Xana wa ha tsundzuka loko u pfa u wa, loko wa ha ri ntsongo? Kumbexana u tivavisa voko kumbe tsolo. Xana wa ha yi tsundzuka ndlela leyi mana wa wena a ku chaveleleke ha yona? Kumbexana u hlantswe ndhawu leyi u vavisekeke eka yona kutani a yi bandicha. U ririle, kambe marito yakwe lama chavelelaka ni leswi a ku angarheke swi hatle swi endla leswaku u titwa u antswa. Hi nkarhi wolowo nchavelelo a wu wu kuma hi ku olova.

Kambe vutomi byi ya byi tika swinene loko hi ri karhi hi kula. Hi va ni swiphiqo leswikulu, naswona swa tika ku kuma nchavelelo. Khombo ra kona, swiphiqo swa vanhu lavakulu a swi tlhantlhiwi hi ku bandichiwa ni hi ku angarhiwa hi manana. Xiya swikombiso swi nga ri swingani.

• Xana u tshame u langutana ni ntshikilelo wa ku heleriwa hi ntirho? Julian u vula leswaku loko a hlongoriwa entirhweni, a a karhatekile swinene. U tivutisile, ‘Ndzi ta wu khathalela njhani ndyangu wa mina? Endzhaku ko tirhela khampani leyi malembe yo tala, ha yini yi vona onge a ndza ha pfuni nchumu?’

• Kumbexana u tsemeke nhlana hikwalaho ka ku fa ka vukati bya wena. Raquel u ri: “Loko nuna wa mina a pfukutana a ndzi siya tin’hweti ta 18 leti hundzeke, ndzi ve ni gome lerikulu. A swi endla onge hiloko mbilu ya mina yi pandzeke hi le xikarhi. A ndzi twa ku vava emirini ni le mintlhavekweni. Vumundzuku a byi ndzi chavisa.”

• Swi nga ha endleka leswaku u ni xiphiqo lexikulu xa rihanyo lexi nga tikombiki xi antswa. Ku nga ha va ni minkarhi leyi u titwaka ku fana na Yobo loyi a titshandzeke a ku: “Ndzi byi bakanyile; a ndzi nge he tlheli ndzi hanya hilaha ku nga heriki.” (Yobo 7:16) Kumbexana u titwa ku fana ni wanuna la nga ni malembe ya va-80 la vuriwaka Luis, loyi a nga te, “Minkarhi yin’wana ndzi vona onge ndzi lo rindzela ku fa.”

• U nga ha va u lava ku chaveleriwa hikwalaho ka leswi u feriweke hi munhu loyi u n’wi rhandzaka. Robert u ri: “Loko n’wana wa mina wa jaha a fa eka mhangu leyi chavisaka ya xihahampfhuka, a ndzi nga tshembi. Endzhaku ka sweswo ndzi twe ku vava loku Bibele yi ku fanisaka ni ku va u tlhaviwe hi banga ro leha.”—Luka 2:35.

Robert, Luis, Raquel na Julian va chaveleriwile eka swiyimo swa vona swo tika. Va kume Munhu lonene ngopfu la chavelelaka, ku nga Xikwembu xa Matimba Hinkwawo. U chavelela njhani? Xana na wena a nga ku chavelela?

Muapostola Pawulo u hlamusela Yehovhaa tanihi “Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Vakorinto 1:3, 4) Hikwalaho Bibele ya hi tiyisekisa leswaku a ku na munhu loyi Xikwembu xi nga tsandzekaka ku n’wi pfuna ni leswaku a ku na khombo leri nga rikulu swinene lerova Tata wa hina wa le tilweni a nga tsandzeka ku hi chavelela.

Ku na leswi hi faneleke hi swi endla loko hi lava ku chaveleriwa hi Xikwembu. Xana dokodela a nga hi pfuna njhani loko hi nga yi exibedlhele leswaku a ta hi pfuna? Hikwalaho Matsalwa ma hi khutaza ma ku: “Tshinelani eka Xikwembu, kutani xi ta tshinela eka n’wina.”—Yakobo 4:8.

I yini lexi nga hi tiyisekisaka leswaku Xikwembu xi ta tshinela eka hina? Xo sungula, hikuva xi hi byela ko tala leswaku xi lava ku hi pfuna. (Vona bokisi.) Xa vumbirhi, hikuva hi ni vumbhoni lebyi khorwisaka bya vanhu va xiviri va le nkarhini wa hina ni va le nkarhini lowu hundzeke lava Xikwembu xi va chaveleleke.

