fikeleriwa hi vavanuna va bindzu ni ntirho wun’wana ni wun’wana ni va nawu wihi na wihi wa vanhu. [Va] yise eka mimpimo ya le kule ya mfumo wa [Rhoma] xihundla xexo xa vutomi bya le ndzeni, langutelo rero lerintshwa ehenhla ka misava, leri eka ntokoto wa vona ri vekeke ku pona. . . . [Vukriste byo sungula] a byi khorwisiwe hi ku helela hi makumu lama tshinelaka ya mafambiselo ya misava ya sweswi byi tshembele eka ku lulamisiwa ka xihatla ni loku hlamarisaka ka mafambiselo ya misava leyintshwa.”

18. I ntshembo wihi lowunene lowu tlulaka milorho ya varhangeri va politiki?

¹⁸ Eku nyikeleni ka vumbhoni hi yindlu na yindlu ni swivumbeko swin’wana swa vutirheli bya vona, Timbhoni ta Yehova hi ntsako ti kongomisa vayingiseri va tona eka misava leyintshwa leyi Xikwembu xi yi tshembiseke. Mikateko ya yona leyi vhumbiweke ya vutomi lebyi nga heriki yi tlula swinene milorho leyi rhandziwaka ngopfu ya lava va tivulaka lava nga ta va vaaki va namuntlha va fambiselo ra misava leyintshwa. (2 Petro 3:13; Nhlavutelo 21:1-4) Hambi leswi a swi ta tikomba onge un’wana ni un’wana u ta lava ku hanya emisaveni leyintshwa yo saseka ya Xikwembu, sweswo a swi tano. Hambi swi ri tano, lexi landzelaka a hi xiye tindlela tin’wana leti humelelaka leti malandza ya Yehova ma nga dyondzisaka lava lavaka vutomi lebyi nga heriki ha tona.

Lavani Lava Faneriwaka Hi Vutomi Lebyi Nga Heriki

“Hinkwavo lava [faneriwaka hi] vutomi lebyi nga heriki, va pfumela.”—MINTIRHO 13:48.

1. Mayelana ni mbilu ya munhu, i vuswikoti byihi lebyi Yehova a nga na byona?

YEHOVA XIKWEMBU wa yi tiva mbilu. Leswi swi vekiwe erivaleni loko muprofeta Samuwele a ye ku ya tota n’wana wa Yese tanihi hosi ya Israyele. Loko a vona Eliyabu, Samuwele “a ku: Kunene muhlawuriwa wa Yehova o le mahlweni ka yena. Kambe Yehova a ku ka Samuel: U nga languti ngohe ya yena, hambi ši ri šiyimo ša yena, hikuv̌a nḍi ṅwi tšukumetile; Yehova a nga languti le’ŝi langutiwaka hi vanhu, hikuva v̌anhu v̌a languta ngohe, kambe Yehova o languta mbilu.” Hi laha ku faneleke, Samuwele u kongomisiwe ku tota Davhida, loyi a tikombiseke ‘a amukeleka embilwini ya Xikwembu.’—1 Samuel 13:13, 14; 16:4-13.

2. I yini leswi mileke embilwini ya munhu yo fanekisela, xisweswo i yini leswi hi swi hlayaka hi leswi eMatsalweni?

² Munhu u kombisa langutelo ro karhi ra vulawuri. U na mboyamelo wo karhi lowu mileke embilwini ya yena yo fanekisela. (Matewu 12:34, 35; 15:18-20) Xisweswo, hi hlaya hi munhu loyi ‘mbilu ya yena yi voyameleke eku lweni.’ (Psalma 55:21) Hi hlamuseriwa leswaku ‘loyi a voyameleke eku holoveni u andzisa swidyoho swa yena.’ Naswona ha hlaya: “L’a nga ni v̌anakulobye la’vo tala o ta [wela ekhombyeni], kambe ku ni nakulobye l’a tlulaka makwav̌o.” (Swivuriso 18:24; 29:22) Lexi tsakisaka, vo tala va tikomba va lava ku fana ni Vamatiko van’wana eAntiyoka ya khale ePisidiya. Loko va twa hi ta lunghiselelo ra Yehova ra ku ponisiwa, “va tsaka, va dzunisa Rito ra [Yehova]; kutani hinkwavo lava [faneriwaka] hi vutomi lebyi nga heriki, va pfumela.”—Mintirho 13:44-48.

