Xana a swi twala leswi Davhida a a rindzele leswaku Xikwembu xi n’wi khathalela? Xana Xikwembu xa khathala hi wena? Vanhu vo tala a va tshembi leswaku Xikwembu xa matimba hinkwawo xa khathala hi vona. Hikwalaho ka yini?

Xivangelo xin’wana hileswaku Xikwembu xi tlakukile swinene ku tlula vanhu. Loko xi languta xi ri etilweni, eka xona matiko hinkwawo “ma fana ni thonsi leri humaka ekhuwaneni; naswona ma tekiwa tanihi ntshurinyana exikalweni.” (Esaya 40:15) Mutsari un’wana wa manguva lawa loyi a kanakanaka leswaku Xikwembu xi kona, u gimete hi ku vula leswaku “a swi twali ku pfumela leswaku ku ni Xikwembu lexi khathalaka hi wena ni hi swilo leswi u swi endlaka.”

Hi hala tlhelo vanhu van’wana, va anakanya leswaku mahanyelo ya vona ma endla leswaku va nga faneleki ku va Xikwembu xi khathala hi vona. Hi xikombiso, wanuna loyi a vuriwaka Jim u ri: “Minkarhi hinkwayo a ndzi khongelela ku va ni ku rhula nileswaku ndzi kota ku tikhoma kambe endzhaku ka nkarhi a ndzi tlhela ndzi hlundzuka. Ndzi gimete hi ku vula leswaku a ndzi ri mudyohi lonkulu naswona Xikwembu a xi nge swi koti ku ndzi pfuna.”

Xana Xikwembu xi le kule ngopfu na hina lerova xi nga tsandzeka ku hi vona? Xi titwa njhani hi swivumbiwa swa xona leswi nga hetisekangiki? A hi nge swi koti ku hlamula swivutiso leswi handle ko kuma vutivi lebyi humaka eka Xikwembu. Hambiswiritano, Bibele leyi nga ni rungula ra Xikwembu leri huhuteriweke, ya hi tiyisekisa leswaku Xikwembu a xi le kule ngopfu ni un’wana ni un’wana wa hina lerova xi nga tsandzeka ku khathala hi hina. Entiyisweni, Bibele yi ri: “[A xi le] kule ngopfu ni un’wana ni un’wana wa hina.” (Mintirho 17:27) Eka swihloko swa mune leswi landzelaka, hi ta bula hi leswi Xikwembu xi swi vulaka malunghana ni ndlela leyi xi khathalaka ha yona hi un’wana ni un’wana wa hina ni ndlela leyi xi va khathaleleke ha yona vanhu lava fanaka na wena.

LEXI ENDLAKA VANHU VAN’WANA VA KANAKANA: Ndzavisiso lowa ha ku endliwaka wu kombisa leswaku xirimela xa hina ntsena xi ni tipulanete ta kwalomu ka 100 wa tibiliyoni. Leswi vuako byi nga byikulu swinene, vanhu vo tala va tivutisa leswaku ‘Ha yini Muvumbi wa matimba hinkwawo a fanele a vona leswi vanhu va swi endlaka eka pulanete leyi leyitsongo?’

LESWI RITO RA XIKWEMBU RI SWI DYONDZISAKA: Xikwembu a xi lo hi nyika Bibele ntsena ivi xi hi tshika xi nga ha vi na mhaka na hina. Ku ri na sweswo, Yehovha wa hi tiyisekisa u ri: “Ndzi ta ku tsundzuxa ndzi veke tihlo ra mina ri ri ehenhla ka wena.”—Pisalema 32:8.

Anakanya hi Agara wansati wa Muegipta wa hi lembe-xidzana ra vu-20 B.C.E. Agara a a nga n’wi xiximi n’wini wakwe Sara, hikwalaho ka sweswo Sara u n’wi tsongahatile kutani Agara a balekela emananga. Leswi Agara a endleke xihoxo, xana Xikwembu xi n’wi tshikile xi nga ha vi na mhaka na yena? Bibele yi ri: ‘Ntsumi ya Yehovha yi n’wi kumile.’ Ntsumi yoleyo yi tiyisekise Agara yi ku: “Yehovha u twe ku xaniseka ka wena.” Kutani Agara a ku eka Yehovha: “U Xikwembu lexi vonaka.”—Genesa 16:4-13.

“Xikwembu lexi vonaka” na wena xa ku vona. Hi xikombiso, manana loyi a nga ni rirhandzu u tshama a va veke tihlo vana vakwe ngopfu-ngopfu lava ha riki swihlangi, hikuva loko n’wana a ha ri xihlangi u wu lava ngopfu nkhathalelo wa mutswari wakwe. Hilaha ku fanaka, Xikwembu xi tshama xi hi langutile ngopfu-ngopfu loko hi hele matimba ni loko hi lava mpfuno. Yehovha u ri: ‘Ndzi tshama eku tlakukeni ni le ndhawini yo kwetsima, kambe ndzi ni loyi a pfotlokeke ni lava va moya wo titsongahata, leswaku ndzi hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.’—Esaya 57:15.

