlhaviwa. Rohana a nga lwanga na yena. Endzhakunyana, wanuna yoloye u humelele hi mhangu kutani a yisiwa exibedlhele naswona a a vaviseke ngopfu. Rohana u n’wi endzerile kwale xibedlhele a n’wi yisela nyiko. Loko wanuna yoloye a vona Rohana, u sungule ku rila a kombela ni ku rivaleriwa hinkwaswo leswi a n’wi endleke swona. Wanuna loyi u te: “Nkulukumba, hikwalaho ka ndlela leyi ndzi ku khomeke ha yona, a swi ta antswa loko a wu lo ndzi hima hi nhonga ematshan’weni yo ta laha u ta ndzi chavelela.” Sweswi u humile exibedlhele naswona wa ha hambeta ni ntirho wakwe wo tleketla vanhu hi xikanyakanya. Naswona minkarhi hinkwayo u hlaya timagazini ta hina.

Vanhu vo tala lava humaka ematikweni mambe va ta eHong Kong va ta tirha emitini ya vanhu. Wansati un’wana la nga ta hi ntirho a a sungule ku dyondza broxara leyi nge I Yini Leswi Xikwembu Xi Swi Languteleke? loko a ha ri ePhilippine naswona a a lava ku hambeta ni dyondzo yakwe ya Bibele. Hambiswiritano, a a nga swi tivi leswaku a nga ti kuma njhani Timbhoni, hiloko a khongela leswaku Xikwembu xi n’wi pfuna a ti kuma. Siku rin’wana loko a nga tirhi u khome ndlela a tsemakanya lwandle a ya laha ku nga ni mabindzu yo tala ni le phakini leyikulu laha vanhu vo tala va le Philippine va tidzumbelaka kona hi mahelo-vhiki. U ye ehenhla ni le hansi a lavana ni Timbhoni ta Yehovha, kambe a nga vonanga ni yin’we, hambileswi minkarhi yo tala hi mahelo-vhiki ti talaka ku chumayela ephakeni yoleyo. Nilokoswiritano, u vone broxara leyi nge Leswi Xi Swi Languteleke yi cukumetiwe ethyakeni. U yi tekile ivi a kuma leswaku yi tsariwe nomboro ya riqingho. Nomboro yoleyo a ku ri ya makwerhu wa xisati loyi a nga fambisela munhu un’wana broxara yoleyo. Wansati yoloye u hlamale ngopfu a tlhela a tsaka swinene loko a twa leswaku makwerhu yoloye u tirha endlwini leyi nga ekusuhi ni laha yena a tirhaka kona. Kutani u tlhele a sungula ku dyondzeriwa Bibele naswona u ya eminhlanganweni.

Mulanguteri wa xifundzha ni nkulu un’wana le Riphabliki ra Korea va endle riendzo ra vurisi hi nkarhi lowu faneleke. Va endzele makwerhu wa xisati loyi ku hundzeke malembe ya khume a horile. Nuna wakwe la nga pfumeliki leswaku Xikwembu xi kona, u endle xiboho xo ya ekerekeni endzhaku ka loko a endliwe vuhandzuri. Loko vamakwerhu va n’wi endzela va kume nuna wakwe, loyi endzhaku ka mabulo ya xinghana a nga teka broxara leyi nge Leswi Xi Swi Languteleke. Nkulu u khutaze makwerhu loyi wa xisati loko a ri karhi a dyondza ni nuna wakwe. Nuna wakwe u pfumerile loko va n’wi rhambela entsombanweni wa muganga, endzhaku ka sweswo u tshike ku ya ekerekeni ivi a hamba a ya eminhlanganweni. Makwerhu wa xisati na yena u endle nhluvuko, kutani a kombela ni leswaku va endzela vana vakwe va mune va majaha ni va vanhwanyana lava tshamaka edorobeni rin’wana. Sweswo swi endle leswaku ku khuvuriwa nuna wa makwerhu loyi, ni n’wana wa vona wa nhwanyana ni nuna wakwe swin’we ni xinhwanyatana xa vona. Hi ku famba ka nkarhi ku khuvuriwe n’wana wakwe lonkulu wa jaha ni nsati wakwe, hinkwavo lava veke Timbhoni i tsevu.