Vapfumeri Va Ni “Timbilu Leti Tengeke”

3, 4. (a) I vamani lava tengeke embilwini? (b) Lava va tengeke embilwini va xi vona njhani Xikwembu?

³ Vapfumeri volavo eAntiyoka va ve Vakriste lava khuvuriweke, naswona lava tshembekaka exikarhi ka vona a va ta swi kota ku tirhisa marito ya Yesu eka vona: “Ku katekile lava nga ni timbilu leti tengeke, hikuva va ta vona Xikwembu.” (Matewu 5:8) Kambe i vamani lava nga ni “timbilu leti tengeke”? Naswona va “vona Xikwembu” hi ndlela yihi?

⁴ Lava nga ni timbilu leti tengeke va basile endzeni. Swa vona i ku tenga ka ku tlangela, rirhandzu, ku navela ni minsusumeto. (1 Timotiya 1:5) Va vona Xikwembu sweswi hi leswi va xi xiyaka xi teka goza hikwalaho ka vahlayisi va vutshembeki. (Ringanisa Eksoda 33:20; Yobo 19:26; 42:5.) Rito ra Xigriki laha leri hlamuseriweke va ku “vona” nakambe ri vula “ku vona hi miehleketo, ku xiya, ku tiva.” Tanihi leswi Yesu a kombiseke vumunhu bya Xikwembu hi ku hetiseka, ku twisisa eka vumunhu byebyo ku tsakeriwa hi “lava nga ni timbilu leti tengeke,” lava kombisaka ripfumelo eka Kriste ni le gandzelweni ra yena ra ku rivalela xidyoho, va kuma ku rivaleriwa ka swidyoho swa vona naswona va kota ku nyikela vugandzeri lebyi amukelekaka eka Xikwembu. (Yohane 14:7-9; Vaefesa 1:7) Eka vatotiwa, ku vona Xikwembu ku fikelela nhlohlorhi ya kona loko va pfuxeriwa etilweni, laha entiyisweni va vonaka Xikwembu na Kriste. (2 Vakorinto 1:21, 22; 1 Yohane 3:2) Kambe ku languta Xikwembu hi vutivi lebyi kongomeke ni vugandzeri bya ntiyiso swa koteka eka hinkwavo lava tengeke embilwini. (Psalma 24:3, 4; 1 Yohane 3:6; 3 Yohane 11) Va faneriwa hi vutomi lebyi nga heriki etilweni kumbe emisaveni ya paradeyisi.—Luka 23:43, NW; 1 Vakorinto 15:50-57; 1 Petro 1:3-5.

5. Munhu a nga va mupfumeri ni mulandzeri wa Yesu Kriste hi ndlela yihi ntsena?

⁵ Lava va nga faneriwiki hi vutomi lebyi nga heriki a va nge vi vapfumeri. A swi koteki leswaku vona va kombisa ripfumelo. (2 Vatesalonika 3:2) Ku tlula kwalaho, a nga kona loyi a nga ta va mulandzeri wa ntiyiso wa Yesu Kriste handle ka loko a ri loyi a dyondzisekaka ivi Yehova, loyi a vonaka leswi mbilu yi nga swona, a koka munhu yoloye. (Yohane 6:41-47) Kavula, eku chumayeleni hi yindlu na yindlu, Timbhoni ta Yehova a ti avanyisi un’wana ni un’wana. A ti swi koti ku tiva mbilu kambe ti siyela mimbuyelo emavokweni ya Xikwembu ya rirhandzu.

6. (a) I yini leswi vuriweke ehenhleni ka ku hlangana ka munhu hi xiyexe evutirhelini bya yindlu na yindlu? (b) I malunghiselelo wahi lama endliweke ku pfuna Timbhoni ta Yehova leswaku ti kuma lava faneriwaka hi vutomi lebyi nga heriki?

