LOKO wo hlangana na Diana,a u ta n’wi vona leswaku i wansati wo tlhariha a tlhela a va ni xinghana. Kambe minkarhi yo tala u heta masiku, mavhiki hambi ku ri tin’hweti a tshikilelekile lerova a titwa a ri xikangalafula. U ri: “Siku a ri hundzi ndzi nga ehleketanga hi ku fa. Ndza swi vona leswaku a ndzi pfuni nchumu.”

Diana u vula leswaku a nge pfuki a tidlayile. Kambe minkarhi yin’wana u vona a nga ri na xivangelo xo hanya. U tlhela a ku: “Ndzi navela onge ndzi nga humeleriwa hi mhangu ya movha. Rifu ndzi ri teka tanihi munghana ku nga ri nala.”

Vanhu vo tala va yi twisisa ndlela leyi Diana a titwaka ha yona naswona van’wana va tshame va ringeta ku tidlaya. Vatshila va vula leswaku vanhu lava ringetaka ku tidlaya, entiyisweni va va va nga lavi ku tidlaya kambe va lava ndlela yo herisa swiphiqo leswi va langutaneke na swona. Entiyisweni va vona va nga ri na xikongomelo evuton’wini; kahle-kahle va lava xikongomelo xa ku hambeta va hanya.

Ndza ha hanyela yini? Xiya swivangelo swinharhu swo hambeta u hanya.

Ku tidlaya ku tekiwa tanihi ndlela yo tlhantlha swiphiqo hi ku helela. Hambileswi swi nga ha tikaka ku tshemba mhaka leyi, swiphiqo leswi u nga na swona swi nga ha cinca u nga swi langutelanga, hambiloko swi vonaka swi ri swikulu swinene.—Hlaya bokisi leri nge “Swiyimo Swa Vona Swi Cincile.”

Hambiloko swiyimo swa wena swi nga cinci, swi nga va swinene ku tlhantlha xiphiqo ha xin’we. Yesu u te: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona. Vubihi bya siku rin’wana ni rin’wana byi enele rona.”—Matewu 6:34.

Ku vuriwa yini loko xiyimo xa wena xo ka xi nga cinci? Hi xikombiso, swi nga ha endleka leswaku u ni vuvabyi lebyi nga tshungulekiki. Kumbe u ni gome hikwalaho ka xiyimo xo karhi lexi u nga ta ka u nga swi koti ku xi tlherisela endzhaku, xo tanihi ku heleriwa hi vukati kumbe ku feriwa hi munhu loyi u n’wi rhandzaka.

Hambiswiritano, u nga swi kota ku cinca ndlela leyi u xi langutaka ha yona xiyimo xexo. Loko u dyondza ku xi amukela, u ta va ni langutelo lerinene. (Swivuriso 15:15) Leswi swi ta tlhela swi ku pfuna ku kuma tindlela leti u nga langutaka xiyimo xa wena ha tona ematshan’weni yo teka ku tidlaya tanihi ntlhantlho wa swiphiqo swa wena. Vuyelo byi ta va byihi? U ta kota ku lawula ndlela leyi u xi langutaka ha yona xiyimo xa wena hambiloko swi tikomba onge a swi nge koteki.—Yobo 2:10.

TSUNDZUKA LESWI: Munhu a nge swi koti ku lulamisa swiphiqo swo tala hi nkarhi wun’we, u fanele a swi tlhantlha ha xin’we-xin’we ku nga khathariseki leswaku swikulu ku fikela kwihi.

LESWI U NGA SWI ENDLAKA SWESWI: U nga byela un’wana hi xiyimo xa wena, ku nga ha va munghana kumbe xaka. Munhu yoloye a nga ku pfuna leswaku u languta xiyimo xa wena hi ndlela leyinene.—Swivuriso 11:14.

Loko u vona onge a ku na lexi u nga xi endlaka leswaku u antswisa xiyimo xa wena u nga ha vona swi antswa leswaku u tidlaya. Kambe xiya swilo swin’wana leswi nga ku pfunaka.

Xikhongelo. Xikhongelo a ko va ndlela leyi nga ku endlaka u titwa u antswa ntsena; naswona a wu fanelanga u khongela loko u nga ha ri na ntshembo ntsena. Xikhongelo i ndlela ya xiviri yo vulavurisana na Yehovha Xikwembu, loyi a khathalaka ha wena. Yehovha u lava leswaku u n’wi byela leswi ku karhataka. Entiyisweni, Bibele ya hi khutaza yi ku: “Lahlela ndzhwalo wa wena eka Yehovha, u ta ku seketela.”—Pisalema 55:22.

