leswaku va kuma vutomi. Hikwalaho, xivangelo lexikulu lexi a va fanele ku papalata ku dya ngati ha xona a a ku ri leswi ngati a yi ri ni nhlamuselo leyi hlawulekeke eka Xikwembu, kambe hayi hi leswi ku dya ngati a swi nga ri na rihanyo.—6/15, matluka 8-9.

◻ Xana vatswari va Vakriste ni vantshwa va nga tiyisa ku koteka ka leswaku ku ala ka n’wana ka mpompelo wa ngati ku ta xiximiwa hi ndlela yihi?

Hambi loko a nga si kula, muntshwa wa Mukriste u fanele a kota ku swi hlamusela kahle ni hi xivindzi leswi ku ala lokukulu ka vukhongeri bya yena hi ku ala ngati swi vulaka swona. Vatswari va fanele va pfuxeta timhaka leti ni vana va vona leswaku va kuma ntokoto eku hlamuseleni ka ku ala ka vona.—6/15, tluka 18.

◻ Vavasati va katekisiwe njhani hi nkarhi wa vutirheli bya Yesu bya laha misaveni?

Yesu u sungule ntirho lowu tiseke nchavelelo, ntshembo ni ntikelo lowuntshwa eka vavasati va tinxaka hinkwato. U dyondzise vavasati mintiyiso leyi enteke ya moya. (Yohane 4:7, 24-26) Hi nkarhi wa vutirheli bya yena, u amukele ku tirheriwa hi vavasati loko a famba-famba etikweni hinkwaro. (Marka 15:40, 41)—7/1, matluka 14-15.

◻ I tidyondzo tihi ta Yesu leti vatswari a va ti kuma ti pfuna eka vana va vona?

Vatswari va endla kahle ku tirhisa swifaniso ku endla leswaku mintiyiso ya Vukriste yi tshama etimbilwini ta vana va vona lavatsongo, naswona va nga ha tirhisa swivutiso leswi akaka ku vona loko vana va vona lava kuleke va ehleketisisa hi swona. (Ringanisa Matewu 17:24-27.)—7/1, tluka 26.

◻ Ha yini hi fanele ku landzela tintswalo ta rirhandzu?

Mfanelo ya tintswalo ta rirhandzu yi endla leswaku hi va ni rirhandzu eka Xikwembu ni le ka van’wana. Yi kondletela malwandla ni ku hi endla hi anakanyela van’wana. Yi tiyisa swiboho exikarhi ka ndyangu ni bandlha ra Vukriste. Ku tlula kwalaho, tintswalo ta rirhandzu ti tisa ku twala eka Yehova.—7/15, tluka 22.

◻ Ha yini swi koteka eka Mukriste ku hambukisiwa hi mhaka ya vanghana? (1 Vakorinto 15:33)

Munhu a nga ha vonaka a ri ni xinghana naswona a tsakisa, kambe loko a nga hlanganyeli eka nkhathalelo wa Mukriste wa ntirho wa Yehova kumbe hambi loko a tshemba Bibele, i munghana lowo biha. Ha yini? Hikuva vutomi bya yena byi sekeriwe eka mimpimanyeto leyi hambaneke, naswona swilo leswi swi nga swa nkoka eka Mukriste swi nga ha va swa nkoka lowutsongo eka yena.—7/15, tluka 23.

◻ Ha yini Siku ra ku Avanyisa wu ri nkarhi wa ntshembo?

Siku ra ku Avanyisa i nkarhi wa gidi ra malembe. Ri ta languteriwa hi Xikwembu hi xoxe hi ku tirhisa N’wana wa xona, Kriste Yesu, la hlawuriweke hi Xikwembu ku tirha tanihi Muavanyisi. Lowu wu ta va nkarhi wo vuyetela vutomi lebyi heleleke eka vanhu lebyi Adamu a byi lahleleke vana va yena. (1 Vakorinto 15:21, 22)—8/1, matluka 5-7.

Xana Wa Yi Kaneta Mimboyamelo Ya Vudyoho?

“HIKOKWALAHO, swi mirile eka mina: Loko ndzi navela ku endla leswo lulama, leswo biha na swona swi kona eka mina. Mina hi xiviri xa mina ndzi tsakela Nawu wa Xikwembu; kambe eswirhweni swa mina ndzi kuma nawu wun’wana, lowu lwaka ni nawu lowu wu fambisaka mianakanyo ya mina; wu ndzi endla mubohiwa enawini wa ku dyoha lowu fumaka swirho swa mina.”—Varhoma 7:21-23.

Swi lave ku titsongahata eka muapostola Pawulo leswaku a pfumela leswi nga laha henhla. Hambi swi ri tano, hi ku endla ka yena tano, swi n’wi pfune ku papalata mimboyamelo ya yena ya ku nga hetiseki leswaku yi n’wi hlula.

