Xana Wa Swi Landzelela Switsundzuxo?
TATANA loyi a nga ni rirhandzu u ta tsundzuxa vana va yena leswaku va kota ku humelela evuton’wini naswona va tsaka loko se va kurile. Naswona vana lava rhandzaka ni ku xixima vatswari va vona va ta amukela xitsundzuxo xo tano hikuva va swi tiva leswaku i xa ku pfuna vona. Hi ku fanana, Tatana wa hina wa le tilweni wa rirhandzu, Yehova, u phamela malandza ya yena hi ndzetelo lowu va tiselaka nkateko ni ntsako evuton’wini bya vona. Hikwalaho, i swa nkoka leswaku hi landzelela switsundzuxo leswi Yehova a hi nyikaka swona hi Rito ra yena, Bibele, na hi nhlengeletano ya yena ya laha misaveni.
Exikarhi Ka Ndyangu
Ku na tindhawu to hambana-hambana leti hi nyikiwaka switsundzuxo eka tona. Yin’wana hi le xikarhi ka ndyangu. Vukati ni ndyangu swi sunguriwe hi Xikwembu. Bibele yi ri Xikwembu xi hlanganise vatekani vo sungula va vanhu kutani xi va lerisa ku va ni vana. (Genesa 1:27, 28; 2:22-24) Muvumbi u nyikele switsundzuxo eka swirho hinkwaswo swa ndyangu hi ku ya hi mintirho ya vona. Hi xikombiso, wanuna na tatana i nhloko ya ndyangu, leswi vulaka leswaku u ni vutihlamuleri bya ku nyikela xitsundzuxo, swakudya, swiambalo, vutumbelo, nsirhelelo ni ndzayo. Nakambe u endla makungu ya nkoka ya ndyangu. Tanihi wanuna, u fanele ku kombisa nkhathalelo eka nsati wa yena ni ku n’wi khoma tanihi xibya lexi nga tiyangiki. (Vaefesa 5:22, 23; 1 Timotiya 5:8; 1 Petro 3:7) Wansati u fanele ku va ehansi ka nuna wa yena, a kombisa xichavo, naswona a va mupfuni ni muhetisisi wa yena. Naswona Matsalwa ma kombisa leswaku vana va fanele ku xixima vatswari va vona.—Genesa 2:18; Vaefesa 6:13; 1 Petro 3:1, 2.
Ku humelela yini loko switsundzuxo leswi swi honisiwa? Ku nga twanani ni timholovo swa humelela loko vavanuna va nga va ehleketeleli vavasati va vona, ni loko vavasati va kombisa xichavo xitsanana eka vunhloko bya wanuna. Entiyisweni, swilo swo tano swi vangele ku hambana eka vukati byo tala. Ku nga yingisi ni ku xandzuka ka vana ku tise ku vaviseka lokukulu eka vatswari vo tala. Hakanyingi, vatswari ku soriwa vona hikwalaho ka ku nga kurisi vana va vona hi ku ya hi ndzayo leyi faneleke, xisweswo swi va dyisa mbitsi.—Vaefsa 6:4.
Hambi leswi vakondleteri, ni va ntivo-miehleketo, ni van’wana va nyikeleke swiringanyeto swo hambana-hambana swa ndlela leyi ku nga hlangavetiwaka ha yona ni swiphiqo swa ndyangu, a ku na ndzayo leyi tirhaka swinene ku tlula switsundzuxo leswi nyikeriweke eBibeleni hi Muvumbi wa ndyangu. Ku landzelela leswi swi tisa ntsako wa ntiyiso ni ku aneriseka.—Psalama 19:7-9.
