Kostas u ri: “Loko nkatanga Sophiaa a lova endzhaku ko hlaseriwa hi vuvabyi lebyi n’wi karhateke nkarhi wo leha, a hi ri ni malembe yo tlula 39 hi tekanile. Vanghana va mina va ndzi chavelerile naswona a ndzi tshama ndzi khomekile. Ndzi hete lembe ndzi ri ni gome. Ndlela leyi a ndzi titwa ha yona a yi tshamela ku cinca. Se swi endla malembe manharhu a lovile kambe loko ndzi n’wi tsundzuka a byi phahi.”

Xana u tshame u feriwa? Loko swi ri tano, u nga ha titwa ku fana na Kostas. A swi talanga swilo leswi vavaka ku fana ni ku feriwa hi nuna kumbe nsati, xirho xa ndyangu kumbe munghana lonkulu. Vativi lava dyondzeke hi ndlela leyi munhu a titwaka ha yona loko a feriwile va pfumelelana na yona mhaka yoleyo. Buku leyi nge, The American Journal of Psychiatry yi vula leswaku “a ku na nchumu lowu vavaka ku fana ni ku feriwa hikuva a wu nge he pfuki u n’wi vonile.” Loko munhu a feriwile a nga ha tivutisa a ku: ‘Xana ndzi ta twa ku vava ku fikela rini? Xana ndza ha ta tlhela ndzi tsaka? Ndzi nga wu kuma kwihi nchavelelo?’

Tinhlamulo ta swivutiso leswi ti ta kumeka eka Xalamuka! leyi. Nhlokomhaka leyi landzelaka yi vulavula hi leswi u nga swi langutelaka loko wa ha ku feriwa. Swihloko leswi landzelaka, swi ta hlamusela tindlela leti nga ku pfunaka leswaku u kota ku langutana ni gome.

Hi tshemba leswaku magazini lowu wu ta va chavelela swinene lava feriweke.

Vativi van’wana va vula leswaku vanhu va twa ku vava hi tindlela to hambanahambana loko va feriwile kambe munhu ha un’we u rila mufi hi ndlela yakwe. Xana leswi vanhu va angulaka hi tindlela to hambanahambana loko va langutana ni gome swi vula leswaku van’wana a va twi ku vava hi leswi va feriweke kumbe va yi ba hi makatla ndlela leyi va titwaka ha yona? A swi tano. Ku amukela ni ku tiphofula swi nga ku pfuna leswaku u hlakarhela kambe a yi kona ndlela leyi kongomeke yo langutana ni gome. Hakanyingi swi titshege hi ndhavuko, vumunhu, leswi u tshameke u langutana na swona ni ndlela leyi munhu wa kona a feke ha yona.

XANA NDZI TA SWI KOTA KU TIYISELA?

Swi nga ha endleka vanhu lava feriweke va nga xi tivi xiyimo lexi va nga ta langutana na xona. Hambiswiritano ku titwa hi ndlela yoleyo swi tolovelekile naswona u nga tshama u vambe ngoma. Xiya swikombiso leswi landzelaka:

Ku pfilunganyeka. Hi nkarhi wolowo u nga ha rila, u navela ku vona mufi naswona ndlela leyi u titwaka ha yona yi nga ha tshamela ku cinca. Nkarhi wun’wana u nga ha tshamela ku n’wi tsundzuka kumbe ku n’wi lorha. Loko swa ha ku endleka, u nga khomiwa hi rhumbyana ni ku hlamala. Tiina u hlamusela ndlela leyi a titweke ha yona loko nuna wakwe Timo a fa. U ri: “Swi ndzi hete matimba. Eku sunguleni a ndzi tsandzeka na ku rila. A ndzi nga ha tivi ta mina, mikarhi yin’wana a ndzi tsandzeka na ku hefemula. A ndzi twa onge ndzo lorha.”