⁶ Mudyondzi un’wana u vule hi laha ku faneleke a ku: “[Pawulo] u dyondzise ntiyiso erivaleni na hi yindlu na yindlu. Hayi eplatifomo ntsena, kambe ni loko a hlangana ni vanhu hi xiyexe u dyondzise hi Kriste. Hakanyingi ku hlangana ka munhu hi xiyexe ku humelela ngopfu ku tlula muxaka wihi na wihi kumbe ndlela yin’wana eku fikeleleni ka mimoya-xiviri.” (August Van Ryn) Tibuku to tanihi Theocratic Ministry School Guidebook, Reasoning From the Scriptures ni Vutirheli Bya Hina Bya Mfumo ti pfuna Timbhoni ta Yehova ku nyikela tinkulumo ni ku tirhisa ku hlangana ka munhu hi xiyexe hi laha ku humelelaka entirhweni wa nsimu. Nakambe, leswi pfunaka i swikombiso swa Nhlangano wa Ntirho ni ndzayo ya Xikolo xa Vutirheli bya le Tilweni. Lava va vaka kona exikolweni va kuma ndzetelo wa nkoka eka timfanelo ta ku vulavula to tanihi swingheniso leswinene, ku tirhisa loku faneleke ka Matsalwa, ku hluvukisa vuswikoti byo ehleketa, mhaka leyi khorwisaka, ku tirhisa swifaniso ni makumu lama humelelaka. A hi voneni ndlela leyi Bibele yi engetelaka ndzayo leyi ha yona leyi yi nga endlaka vanhu va Xikwembu va humelela swinene loko va lava lava faneriwaka hi vutomi lebyi nga heriki.

Swingheniso Leswi Pfuxaka Mianakanyo

7. Marito yo sungula ya Dyondzo ya Yesu eNtshaveni ma dyondzisa yini hi swingheniso?

⁷ Eka xikombiso xa Yesu, lava lunghiselelaka ku veka vumbhoni hi yindlu na yindlu va nga dyondza swin’wana hi swingheniso leswi pfuxaka ku tsakela. Loko a sungula Dyondzo ya yena ya le Ntshaveni, u tirhise rito “katekile” minkarhi ya kaye. Hi xikombiso, u te: “Ku katekile swisiwana emoyeni, hikuva Mfumo wa matilo i wa swona. . . . Ku katekile lavo rhula, hikuva va ta dya ndzhaka ya misava.” (Matewu 5:3-12) Swiga a swi kongomile ni ku va erivaleni. Naswona xingheniso xexo hakunene xi pfuxe ku tsakela ivi a kuma vayingiseri va yena va katsekile, hikuva i mani loyi a nga swi laviki ku kateka?

8. Evutirhelini bya yindlu na yindlu, mhaka yo vulavurisana yi fanele ku sunguriwa hi ndlela yihi?

⁸ Mhaka yin’wana ni yin’wana yo vulavurisana leyi tirhisiwaka evutirhelini bya yindlu na yindlu yi fanele ku sunguriwa hi ndlela leyinene, leyi tsakisaka. Kambe a nga kona loyi a faneleke ku tirhisa xingheniso lexi tsemaka nhlana ku fana ni ku, “Ndzi ku khomele rungula leri humaka empfhukeni.” Mahungu lamanene ma na xona xihlovo xa le tilweni, kambe xingheniso xo tano xi nga ha endla n’wini wa muti a tivutisa loko Mbhoni yi fanele ku tekeriwa enhlokweni kumbe yi hlongoriwa hi xihatla hi laha swi nga kotekaka ha kona.

Ku Tamela Rito Ra Xikwembu Hi Ndlela Leyinene

9. (a) Matsalwa ma fanele ku tivisiwa, ma hlayiwa ni ku tirhisiwa njhani evutirhelini? (b) I xikombiso xihi lexi tshahiweke ku kombisa ndlela leyi Yesu a tirhiseke swivutiso ha yona?

