Veka Masungulo Eka Riendzo Ra Wena Ro Sungula

¹ Ku endla maendzo yo vuyela swi olova ngopfu loko hi veka masungulo lamanene eka riendzo ro sungula. Buku leyi nge Reasoning yi nga hi pfuna ku endla sweswo.

² Rungula leri landzelaka ri tekiwe eka xingheniso xa vumbirhi eka tluka 10 ra buku leyi nge Reasoning, ehansi ka xihloko lexi nge “Bible/God.”

Endzhaku ko pfuxelana hi ndlela ya xinghana, vula leswi:

◼ “Hi kuma leswaku vanhu vo tala ngopfu namuntlha a va tiyiseki leswaku tinhlamulo letinene ta swiphiqo swa siku na siku leswi andzaka va nga ti kuma kwihi. Xana u tshame u swi vona sweswo? [Yimela nhlamulo.] Eku sunguleni vanhu a va tshemba Bibele leswaku yi va pfuna. Kambe sweswi va kanakana. Xana u titwa njhani hi Bibele?” Loko n’wini wa muti a nga yi tshembi leswaku i ntiyiso, humesa xiphephana lexi nge Mhaka Leyi U Nga Tshembaka Bibele Ha Yona ivi u hlaya ndzimana ya vumbirhi ni ya vunharhu eka tluka 2. Loko n’wini wa muti a pfumela leswaku Bibele i Rito ra Xikwembu, pfula ivi u hlaya matsalwa lama kombisiweke eka ndzimana ya vumbirhi eka tluka 2 exiphephanini, ivi u bula na yena ha swona hi ku komisa. Fambisa nyiko ya n’hweti.

³ Loko ku ri ni vo tala ensin’wini ya n’wina lava nga pfumeriki, ringeta ku hundzula xingheniso xa vuntlhanu lexi nga eka tluka 10 ra buku leyi nge Reasoning, leswaku u pfuxa ku tsakela ka vona.

U nga ha ku:

◼ “Hi mhaka ya madzolonga hinkwawo lama nga kona emisaveni namuntlha, vanhu vo tala lavanene swa va tikela ku pfumela eka Xikwembu. Kumbe loko va pfumela eka xona, a va swi tshembi leswaku xi nga tlhantlha swiphiqo leswi hi nga na swona. Wena u swi vona njhani?” Yimela nhlamulo. Hlaya xingheniso xa buku leyi nge Rito Ra Xikwembu eka tluka 5. Kombela mavonelo ya n’wini wa muti eka xivutiso xo hetelela: “Xana u ehleketa leswaku swiphiqo swo fana ni leswi swi ta ololoxiwa?” Yisa bulo emahlweni hi ku hlaya swiyenge leswi fanelaka eka tindzimana ta ntlhanu leti landzelaka eka ndzima yo sungula. Fambisa buku eka n’wini wa muti kutani u hlela ku tlhela u vuya mi ta yisa bulo emahlweni.

⁴ Tlakusa Swivutiso eXiphephanini Leswaku U Lunghisela Riendzo Ra Wena Leri Landzelaka: Kunguhata leswaku riendzo ra wena ro sungula ri va masungulo ya maendzo lama vekaka mihandzu. U nga ehleketi leswaku u fanele u hlamusela ngopfu; naswona a wu fanelanga u hatlisela lerova n’wini wa muti a vona onge a wu na mhaka na yena. Endzhaku ko hlaya tindzimana timbirhi kumbe tinharhu exiphephanini, tlakusa xivutiso lexi nga ta hlamuseriwa eka riendzo ra nkarhi lowu taka.

⁵ Hi xikombiso, u nga ha n’wi komba ndzimana ya vunharhu eka tluka 4 ivi u vutisa: “Xana u ehleketa leswaku Bibele yi nyika vumbhoni lebyi eneleke leswaku u tshemba leswi yi swi vulaka mayelana ni vumundzuku?” Xivutiso lexi xi ta endla yinhla leyi nga ta hlamuseriwa eka riendzo ro vuyela. Fambisa buku leyi nge Rito Ra Xikwembu. Loko u vuyela u nga ha languta tindzima 9 na 10 ebukwini leyi nge Rito Ra Xikwembu.

⁶ Loko hi languta n’wini wun’wana ni wun’wana wa muti tanihi loyi a nga ha vaka mudyondzisiwa, hi ta lwela ku tirhisa marito ya hina yo gimeta leswaku hi veka masungulo ya riendzo ro vuyela.