Yuki la nga xichudeni lexi nga exikolweni xa le henhla eJapani, a swi n’wi tikela ku byela swichudeni-kulobye leswaku i Mbhoni ya Yehovha. Leswi a a swi tiva leswaku u fanele a chumayela, u swi xiyile leswaku u fanele a sungula bulo hikuva swichudeni-kulobye a swi nga vulavuli hi vukhongeri. U endle leswaku vanghana va yena va n’wi vona loko a ri karhi a khongelela swakudya hi nkarhi wo wisa. Mixo wun’wana ni wun’wana a a khongela hi mbilu hinkwayo a kombela ku va ni xivindzi. Kutani, ematshan’weni yo endla xikhongelo xo koma hi nkarhi wo wisa leswaku a nga voni hi munhu, se a a korhamisa nhloko kutani a endla xikhongelo xo lehanyana. Loko a heta ku khongela xichudeni xin’wana xi n’wi vutise loko a pfuke kahle. Hambiswiritano, Yuki a nga swi kotanga ku xi chumayela. Sweswo swi n’wi karhatile emoyeni, endzhaku ka sweswo u khongele eka Yehovha a kombela ku rivaleriwa a tlhela a kombela ku va ni xivindzi. Hi xamundzuku, loko Yuki a heta ku khongela, xichudeni lexiya xi tlhele xi n’wi vutisa loko a pfuke kahle, kutani Yuki a tibyela a ku, ‘Namuntlha kona ndzi fanele ndzi xi chumayela!’ U xi hlamusele leswaku i Mbhoni ya Yehovha. Eku sunguleni xichudeni xexo xi hlamarile, kambe endzhaku ka sweswo xi tlhave Yuki hi swivutiso leswi nge, Xana u khongelela yini? Vito ra Xikwembu i mani? Yesu i mani? ni swin’wana. Yuki a a tsake ngopfu.

Le Kupang eIndonesia, Glenn a a dume hi vudakwa ni ku tirhisa swidzidzirisi. Vanhu a va n’wi thola leswaku a ya va chuhisela kumbe a va bela vanhu vo karhi. Loko a ha tshama ni vatswari vakwe, ku fike Timbhoni ta Yehovha ti bula na vona hi Bibele. Glenn u hatle a amukela dyondzo ya Bibele kutani a endla matshalatshala yo tshika mikhuva leyo biha. Siku rin’wana n’wini wa xitolo u n’wi nyike mali yo tala ngopfu leswaku a ya n’wi bela wanuna un’wana. Glenn u ehlekete hi mali yoleyo kambe a endla xiboho xo ka a nga ha pfumeli ku tholeriwa ku ba vanhu. U ale ntirho wolowo ivi a tlherisa ni mali ya kona. Kutani siku rin’wana loko Glenn a nghena exitolo xin’wana, n’wini wa xona a a chuhile hikuva a a ehleketa leswaku u tele ku ta n’wi ba. Glenn u n’wi tiyisekisile leswaku se u dyondza Bibele naswona a nga ha ri na rigombo. N’wini wa xitolo u amukele dyondzo ya Bibele a tlhela a n’wi thola exitolo xakwe. Glenn u khuvuriwe n’wexemu entsombanweni wa muganga naswona n’wini wa xitolo a a ri kona.

◼ YUROPA

Nhlayo ya matiko: 46

Nhlayo ya vaaka-tiko: 728 373 014

Nhlayo ya vahuweleri: 1 490 345

Nhlayo ya tidyondzo ta Bibele: 733 728

Endzhaku ka loko Jacoba wa le Netherlands la nga ni malembe ya 88 hi vukhale a file, maxaka yakwe ma kume papila ra ximfumo leri a ri huma exitichini xa maphorisa. U hete malembe yo tala a ri karhi a va yisela timagazini. Hi leswi swin’wana swa leswi a swi tsariwe epapileni rero: “A a ri munhu wo hlawuleka swinene eka hina. A a tshamela ku hi endzela exitichini xa maphorisa, naswona a hi tiphina hi ku nwa tiya na yena. A hi byi xixima vurhena bya yena, ni ku hlamarisiwa hi ku vona mukhegula wo ringana na yena a ha gada xikanyakanya, hambi ya na kumbe ka hisa, a endzela vanhu a ya va byela hi ta ripfumelo rakwe. Hi ta n’wi kumbuka swinene.”