⁹ Evutirhelini bya nsimu, ku fana ni le platifomo, matsalwa ma fanele ku tivisiwa hi laha ku faneleke, ma hlayiwa hi ku tshikilela loku faneleke ni ku tirhisiwa hi ndlela leyi twalaka, leyi kongomeke. Swivutiso leswi endlaka n’wini wa muti a ehleketa hi tinhla ta Matsalwa na swona swi nga pfuna. Nakambe, tindlela ta Yesu ta dyondzisa. Eka khamba rin’wana, wanuna loyi a nga ni vutivi eNawini wa Muxe u n’wi vutisile: “Mudyondzisi, ndzi ta endla yini ku kuma vutomi lebyi nga heriki?” Loko a hlamula, Yesu u vutisile: “Ku tsariwile yini eNawini? U hlaya yini kona?” Handle ko kanakana, Yesu a a swi tiva leswaku lexi a ku ri xivutiso lexi munhu loyi a nga xi hlamulaka. U hlamule kahle, a ku: “‘Rhandza [Yehova] Xikwembu xa wena hi mbilu ya wena hinkwayo, ni moya wa wena hinkwawo, ni matimba ya wena hinkwawo, ni ku anakanya ka wena hinkwako,’ Naswona: ‘Rhandza munhu-kuloni kukota loko u tirhandza.’” Leswi swi vangele Yesu ku nyikela xibumabumelo naswona bulo leri engetelekeke ri ve kona.—Luka 10:25-37.

10. Malunghana ni mhaka yo vulavurisana, va fanele ku tsundzuka yini, naswona i yini lexi faneleke ku papalatiwa loko u vutisa vini va miti swivutiso?

¹⁰ Lava vekaka vumbhoni hi yindlu na yindlu va fanele ku kandziyisa xihloko xa mhaka yo vulavurisana ni ku veka erivaleni xivangelo xa ku hlaya tindzimana ta Bibele leti engetelaka mhaka yoleyo. Tanihi leswi Mbhoni yi ringetaka ku fikelela mbilu ya n’wini wa muti, yi fanele ku papalata ku vutisa swivutiso leswi karhataka. Loko hi tirhisa Rito ra Xikwembu, ‘ku vulavula ka hina a ku ve lokunene nkarhi hinkwawo, ku lungiwe hi munyu.’—Vakolosa 4:6.

11. Eku tirhiseni ka Matsalwa ku ololoxa malangutelo lama hoxeke, i xikombiso xihi lexi hi nga na xona xa Yesu loko a ringiwa hi Sathana?

¹¹ Ngopfu-ngopfu eka maendzo yo vuyela ku nga ha va ni xilaveko xo ololoxa malangutelo lama hoxeke hi ku kombisa leswi kahle-kahle Matsalwa ma swi vulaka kumbe leswi ma swi hlamuselaka. Yesu u endle swin’wana leswi fanaka loko a kaneta Sathana, loyi a nga te: “Loko u ri N’wana wa Xikwembu, jitama [ku suka exihlungwaneni xa tempele, ku fana ni ku tisunga], hikuva ku tsariwile leswi: ‘Xikwembu xi ta lerisa tintsumi ta xona hikwalaho ka wena, kutani ti ta ku qhavulela emavokweni ya tona, leswaku nenge wa wena wu nga tshuki wu vavisiwa hi ribye.’” Psalma 91:11, 12, leyi tshahiweke hi Sathana, a yi yimeleli ku nghenisa vutomi ekhombyeni, nyiko leyi humaka eka Xikwembu. Hi ku xiya leswaku a swi hoxile ku ringa Yehova hi ku tlanga hi vutomi bya yena, Yesu u byele Sathana: “Nakambe ku tsariwile leswi: ‘U nga tshuki u ringa [Yehova] Xikwembu xa wena.’” (Matewu 4:5-7) Kavula, Sathana a hi mulavi wa ntiyiso. Kambe loko vanhu lava ehleketaka va kombisa malangutelo lama hoxeke lama nga ta sivela nhluvuko wa vona wa moya, mutirheli wa Rito ra Xikwembu hi vutlhari u fanele a kombisa leswi hakunene Matsalwa ma swi vulaka ni ku swi hlamusela. Lexi i xiphemu xo ‘tamela rito ra ntiyiso hi ndlela leyinene’—yin’wana ya tidyondzo ta nkoka leti dyondzisiwaka eXikolweni xa Vutirheli bya le Tilweni.—2 Timotiya 2:15.

Nsusumeto Wu Ni Xiphemu Xa Wona

12, 13. Ha yini swi lulamile ku tirhisa nsusumeto evutirhelini?