Hosi Davhida a a weriwe hi makhombo yo tala ku fana ni vanhu vo tala namuntlha lava lavaka ku pfuniwa hi Xikwembu. U kombele Yehovha a ku: “Yingisa rito ra mina loko ndzi kombela mpfuno eka wena.” Xana Xikwembu xi n’wi pfunile? Ina. Davhida u tlhele a ku: “Ndzi pfuniwile, leswaku mbilu ya mina yi khana.”—Pisalema 28:2, 7.

NDLELA LEYI YESU A VA CHAVELELAKA HA YONA HINKWAVO LAVA RILAKA

Xikongomelo xa Xikwembu hi leswaku Yesu a va chavelela swinene vanhu. Ntirho wun’wana lowu Xikwembu xi wu nyikeke Yesu a ku ri ku “bohelela lava vavisekeke mbilu” ni ku “chavelela hinkwavo lava rilaka.” (Esaya 61:1, 2) Hilaha ku profetiweke hakona, Yesu wa khathala swinene hi vanhu lava “tirhaka hi matimba ni lava tikeriwaka.”—Matewu 11:28-30.

Yesu u chavelele vanhu hi ku va nyika xitsundzuxo xa vutlhari, hi ku va khoma hi ndlela leyinene naswona minkarhi yin’wana hi ku va tshungula mavabyi. Siku rin’wana munhu la nga ni nhlokonho u kombele Yesu a ku: “Loko u swi lava, u nga ndzi basisa.” Hikwalaho ko n’wi twela vusiwana Yesu u te: “Ndza swi lava. Basisiwa.” (Marka 1:40, 41) Kutani munhu wa nhlokonho u hanyile.

Namuntlha N’wana wa Xikwembu a nga kona laha misaveni leswaku a ta hi chavelela hi ku kongoma. Kambe Tata wakwe, Yehovha, “Xikwembu xa nchavelelo hinkwawo,” u ya emahlweni a pfuna lava lavaka ku chaveleriwa. (2 Vakorinto 1:3) Xiya tindlela ta nkoka ta mune leti Xikwembu xi ti tirhisaka ku chavelela vanhu.

• Bibele. “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.”—Varhoma 15:4.

• Moya Lowo Kwetsima Wa Xikwembu. Endzhakunyana ka ku fa ka Yesu, vandlha hinkwaro ra Vakreste ri ve ni ku rhula. Ha yini? “A ri famba hi ku chava Yehovha ni hi nchavelelo wa moya lowo kwetsima.” (Mintirho 9:31) Moya lowo kwetsima wa Xikwembu, wu ni matimba swinene. Xikwembu xi nga tirhisa wona leswaku xi chavelela munhu un’wana ni un’wana exiyin’weni xihi ni xihi.

• Xikhongelo. Bibele ya hi tsundzuxa yi ku: “Mi nga vileli ha nchumu.” Ku ri na sweswo, yi ri, “tivisani Xikwembu swikombelo swa n’wina . . . kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo.”—Vafilipiya 4:6, 7.

• Vakrestekulorhi va nga va vanghana va ntiyiso lava hi nga titshegaka ha vona leswaku va hi chavelela eminkarhini yo tika. Muapostola Pawulo u vule leswaku vanghana vakwe a va ri “mpfuno lowu tiyisaka” eminkarhini ya ku “pfumala ni le nhlomulweni.”—Vakolosa 4:11; 1 Vatesalonika 3:7.

Kambe u nga ha va u tivutisa leswaku swilo leswi hinkwaswo swi tirha njhani. A hi kambisiseni mintokoto ya vanhu lava langutaneke ni swiphiqo lava ku vulavuriweke ha vona eku sunguleni ka xihloko lexi. Ku fana na vona, u ta swi xiya leswaku Xikwembu xa ha xi hetisisa xitshembiso lexi khutazaka lexi nge: “Ku fana ni munhu loyi mana wakwe a hambetaka a n’wi chavelela, na mina ndzi ta hambeta ndzi mi chavelela.”—Esaya 66:13.

LOKO U HELERIWE HI NTIRHO

Setha u ri: “Mina ni nsati wa mina hi heleriwe hi ntirho hi nkarhi wun’we. Ku ringana malembe mambirhi hi boheke ku hanya hi swilo leswi a hi nyikiwa swona hi ndyangu wa ka hina ni hi swintirhwana leswi a hi swi endla hi masiku yo karhi. Xiyimo xexo xi endle leswaku nsati wa mina Priscilla a tshikileleka ivi mina ndzi tivona ndzi nga pfuni nchumu.