Le Switzerland hi kuma ntokoto lowu. Loko ndyangu wun’wana wa Timbhoni ta Yehovha wu teka riendzo, wu siye xilotlelo xa yindlu eka mufana wa ndyangu wun’wana wa Timbhoni, wu n’wi kombela leswaku a sala a phamela tinhlampfi leti nga exidan’wanini lexi nga endlwini. Ro sungula loko mufana yoloye a pfula nyangwa hi xilotlelo, a xi nga pfuli. Wansati un’wana wa muakelani u twe vukokotlokotlo, ivi a hlometela hi le nyangweni. Loko a vona mufana yoloye a ri karhi a ringeta ku pfula nyangwa, u ehlekete leswaku i khamba ivi a vitana maphorisa. Loko mufana a hetile ntirho wakwe ivi a huma, u hlanganisiwe hi maphorisa mambirhi lama hlomeke. Ma n’wi tlhave hi xivutiso ma ku: “Xana u endla yini laha?” Ivi a ku: “A ndzi phamela tihlampfi, tanihi leswi ndzi nga komberiwa.” Maphorisa wolawo a ma n’wi kholwanga. Hiloko a ku: “Mina ni vini va muti lowu hi Timbhoni ta Yehovha. Kutani, va ndzi kombele leswaku ndzi sala ndzi phamela tinhlampfi ta vona loko va ha fambile, hi yona mhaka leyi va ndzi nyikeke ni swilotlelo swa yindlu.” Maphorisa a ma nga n’wi tshembi kutani a ma lava ku n’wi yisa exitichini xa maphorisa. Mufana yoloye u te: “Yimaninyana. Vini va muti va ndzi tsalele tinomboro ta vona ta riqingho ephepheni leri; mi nga va khoma emoyeni sweswi mi va vutisa loko leswi ndzi swi vulaka swi ri ntiyiso.” Hiloko maphorisa ma ba riqingho kutani ma kuma leswaku mhaka ya mufana loyi i ntiyiso. Endzhaku ka sweswo ma kombele leswaku a ma rivalela ivi ma suka ma famba. Loko ndyangu wolowo wu vuya eku wiseni, wu vulavule ni muakelani wa wona, loyi a a ha ku rhurhela kwalaho. Wu nkhense musa wakwe. Kutani wu n’wi hlamusela leswaku wona ni mufana luya i Timbhoni ta Yehovha, nileswaku mufana yoloye wa tshembeka swinene. Leswi wansati yoloye a a nga tivi swo tala hi Timbhoni ta Yehovha, ku sunguriwe bulo na yena leri nga endla leswaku a hetelela a pfumerile ku dyondzeriwa Bibele.

Loko makwerhu un’wana a ri karhi a tirha hi yindlu ni yindlu le Italiya u vulavurisane ni wansati un’wana loyi a nga ni vana naswona a hetaka nkarhi wo tala a ri entirhweni wo tihanyisa. Leswi makwerhu a nga ringeta ko tala leswaku a tlhela a vulavula na yena kambe a nga n’wi kumi, u vone swi antswa leswaku a n’wi bela riqingho. Wansati yoloye u hlamusele leswaku entiyisweni a nga na wona nkarhi wo bula hi Bibele. Makwerhu u te: “U nga dyondza swilo leswintshwa hi timinete ta khume kumbe ta 15, hambiloko hi bula hi riqingho.” U hlamule a ku: “Loko hi ta bula hi riqingho swi lulamile!” Makwerhu yoloye wa ha ku n’wi nyika buku leyi nge Vutivi Lebyi Yisaka eVuton’wini Lebyi Nga Heriki naswona va sungule ku dyondza hi riqingho. Hakanyingi va dyondza hi Mugqivela nimixo, kambe timinete letiya ta khume kumbe ta 15 leti va twananeke ha tona sweswi se ti hundzele eka 30 wa timinete.

Angela i wun’wana wa vahuweleri lava engetelekaka le Britain lava ringetaka ku chumayela vanhu vo tala lava humaka ematikweni mambe. Siku rin’wana loko a ya ekhefini ya Machayina, un’wana wa vatirhi u n’wi tlherisile. Hambiswiritano, loko Angela a ri karhi a tlhela, wansati un’wana wa Muchayina loyi a a huma hala ndzhaku ka khefi u n’wi tsutsumerile a ri karhi a vitana vito ra Xikwembu hi Xichayina. Endzhaku ka bulo rero ro sungula Angela a a hamba a n’wi yisela timagazini. Hambileswi wansati yoloye a a ti tsakela kambe u vule leswaku swa n’wi tikela ku kholwa leswaku Xikwembu hi xona xi nga vumba vuako hinkwabyo. A a ehleketa leswaku swilo hinkwaswo swi lo tiendlekela.