¹² Nsusumeto wu ni xiphemu lexi faneleke evutirhelini bya Vukriste. Hi xikombiso, Pawulo u khongotele mutirhi-kulobye Timotiya ku ya emahlweni eka swilo leswi a swi dyondzeke ni leswi a ‘susumeteriwe ku swi pfumela.’ (2 Timotiya 3:14) Le Korinto, Pawulo ‘a a nyikela nkulumo esinagogeni hi siku rin’wana ni rin’wana ra Savata naswona a a susumetela Vayuda ni Vagriki.’ (Mintirho 18:1-4) Le Efesa, u ‘nyikele tinkulumo hi laha ku humelelaka ivi a tirhisa nsusumeto malunghana ni mfumo wa Xikwembu.’ (Mintirho 19:8) Naswona loko a ri endlwini ya khotso eRhoma, muapostola u vitane vanhu va ya eka yena kutani a va nyika vumbhoni, ‘a tirhisa nsusumeto,’ kutani van’wana va va vapfumeri.—Mintirho 28:23, 24.

¹³ Ku nga khathariseki ndlela leyi Mbhoni yi nga ringetaka ku va ni nsusumeto ha yona, kavula, hi lava faneriwaka hi vutomi lebyi nga heriki ntsena lava nga ta va vapfumeri. Timhaka leti khorwisaka ni tinhlamuselo leti nga erivaleni, leti nyikeriweke hi vukheta ti nga va susumetela ku pfumela. Kambe i yini xin’wana lexi nga ha pfunaka eku va susumeteleni?

Vana La Longoloxaka Ni Ku Khorwisa

14. (a) Ku vumba loku landzelelanaka, loku twisisekaka ku katsa yini? (b) Mhaka leyi khorwisaka yi lava yini?

¹⁴ Yin’wana ya timfanelo ta nkulumo leti tshikileriwaka eXikolweni xa Vutirheli bya le Tilweni i ku vumba loku landzelelanaka, loku twisisekaka. Leswi swi katsa ku nghenisa miehleketo hinkwayo ya nkoka ni mhaka leyi yelanaka na yona eka nongonoko lowu twalaka. Naswona lexi nga xa nkoka i mhaka leyi khorwisaka, leyi lavaka ku veka xisekelo lexinene ni ku nyikela xikombiso lexi twalaka. Leswi yelanaka ni leswi i ku pfuna vayingiseri ku anakanya hi ku hlayisa xisekelo xa ntolovelo, u vumba tinhla hi laha ku twalaka ni ku ti tirhisa hi laha ku humelelaka. Nakambe, Matsalwa ma nyika switsundzuxo.

15. (a) Xana loko Pawulo a vulavula eXitsungeni xa Mars u kokele nyingiso ivi a simeka xisekelo lexinene hi ndlela yihi? (b) Eka nkulumo ya Pawulo, i vumbhoni byihi lebyi hi byi kumaka bya ku vumba loku landzelelanaka, loku twisisekaka?

¹⁵ Timfanelo leti ta nkulumo ti le rivaleni eka nkulumo leyi tivekaka ya Pawulo eka Xitsunga xa Mars eAtena ya khale. (Mintirho 17:22-31) Xingheniso xa yena xi koke nyingiso naswona xi simeke xisekelo lexi tolovelekeke, hikuva u te: “Vavanuna va Atena, ndza swi vona leswaku, eka swilo hinkwaswo, mi vanhu va vukhongeri lebyikulu ngopfu.” Eka vona, handle ko kanakana leswi swi tikombe swi ri xihetisisi. Endzhaku ka loko a boxe altari leyi nyikeriweke “Eka Xikwembu lexi nga tiviwiki!” Pawulo u ye mahlweni ni ku vumba ka yena loku landzelelanaka, loku twisisekaka ni mhaka leyi khorwisaka. U boxe leswaku Xikwembu lexi a va nga xi tivi xi ‘endle misava ni hinkwaswo leswi nga ka yona.’ A xi fani na Atena kumbe swikwembu swin’wana swa Magriki, ‘a xi tshami etitempeleni leti endliweke hi mavoko ya vanhu, hambi ku ri ku tirheriwa hi mavoko ya vanhu.’ Endzhaku muapostola u kombise leswaku Xikwembu lexi xi hi nyike vutomi naswona a xi endli leswaku hi xi ambamba hi nga voni. Kutani Pawulo u anakanye leswaku Muvumbi wa hina, loyi a nga honisa minkarhi ya ku honisa swifaniso, ‘u byela vanhu hinkwako leswaku va hundzuka.’ Leswi hi ku landzelelana swi yise eka yinhla ya leswaku ‘Xikwembu xi avanyisa vaaki va misava hi ku lulama hi wanuna loyi a hlawuriweke loyi xi n’wi pfuxeke evafini.’ Tanihi leswi Pawulo a a ‘twarisa mahungu lamanene hi Yesu ni ta ku pfuka ka vafi,’ Vaatena volavo va swi tivile leswaku muavanyisi yoloye a a ta va Yesu Kriste.—Mintirho 17:18.

