ntsena naswona a ndzi kombela leswaku ndzi pfumelelana na swona. Hambi swi ri tano, mina ni nsati wa mina hi tshembele eka Yehovha, loyi a nga hi hlayisaka nkarhi wo leha ku tlula munhu wihi ni wihi—hambi loko ku hlayisa nawu wa yena swi ta vula ku lahlekeriwa hi vutomi eka malembe ma nga ri mangani ya sweswi.

Xikan’we-kan’we, ku ve ni ku antswa lokukulu eka xiyimo xa nsati wa mina. Siku rin’wana ndzi fike ndzi n’wi kuma a tshame emubedweni a ri ku hlayeni. Hi masiku lama nga landzela u sungule ku chumayela swigulani ni ntlawa wa vaongori. Kutani ndzi lerisiwe ku ta ehofisini ya muhandzuri. U te: “Nkulukumba Wharerau, u wanuna la katekeke hakunene! Hi tshemba leswaku xiphiqo xa nsati wa wena xi tshungulekile.” Swi nga languteriwanga, nsusumeto wa ngati ya yena wu ve exiyin’weni lexinene. Mina ni nsati wa mina hi nkhense Yehovha naswona hi pfuxeta ku tiyimisela ka hina ku endla leswi nga emandleni ya hina entirhweni wa yena.

Sweswi ndzi tlhele ndzi averiwa eSwihlaleni swa Cook, laha nakambe ndzi tirhaka eRarotonga. Mawaku lunghelo ronghasi leri katekisiweke! Loko hi languta endzhaku, mina ni nsati wa mina hi tsakela leswi Yehovha a hi hlayiseke malembe ya makume ntlhanu hi ri entirhweni wa yena. Malunghana ni swilo swa nyama, a hi pfumalanga swilaveko swa vutomi. Hi tlhelo ra moya, mikateko a yi tele ku tlula mpimo. Yin’wana leyi xiyekaka i nhlayo ya maxaka ya mina lama namarheleke ntiyiso. Ndzi nga hlaya vo tlula 200 lava sweswi va nga Timbhoni ta Yehovha leti khuvuriweke, ku katsa ni vatukulu va 65. Un’wana ntukulu i xirho xa ndyangu wa le Bethele le New Zealand, kasi n’wana un’wana wa xisati ni nuna wa yena ni vana vambirhi va endla ntirho wo aka emarhavini.—3 Yohane 4.

Loko ndzi languta emahlweni, ndzi tsakela ntshembo wo hanya eparadeyisini ya misava hinkwayo, laha ku saseka ka yona ku nga ta tlula nkova lowo saseka laha ndzi nga velekiwa kona. Ku ta va lunghelo lerikulu swonghasi ku amukela tata wa mina ni mana wa mina eku pfukeni ka vafi ni ku va byela hi Mfumo ni vumbhoni byin’wana bya ku hlayisa ka Yehovha.

Ku tiyimisela ka mina, loku tiyisiwaka hi ku tiva leswaku Xikwembu xa ndzi khathalela, ku fana ni leswi mupisalema a swi vuleke eka Pisalema 104:33: “Nḍi ta yimbelela Yehova loko nḍa ha hanya; nḍi ta ḍunisa Šikwembu ša mina, loko nḍa ha ri kona.”—Hi ku vula ka Sarn Wharerau.

Swivutiso Swa Vahlayi

Xana Timbhoni ta Yehovha ti papalata ku tlangela masiku yo velekiwa hikwalaho ka leswi mukhuva lowu a wu ri wa vukhongeri eminkarhini ya khale?

Ku tlangela masiku yo velekiwa ku sekeriwe eka vukholwa-hava ni vukhongeri bya mavunwa, kambe a hi xona xivangelo-nkulu lexi endlaka leswaku Timbhoni ta Yehovha ti papalata mukhuva lowu.