Ntirho wa wansati yoloye a ku ri ku endla tiphayi ekhefini yoleyo. Angela u n’wi vutise leswaku u hlanganisa swilo swingani loko a endla phayi. U hlamule a ku: “Ntlhanu wa swona.” Kutani Angela u ringanyete leswaku enkarhini lowu taka loko a yi endla, u fanele a hoxela swilo sweswo swa ntlhanu empfhukeni a vona leswaku ku ta huma tiphayi tingani. Vhiki leri landzelaka loko Angela a fika ekhefini wansati yoloye u n’wi nyike phayi leya ha ku humaka exitofini, kutani a n’wi byela leswaku se wa pfumela leswaku Xikwembu hi xona xi vumbeke vuako hinkwabyo. Va sungule ku dyondza Bibele nkarhi na nkarhi, naswona wansati yoloye u endla nhluvuko lowunene hi ntiyiso lowu a wu dyondzaka eRitweni ra Xikwembu.

Loko thyaka leri humaka eka xihlovo xa matimba ya nyutliya ri tleketliwa hi xitimela, lava va lwisanaka ni ku thyakisiwa ka mbango hakanyingi va kombisa ku vilela le Jarimani. Hikwalaho swiporo swi tshama swi rindziwe hi maphorisa, lama susaka swihinga swihi na swihi ka ha ri nkarhi xitimela xi nga si hundza. Hi November 2003 swihinga leswi nga exiporweni a swi susiwa ekusuhi ni laha Gudrun a a phayona kona. Loko a rungula u ri: “Ndzi ehlekete hi maphorisa lama tshamaka ma rindzile tiawara to leha, hiloko ndzi kunguhata ku ya ma nyika swo hlaya.” Gudrun u kume leswaku maphorisa ya kona ma ni xinghana. Leswi a a rhwala basikiti leyi nga lo mphaa, hi timagazini ta Xihondzo xo Rindza ni Xalamuka! a swi nga tiki ku ya vulavula na wona. Ntlawa wa maphorisa lowu a wu huma eBavaria wu n’wi teke xifaniso a ri karhi a wu nyika Xalamuka! emovheni wa wona. U fambe tikhilomitara to tlula 120 hi masiku mambirhi naswona u vulavule ni maphorisa yo tlula 100 endleleni yoleyo hinkwayo. U fambise timagazini ta 184. U rungule mhaka leyi a tsake ngopfu, a ku: “Ntokoto lowu a ndzi nge pfuki ndzi wu rivarile!”

Siku rin’wana loko Ana María wa le Spaniya a chayisile entirhweni u ye exitichini xa mabazi, loko a ha yimele bazi u hlaye maphepha lama namekiweke ebodweni ya switiviso. Rin’wana ra wona ri n’wi koke mahlo. A ri hlayeka hi ndlela leyi: “Ndzi lava ku vonana ni Timbhoni ta Yehovha hi xihatla leswaku ndzi ta ya emahlweni ni dyondzo ya mina ya Bibele.” Ana María a nga ha yimayimanga, u bele nomboro ya riqingho rero a hlela ku ya hlangana ni wansati yoloye la vuriwaka Felicitas. A a ha ku fika a huma le Ecuador laha a fambiseriweke dyondzo ya Bibele malembe mambirhi. Dyondzo ya Bibele yi tlhele yi sunguriwa hi xihatla naswona ku sukela hi nkarhi wolowo Felicitas swin’we ni n’wana wakwe wa jaha va va kona eminhlanganweni. Va tsakile leswi nhluvuko wa vona wa moya wu nga kavanyetiwangiki nkarhi wo leha.

