‘Matimba Lamakulu Lama Tlulaka Hinkwaswo’

MUKRISTE a nga tiyisela ku xanisiwa ko tanihi kwihi? Namuntlha, Vakriste emisaveni hinkwayo va langutane ni vusiwana, ku hahluka ka mindyangu, ntshikilelo wa mianakanyo, vuvabyi, tinyimpi ni nxaniso. Xana i swinene ku va langutela leswaku va hlayisa vutshembeki ku nga khathariseki hinkwaswo leswi? Muapostola Pawulo u vule leswaku a swi ri swinene. U tsarile: “Ndzi nga endla hinkwaswo hi matimba ya Loyi a ndzi tiyisaka.”—Vafilipiya 4:13.

Matimu ma swi kombisile leswaku matimba lama humaka eka Yehova hakunene ma ringene swilo hinkwaswo. Hi xikombiso, enkarhini wa ku fuma ka Manazi eJarimani, Timbhoni ta Yehova ti vone nxaniso wa tihanyi. Xana ti tiyiserile? Buku leyi nge Les Bibelforscher et le nazisme (Swichudeni Swa Bibele Ni Vunazi) yi ri: “Ku nga khathariseki ku biwa hinkwako, minxungeto ni ku yirisiwa, ku nga khathariseki ku khomisiwa tingana ka le rivaleni, ku khotsiwa ni ku pfaleriwa etikampeni ta nxaniso, Swichudeni swa Bibele [Timbhoni ta Yehova] a swi pfumelanga ku ‘hambukisiwa eka ntiyiso wa swona.’”

Etikampeni ta nxaniso, Timbhoni a ti voniwa hi mfungho lowuntsongo wa tikhona tinharhu eka swiambalo swa tona naswona a ti hlawuleriwa etlhelo leswaku ti kuma nxaniso lowu hlawulekeke wa tihanyi. Xana leswi swi endla leswaku ti avana? Mutivi wa mianakanyo Bruno Bettelheim u xiye leswaku “a ti kombisanga vukulukumba lebyi nga tolovelekangiki ntsena ni mahanyelo lamanene, kambe ti tikombe ti sirhelelekile eka ntokoto wa nkampa lowu fanaka lowu hi ku hatlisa wu nga herisa vanhu lava mina ni vanghana va mina lava va nga vativi va mianakanyo, a hi va teka va ri ni vun’we lebyikulu.”

Ina, a va ri ni ‘matimba ya swilo hinkwaswo.’ Hikwalaho ka yini? hikuva va titshege hi Yehova. Pawulo u te: “Kambe hina hi nyikiweke ku rhwala xuma lexi, hi fana ni timbita ta vumba; swi komba leswaku matimba lamakulu lawa, lama tlulaka hinkwaswo, ma huma eka Xikwembu, a ma humi eka hina.” (2 Vakorinto 4:7) Loko u langutana ni miringo, tshembela eka Yehova leswaku u kuma mpfuno. Loko u tiyisiwa hi matimba lama tlulaka hinkwaswo lawa a ma nyikelaka, u ta swi kota ku tiyisela.—Luka 11:13.

Xana U Nga Ri Amukela Riendzo?

Hambi ku ri eka misava leyi nga ni maxangu, u nga wu kuma ntsako eka vutivi lebyi kongomeke bya Bibele, bya Xikwembu, Mfumo wa xona, ni xikongomelo xa xona lexinene eka vanhu. Loko u ta lava ku kuma rungula leri engetelekeke kumbe u lava leswaku un’wana a ku endzela a ta fambisa dyondzo ya le kaya ya Bibele ya mahala na wena, tsalela eka Watch Tower, Private Bag 2067, Krugersdorp, 1740, kumbe eka adirese leyi faneleke eka leti xaxametiweke eka tluka 2.