Vantshwa Va Vakriste—Tiyani eRipfumelweni

“UN’WANA ni un’wana u fanele ku va kona.” Xexo a ku ri xitiviso. Swichudeni hinkwaswo exikolweni xin’wana xa le Japani a swi fanele ku va kona eka nhlengeletano ya mani na mani eholweni. Xichudeni lexitsongo xa Mukriste a a xi nga ta pfumelelana ni mianakanyo yin’wana leyi a yi humesiwa eka risimu ra xikolo. U anakanyile, “Kahle-kahle ndza swi tiva leswaku risimu ra xikolo ri ta tlangiwa. Kambe a ndzi nge vi na swiphiqo. Ndzi ta tshama endzhaku tanihi ntolovelo.”

Hambi swi ri tano loko Mbhoni ya Yehova leyintshwa yi nghene eholweni, yi kume leswaku swirho hinkwaswo swa vadyondzisi a swi tshame enxaxamelweni wa switulu swa le ndzhaku. Hikwalaho, a a boheka ku tshama emahlweni ka vona. Loko swichudeni leswin’wana swi yima hikwalaho ka risimu ra xikolo, hi xichavo u sale a tshamile. Kambe vadyondzisi a va hlundzukisiwile hi leswi. Va ringete ku n’wi sindzisa ku yima hi xiviri. Xana u nga tianakanya exiyin’weni xo tano? Xana a a wu ta va u endle yini?

Ha Yini Ripfumelo Leri Tiyeke Ri Laveka

A swi ta va kahle loko vanhu a va tshika Vakriste va ri voxe kutani va va pfumelela ku hanya hi ku ya hi ripfalo ra vona leri leteriweke hi Bibele. Hambi swi ri tano, hakanyingi Vakriste va boheka ku langutana ni swiyimo leswi tshikilelaka. Leswi a swi fanelanga swi hi hlamarisa, hikuva N’wana wa Xikwembu hi xoxe, Yesu Kriste, u te: “Loko va ndzi xanisile, na n’wina va ta mi xanisa.” (Yohane 15:20) Handle ka minxaniso leyi kongomeke, malandza ya Yehova ma langutana ni miringo yin’wana yo hambana-hambana ya ripfumelo.

Vantshwa va Vakriste hakanyingi va fanele ku hlayisa ripfumelo leri tiyeke eka miringo leyi va hlangavetanaka na yona exikolweni. Va nga ha sindzisiwa ku hlanganyela ni vadyondzi-kulobye lava tirhisaka tinhlamba kumbe lava nga ni malangutelo lama nga xiximiki Xikwembu. Vakriste lavantshwa va nga ha langutana ni ku kandziyisa loku engetelekeke ehenhla ka xihlawu-hlawu ni ntshikilelo wa ku katseka emintlaweni, tipolitiki ta xikolo, kumbe swiendlo leswi nga onhaka emoyeni. Vadyondzisi kumbe swichudeni-kulobye va nga ha ringeta ku veka ntshikilelo ehenhla ka Vakriste lavatsongo leswaku va landzula. Hikwalaho, vantshwa lava chavaka Xikwembu va fanele ku titshega hi moya wa Yehova leswaku va va ni ripfumelo leri lavekaka ku nyikela vutisirheleri lebyi twalaka hi ta ntshembo wa vona.—Matewu 10:19, 20; Vagalatiya 5:22, 23.

‘Tilunghiselele Ku Tihlamulela’

Xitsundzuxo xa muapostola Petro xi fanelekela hinkwavo Vakriste lavatsongo ni lavakulu. U te: “Masiku hinkwawo tilunghiseleleni ku tihlamulela eka un’wana ni un’wana loyi a mi vutisaka ehenhla ka ku tshemba loku mi nga na kona, kambe mi swi endla hi moya wa ku olova ni wa xichavo.” (1 Petro 3:15, 16) Xana ku laveka yini leswaku u tilunghiselela ku tihlamulela ko tano? Xo sungula, u fanele ku twisisa leswi Matsalwa ma swi dyondzisaka. Ku yima u tiyile exikolweni etimhakeni to tanihi xihlawu-hlawu, tipolitiki, ku tirhisa swidzidzirisi hi ndlela leyi hoxeke, kumbe mahanyelo, u fanele ku sungula u twisisa xivangelo xa xiyimo xa Vakriste naswona u fanele ku tshembela eka xona hi mbilu hinkwayo.