Wansati un’wana wa le Bulgaria a a va kona loko ntukulu wakwe a dyondza Bibele ni Timbhoni. U tsake ngopfu loko a twa leswaku vito ra Xikwembu i Yehovha. Tanihi leswi Bibele yakwe a yi nga ri na vito ra Xikwembu, u ye exitolo xa tibuku a ya tixavela leyi nga na rona. N’wini wa xitolo u n’wi vutise leswaku u lava yini. Loko a n’wi byela, u lo n’wi tlatlarhukela a ku: “U wun’wana wa ntlawa luwa!” Loko va ha vulavula ku nghene mufundhisi. Kutani loko a vutisiwe ku, “Vito ra Xikwembu i mani?” u hlamule a ku: “A ku na rin’wana handle ka ra Yehovha. Wa nga tshika ku tlatlarhukela wansati wa vanhu.” N’wini wa xitolo u sale a tikhome xihlaya hi ku hlamala. Wansati yoloye swin’we ni van’wana vanharhu vandyangu wakwe va endla nhluvuko hi tlhelo ra moya.

Ndyangu wun’wana eRhaxiya wu humeleriwe hi khombo: vatswari va feriwe hi n’wana wa vona wa jaha la rhandzekaka. Vusiku lebyi hi xamundzuku xa kona a ku ta va nkosi wa yena, mana wakwe u be riqingho ri ya eka vanghana va n’wana wakwe hinkwavo, tinomboro ta vona a a ti kuma exibukwanini xa mufi. A ku ri ni nomboro yin’wana ya ndyangu wa Timbhoni ta Yehovha lowu na wona a wu tiviseke hi ta nkosi lowu. Ndyangu lowu wa Timbhoni a wu nga va tivi vatswari va mufi, kambe wu vone swi antswa leswaku wu ya va chavelela. Makwerhu un’wana u vulavule ni tata wa mufi hi ntshembo wa ku pfuxiwa ka vafi ivi a n’wi nyika broxara leyi nge Loko U Feriwa Hi Loyi U N’wi Rhandzaka. Makwerhu loyi u tlhele a n’wi endzela mundlwana wa kona. Tata wa mufi u te: “Broxara leyi yi hi khumbhe ngopfu. Hi endle xiboho xa leswaku hi va ni nkarhi wo dyondza Bibele.” Mana wa mufi se u tsarisile eka Xikolo xa Vutirheli bya le Tilweni naswona u tilunghiselela ku va muhuweleri la nga khuvuriwangiki.

◼ OCEANIA

Nhlayo ya matiko: 30

Nhlayo ya vaaka-tiko: 34 820 382

Nhlayo ya vahuweleri: 94 087

Nhlayo ya tidyondzo ta Bibele: 48 307

Olena a a ri ni malembe ya 12 hi vukhale loko a khuvuriwa hi December 2003, le Hawaii. A a nga fani ni vantshwa van’wana lava rhandzaka vuhungasi ku tlula mpimo, yena a a ri ni tipakani to tala ta swilo swa moya. U te: “Ndzi tiphine ngopfu hi ku va phayona ra nkarhinyana hi March na hi May, naswona ndzi tsakele ku tirha ni maphayona ni vamakwerhu lava kuleke. Hi xikombiso hi Migqivela nindzhenga ndzi ve ni nkarhi lowunene wo famba ni khale ka murhumiwa loko a endla maendzo yo vuyela eka Machayina man’wana niloko a ya fambisa tidyondzo ta yena ta Bibele. Ririmi ra kona ri ndzi tsakisile. Pakani ya mina leyikulu i ku va phayona ra nkarhi hinkwawo evandlheni ra ririmi rimbe. Leswaku ndzi fikelela pakani yoleyo, loko xikolo xi huma ndzi ya ensin’wini hi Ravunharhu, hi Mugqivela ni hi Sonto. Ndzi hlele ni ku teka vuphayona bya nkarhinyana ko tala hilaha ndzi nga kotaka hakona.” Hi swihi swin’wana leswi Olena a vonaka onge swi ta n’wi pfuna leswaku a fikelela tipakani takwe? U te: “Leswaku ndzi hlayisa mbilu yanga ndzi fanele ndzi swi kombisa hi swiendlo leswaku ku tsakisa Yehovha i swa nkoka eka mina. Ku tihlanganisa ni vanhu lava titwaka hi ndlela leyi fanaka ni leyi ndzi titwaka ha yona hi Yehovha, swi ta ndzi pfuna leswaku ndzi tshama endleleni yo lulama. Loko ndzi heta nkarhi wo leha ndzi ri karhi ndzi tirhela Yehovha a ndzi nge heti nkarhi wo leha ni vanhu lava nga ni malangutelo ya misava. Leswi swa ndzi sirhelela leswaku ndzi nga anakanyi leswaku ndzi nga kuma ntsako hi ku va ni swilo leswi vonakaka ni le ka mintsako yo homboloka.”