16. Vutirheli bya un’wana byi nga khumbiwa njhani hi nkulumo ya Pawulo eXitsungeni xa Mars na hi ndzetelo eXikolweni xa Vutirheli bya le Tilweni?

¹⁶ I ntiyiso, Pawulo a a nga veki vumbhoni hi yindlu na yindlu eXitsungeni xa Mars. Kambe eka nkulumo ya yena ni ndzetelo lowu nyikeriwaka eXikolweni Xa Vutirheli bya le Tilweni, Timbhoni ta Yehova ti nga dyondza swo tala leswi swi nga tlakusaka vutirheli bya tona bya nsimu. Ina, hinkwaswo leswi swi va pfuna leswaku va va vatirheli lava humelelaka swinene, tanihi leswi ku vumba loku landzelelanaka ni ku vulavula ka Pawulo loku khorwisaka ku susumeteleke van’wana va Vaatena volavo leswaku va va vapfumeri.—Mintirho 17:32-34.

Tirhisa Swikombiso Leswi Dyondzisaka

17. I muxaka wihi wa swikombiso lowu faneleke ku tirhisiwa evutirhelini?

¹⁷ Xikolo xa Vutirheli bya le Tilweni nakambe xi pfuna vatirheli va Xikwembu ku tirhisa swikombiso leswinene loko va veka vumbhoni hi yindlu na yindlu ni tindlela tin’wana ta vutirheli bya vona. Leswaku ku tshikileriwa tinhla ta nkoka, swikombiso swo olova leswi swi nga swinene swi fanele ku tirhisiwa. Mbhoni yi fanele ku swi tshaha eka swiyimo leswi tolovelekeke ivi yi xiya ku swi tirhisa kahle. Swikombiso swa Yesu swi fikelele swilaveko leswi hinkwaswo.

18. Matewu 13:45, 46 yi nga ha tikomba yi tirha vutirhelini hi ndlela yihi?

¹⁸ Hi xikombiso, xiya marito ya Yesu: “Mfumo wa matilo wu fana ni muxavi la lavaka tidayimani letinene; kutani loko a kumile dayimani yin’wana ya nxavo lowukulu, a ya xavisa swilo swa yena hinkwaswo, a tixavela yona.” (Matewu 13:45, 46) Tidayimani i maribye ya risima lama kumekaka endzeni ka swiphambati swa tihumba ni tinxaka tin’wana ta tona. Kambe i tidayimani tin’wana leti nga ‘tinene.’ Muxavisi u ve ni ku twisisa loku lavekaka leswaku a tlangela nkoka lowukulu wa dayimani leyi yin’we naswona a a tiyimisele ku hambana ni letin’wana hinkwato leswaku a kuma yona. Kumbexana eka riendzo ro vuyela kumbe dyondzo ya le kaya ya Bibele, xikombiso lexi xi nga tirhisiwa ku kombisa leswaku munhu loyi hakunene a tlangelaka Mfumo wa Xikwembu u ta endla ku fana ni muxavisi yoloye. Munhu wo tano u ta rhangisa Mfumo evuton’wini, a xiya leswaku wu tlula gandzelo rihi na rihi.

Hetelela Hi Xikhutazo

19. Evutirhelini bya yindlu na yindlu, mahetelelo ma fanele ma kombisa yini eka n’wini wa muti?

¹⁹ Exikolweni xa Vutirheli bya le Tilweni, vanhu va Xikwembu nakambe va dyondza leswaku makumu ya nkulumo kumbe bulo ma fanele ma va ni ku fambisana loku kongomeke ni xihloko naswona ma fanele ma komba vayingiseri leswi va nga swi endlaka ivi ma va khutaza ku swi endla. Evutirhelini bya yindlu na yindlu, n’wini wa muti u fanele ku kombisiwa kahle ndlela leyi a languteriweke ku yi teka, ku fana ni ku amukela buku ya Bibele kumbe ku pfumelela riendzo ro vuyela.