Hi xikombiso, muapostola Pawulo u byele Vakriste-kulobye: “Mi nga pfumeli ku xisiwa: ‘Vanghana lavo biha, va borisa mikhuva leyinene.’ (1 Vakorinto 15:33) Xana u pfumelelana na swona sweswo? Hi laha Pawulo a kombiseke ha kona, swa olova ku hambukisiwa hi mhaka ya vanghana. Munhu a nga ha vonaka a ri ni xinghana naswona a tsakisa. Kambe loko a nga hlanganyeli eka nkhathalelo wa wena wa ntirho wa Yehova kumbe hambi ku ri ku tshembela eswitshembisweni swa Bibele, i munghana lowo biha. Ha yini? Hikuva vutomi bya yena byi sekeriwe emilawini yo hambana-hambana, naswona swilo leswi nga vaka swa nkoka eka Mukriste swi nga ha va swa nkoka lowutsongo eka yena.

Leswi a swi hlamarisi, hikuva Yesu u te hi valandzeri va yena: “A hi va misava, tanihi leswi na mina ndzi nga riki wa misava.” (Yohane 17:16) A swi koteki eka munhu leswaku a va Mukriste wa ntiyiso naswona hi nkarhi lowu fanaka a va xiphemu xa misava leyi, leyi Sathana a nga xikwembu xa yona. (2 Vakorinto 4:4) Xana wa yi vona ndlela leyi ku hambana ko tano ni misava ku sirhelelaka Vakriste ha yona eka vuhomboloki ni le madzolongeni lama hlaselaka vo tala namuntlha? Loko swi ri tano, kutani u nga twisisa leswaku ha yini u fanele ku hlayisa ku tihambanisa ka wena, hambi loko leswi swi nga ha vula leswaku u nge hlanganyeli eka mintirho yin’wana ya xikolo.a

Nkoka wa ku va la tiyeke eripfumelweni ni ku veka swilaveko swa Mfumo emahlweni evuton’wini wu kombisiwile emhakeni ya nhwana un’wana wa Mukriste lontsongo. (Matewu 6:33) Loko nkhuvo wa yena wa ku thwasa wu tivisiwa, u kume leswaku a a wu hleriwe hi siku leri fanaka ni ra nhlengeletano ya xifundza ya Timbhoni ta Yehova leyi a a tilunghiselele ku va eka yona. U tsale papila leri xiximaka a hlamusela leswaku ha yini a nga ta ka a nga vi kona eka nkhuvo kutani a ri nyika mudyondzisi wa yena emahlweni ka dyondzo. Endzhaku ka dyondzo mudyondzisi u n’wi vitanele etlhelo kutani a n’wi kombela leswaku a hlamusela nakambe leswaku ha yini a nga ta ka a nga vi kona enkhubyeni. Wanhwana u ri: “A a lava ku vona loko marito ya mina ma fana. Leswaku xana loku a ku ri ku titwa ka mina, kumbe papila a a ri khome ntsena marito ya mana wa mina hi ku kongoma? Endzhaku ko vona langutelo ra vumunhu bya mina emhakeni leyi, a nga ndzi kanetanga.”

“Tihlamulel[e] Eka Un’wana Ni Un’wana”

Vantshwa va Vakriste hakanyingi va kuma leswaku loko va endla xiyimo xa vona xi tiveka hi laha ku twalaka eka swirho swa vadyondzisi ni swichudeni emahlweni ko va mphikamakaneta yi humelela, ntshikilelo a hi wukulu ngopfu loko swiphiqo swi fanele ku langutiwa. Mukriste un’wana lontsongo wa Mujapani u hlamusela leswaku loko a ri na malembe ya 11 hi vukhale, xikolo xa yena a a xi lava leswaku swichudeni hinkwaswo swi hlanganyela enkhubyeni wa Khisimusi. Swichudeni swa le mintlaweni ya le henhla swi veke ntshikilelo ehenhla ka yena leswaku a hlanganyela, kambe a nga vanga kona, naswona mudyondzisi wa yena u twisise xiyimo xa yena. Ha yini? Hikuva eku sunguleni ka lembe ra xikolo, Mbhoni leyi ni vatswari va yona va tihlanganise ni mudyondzisi kutani va hlamusela swivumbeko swo hambana-hambana swa xiyimo xa vona xa Vukriste.