Hambiswiritano, u nga ha tivutisa: ‘Xana Xikwembu xi ndzi languta njhani? Xana xi ndzi avanyisa hi ku ya hi ndlela leyi ndzi langutekaka ha yona kumbe xi languta leswi ndzi nga xiswona endzeni kutani xi twisisa leswi ndzi nga swona?’

LEXI ENDLAKA VANHU VAN’WANA VA KANAKANA: Vanhu vo tala va vona onge Xikwembu xi languta vanhu tanihi vadyohi ntsena—lava nga basangiki naswona va nga faneriwiki ku khathaleriwa hi xona. Kendra loyi a a ri ni ntshikilelo wa mianakanyo, a a titwa a ri mudyohi lonkulu hikuva a a nga swi koti ku hanya hi milawu ya Xikwembu. Eku heteleleni u te: “Ndzi tshike ku khongela.”

LESWI RITO RA XIKWEMBU RI SWI DYONDZISAKA: Yehovha a nga langutisi ku nga hetiseki ka wena naswona wa yi twisisa ndlela leyi u nga ha yona. Bibele yi ri: “U ku tiva kahle ku vumbeka ka hina, wa tsundzuka leswaku hi ntshuri.” Lexi tsakisaka, a nga hi khomanga “hi ku ya hi swidyoho swa hina,” kambe u hi rivalela hi musa loko hi hundzuka.—Pisalema 103:10, 14.

Anakanya hi Davhida, hosi ya le Israyele loyi ku vulavuriweke ha yena eka xihloko xo sungula xa swihloko leswi swa nxanxamelo. Loko a khongela eka Xikwembu u te: “Mahlo ya wena ma vone ni xitumbulukwa xa mina, naswona swiphemu swa xona hinkwaswo swi tsariwe ebukwini ya wena . . . Ndzi lavisise, Wena Xikwembu, u tiva mbilu ya mina.” (Pisalema 139:16, 23) Davhida a a khorwiseka leswaku hambileswi minkarhi yin’wana a a endla swidyoho leswikulu, Yehovha a a kota ku vona leswaku u hundzukile hi mbilu hinkwayo.

Yehovha u ku tiva kahle ku tlula ndlela leyi vanhu hinkwavo va ku tivaka ha yona. Bibele yi ri: “Munhu u vona ntsena leswi vonakaka ematihlweni; kambe loko ku ri Yehovha, u vona leswi mbilu yi nga swona.” (1 Samuwele 16:7) Xikwembu xa swi tiva leswaku ha yini u hanya hi ndlela leyi u hanyaka ha yona—laha u ma tekeleleke kona mahanyelo wolawo, ndlela leyi u kuleke ha yona, laha u kuleleke kona ni vumunhu bya wena ku nga swilo leswi ku endlaka u va leswi u nga xiswona. Xa ma vona naswona xa ma tlangela matshalatshala lawa u ma endlaka yo lava ku antswisa vumunhu bya wena hambileswi u pfaka u endla swihoxo.

Kambe, Xikwembu xi yi tirhisa njhani ndlela leyi xi ku twisisaka kahle ha yona leswaku xi ku chavelela?

LEXI ENDLAKA VANHU VAN’WANA VA KANAKANA: Hambiloko vanhu va lava nchavelelo, van’wana va vona onge ku ta va ku ri vutianakanyi loko vo kombela Xikwembu leswaku xi va pfuna va kota ku langutana ni swiphiqo swa vona. Wansati loyi a vuriwaka Raquel u te: “Loko ndzi xiya swiphiqo leswikulu leswi vanhu vo tala emisaveni va langutanaka na swona, ndzi vona swiphiqo swa mina swi nga ri nchumu lerova ndzi nga kombela mpfuno eka Xikwembu.”

LESWI RITO RA XIKWEMBU RI SWI DYONDZISAKA: Xikwembu xi nghenelerile hi ndlela leyi hlamarisaka leswaku xi pfuna ni ku chavelela vanhu. Namuntlha vanhu hinkwavo va velekiwe ni xidyoho lexi endlaka leswaku va nga swi koti ku yingisa milawu ya Xikwembu hilaha ku heleleke. Hambiswiritano, Xikwembu “xi hi rhandzile kutani xi rhuma N’wana wa xona [Yesu Kreste] a va gandzelo ra ku vuyelelana ra swidyoho swa hina.” (1 Yohane 4:10) Hi ku tirhisa gandzelo ra nkutsulo ra Yesu, Xikwembu xi endle swi koteka leswaku hi rivaleriwa swidyoho, hi va ni ripfalo leri baseke ni ntshembo wo kuma vutomi lebyi nga heriki emisaveni leyintshwa leyi nga ni ku rhula.a Xana gandzelo rero ri endleriwe vanhu hinkwavo hi ku angarhela kumbe ri kombisa ndlela leyi Xikwembu xi khathalaka ha yona hi wena?