Swi tolovelekile ku vilela, ku hlundzuka ni ku titwa nandzu. Ivan, u ri: “Endzhaku ko feriwa hi n’wana wa hina wa jaha Eric! loyi a ri ni malembe ya 24, mina ni nkatanga a hi hlundzukile, leswi swi hi hlamarisile hikuva a hi nga ri vanhu Lava tshamaka va hlundzukile. Hi tlhele hi titwa nandzu hi tivutisa leswaku xana a ku nga ri na leswi a hi ta va hi swi endlile leswaku hi ponisa n’wana wa hina?” Alejandro, loyi a feriweke hi nsati endzhaku ko vabya nkarhi wo leha na yena a titwa nandzu, u te: “Eku sunguleni a ndzi tibyela leswaku loko Xikwembu xi pfumelela leswaku ndzi xaniseka, swi nga ha endleka ndzi ri munhu wo biha. Kutani a ndzi titwa nandzu, a ndzi vona onge swi vangiwa hi Xikwembu.” Kostas loyi a boxiweke eka xihloko lexi hundzeke u ri: “Mikarhi yin’wana a ndzi hlundzukela Sophia hikwalaho ka leswi a feke. Sweswo swi endle leswaku ndzi tivona nandzu. Kahlekahle, a ku nga ri nandzu wa yena.”

Mianakanyo yi nga ha tsendzeleka. Mikarhi yin’wana u nga ha twa onge tikhoma titshika. Hi xikombiso, mikarhi yin’wana u nga ha anakanya leswaku u vone munhu la feke kumbe ku twa rito rakwe. Van’wana swi nga ha va tikela ku nyikela nyingiso kumbe ku tsundzuka swilo swo karhi. Tiina u ri: “Mikarhi yin’wana loko hi ri karhi hi bula, miehleketo ya mina a yi pfa yi tsendzeleka! A ndzi tshamela ku anakanya hi ku fa ka Timo. Leswi a ndzi tshikilelekile a ndzi nga swi koti ku nyikela nyingiso.”

Ku titwa u lava ku va wexe. Munhu la nga ni gome a nga swi tsakeli ku va ni vanhu van’wana. Kostas u ri: “Loko ndzi ri ni vanhu lava tekaneke, ndzi twa onge ndzi lahlekile. Hambiloko ndzi ri ni vanhu lava nga nghenelangiki vukati ndzi titwa hi ndlela leyi fanaka.” Yolanda, nsati wa Ivan, u ri: “A swi ndzi tikela ku tshama ni vanhu lava tshamelaka ku rila hi swiphiqo leswi nga nyawuriki! Kambe van’wana a va tshamela ku tinyungubyisa hi vana va vona. A ndzi tsaka na vona kambe a swi nga ndzi oloveli ku va yingisela. Mina ni nuna wa mina a hi swi tiva leswaku a hi ku hela ka misava kambe a hi nga swi koti ku tiyisela xiyimo xexo.”

Swiphiqo swa rihanyo. Swi toloveleki ku cinca madyelo, ntiko wa miri ni nkarhi lowu u etlelaka ha wona. Loko Aaron a hlamusela ndlela leyi a titweke ha yona loko tata wakwe a lova, u ri: “Vurhongo a byi nga phahi, leswi a swi vangiwa hi leswi a ndzi tshamela ku ehleketa hi ku fa ka papa.”

Loko Alejandro a hlamusela hi mavabyi lama nga tolovelekangiki lama a ri na wona, u ri: “Dokodela u ndzi kambele ko tala naswona u vule leswaku a ndzi vabyi. Ndzi ehleketa leswaku leswi a swi vangiwa hi gome.” Switlhavi leswi a ndzi ri na swona swi hele hi ku tsopeta ka tihlo. Hambiswiritano, Alejandro u endle xiboho xa vutlhari hi ku ya eka dokodela. Gome ri nga ha tsanisa masocha ya miri, ri nyanyisa vuvabyi kumbe ri vanga man’wana.

Mitirho leyi lava feriweke va bohekaka ku yi endla. Ivan, u ri: “Endzhaku ka loko Eric a lovile, a hi fanele hi tivisa maxaka, vanghana ni van’wana vo tanihi muthori wakwe ni munhu loyi a hirhe eka yena. A ku ri ni tifomo to tala ta le nawini leti a hi fanele hi ti tata. Kutani a hi fanele hi ngundzuvanya swilo swa Eric. Leswi a swi lava leswaku hi tirha hi matimba hambileswi a hi karhele naswona a hi ri ni gome.”

Hambiswiritano, van’wana swa va tikela ku endla mitirho leyi a yi endliwa hi mufi. Tiina u tshame a va eka xiyimo lexi. Loko a hlamusela, u ri: “Timo hi yena a khathalela bindzu ra hina. Vutihlamuleri bya Timo a ku ri tlakula va xurhe naswona a byi ta engetela ntshikilelo lowu a ndzi ri na wona. A ndzi tivutisa leswaku xana ndzi ta swi kota ku endla mitirho leyi hinkwayo hilaha Timo a yi endla ha kona?”