Le Solomon Islands swi tolovelekile leswaku vatswari va nyika xaka n’wana wa vona un’we kumbe vambirhi leswaku a va kurisa. Loko mpatswa wun’wana wu dyondze leswi Yehovha a swi languteleke eka vatswari, wu kombele leswaku Deborah, ku nga n’wana wa wona wa nhwanyana a vuyisiwa ekaya, loyi hi nkarhi wolowo a a ri eka malembe ya kondlo-a-ndzi-dyi. Xana a ku ta humelela yini loko se a tikuma a ri xirho xa ndyangu wa Timbhoni, lowu yaka eminhlanganweni vhiki ni vhiki, wu chumayela ni ku va ni dyondzo ya ndyangu ya Bibele? Deborah u ri: “Hambi ku ri eka nhlangano wo sungula lowu ndzi nga ya eka wona, ndzi vone vanhu hinkwavo va ndzi tsakerile leswi ndzi nga ta. A ndzi ehleketa leswaku ndzi ta vona vafundhisi va ambale tiphuraphura, kambe doo! Swi tikombe onge un’wana ni un’wana a a hlanganyela hambi ku ri swihlangi.” A swi hlwelanga leswaku na yena Deborah a endla tano. Xin’wana lexi n’wi tsakiseke i ndlela leyi tata wakwe a n’wi dyondzisaka ha yona swin’we ni vamakwavo. U ri: “Tatana u hi pfuna leswaku hi anakanyisisa hi swikombiso swa vanhu va le Bibeleni. Entiyisweni leswi swa ndzi pfuna loko ndzi ri ni xiphiqo.” Deborah loyi sweswi a nga muhuweleri la nga khuvuriwangiki, u vula leswaku u tsake ngopfu leswi ntiyiso wa Rito ra Xikwembu wu susumeteleke vatswari vakwe leswaku va n’wi landza a ta nghena endleleni ya vutomi.

Tindhawu tin’wana ta le Papua New Guinea ko va tintshava, naswona vaaki vo tala va le swimitanini swin’wana a swi koteki ku ya eka vona hi patu. Swin’wana swa swimitana leswi a swi na swona swilo swa manguva lawa. Hambiswiritano, mahungu lamanene ya Mfumo ma swi kota ku fikelela ni le tindhawini toleto. Wanuna la vuriwaka Leanna u ye eminhlanganweni edorobeni ra Port Moresby leri nga ntsindza wa tiko. Vamakwerhu va hlamarile ku twa leswaku i hosi ya le ximutanini lexi nga le henhla ka tintshava, laha vanhu va kona va nga riki na swilo swa manguva lawa. Leanna swi n’wi teke masiku ya ntlhanu ku ya fika epatwini lerikulu a ri karhi a tsemakanya makhwati hi milenge. Ku sukela epatwini rolero u khandziye lori yi ya n’wi veka entsindza. U vule leswaku eka mune wa malembe lama hundzeke u tshame a ta edorobeni ivi a hlangana ni makwerhu loyi a a ri eku chumayeleni exitarateni kutani a n’wi fambisela magazini wa Xihondzo xo Rindza. Leanna u fambe ni magazini wolowo eximutanini xa rikwavo, naswona loko a hete ku xi hlaya, u sungule ku dyondzisa vanhu va le ximutanini xakwe hi magazini wolowo. Ku hundze malembe yo hlayanyana a ri karhi a endla tano hi Sonto yin’wana ni yin’wana, naswona magazini wolowo a a wu veka endzeni ka plasitiki leswaku wu nga onhaki. Eku heteleleni vanhu va ximutana xakwe va n’wi sindzise leswaku a va lavela vatsari va magazini wolowo. Hiloko a tlhelela edorobeni a ya tivisa vamakwerhu, ivi va hlela ku dyondza na yena. Leanna u fike a tshama mavhiki mambirhi ni ndyangu wa Timbhoni kutani a heta dyondzo ya broxara leyi nge Leswi Xi Swi Languteleke. Loko a hlamuseriwe leswaku ku ni vandlha edorobeni leri nga riki ekule ngopfu ni ximutana xakwe, u tsake ngopfu, ivi a ku: “Swa antswa! Swi teka masiku mambirhi ntsena ku ya kona!” U longisiwe nkwama lowu a wu lo mphaa, hi tibuku swin’we ni vutivi lebyi engetelekeke bya ntiyiso wa Rito ra Xikwembu, ivi a khoma ndlela a muka. Ku endliwe malunghiselelo ya leswaku siku rin’wana ku endzeriwa ximutana xexo leswaku vaaki va xona va ta dyondzisiwa Bibele hi ndlela leyi kongomeke.