Anakanya hi muapostola Pawulo. Gandzelo ra nkutsulo ra Yesu ri n’wi susumetele ku tsala a ku: “Ndzi hanya hi ripfumelo leri nga eka N’wana wa Xikwembu, loyi a ndzi rhandzeke kutani a tinyiketa hikwalaho ka mina.” (Vagalatiya 2:20) I ntiyiso leswaku Yesu u fe Pawulo a nga si va Mukreste. Hambiswiritano, Pawulo u teke gandzelo rero tanihi nyiko leyi Xikwembu xi n’wi nyikeke yona.

Rifu ra gandzelo ra Yesu i nyiko leyi na wena Xikwembu xi ku nyikeke yona. Nyiko yoleyo yi kombisa leswaku na wena u wa risima eka Xikwembu. Yi nga ku nyika “nchavelelo lowu nga heriki ni ntshembo lowunene” kutani yi ku “tiyisa exiendlweni xin’wana ni xin’wana lexinene ni le ritweni.”—2 Vatesalonika 2:16, 17.

Kambe, Yesu u nyikele hi vutomi byakwe tanihi gandzelo emalembeni ya kwalomu ka 2 000 lama hundzeke. Hi byihi vumbhoni lebyi nga kona lebyi kombisaka leswaku Xikwembu xi lava ku va ni vuxaka na wena namuntlha?

LEXI ENDLAKA VANHU VAN’WANA VA KANAKANA: Vanhu vo tala lava pfumelaka eka Xikwembu va vona onge xi le kule swinene na vona. Christina wansati wa le Ireland loyi a nga xwiki ekerekeni u ri: “Ndzi teka Xikwembu tanihi lexi tumbuluxeke swilo hinkwaswo, kambe a ndzi xi tivi. A ndzi si tshama ni siku ni rin’we ndzi titwa ndzi ri ekusuhi na xona.”

LESWI RITO RA XIKWEMBU RI SWI DYONDZISAKA: Loko hi titwa hi nga pfuni nchumu, Yehovha a nga hi lahleli mavoko. Yesu u kombise ndlela leyi Xikwembu xi khathalaka ha yona hi hina loko a ku: “Loko munhu wo karhi a ri ni tinyimpfu ta 100 kutani ku lahleka yin’we, xana a nge ti siyi leta 99 etintshaveni kutani a ya lava leyi lahlekeke?” Hi dyondza yini emhakeni leyi? “Hi ku fanana Tata wa mina la nge tilweni a nga naveli leswaku un’wana wa lava lavatsongo a lova.”—Matewu 18:12-14.

Un’wana ni un’wana “wa lava lavatsongo ” i wa risima eka Xikwembu. Xana Xikwembu xi yi ‘lava njhani leyi lahlekeke?’ Hi ku ya hi tsalwa leri tshahiweke eku sunguleni ka xihloko lexi, Yehovha u kokela vanhu eka yena.

Xiya ndlela leyi Xikwembu xi tekeke goza ha yona ku sungula leswaku xi kokela vanhu va timbilu letinene eka xona. Hi lembe-xidzana ro sungula C.E., Xikwembu xi rhume Filipi mudyondzisiwa loyi a nga Mukreste leswaku a ya hlangana ni ndhuna ya Muetiyopiya leyi a yi famba hi kalichi leswaku a ya yi hlamusela vuprofeta bya le Bibeleni lebyi ndhuna yoleyo a yi ri karhi yi byi hlaya. (Mintirho 8:26-39) Hi ku famba ka nkarhi, Xikwembu xi lerise muapostola Petro leswaku a endzela ndhuna ya Murhoma leyi vuriwaka Korneliyo, loyi a a ri karhi a khongela ni ku tikarhatela ku gandzela Xikwembu. (Mintirho 10:1-48) Xikwembu xi tlhele xi kongomisa muapostola Pawulo ni vatirhi-kulobye leswaku va ya enambyeni lowu a wu ri ehandle ka muti wa Filipiya. Kwalaho, va hlangane ni “mugandzeri wa Xikwembu” loyi a vuriwaka Lidiya kutani “Yehovha a pfula mbilu yakwe swinene leswaku yi nyikela nyingiso.”—Mintirho 16:9-15.

Etimhakeni leti hinkwato, Yehovha u tiyisekise leswaku lava a va n’wi lava hi mbilu hinkwayo va kuma nkarhi wo n’wi tiva. I vamani lava namuntlha va endzelaka vanhu emakaya ni le tindhawini ta mani na mani leswaku va ya va chumayela hi rungula ra Xikwembu leri kumekaka eBibeleni? Vo tala va nga ha vula leswaku i ‘Timbhoni ta Yehovha.’ Tivutise, ‘Xana leswi swi nga vula leswaku Xikwembu xi tirhisa tona leswaku xi endla ndzi va ni vuxaka na xona?’ Hi ku khutaza leswaku u khongela Xikwembu leswaku xi ku pfuna u kota ku tshinela eka xona hilaha xi lavaka hakona.a