Swiyimo leswi hlamuseriweke laha, swi kombisa leswaku a swi olovi ku langutana ni gome. Ntiyiso hi leswaku ku feriwa swa vava kambe ku tiva leswi u faneleke u swi endla ka ha ri ni nkarhi swi ta ku pfuna leswaku u kota ku langutana ni xiyimo xexo. Tsundzuka leswaku a hi vanhu hinkwavo lava langutanaka ni swiyimo hinkwaswo leswi vangiwaka hi gome. Ku tlula kwalaho, swa va chavelela vanhu lava feriweke ku tiva leswaku ndlela leyi va titwaka ha yona i ya ntumbuluko.

XANA NDZA HA TA TLHELA NDZI TSAKA?

Leswi u nga swi langutelaka: Hi ku famba ka nkarhi, gome ri nga hola ku fana ni xilondza. Leswi a swi vuli swona leswaku lava feriweke va ta “hlakarhela” hi ku helela kumbe ku rivala hi mufi. Hambiswiritano, hakatsongotsongo switlhavi leswi tisiwaka hi gome swa hola. Gome rolero ri nga ha tlhela ri pfuka loko u tsundzuka swilo swo karhi leswi a mi swi endla swin’we kumbe loko ku fika siku leri mi tekaneke ha rona. Hi ku famba ka nkarhi, vanhu vo tala va kota ku lawula ndlela leyi va titwaka ha yona, ivi va ya emahlweni ni vutomi. Leswi swa olova loko munhu la feriweke a seketeriwa hi vandyangu ni hi vanghana va yena naswona a endla leswi a nga swi kotaka leswaku a hlula xiyimo xexo.

Swi ta teka nkarhi wo tani hi kwihi? Van’wana swi nga ha va tekela tin’hweti. Vo tala swi nga ha va tekela lembe kumbe ku tlula leswaku va hlakarhela. Kasi van’wana swi nga ha va tekela malembe yo tala.a Alejandro, u ri: “Gome leri a ndzi ri na rona ri teke malembe manharhu.”

Lehisa mbilu. U nga vileli hi swilo swa nkarhi lowu taka, fambisana ni swiyimo swa wena naswona tsundzuka leswaku switlhavi leswi tisiwaka hi gome swi ta hela. Xana swi kona leswi u nga swi endlaka leswaku u hlula gome kumbe ku ri sivela leswaku ri nga yi emahlweni ri nyanya?

Ku na swiringanyeto swo tala leswi u nga swi tirhisaka leswaku u hlula gome, swin’wana swa kona swi nga ku pfuna. Hilaha swi boxiweke ha kona eku sunguleni, vanhu va langutana ni gome hi tindlela to hambanahambana. Tindlela to dlaya ximanga ti tele, a mi nge hluli gome hi ndlela leyi fanaka.

Hambiswiritano, ku na swiringanyeto leswi pfuneke vanhu vo tala. Hakanyingi vanhu lava pfunaka vanhu lava nga ni gome, va tshaha swiringanyeto leswi nga hundzeriwiki hi nkarhi, leswi kumekaka eBibeleni.

1: AMUKELA KU CHAVELERIWA HI VA NDYANGU NI VANGHANA

• 

  Vativi van’wana va vula leswaku ku endla tano swi ta ku pfuna leswaku u hlula gome. Hambiswiritano, mikarhi yin’wana u nga ha lava ku va wexe. U nga ha phirheka loko va ringeta ku ku pfuna. Sweswo swi tolovelekile.

• A hi xikolokolo ku va exikarhi ka vanhu kambe u nga va bisi hi moya. Nkarhi wun’wana u nga ha lava leswaku va ku pfuna. Hi musa va byele leswi u swi lavaka ni leswi u nga swi laviki.

• Loko swiyimo swi ku pfumelela tinyike nkarhi wo va ni vanhu van’wana ni wo va wexe.

NSINYA WA NAWU: “Vambirhi va antswa ku tlula un’we . . . Hikuva loko un’we wa vona o wa, loyi un’wana a nga pfuxa munghana wakwe.”—Eklesiasta 4:9, 10.

2: ENDLA VUTIOLORI IVI U DYA SWAKUDYA LESWI NGA NI RIHANYO

• Ku dya swakudya leswi nga ni rihanyo swi ta ku pfuna leswaku u hlula ntshikilelo lowu vangiwaka hi gome. U nga ha dya mihandzu yo hambanahambana, matsavu ni swakudya leswi nga ni phrotheyini.