Mikhuva yin’wana leyi eku sunguleni hi ntolovelo a yi ri ya vukhongeri a ya ha ri tano etindhawini to tala. Hi xikombiso, xingwavila xa vukati xi tshame xi tekiwa tanihi xa vukhongeri, kambe etindhawini to tala namuntlha, a swa ha ri tano. Hikokwalaho, vunyingi bya Vakreste va ntiyiso byi amukela mukhuva lowu tolovelekeke wo ambala xingwavila xa vukati tanihi vumbhoni bya leswaku munhu u tekiwile. Etimhakeni to tano, lexi nga ni mhaka ngopfu hi loko sweswi mukhuva wolowo wu fambelana ni vukhongeri bya mavunwa.—Languta “Swivutiso Swa Vahlayi” eka Xihondzo xo Rindza xa Xinghezi xa January 15, 1972 ni xa October 15, 1991.

Kambe, u nge kaneti leswaku tibuku to hambana-hambana ti paluxa vukholwa-hava ni nxaxamelo wa vukhongeri wo tlangela masiku yo velekiwa. The Encyclopedia Americana (nkandziyiso wa 1991) yi ri: “Tiko ra khale ra Egipta, Greece, Rhoma na Peresi ma tlangele masiku yo velekiwa ya swikwembu, tihosi ni tinghanakana.” Yi vula leswaku Varhoma a va tlangela ku velekiwa ka Artemis ni siku ra Apollo. Hi laha ku hambaneke ni sweswo, “hambi leswi Israyele wa khale a hlayiseke tirhekhodo ta malembe ya vanhu va tiko, ku hava vumbhoni bya leswaku va ve ni minkhuvo yo tsundzuka siku ro velekiwa.”

Buku yin’wana yi boxa vuxokoxoko lebyi xiyekaka hi ta masungulo ya ku tlangela masiku yo velekiwa: ‘Swinkhubyana swa masiku yo velekiwa swi sungule khale eYuropa. Vanhu a va pfumela eka mimoya leyinene ni leyo biha, leyi nkarhi wun’wana a yi vuriwa mikhuva leyinene ni leyo biha. Un’wana ni un’wana a a yi chava mimoya leyi, leswaku yi nga vavisa la tlangelaka masiku yo velekiwa, kutani a a rhendzeriwa hi vanghana ni maxaka, lava ku n’wi navelela ka vona leswinene ni vukona bya vona, a swi ta n’wi sirhelela eka makhombo lama nga tiviwiki lama nga taka ni masiku yo velekiwa. Ku nyika tinyiko swi ve ni nsirhelelo lowukulu. Ku dya swin’we swi nyikele nsirhelelo lowu engetelekeke ni ku pfuna ku tisa mikateko ya mimoya leyinene. Kutani eku sunguleni xinkhubyana xa siku ro velekiwa a xi endleriwa ku sirhelela munhu eka vubihi ni ku tiyisekisa ku ta ka lembe lerinene.’—Birthday Parties Around the World, 1967.

Nakambe buku yoleyo yi hlamusela masungulo ya mikhuva yo tala yo tlangela masiku yo velekiwa. Hi xikombiso: “Xivangelo [xo tirhisa makhandlhela] xi hi tsundzuxa Magriki ni Varhoma vo sungula lava anakanyeke leswaku swivonani kumbe makhandlhela a ma ri ni mahlori. A va nyikela swikhongelo kutani va endla leswaku leswi va rhandzaka swona swi yisiwa eka swikwembu hi malangavi ya makhandlhela. Kutani swikwembu a swi ta va tisela mikateko kumbexana swi hlamula swikhongelo.” Rungula rin’wana ro fana ni leri ri kumiwa eka matluka 69 na 70 eka Reasoning From the Scriptures, leyi kandziyisiweke hi Watchtower Bible and Tract Society of New York, Inc.

Hambi swi ri tano, tanihi laha swi boxiweke ha kona, ku katseka swo tala eka xivutiso lexi ku tlula ku tiva loko ku tlangela masiku yo velekiwa swi ve swa vukhongeri kumbe na sweswi swa ha ri swa vukhongeri. Bibele yi boxa mhaka ya masiku yo velekiwa, naswona Vakreste lava vupfeke va xiya xikombiso xin’wana ni xin’wana lexi yi xi nyikelaka.