Exihlaleni xa Kiribati, makwerhu wa xisati la tirhaka etihofisi ta vuhundzuluxeri ta Timbhoni ta Yehovha u rungula ntokoto wakwe a ku: “Mixo wun’wana, ndzi hoxe magazini wa Xihondzo xo Rindza ebegeni ya mina, lowu vulavulaka hi tihele, ndzi ehleketa leswaku ndzi ta wu fambisa, hambi leswi a wu ri wa khale. Mina ni loyi a ndzi famba na yena hi hlangane ni wanuna wun’wana. Hiloko hi titivisa eka yena, kutani endzhaku ka loko hi n’wi hlamusele leswi Bibele yi swi vulaka hi tihele hi n’wi kombe magazini wolowo. U lo korhamisa nhloko a ku whii, nkarhi wo lehanyana, kutani ndzi n’wi vutisa loko ku ri na leswi nga fambiki kahle. Loko a tlakusa nhloko ndzi xiye leswaku a a ri eku rileni. U hi byele leswaku mhaka leyi nga eka magazini yi n’wi khumbe ngopfu. N’wana wakwe a a ha ku fa mavhiki lama hundzeke, naswona yena ni nsati wakwe a va ha n’wi rila. Havambirhi a va khongela Xikwembu leswaku xi va chavelela hikuva a va tshemba leswaku jaha ra vona a ri ri eku katingiweni etiheleni. Loko va twe leswi Bibele yi swi vulaka hi xiyimo xa vafi, wanuna yoloye swi n’wi hlamarisile swi tlhela swi n’wi tsakisa ngopfu. Ku sunguriwe dyondzo eka riendzo leri landzeleke. U rhandza ku vula leswaku u khongele Xikwembu leswaku xi n’wi komba ntiyiso ni leswaku i khale a ri karhi a navela ku kuma vukhongeri lebyi dyondzisaka Bibele hi vuenti. U sungule ku ya eminhlanganweni, naswona u lunghiselela kahle nakambe eka Dyondzo ya Xihondzo xo Rindza u hlamula swi suka embilwini.”

Hi December 2003, vanhu vo tlula 60 000 va ve kona entsombanweni lowukulu wa matiko hinkwawo wa Timbhoni ta Yehovha le Australia. Loko Alyscea wa malembe ya tsevu a huma entsombanweni wa le Sydney, a a swi yimele hi mahlo-ngati ku komba swichudeni-kulobye leswintshwa buku leyi nge Dyondza Eka Mudyondzisi Lonkulu. Loko mana wakwe a n’wi landza exikolweni ndzhenga wolowo u hlamarile ku vona marito lama nge “Vangamisa Xikwembu” ma tsariwe hi maletere lamakulu ebodweni etlilasini. Siku rero nimixo Alyscea u rungulele vadyondzisiwa vanharhu swin’we ni swichudeni-kulobye swa 24 hi ta ntsombano. Hinkwavo ka vona yi va tsakise ngopfu buku leyintshwa swin’we ni tinhla-nkulu tin’wana leti Ayscea a va runguleleke tona hi ku hiseka. Marito lama nge “Vangamisa Xikwembu” ma tshame ebodweni yoleyo siku hinkwaro.

[Xifaniso lexi nga eka tluka 43]

Rantso (wa vumbirhi ku suka exineneni) swin’we ni muzala wakwe ni vamakwavo eLesotho

[Xifaniso lexi nga eka tluka 43]

Nafissatou wa le Niger

[Xifaniso lexi nga eka tluka 48]

Marie wa le Guadeloupe

[Xifaniso lexi nga eka tluka 48]

Antonio wa le Mexico

[Xifaniso lexi nga eka tluka 52]

Ghanshyam wa le Nepal

[Xifaniso lexi nga eka tluka 56]

Jacoba wa le Netherlands

[Xifaniso lexi nga eka tluka 58]

Angela wa le Britain

[Xifaniso lexi nga eka tluka 61]

Olena wa le Hawaii