• Nwana mati yo tala ni swakunwa swin’wana leswi akaka miri.

• Loko u nga naveli swakudya, dyana switsongo nkarhi ni nkarhi. U nga ha tlhela u vutisa dokodela wa wena hi maphilisi lama nga ku nyikaka matimba ni swilo swin’wana leswi nga ku pfunaka.a

• Ku endla vutiolori byo hambanahambana swi nga ku pfuna leswaku u hunguta ntshikilelo. Ku ti olola swi nga ku pfuna leswaku u horisa mbilu naswona u nga tshameli ku ehleketa ha swona.

NSINYA WA NAWU: “A nga kona munhu loyi a tshameke a venga nyama yakwe; kambe wa yi wundla ni ku yi khathalela.”—Vaefesa 5:29.

3: U NGA TITSONI VURHONGO

• 

  Ku etlela i swa nkoka ngopfungopfu eka lava nga ni gome hikuva gome ri endla leswaku va tshama va karhele.

• U nga nwi ngopfu swilo leswi nga ni khafeyini kumbe xihoko hikuva swi nga ku tsona vurhongo.

NSINYA WA NAWU: “Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.”—Eklesiasta 4:6.

4: PFUMELELANA NI SWIYIMO

• 

  Vanhu va langutana ni gome hi tindlela to hambanahambana. Na wena kuma ndlela leyi u nga yi tirhisaka.

• Van’wana va kota ku langutana ni gome hi ku tiphofula, kasi van’wana a va swi tsakeli ku phofula ndlela leyi va titwaka ha yona. Valavisisi a va yi voni hi tihlo rin’we mhaka ya leswaku ku tiphofula swi nga pfuna munhu leswaku a langutana ni gome. Loko u twa u lava ku tiphofula eka un’wana kambe u kanakana, u nga ha sungula hi ku byela munghana wa wena lonkulu ndlela leyi u titwaka ha yona.

• Van’wana swa va pfuna ku rila kambe van’wana va kota ku langutana ni gome hambiloko va nga rili ngopfu.

NSINYA WA NAWU: “Mbilu yi titivela ku vava ka yona.”—Swivuriso 14:10, Bibele Ya Xitsonga.

5: PAPALATA MIKHUVA YO BIHA

• 

  Van’wana lava feriweke va tibyela leswaku va nga hunguta ntshikilelo lowu va nga na wona hi ku nwa byala kumbe hi ku tirhisa swidzidziharisi. Sweswo i ku tixisa. U nga ha twa onge swi ku pfunile kambe a swi nge tlhaveriwi hi dyambu hikuva ku endla tano swi nga va ni vuyelo byo biha swinene. Tirhisa tindlela tin’wana leti nga riki na khombo leswaku u hunguta ku vilela.

NSINYA WA NAWU: “A hi tibasiseni eka swilo hinkwaswo leswi nyamisaka.”—2 Vakorinto 7:1.

6: TIRHISA NKARHI WA WENA HI VUTLHARI

• Van’wana va vone swi pfuna ku tihumesa leswaku va bela hi moya ku endlela leswaku va kota ku horisa mbilu, kasi van’wana va tinyika mitirho leyi va nga yi endlaka.

• Ku hungasa, ku endla xinghana ni ku dyondza swilo leswintshwa swi nga ku pfuna leswaku u ya u hlakarhela.

• Hi ku famba ka nkarhi, swilo swi nga ha cinca. Loko u nga ha tshameli ku ehleketa hi mufi, swi kombisa leswaku se u ya u hlakarhela.

NSINYA WA NAWU: “Xin’wana ni xin’wana xi ni nkarhi wa xona lowu vekiweke, . . . nkarhi wa ku rila ni nkarhi wa ku hleka; nkarhi wa ku kalakala ni nkarhi wa ku tlula-tlula.”—Eklesiasta 3:1, 4.

7: LANDZELA XIYIMISO XA WENA

• 

  Tlhela u landzela xiyimiso xa wena handle ko ba mariri.

• Loko u landzela xiyimiso xa wena loko swi ta emhakeni ya ku etlela hi nkarhi lowu u wu vekeke, ni ku endla mitirho yin’wana u ta hatla u hlakarhela.

• Ku tshama u khomekile swi nga ha hunguta ntshikilelo lowu u nga na wona.