Malandza ya Xikwembu ya nkarhi lowu hundzeke a ma xiya nkarhi wa ku velekiwa ka munhu, leswi swi endleke leswaku va kota ku hlayela tinguva. Ha hlaya: “Noa, loko a ri munhu wa malembe ya ntlhanu wa madzana, a kuma Sem na Kam na Yafet.” “Hi lembe ra 600 ra ku hanya ka Noa, hi ṅhweti ya v̌umbiri, hi siku ra khume na ntlhanu na mambiri, hi siku lero, ŝihlovo hikwaŝo ŝa mpfhuka lo’wukulu ŝi pfelela, ni tinyangwa ta mati ya tilo ti pfuleka.”—Genesa 5:32; 7:11; 11:10-26.

Tanihi laha Yesu a boxeke ha kona, exikarhi ka vanhu va Xikwembu ku velekiwa ka n’wana a ku ri xiendlakalo lexi tsakisaka, lexi katekisiweke. (Luka 1:57, 58; 2:9-14; Yohane 16:21) Hikwalaho, vanhu va Yehovha a va tsundzuki siku ro velekiwa; va hlayisa minkhuvo yin’wana hayi masiku yo velekiwa. (Yohane 10:22, 23) Encyclopaedia Judaica yi ri: “Ku tlangela masiku yo velekiwa a swi tiviwi eka mukhuva wa Xiyuda.” Customs and Traditions of Israel yi ri: “Ku tlangela masiku yo velekiwa swi tekeleriwe eka mikhuva ya matiko man’wana, tanihi leswi mukhuva lowu wu nga boxiwangiki exikarhi ka Vayuda kumbe eBibeleni, eka Talmud kumbe eka matsalwa ya vavanuna va vutlharhi. Entiyisweni, a a wu ri mukhuva wa khale wa le Egipta.”

Mukhuva wa Vaegipta wu fambelana kahle ni nkhuvo wo tlangela siku ro velekiwa lowu boxiweke eBibeleni, lowu vagandzeri va ntiyiso va nga wu tlangelangiki. A a wu ri nkhuvo wo tlangela siku ra ku velekiwa ka Faro loyi a fumeke loko Yosefa a ha ri ekhotsweni. Van’wana va vahedeni volavo va nga ha va va wu tsakerile nkhuvo wolowo, kambe siku rero ro velekiwa a ri fambelana ni ku tsemiwa ka nhloko ya ndhuna-nkulu ya vaphameri va xinkwa.—Genesa 40:1-22.

Mhaka yin’wana leyi fanaka leyi nga amukeriwiki yo tlangela siku ro velekiwa yi hlamuseriwe eMatsalweni—ku nga nkhuvo wa Heroda Antipasi, n’wana wa Heroda Lonkulu. Ku tlangela loku ka siku ro velekiwa a ku boxiwi nikatsongo eBibeleni tanihi nkhuvo lowu faneleke. Ku ri ni sweswo, wu humelele hi nkarhi wa ku tsemiwa ka nhloko ya Yohane Mukhuvuri. Kutani, “vadyondzisiwa va Yohane va ta, va ta teka ntsumbu wa yena, va ya wu lahla; kutani va ya tivisa Yesu,” loyi ‘a nga suka kwalaho a ya emananga a ri yexe.’ (Matewu 14:6-13) Xana u anakanya leswaku vadyondzisiwa valavo va tsakisiwe hi minkhuvo yoleyo ya siku ro velekiwa?

Hikwalaho ka leswi ku tiviwaka masungulo ya ku tlangela masiku yo velekiwa naswona xa nkoka ngopfu, tanihi leswi swi boxiwaka eka xiendlakalo lexi nga riki kahle eBibeleni, Timbhoni ta Yehovha ti na xivangelo lexi twalaka xo papalata mukhuva lowu. A va swi lavi ku landzela mukhuva lowu wa misava, hikuva va nga ha va ni swakudya leswinene naswona va va na swona nkarhi wun’wana ni wun’wana elembeni. Ku nyikela ka vona nyiko a hi xikolokolo kumbe a hi loku endliwaka hikwalaho ka ku hlangana ka xinghana; i ku avelana tinyiko hi ku swi rhandza nkarhi wihi ni wihi hi malwandla ni rirhandzu ra xiviri.—Swivuriso 17:8; Eklesiasta 2:24; Luka 6:38; Mintirho 9:36, 39; 1 Vakorinto 16:2, 3.