Swa fana ni le ka Vakriste va ntiyiso namuntlha. Loko hi tiva vutivi lebyi kongomeke bya ntiyiso wa Bibele, hi endle ku hundzuka loku lavekaka emahanyelweni ya hina, hi hundzukela eka mimpimanyeto ya Yehova. Hambi swi ri tano, mimboyamelo ya xidyoho ya ha ri kona, “hikuv̌a makungu ya timbilu ta v̌anhu ma bihile ku suka v̌uhlangini bya v̌ona.” (Genesa 8:21) Xana hi tshembeke ku ringana lerova hi pfumela hi hexe mimboyamelo yo karhi leyi hi tshikilelaka? Kumbe ha swi kaneta leswaku hi na yona, kumbexana hi heta hi ku vula leswaku, ‘Leswi kumbexana i xiphiqo eka vanhu van’wana, ku nga ri eka mina’?

Ku tixisa ko tano ku nga ha va ni khombo. Xikombiso lexi sekeriweke eBibeleni xi nga ha hi pfuna ku tlangela xilaveko xo pfumela mimboyamelo ya hina ya xidyoho ni ku yi lawula.

Mhaka Leyi Ku Kaneta Swi Nga Ni Khombo Ha Yona

Eminkarhini ya Bibele miti yo tala a yi sirheleriwe hi marhangu. Minyangwa—leyi hakanyingi a yi endliwa hi timhandzi—a yi ri xivandla xo hlaseleka hi ku olova xa rirhangu ra le ndzeni ra muti; hikwalaho, a yi sirheleriwa hi matimba swinene. Vaaki a va ake minyangwa yo tala, hi laha swi lavekaka ha kona ntsena, leswaku ku famba-famba ku olova hi nkarhi wa ku rhula. Minyangwa ya timhandzi hakanyingi a yi funengetiwa hi nsimbi, ku yi sivela ku hisiwa hi ndzilo. Swihondzo a a swi akiwile endzeni ka marhangu leswaku varindzi lava nga eka swona va kota ku vona valala lava taka va ha ri ekule.

Sweswi anakanya: A ku ta va ku humelele yini loko vaaki va muti a va honise ku hlaseleka ko olova ka minyangwa ya muti kutani va nga endli nsirhelelo lowu eneleke? Masocha ya valala a ma ta nghena emutini hi ku olova, kutani ma wu hlula.

Kutani swi tano hi hina. Yehova u tiva swivandla swa hina ha un’we-un’we swo hlaseleka hi ku olova. “Emahlweni ka Xikwembu, ku hava ni xivumbiwa ni xin’we lexi tumbeleke. Hinkwaswo swi lo tlàgàndlà, erivaleni, emahlweni ka Loyi hi fanelaka ku tihlamulela eka yena.” (Vaheveru 4:13) Sathana na yena a nga ha va a vone mboyamelo wun’wana wa xidyoho eka hina, wu nga ha va wo hi susa entiyisweni, ku hatlisela ku hlundzuka, ku navela rimbewu leri nga riki enawini, ku hlongorisa swilo leswi vonakaka, ku tikukumuxa kumbe swin’wana. Loko hi kaneta leswaku hi ni mimboyamelo ya vudyoho, hi tiendla hi hlaseleka swinene hi ku olova eripfumelweni ra hina hi minhlaselo ya Sathana. (1 Petro 5:8) Hi nga ha hluriwa loko ku navela loko biha ku tlula mimboyamelo ntsena kutani ku tswala xidyoho. (Yakobo 1:14, 15) Hi lava ku fana na Pawulo, hi xiya hi vutshembeki ‘nyangwa wihi na wihi wa mhandzi’ lowu nga ha vaka kona.

Ti Tiyise!

Ku nga va vuphukuphuku ku vona mimboyamelo leyi hoxeke kambe endzhaku ku nga ri na lexi u xi endlaka ha swona. Leswi a swi ta fana ni munhu la tilangutaka exivonini, kutani a vona swivandla leswi lavaka ku lunghisiwa, kutani a famba a nga endlanga ku lunghisa loku lavekaka. (Yakobo 1:23-25) Ina, hi fanele hi teka goza leswaku hi ta tisirhelela eku hluriweni hi mimboyamelo ya vudyoho. Xana hi nga swi endlisa ku yini leswi?

Hakanyingi, eminkarhini ya Bibele, miti leyitsongo, kumbe “l’eyi nge hansi ka [yin’wana, NW]” a yi nga biyeriwanga. (Tinhlayo 21:25, 32; Vaavanyisi 1:27; 1 Tikronika 18:1; Yeremia 49:2) Vaaki va miti leyi a va swi kota ku balekela emutini lowu sirheleriweke hi rirhangu loko valala va hlasela. Xisweswo miti leyi tiyisiweke a yi tirha tanihi vuchavelo bya vanhu va ndhawu yoleyo.