NSINYA WA NAWU: “A nge he tshameli ku ma tsundzuka masiku ya vutomi byakwe, hikuva Xikwembu xa ntiyiso xa n’wi rivata hi ku tsaka ka mbilu yakwe.”—Eklesiasta 5:20.

8: U NGA HATLISELI KU ENDLA SWIBOHO

• Vo tala loko va feriwile va endla swiboho leswikulu, leswi endzhaku va tisolaka ha swona.

• Loko swi koteka, u nga hatliseli ku rhurha, ku cinca ntirho kumbe ku susa swilo swa mufi.

NSINYA WA NAWU: “Kunene makungu ya lava va gingiritekaka ma endla leswi pfunaka, kambe un’wana ni un’wana la hatlisaka ngopfu, hakunene u ta wela eku pfumaleni.”—Swivuriso 21:5.

9: TSUNDZUKA MUFI

• 

  Vanhu vo tala lava nga feriwa va vona swi pfuna ku endla swilo leswi nga ta va pfuna leswaku va nga rivali hi mufi.

• Na wena swi nga ku chavelela ku hlayisa swifaniso kumbe swilo leswi a swi rhandziwa hi mufi kumbe ku tsala hi swilo leswi u lavaka ku swi tsundzuka hi yena.

• Hlayisa swilo leswi nga ta ku tsundzuxa hi timhaka letinene hi mufi kutani hi ku famba ka nkarhi u nga ha tlhela u swi nyanga.

NSINYA WA NAWU: ‘Tsundzuka masiku ya khale.’—Deteronoma 32:7.

10: TIHUMESE

• U nga ha tihumesa.

• Loko u nga lavi ku tihumesa nkarhi wo leha, u nga ha teka siku rin’we kumbe mambirhi u endla swin’wana leswi ku tsakisaka, u nga ha famba u ya beriwa hi moya etintshaveni, u ya emuziyamu kumbe u huma hi movha u ya beriwa hi moya.

• Ku endla swin’wana handle ka leswi a wu tolovele ku swi endla swi nga ku pfuna leswaku u langutana ni gome.

NSINYA WA NAWU: “Tanani, mi ri swenu hi ya enhoveni, mi wisanyana.”—Marka 6:31.

11: PFUNA VAN’WANA

• 

  Tsundzuka leswaku loko u pfuna van’wana swi nga endla leswaku u titwa u antswa.

• U nga ha sungula hi ku pfuna vanhu lava khumbekeke hi rifu rero, vo tanihi vanghana ni maxaka hikuva va nga ha lava ku chaveleriwa hi munhu loyi a xi twisisaka kahle xiyimo xa vona.

• Ku seketela van’wana u tlhela u va chavelela swi nga ku tisela ntsako swi tlhela swi ku tiyisa.

NSINYA WA NAWU: “Ku nyika swi tisa ntsako lowukulu ku tlula ku amukela.”—Mintirho 20:35.

12: KAMBISISA LESWI U SWI RHANGISAKA

• Loko u ri na gome swi nga ku nyika nkarhi wo kota ku vona swilo swa nkoka.

• Tirhisa nkarhi wolowo leswaku u vona ndlela leyi u hanyaka vutomi bya wena ha yona.

• Loko swi fanerile, endla ku cinca.

NSINYA WA NAWU: “Swa antswa ku ya endlwini ya xirilo ku ri ni ku ya endlwini ya nkhuvo, hikuva hilaha vanhu hinkwavo va yaka kona; naswona loyi a hanyaka u fanele a swi nghenisa embilwini yakwe.”—Eklesiasta 7:2.

Entiyisweni, a wu kona nchumu lowu nga ku susaka hi ku helela ku vava loku u ku twaka. Hambiswiritano, vo tala lava tshameke va feriwa lava tirhiseke swiringanyeto leswi fanaka ni leswi xaxametiweke exihlokweni lexi, swi va pfunile leswaku va hlakarhela loko va ri ni gome. Leswi a swi vuli swona leswaku swiringanyeto leswi xaxametiweke laha, hi swona ntsena leswi nga ku pfunaka leswaku u langutana ni gome. Kambe loko u swi tirhisa swi nga ku pfuna leswaku u kota ku hatla u hlakarhela.