Loko va ri evutirhelini bya nsimu, vantshwa van’wana va Vakriste va chava ku hlangana ni vadyondzi-kulobye kumbe mathicara. Xana u titwa hi ndlela yoleyo? Loko swi ri tano, ha yini u nga sunguli ku endla leswaku vadyondzi-kuloni va tiva leswaku u chumayela hi yindlu na yindlu ni leswaku ha yini u endla tano. Mbhoni yin’wana ya Yehova ya malembe ya 14 hi vukhale yi vike leswi: “Un’wana ni un’wana exikolweni u tiva xiyimo xa mina tanihi Mukriste. Entiyisweni, va swi tiva kahle ngopfu lerova loko ndzi hlangana ni mudyondzi-kulorhi ndzi ri evutirhelini, a ndzi khomiwi hi tingana. Swichudeni-kulorhi hi ntolovelo swa yingisela, naswona minkarhi yo tala swi amukela tibuku ta Bibele.” Un’wana wa malembe ya 12 hi vukhale u vika leswaku u langutele ku hlangana ni vadyondzi-kulobye va yena loko a hlanganyela evutirhelini. Ematshan’wini yo khomiwa hi tingana eku anakanyeni hi leswi, minkarhi hinkwayo u pfuxeta leswi a nga ta swi vula loko swo endleka. Xisweswo u tilunghiserile ku nyikela swivangelo leswi twalaka swa ripfumelo ra yena.

Eswikolweni swo tala, mintirho ya le ndzhaku ka xikolo a yi bohi. Kambe hi xiviri, vadyondzisi ni swichudeni va veka ntshikilelo lowukulu ehenhla ka vanhu leswaku va hlanganyela emintirhweni yo tano. Mukriste un’wana wa malembe ya 20 hi vukhale u tshubule ndlela leyinene yo hlangavetana ni ntshikilelo lowu. U ri: “Ndzi tirhe tanihi phayona ro pfuna ku fikela exikolweni xa le henhla. Un’wana ni un’wana a a swi tiva leswaku a a ndzi khomeke ngopfu hi mintirho ya vukhongeri bya mina leswaku ndzi nga joyina swilo swin’wana.” Makwavo lontsongo wa xisati wa Mbhoni leyi u landzele ndlela leyi fanaka. Vantshwa van’wana va Vakriste va suka hi ku kongoma entirhweni wa vuphayona byo pfuna hi malembe ya xikolo va nghena entirhweni wa vuphayona bya nkarhi hinkwawo tanihi vahuweleri va Mfumo va nkarhi hinkwawo loko xikolo xa vona xi herile.

U nga yi languteli ehansi mimbuyelo leyinene ya ku tikhoma ka wena lokunene ni ku chumayela ka wena hi vurhena. Ematshan’wini yo tshama u miyerile, ha yini u nga kombisi leswaku u tiyile eripfumelweni hi ku vulavula hi xichavo kambe hi vurhena? Sweswo hi leswi endliweke hi wanhwana wa Muisrayele loyi a nga yisiwa evukhumbini kutani a tikuma a ri emutini wa Namani mufambisi wa mavuthu ya Siriya. (2 Tihosi 5:2-4) Vito ra Yehova ri dzunisiwile hikwalaho ka vurhena bya xin’hwanyetana xexo. Ripfumelo leri fanaka eka wena na rona ri nga tisa xichavo eka Xikwembu naswona ri nga ha pfuna van’wana ku teka xiyimo tanihi vadzunisi va vito ra xona.

Ntiyiso hi leswaku a hi nge ri landzuli ripfumelo ra hina ivi hi tshama ha ha ri Vakriste. Yesu u te: “Un’wana ni un’wana la nga ta ndzi vula emahlweni ka vanhu, na mina ndzi ta n’wi vula emahlweni ka Tata wa mina la nge matilweni. Kambe un’wana ni un’wana la nga ta ndzi landzula emahlweni ka vanhu, na mina ndzi ta n’wi landzula emahlweni ka Tata wa mina la nge matilweni.” (Matewu 10:32, 33) Ku va la tiyeke eripfumelweni tanihi mulandzeri wa Yesu i vutihlamuleri bya nkoka, a swi tano ke?