Ha yini u nga khongeli eka Xikwembu namuntlha? Tirhisa vito ra xona ra Yehovha kutani u xi phofulela ta le mbilwini ya wena. (Pisalema 62:8) Yehovha u lava leswaku u n’wi tiva tanihi munghana wa wena. (Esaya 55:6; Yakobo 2:23) Xikhongelo i ndlela yo vulavurisana leyi u nga yi tirhisaka nkarhi wihi na wihi, endhawini yihi na yihi.

Vanhu lava khathalaka ha wena. Vutomi bya wena i bya nkoka eka van’wana—ku katsa ni swirho swa ndyangu wa wena kumbe vanghana lava nga ha vaka se va swi kombisile leswaku va khathala ha wena. Vanhu van’wana lava khathalaka ha wena va katsa ni lava u nga ha vaka u nga si tshama u hlangana na vona. Hi xikombiso, minkarhi yin’wana Timbhoni ta Yehovha loko ti ri ensin’wini ti hlangana ni vanhu lava karhatekeke swinene, lava van’wana va vona va pfumeleke leswaku a va lava mpfuno wa xihatla naswona a va anakanya ku tidlaya. Ntirho wo chumayela hi yindlu ni yindlu wu endle leswaku Timbhoni ta Yehovha ti va ni lunghelo ro hlawuleka ro pfuna vanhu vo tano. Timbhoni ta Yehovha ti landzela xikombiso xa Yesu xo khathala hi vanhu-kulobye. Ta khathala hi wena.—Yohane 13:35.

Mpfuno wa vanhu lava swi dyondzeleke. Hakanyingi loko munhu a anakanya ku tidlaya swi va swi kombisa leswaku u ni vuvabyi bya ku pfilunganyeka ka mianakanyo, byo tanihi ntshikilelo lowukulu wa mianakanyo. A wu fanelanga u khomiwa hi tingana loko u ri ni vuvabyi bya ku pfilunganyeka ka mianakanyo—tanihi leswi u nga khomiwiki hi tingana loko u ri ni vuvabyi byin’wana ni byin’wana. Entiyisweni, ntshikilelo wa mianakanyo wu vitaniwa “mukhuhlwana wa mianakanyo.” Munhu un’wana ni un’wana a nga va na wona—naswona wu nga tshunguleka.a

TSUNDZUKA LESWI: Hakanyingi a swi nge koteki leswaku ntshikilelo wa wena wu tshunguleka u nga lavanga mpfuno. Kambe loko u lava mpfuno, u nga tshunguleka.

LESWI U NGA SWI ENDLAKA SWESWI: Lava dokodela la nga ni ndhuma leyinene loyi a tshungulaka vuvabyi bya ku pfilunganyeka ka mianakanyo byo tanihi ntshikilelo wa mianakanyo.

Bibele ya pfumela leswaku vutomi byi “taleriwe hi ku karhateka.” (Yobo 14:1) Namuntlha vanhu hinkwavo va weriwa hi makhombo yo hambana-hambana. Kambe vanhu van’wana va heleriwa hi ntshembo malunghana ni vutomi, onge hiloko ku nga ri na ntshembo wa vumundzuku byo antswa. Xana u titwa hi ndlela yoleyo? Loko swi ri tano, tiyiseka leswaku Bibele yi nyikela ntshembo wa xiviri—ku nga ri eka wena ntsena kambe eka vanhu hinkwavo. Hi xikombiso:

• Bibele yi dyondzisa leswaku Yehovha Xikwembu a a lava leswaku hi va ni swilo leswinene ngopfu.—Genesa 1:28.

• Yehovha Xikwembu u tshembisa leswaku u ta endla misava ya hina yi va paradeyisi.—Esaya 65:21-25.

• Xitshembiso xolexo xi ta hetiseka hakunene. Nhlavutelo 21:3, 4 yi ri:

  “Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”

Ntshembo wolowo a wo va norho ntsena. Yehovha Xikwembu u tiyimisele ku wu hetisisa naswona u ni matimba yo wu hetisisa a tlhela a tsakela ku wu hetisisa. Ntshembo lowu Bibele yi wu tshembisaka wa tshembeka naswona wu nyikela nhlamulo leyi enerisaka ya xivutiso lexi nge “Ndza Ha Hanyela Yini?”

TSUNDZUKA LESWI: Hambileswi mintlhaveko ya wena yi nga ha tshamelaka ku cinca-cinca ku fana ni xikepe lexi nga le lwandle leri kariheke, rungula ra le Bibeleni leri nyikaka ntshembo ri nga fana ni nsoma lowu ku endlaka u tshama u tiyile.

LESWI U NGA SWI ENDLAKA SWESWI: Sungula ku kambisisa leswi Bibele yi swi dyondzisaka malunghana ni ntshembo wa xiviri hi vumundzuku. Timbhoni ta Yehovha ti nga tsakela ku ku pfuna. U nga tihlanganisa ni Timbhoni ta laha u tshamaka kona kumbe u kuma rungula ra nkoka eka Web site ya tona ya jw.org/ts.a