“Hi langutane njhani ni xiyimo lexi? Priscilla a a tshamela ku titsundzuxa marito ya Yesu lama kumekaka eka Matewu 6:34. U vule leswaku a hi fanelanga hi vilela hi mundzuku, hikuva siku rin’wana ni rin’wana ri ni mivilelo ya rona. Loko a khongele swi huma embilwini u kume matimba yo ya emahlweni ni vutomi. Mina ndzi chaveleriwe hi Pisalema 55:22. Ku fana na mupisalema, ndzi lahlele ndzhwalo wa mina eka Yehovha, kutani u ndzi seketerile. Hambileswi sweswi se ndzi tirhaka, hi hanya vutomi byo olova hi ku pfumelelana ni xitsundzuxo xa Yesu lexi nga eka Matewu 6:20-22. Xa nkoka swinene, hi tshinele swinene eka Xikwembu naswona ndzi kurise vuxaka bya mina na Priscilla.”

Jonathan u ri: “Vumundzuku a byi ndzi chavisa loko bindzu ra hina leritsongo ra ndyangu ri wa. Malembe ya 20 lawa hi ma heteke hi tirha hi matimba ma hundzuke nyuku wa mbyana hikwalaho ka ku wa ka ikhonomi. Mina ni nsati wa mina hi sungule ku holova hi mhaka ya mali. A hi nga ha xavi hi tirhisa khadi ra xikweleti hikuva a hi chava leswaku bangi a yi nge pfumeli ku hakela mali ya kona.

“Kambe Rito ra Xikwembu ni moya wa xona swi hi pfunile leswaku hi endla swiboho leswinene. Ndzi dyondze ku amukela muxaka wun’wana ni wun’wana wa ntirho, naswona a hi papalata ku xava swilo leswi nga bohiki. Leswi hi nga Timbhoni ta Yehovha, vapfumerikulorhi va tlhele va hi seketela. Va endle leswaku hi titshemba va tlhela va hi pfuna loko xiyimo xi tika swinene.”

LOKO VUKATI BYI FA

Raquel u ri: “Ndzi twe ku vava ndzi tlhela ndzi hlundzuka loko nuna wa mina o swi pfuketana a ndzi sukela. Ndzi ve ni gome lerikulu. Kambe ndzi tshinele eka Xikwembu kutani xi ndzi chavelerile. Ku rhula ka Xikwembu ku sirhelele mbilu ya mina loko ndzi khongela eka xona siku ni siku. Xi horise mbilu ya mina leyi a yi tshovekile.

“Hikwalaho ka Rito ra xona, ku nga Bibele, ndzi kote ku hlula ku hlundzuka loku a ndzi ri na kona. Ndzi yingise marito ya muapostola Pawulo lama nge: ‘U nga pfumeli ku hluriwa hi swo biha, kambe hambeta u hlula swo biha hi leswinene.’”—Varhoma 12:21.

“Mutsundzuxi wa mina wo tlhariha u ndzi pfunile ku vona leswaku ndzi fanele ndzi ya emahlweni ni vutomi. U ndzi kombe Eklesiasta 3:6 ivi hi musa a ndzi byela leswaku ku ni nkarhi lowu hi faneleke hi ‘tshika leswi lahlekeke.’ Xitsundzuxo lexi a xi vava, kambe hi xona lexi a ndzi xi lava. Sweswi ndzi tivekele tipakani letintshwa evuton’wini.”

Elizabeth u ri: “U fanele u seketeriwa loko vukati bya wena byi hela. A ndzi ri ni munghana lonkulu loyi a ndzi seketeleke, siku ni siku. A a rila loko ndzi rila, a ndzi chavelela naswona a a ndzi endla ndzi titwa ndzi rhandziwa ematshan’weni yo tivona ndzi ri xikangalafula. Ndza khorwiseka leswaku Yehovha u tirhise yena leswaku a horisa ku vava loku a ndzi ku twa.”

LOKO U VABYA KUMBE U DYUHARILE

Luis, loyi ku vulavuriweke ha yena exihlokweni xo sungula u ni xiphiqo lexikulu xa mbilu, naswona a ku sale katsongo a file kambirhi loku. Sweswi u fanele a tshama a ri eka muchini wo n’wi hefemurisa ku ringana tiawara ta 16 hi siku. U ri: “Ndzi khongela eka Yehovha nkarhi na nkarhi. Endzhaku ka loko ndzi khongerile eka Xikwembu, moya wa xona wu ndzi nyika matimba. Xikhongelo xi ndzi nyika xivindzi xo ya emahlweni ni vutomi hikuva ndzi ni ripfumelo eka xona naswona ndza swi tiva leswaku xa ndzi khathalela.”