Mpfuno Lowu Kumekaka

Leswaku u teka xiyimo lexi tiyeke tanihi un’wana wa Timbhoni ta Yehova, u lava ripfumelo leri tiyeke. Leswaku u ri kuma, u fanele ku chivirikela ku dyondza Bibele, u hlanganyela eminhlanganweni, naswona u hlanganyela evutirhelini bya nsimu. Loko wa ha twa onge xin’wana xa kayivela, u nga endla yini? Mudyondzisiwa Yakobo u te: “Loko un’wana wa n’wina a pfumala vutlhari, a a kombele eka Xikwembu, lexi nyikaka vanhu hinkwavo hi tintswalo, ku nga ri na ku vilela, kutani ú ta nyikiwa byona.” (Yakobo 1:5) Vulavula na Yehova hi xikhongelo hi swiphiqo swa wena; a nga ku tiyisa leswaku u langutana ni miringo ya ripfumelo ra wena.

I yini xin’wana lexi Mukriste lontsongo a nga xi endlaka? Buku ya Swivuriso ya hi byela: “Yingisa tata wa wena l’a ku v̌elekeke, u nga monyi mana wa wena loko a dyuharile.” (Swivuriso 23:22) Muapostola Pawulo u seketele ndzayo leyi, hikuva u te: “Vana, yingisani vatswari va n’wina etimhakeni hinkwato, hikuva exikarhi ka va ka Kriste, hi swona leswi tsakisaka.” (Vakolosa 3:20) Vatswari va Vakriste va nga ku pfuna leswaku u tiya eripfumelweni. Yingisela swiringanyeto swa vona. Hi mpfuno wa vona, lavisisa Matsalwa ni tibuku leti sekeriweke eBibeleni, u lava mianakanyo, switsundzuxo ni mintokoto. Wena ni vatswari va wena mi ta swi tsakela leswi, naswona swi ta ku pfuna ku hlula nchavo.—2 Timotiya 1:7.

Tirhisa hi xitalo mpfuno wa malunghiselelo lawa Yehova Xikwembu a ma endleke ebandlheni ra Vukriste. Lunghiselela minhlangano kahle. Vulavula ni vakulu lava vekiweke ni van’wana lava hundzeke eka mintokoto leyi fanaka ni leyi sweswi yi langutaneke na wena. Solomoni u te: “L’a tlhariheke, a a yingise, o ta tiengetela ku tiva, l’a nga ni ku twisisa a ta tikumela mano.” (Swivuriso 1:5) Kutani ke, dyondza eka lava va kuleke. Nakambe, u nga ha dyondza eka vantshwa va Vakriste lava humelelaka eku langutaneni ni swiphiqo swo fana ni swa wena.

Vutshembeki Byi Tisa Mikateko

Hi ku yima u tiyile eripfumelweni, u ta va u tirhisa xitsundzuxo xa Pawulo lexi nge “tiyani swinene mi nga tsekatsekeni; tiyiselani swinene, mi tirhela Hosi masiku hinkwawo.” (1 Vakorinto 15:58) Yehova u tiva ni ku twisisa swiphiqo leswi u langutanaka na swona. U tiyise vo tala lava langutaneke ni swiphiqo leswi fanaka, naswona u ta ku tiyisa. Loko u titshega hi Xikwembu, xi ta ku seketela, hikuva mupisalema u te: “Nyiketa Yehova e timhaka ta wena, o ta ku seketela. A nga ka a nga pfumeli ni siku rin’we l’a lulameke a ṭekaṭekisiwa.”—Psalma 55:22.

Petro u tsarile: “Mi tshama mi ri ni ripfalo leri tengeke, leswaku loko mi hemberiwa, lava sandzaka mahanyelo ya n’wina layo lulama ya xikriste, va ta khomiwa hi tingana.” (1 Petro 3:16) Loko u ala ku landzula mayelana ni milawu leyo lulama ya Xikwembu ni misinya ya milawu ya xona, u ta va ni ripfalo lerinene, leri ku nga nkateko lowukulu lowu humaka eka Yehova. Ku tlula kwalaho, u ta veka xikombiso lexinene eka vantshwa va Vakriste lava ripfumelo ra vona ri nga ha vaka ri tsanile. (1 Timotiya 4:15, 16) Hanyelo ra wena ri nga va khutaza leswaku va endla matshalatshala ya ku va lava tiyeke eripfumelweni kutani xisweswo va kota ku tiyisela miringo.