Bibele yi hlamusela Yehova Xikwembu tanihi xihondzo, vuchavelo, rirhangu leri hi nga tsutsumelaka eka rona ku kuma vuhlayiseki. (Swivuriso 18:10; Zakaria 2:4, 5) Kutani Yehova i musirheleli lonkulu eka malandza ya yena. Xikhongelo xa nkarhi na nkarhi eka yena i xa nkoka swinene. (1 Vatesalonika 5:17) Mpfuno wun’wana i Bibele. Loko hi tirhisa Rito ra Xikwembu, hi endla kahle loko hi endla dyondzo leyi hlawulekeke ya tindhawu leti hi tsaneke eka tona. Nakambe hi nga ha tinyika nkarhi wo hlahluvisisa swihloko leswi phindha-phindhiweke leswi sekeriweke eBibeleni leswi vulavulaka hi ‘minyangwa ya mhandzi’ ya hina ha un’we-un’we.

Nakambe, tanihi varindzi lava nga exihondzweni, hi nga ha vona nala a ha ta hi le kule, hi ndlela yo fanekisela, kutani hi endla hi laha swi faneleke. Njhani? Hi ku papalata swiyimo leswi hi nga ha kumaka ndzingo kumbe ntshikilelo eka swona. Hi xikombiso, munhu la tirhelaka ku ringanisela eku nweni ka swakunwa leswi nga ni xihoko hi vutlhari u ta hlawula ku papalata tindhawu leti swakunwa leswi swi kumekaka hi ku olova kumbe hambi ku ri ku khutaziwa kona.

Hinkwaswo leswi swi lava matshalatshala. Hambi swi ri tano, loko muapostola Pawulo a boheke ku ‘xanisa miri wa yena’ leswaku a hlula mimboyamelo ya ku nga hetiseki, xana na hina a hi fanelanga ku tirhisa matshalatshala ya hina vini? Nyingiso wo tano wa vukheta eka mimboyamelo ya hina ya vudyoho wu ta kombisa leswaku hi landzela nkongomiso wa muapostola Petro: “Chivirikani leswaku Xikwembu xi mi kuma mi nga ri na xivati kumbe xisandzu, naswona mi ri ni ku rhula.”—1 Vakorinto 9:27; 2 Petro 3:14.

Ku Xiya Ni Xiendlo

U nga heli matimba loko, ku nga khathariseki matshalatshala ya wena, mimboyamelo ya wena hinkwayo ya ku nga hetiseki yi nga nyamalali. Ntsendze loko hi nga hetisekanga, mimboyamelo leyi hoxeke minkarhi hinkwayo yi ta va kona ku fikela eka mpimo wo karhi, hi laha a swi ri ha kona emhakeni ya Pawulo. Kambe hi lava ku tshama hi tirhela ku yi hlula, hi yi sivela ku tswala xidyoho.

Hambi swi ri tano, xalamukela ku hambana exikarhi ka ku amukela ntiyiso wa ku nga hetiseki ni ku swi tiyisela. Sweswo swi nga ha fanisiwa ni munhu loyi endzeni ka xifuva xa yena a nga ni mbilu leyi tsaneke. U fanele ku langutana ni ntiyiso lowu hi ku ringeta ku hlayisa mbilu ya yena yi ri exiyin’weni lexinene hi laha a navelaka ha kona. A nga ehleketi leswaku leswi mbilu ya yena yi nga tsana, a nga tlhela a tlula minsivelo hinkwayo kutani a hanya hi ndlela leyi a yi tsakelaka.

Kutani, tiva leswaku matimba ya hina a ya titshegangi hi ku ala ka le munyameni ka mimboyamelo ya vudyoho kambe eku yi xiyeni ni ku teka goza ehenhleni ka yona. Kutani u nga chavi ku swi pfumela hi wexe ni le ka Yehova, swivandlha leswi eka swona u ringiwaka ni ku tshikileriwa hi ku olova. U nga tshuki u tisola eku endleni tano, naswona rirhandzu ra Yehova eka wena ri nge heli. Entiyisweni, loko u tshinela ekusuhi na Xikwembu hi ku tinyiketela lokukulu leswaku xi ku amukela, xi ta tshinela swinene ekusuhi na wena.—Yakobo 4:8.

[Xifaniso lexi nga eka tluka 31]

Xifaniso lexi xa Megido xi kombisa tinyangwa leti tiyisiweke ni marhangu yo sirhelela ya miti ya khale

[Xihlovo Xa Kona]

Pictorial Archive (Near Eastern History) Est.