Petra loyi a nga ni malembe ya va-80 u ri: “Ndzi lava ku endla swilo swo tala kambe ndza tsandzeka. Swi ndzi twisa ku vava swinene loko ndzi vona ndzi heleriwa hi matimba. Ndzi titwa ndzi hele matimba naswona ndzi boheka ku hanya hi maphilisi ni mirhi. Minkarhi yo tala ndzi anakanya hi ndlela leyi Yesu a kombeleke Tata wakwe ha yona leswaku xiyimo xo karhi xo tika xi hundza, loko swi koteka.” Kambe Yehovha u nyike Yesu matimba, na mina wa ndzi tiyisa. Ndzi hanyisa hi xikhongelo siku ni siku. Ndzi titwa ndzi antswa swinene endzhaku ka loko ndzi vulavule na Xikwembu.”—Matewu 26:39.

Julian loyi a nga ni malembe ya kwalomu ka 30 a khomiwe hi vuvabyi lebyi lamataka miri, na yena u titwa hi ndlela leyi fanaka. U ri: “Xiyimo xa mina xi cince swinene. Kambe vutomi bya mina i bya nkoka hikuva ndzi tinyiketele ku pfuna van’wana. Ku nyika ku nga antswisa ku xaniseka naswona Yehovha wa xi hetisisa xitshembiso xakwe xo hi tiyisa loko hi lava ku chaveleriwa. Ku fana na muapostola Pawulo, ndzi nga vula hi ku tiyiseka ndzi ku: ‘Eka swilo hinkwaswo ndzi ni ntamu hikwalaho ka loyi a ndzi nyikaka matimba.’”—Vafilipiya 4:13.

LOKO U FERIWILE

Antonio u ri: “Loko tatana a tlumbe hi movha ivi a fa, eku sunguleni a ndzi nga swi kholwi. A swi tikomba ku ri vuhomboloki—a a tifambela hi milenge a nga dyanga xa munhu. Kambe a ku nga ri na lexi a ndzi ta xi endla. U hete masiku ya ntlhanu a titivarile loko a nga si fa. Loko ndzi ri na manana a ndzi nga rili, kambe a ndzi rila swinene loko ndzi ri ndzexe. A ndzi tshamela ku tivutisa ndzi ku, ‘Ha yini? Ha yini?’

“Hi masiku wolawo lawa a ndzi tsemeka nhlana, a ndzi tshamela ku kombela Yehovha leswaku a ndzi pfuna ndzi lawula ndlela leyi ndzi titwaka ha yona a tlhela ndzi nyika ku rhula. Kutani hakatsongotsongo a ndzi va ni ku rhula. Ndzi tsundzuke leswaku Bibele ya hlamusela leswaku ‘xiendlakalo lexi nga languteriwangiki’ xi nga wela un’wana ni un’wana wa hina. Leswi Xikwembu xi nga hembiki, ndza khorwiseka leswaku ndzi ta tlhela ndzi n’wi vona tatana loko ku pfuxiwa vafi.”​—Eklesiasta 9:11; Yohane 11:25; Tito 1:2.

Robert, loyi ku vulavuriweke hi yena eka xihloko xo sungula, na yena u titwa hi ndlela yoleyo. U ri: “Mina ni nsati wanga hi ve ni ku rhula emianakanyweni loku ku vulavuriweke ha kona eka Vafilipiya 4:6, 7. Hi pfuniwe hi ku tshamela ku khongela eka Yehovha. Ku rhula koloko ku endle leswaku hi kota ku vulavula ni vaviki va mahungu malunghana ni ntshembo wa hina wa ku pfuxiwa ka vafi. Hambileswi eka mhangu ya xihahampfhuka hi feriweke hi n’wana wa hina wa jaha, ha ha tsundzuka swilo swo tala leswi tsakisaka leswi hi nga swi endla swin’we na yena. Hi ringeta ku anakanyisisa hi swona.

“Loko Timbhonikulorhi ti hi byela leswaku ti hi vonile eka thelevhixini loko hi hlamusela leswi hi swi pfumelaka, hi ti byele leswaku swi le rivaleni leswaku a ku ri hikwalaho ka swikhongelo swa vamakwerhu. Ndza tshemba hakunene leswaku Yehovha a a ri ku hi seketeleni hi ku tirhisa marungula ya tona yo tala swinene yo hi chavelela.”

Hilaha swikombiso leswi se hi buleke ha swona swi kombisaka hakona, Xikwembu xi nga va chavelela vanhu lava langutaneke ni swiphiqo ni mintlhontlho yo hambanahambana. Ku vuriwa yini hi wena? Ku nga khathariseki leswaku u langutana ni xiphiqo xa njhani evuton’wini, u nga wu kuma nchavelelo lowu nga ku pfunaka eminkarhini yo tika.b Ha yini u nga kombeli mpfuno eka Yehovha? I “Xikwembu xa nchavelelo hinkwawo.”—2 Vakorinto 1:3.