20. I xikombiso xihi lexinene xa mahetelelo lama khutazaka lexi hi xi kumaka eka Matewu 7:24-27?

²⁰ Mahetelelo ya Dyondzo ya Yesu eNtshaveni ma nyikela xikombiso lexinene. Hi ku tirhisa xikombiso lexi twisisekaka hi ku olova, Yesu u kombise leswaku a ku ta va ndlela ya vutlhari ku yingisela marito ya yena. U hetelerile hi leswaku: “Hikwalaho ke un’wana ni un’wana la yingisaka marito ya mina lawa, a va a famba ha wona, ú ta fana ni wanuna lowo tlhariha la akeke yindlu ya yena eribyeni. Kutani mpfula yi na, maboboma ma ta, timheho ti hunga, swi ba yindlu yoleyo; kambe a yi wanga, hikuva masungulo ya yona a ma ri eribyeni. Un’wana ni un’wana la yingisaka marito ya mina lawa, kutani a nga fambi ha wona, ú ta fana ni wanuna wa xiphukuphuku, la akeke yindlu ya yena esaveni. Mpfula yi na, maboboma ma ta, timheho ti hunga, swi ba yindlu yoleyo, kutani yi wa, ku wa ka yona ku va lokukulu.” (Matewu 7:24-27) Mawaku ndlela leyi leswi swi kombisaka kahle ha yona leswaku vatirheli va Xikwembu va fanele va ringeta ku susumetela vini va miti!

21. Bulo ra hina ri kombise yini, kambe i yini leswi faneleke ku xiyiwa?

²¹ Tinhla leti hundzeke ti kombisa ndlela leyi Xikolo xa Vutirheli bya le Tilweni xi nga pfunaka vo tala ha yona leswaku va va vahuweleri va Mfumo lava fanelekaka. Kavula, ku va la fanelekaka kahle swi ni vuyelo lebyikulu eka Xikwembu. (2 Vakorinto 3:4-6) Ku nga khathariseki ndlela leyi mutirheli a nga ha vaka a faneleka ha yona, a nga kona loyi a nga susumetelaka vanhu leswaku va va vapfumeri handle ka loko va kokiwa hi Xikwembu hi ku tirhisa Kriste. (Yohane 14:6) Hambi swi ri tano, vanhu va Xikwembu hakunene va fanele ku tirhisa malunghiselelo hinkwawo ya moya hi laha ku humelelaka lama endliweke hi Yehova tanihi leswi va lavaka lava va faneriwaka hi vutomi lebyi nga heriki.

Hi Tihi Tinhlamulo Ta Wena?

◻ I vamani ‘lava tengeke embilwini,’ naswona va xi ‘vona njhani Xikwembu’?

◻ I tinhla tihi leti faneleke ku langutiwa loko ku tivisiwa rungula ra Mfumo entirhweni wa yindlu na yindlu?

◻ Rito ra Xikwembu ri nga tameriwa hi ndlela leyinene evutirhelini hi ndlela yihi?

◻ I yini lexi nga ta pfuna ku endla marungula lama landzelelanaka, lama khorwisaka entirhweni wa nsimu?

◻ I yini leswi faneleke ku tsundzukiwa hi swikombiso leswi tirhisiwaka evutirhelini?

◻ I yini leswi faneleke ku hetisisiwa hi mahetelelo lama tirhisiwaka entirhweni wo veka vumbhoni?

[Xifaniso lexi nga eka tluka 16]

Yesu u te ‘lava tengeke embilwini’ va ta “vona Xikwembu.” Leswi a swi vula yini?

[Xifaniso lexi nga eka tluka 18]

Matsalwa ma fanele ku tivisiwa hi laha ku faneleke, ma hlayiwa hi ku kandziyisa loku faneleke naswona ma tirhisiwa hi mukhuva lowu nga erivaleni, lowu kongomeke