SWESWINYANA KU ENDLIWE NDZAVISISO WO TALA MAYELANA NI KU VAVA LOKU MUNHU A KU TWAKA LOKO A FERIWILE. Hilaha swi kombisiweke ha kona eku sunguleni, switsundzuxo swa vutlhari leswi humaka eka vativi swa fambisana ni leswi Bibele yi swi vulaka. Leswi swi kombisa leswaku switsundzuxo leswi nga eBibeleni a swi hundzeriwi hi nkarhi. Hambiswiritano, switsundzuxo swa Bibele a swi titsheganga hi vutlhari bya vanhu. Rungula ra yona a ri kumeki kun’wana naswona ri nga chavelela lava feriweke hi ndlela leyikulu.

• Xitiyisekiso xa leswaku lava feke a va le ku xanisekeni

  Eka Eklesiasta 9:5, Bibele yi ri: “Lava feke, a va tivi nchumu.” ‘Miehleketo ya vona ya lova.’ (Pisalema 146:4) Hi ku pfumelelana ni mhaka leyi, Bibele yi fanisa rifu ni ku etlela.—Yohane 11:11.

• Ku tshemba Xikwembu swa hi chavelela

  Eka Pisalema 34:15, Bibele yi ri: “Mahlo ya Yehovhaa ma le henhla ka lavo lulama, ni tindleve takwe ti yingisa xirilo xa vona xo kombela mpfuno.” Ku tiphofula eka Xikwembu hi xikhongelo swi nga ku chavelela ku tlula loko u vulavula ni munhu un’wana. Nakambe swi hi pfuna leswaku hi va ni vuxaka lebyinene ni Muvumbi wa hina, loyi a nga tirhisaka matimba ya yena leswaku a hi chavelela.

• Ku langutela vumundzuku byo tsakisa

  Anakanya hi nkarhi lowu lava nga emasirheni va nga ta pfuxiwa ha wona! Bibele yi vulavula hi nkarhi wolowo hi ku phindhaphindha. Loko Bibele yi vulavula hi ndlela leyi swiyimo swi nga ta va ha yona emisaveni, yi vula leswaku Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:3, 4.

Vanhu vo tala lava tshembaka Yehovha, va kota ku langutana ni gome hikwalaho ka leswi va nga ni ntshembo wa leswaku va ta tlhela va vona lava feke loko va pfuxiwa. Hi xikombiso, Ann, loyi a feriweke hi nuna, loyi a a ri ni malembe ya 65, u ri: “Bibele yi vula leswaku vafi a va le ku xanisekeni naswona Xikwembu xi ta pfuxa hinkwavo lava nga emianakanyweni ya xona. Loko ndzi tsundzuka nuna wa mina, ndzi anakanya hi xitshembiso xa Yehovha naswona sweswo swi ndzi pfuna leswaku ndzi kota ku tiyisela!”

Tiina loyi a boxiweke eswihlokweni swo hlayanyana swa magazini lowu, u ri: “Ndzi xiye ndlela leyi Xikwembu xi ndzi seketelaka ha yona ku sukela siku leri Timo a feke hi rona. Ndzi vone ndlela leyi Yehovha a ndzi pfuneke ha yona loko ndzi tshikilelekile naswona ndza tshemba leswaku u ta pfuxa vafi. Leswi swi endla leswaku ndzi kota ku tiyisela naswona ndza tshemba leswaku siku rin’wana ndzi ta tlhela ndzi n’wi vona Timo.”

Marito lawa ma fana ni ya vanhu va timiliyoni lava tshembaka leswi Bibele yi swi vulaka. Loko u twa onge switshembiso swa le Bibeleni ko va norho ntsena, kambisisa vumbhoni lebyi kombisaka leswaku switsundzuxo ni switshembiso swa yona swa pfuna. U ta swi xiya leswaku Bibele yi chavelela lava feriweke ku tlula tibuku hinkwato.

KUMA LESWI ENGETELEKEKE MAYELANA NI KU PFUXIWA KA VAFI

Hlalela tivhidiyo leti vulavulaka hi mhaka leyi, eka website ya hina ya jw.org

KU ENDLEKA YINI LOKO MUNHU A FA?

Ku endleka yini hi hina loko hi fa? Bibele yi hi nyika nhlamulo leyi chavelelaka yi tlhela yi hi tiyisa

Nghena ehansi ka nhlokomhaka leyi nge, LAYIBURARI > TIVHIDIYO (Nxaxamelo wa Tivhidiyo: BIBELE)

XANA U NGA MA TSAKELA MAHUNGU LAMANENE?

Misava yi tele hi mahungu yo biha kambe hi nga ma kuma kwihi mahungu lamanene?

Nghena ehansi ka nhlokomhaka leyi nge, TIDYONDZO TA BIBELE > KU RHULA NI NTSAKO