Ebandlheni
Hi fanele ku landzelela switsundzuxo leswi Nhloko ya bandlha ra Vukriste, Yesu Kriste, a swi nyikaka hi ku tirhisa “nandza wo tshembeka ni wa vutlhari,” xi tirhisiwa lexi vekiweke xa nhlengeletano ya Xikwembu laha misaveni. (Matewu 24:45-47; Vaefesa 5:23) Leswaku ku ta va ni ku rhula ni ntwanano ebandlheni, swirho swa rona hinkwaswo swi fanele ku fambisana ni nkongomiso lowu nyikeriweke. Hi xikombiso, lava va rhangelaka eku dyondziseni ka bandlha ni ku pfuna vanhu van’wana va fanele ku namarhela eka swikongomiso leswi va swi kumaka eka nhlengeletano ya Yehova. Leswi swi ta hoxa xandla eku humeleleni ka ntirho wa vona. Switsundzuxo swi nga va eka leswaku hi nga hlanganyela njhani entirhweni wo chumayela, ndlela leyi ha yona ku nga hlangavetaniwaka ni swiphiqo ebandlheni, ndlela yo nyikela ndzayo ni xikhutazo, ndlela yo chavelela lava hlunameke ni swin’wana. Nakambe ku na swikongomiso swa ndlela leyi ku nga lunghiseleriwaka ha yona mihlangano leyi dyondzisaka ni leyi akaka eka hinkwavo lava va hlanganyelaka ni bandlha ra Vukriste.—Mintirho 20:20; Varhoma 12:6-8; Vagalatiya 6:1; 1 Vatesalonika 3:1-3
Vakulu va bandlha, kumbe valanguteri, ngopfu-ngopfu va fanele ku veka xikombiso lexinene emhakeni leyi. Huvo leyi Fumaka yi rhumela switsundzuxo leswi vakulu va faneleke ku swi landzela hi vukheta na hi ku tshembeka. Va fanele ku twananisa ni ku tirhisa switsundzuxo eka swiyimo swa kwalaho. Hi fanele ku tsundzuka leswaku loyi a kongomisaka bandlha ra Vukriste i Yesu Kriste. U swi twisisa kahle swilaveko swa mabandlha hinkwawo emisaveni hinkwayo, naswona u nyikela xikhutazo ni mpfuno lowu lavekaka. Hikwalaho, vakulu a va fanelanga ku kanakana ku tirhisa swikongomiso swihi na swihi leswi va swi kumaka swi huma eka nhlengeletano ya le tilweni ya Xikwembu. Leswi swi ta tirha tanihi xikombiso lexinene eka hinkwavo eka bandlha rin’wana ni rin’wana naswona swi ta va pfuna leswaku va va ni vun’we exikarhi ka vona swin’we ni vamakwavo hinkwavo va Vukriste emisaveni hinkwayo.—Mintirho 15:1-31; Vaheveru 13:7; Nhlavutelo 5:6.
Vuyelo Lebyi Tsakisaka!
Loko muaki a aka muako lowukulu u landzelela pulani ya vativi-vuako hi vukheta leswaku lexi a xi akaka xi khomelela. Emasikwini yo biha emahlweni ka Ndhambi, Nowa a a byeriwe ku aka ngalava. A a byeriwe leswaku a nga yi aka hi ndlela yihi naswona i vanhu ni swiharhi swihi leswi a nga ta swi nghenisa leswaku swi pona Ndhambi leyi taka. Nowa u hlamule hi ndlela yihi? Bibele yi ri: “Noa a endlisa ŝeŝo; a endla hikwaŝo hi laha Šikwembu ši ṅwi leriseke ha kona.” I Nowa ntsena ni lava a ri na vona engalaveni lava va poneke Ndhambi. (Genesa 6:5, 13-22; 7:23) Namuntlha, hi hanya eminkarhini leyi fanaka swinene ni masiku ya Nowa, naswona hikwalaho ka leswi Xikwembu xi ta susa hinkwavo vanhu lavo homboloka. Bibele ya hi byela leswaku i magoza wahi lawa hi faneleke ku ma teka loko hi lava ku va exikarhi ka lava nga ta pona.—Matewu 24:37-39; 2 Petro 3:5-7, 11.
Hikwalaho, a hi amukeleni switsundzuxo leswi Yehova a hi nyikaka swona hi Rito ra yena leri tsariweke na hi nhlengeletano ya yena ya la misaveni hi ntsako, kutani hi swi tirhisa. Loko hi endla leswi swi ta hi tisela nkateko ni ntsako naswona swi ta hlayisa vutomi bya hina.