U nga ha pfuna ni lava eku sunguleni a va kaneta xiyimo xa wena xa Vukriste. Tsundzuka ku tshembisa ka marito lama ma huhuteriweke: “Byala mbewu ya wena ka ha ri mišo; mav̌oko ya wena u nga ṭhuki u ma nyiketa nkarhi ni madyambu, hikuv̌a a ku tiv̌i leŝaku ku ta mila yihi, kumbe leyi, kumbe liya, kumbe loko ti ta mila ha timbirhi.” (Eklesiasta 11:6) I mani la tivaka vuyelo lebyinene lebyi nga ta humelela eku byaleni ka wena mbewu leyinene hi mintirho ya wena ya vutshembeki?

Exikarhi ka mikateko leyikulu leyi u nga ta yi tshovela ku na xiyimo xa ku amukeriwa hi Yehova. Eku heteleleni, ku tiya eripfumelweni swi ta vuyerisa hi vutomi lebyi nga heriki. (Yohane 17:3; ringanisa Yakobo 1:12) Ku wisa kwihi na kwihi ka xinkarhana loku kumiwaka hi ku landzula, a ku vuli nchumu loko ku pimanisiwa ni ku lahlekeriwa hi nyiko yoleyo.

Ku vuriwa yini hi muntshwa la boxiweke eku sunguleni ka xihloko lexi? U tiyisele ndzingo wa yena. Endzhaku ka loko nhlengeletano ya xikolo yi herile, u ringete ku hlamusela xiyimo xa yena hi ndlela leyi twalaka eka vadyondzisi. Hambi leswi ku nga vangiki na angulo lowunene, a a ri ni ku aneriseka hi ku tiva leswaku u endle mbilu ya Yehova yi tsaka. (Swivuriso 27:11) U ye emahlweni a sirheleta ripfumelo ra yena ku kondza a heta xikolo xa yena. Kutani u ve phayona. Onge ku tiyisela ka wena ka vutshembeki ku nga va ni vuyelo byo tano lebyi tsakisaka. Byi ta va tano loko u tikombisa u tiyile eripfumelweni.

[Nhlamuselo ya le hansi]

[Bokisi leri nga eka tluka 25]

MPFUNO LOWU KUMEKAKA

◻ Yingisa vutlhari bya vatswari va wena lava chavaka Xikwembu.

◻ Tirhisa malunghiselelo ya moya ebandlheni ra Vukriste.

◻ Vulavula ni vakulu lava vekiweke ni van’wana lava nga ha vaka va ve ni swiphiqo leswi fanaka ni swa wena.

◻ Vulavula ni Vakriste van’wana lavatsongo lava hlangavetanaka ni swiphiqo leswi fanaka hi laha ku humelelaka.

Nhlamuselo Ya Xikhongelo

“Hi Xiheveru, rito-nkulu ra xikhongelo ri huma eka rimitsu, ‘ku avanyisa’ naswona xivumbeko lexi tolovelekeke xa xikombiso . . . hi ku kongoma xi vula, ‘ku tiavanyisa hi wexe.’” Ku vurisa sweswo Authorised Daily Prayer Book. Nhlamuselo leyi anakanyeriwaka hi leswaku ntirho wun’wana wa xikhongelo hi leswaku xi fanele ku pfuna munhu ku vona loko a fikelela mimpimanyeto ni swilaveko swo lulama swa Xikwembu.

Hikwalaho ka xivangelo lexi, eBibeleni hinkwayo hi byeriwa leswaku handle ka loko munhu a endla ku rhandza ka Xikwembu, swikhongelo swa yena a swi nge amukeriwi. “Yehova o ṭhama kule ni la’v̌o biha, kambe o yingisa mikhongelo ya la’v̌o lulama.”—Swivuriso 15:29; 1 Yohane 5:14.

Ku tikambela ka munhu hi xiyexe emahlweni ka Yehova Xikwembu entiyisweni ku fanele ku endla munhu loyi a khongelaka ku va la titsongahataka ni la tivekaka ehansi. Leswi swi nyikela nkoka lowu engetelekeke eka xifaniso xa Mufarisi la tidzunisaka ni muluvisi la tivekaka ehansi loyi a teke etempeleni ku ta khongela.—Luka 18:9-14.

Xisweswo, hambi hi khongela eka Yehova leswaku hi nkhensa, ku dzunisa, kumbe ku kombela eka yena, minkarhi hinkwayo xikhongelo i nkarhi wa ku tikambela. Hi ndlela leyi, xikhongelo xi hi tshineta ekusuhi na Yehova naswona xi tiyisa vuxaka bya hina na yena.