Swingheniso Swa Ku Swi Tirhisa eVutirhelini Bya Nsimu

Tinhlamuselo: Leswaku u kuma xingheniso lexi u nga xi tirhisaka loko u ri evutirhelini bya nsimu, ku ni swilo swinharhu leswi u faneleke u swi kambisisa hi vukheta: (1) Rungula leri hi rhumiweke ku ri haxa i “mahungu lawa lamanene ya mfumo.” (Mt. 24:14, NW) Hambi loko hi nga vulavuli ha wona hi ku kongoma, hi fanele hi tsundzuka ku pfuna vanhu leswaku va vona xilaveko xa wona, kumbexana hi susa swihinga leswi va sivelaka ku ma xiya. (2) Ku khathalela ngopfu vuhlayiseki bya vanhu lava hi hlanganaka na vona swi ta hi pfuna, ku fana na Yesu, leswaku hi fikelela timbilu. (Mar. 6:34) Ku tsakela ko tano ka ntiyiso ku nga kombisiwa hi ku n’wayitela lokunene ni ku va ni xinghana, ku tsakela ku yingisela loko va vulavula ivi hi vula marito ya hina hi laha ku faneleke, swin’we ni ku tirhisa swivutiso leswi va khutazaka ku tiphofula leswaku hi kota ku twisisa langutelo ra vona kahle. Vakorinto vo Sungula 9:19-23 yi kombisa leswaku muapostola Pawulo u hundzule rungula ra yena ra mahungu lamanene ri fanelana ni swiyimo swa vanhu lava a a vulavula na vona. (3) Eswiphen’wini swin’wana swa misava, vaendzi va languteriwa ku landzela milawu yo karhi, va nga si boxa xivangelo xa riendzo ra vona. Eka tindhawu tin’wana n’wini wa muti a nga langutela leswaku muendzi la nga rindzeriwangiki a hatla a nghena emhakeni.—Ringanisa Luka 10:5.

Swingheniso leswi landzelaka swi kombisa ndlela leyi Timbhoni tin’wana leti nga ni ntokoto ti sungulaka mabulo ha yona. Loko swingheniso leswi u swi tirhisaka sweswi swi nga yi pfuli kahle ndlela ya bulo, ringeta swin’wana swa swiringanyeto leswi. Loko u endla sweswo, a swi kanakanisi leswaku u ta lava ku swi vula hi marito ya wena. Nakambe, u ta pfuneka loko wo kuma swiringanyeto swa Timbhoni tin’wana evandlheni ra ka n’wina, leti humelelaka loko ti vulavula ni vanhu.

ARMAGEDONI

● ‘Vanhu vo tala va vilerisiwa hi Armagedoni. Va twe varhangeri va misava va tirhisa rito rero va vula nyimpi leyikulu ya nyutliya. Xana u vona onge Armagedoni yi ta vula yini evanhwini? . . . Kahle-kahle, vito leri nge Armagedoni ri huma eBibeleni, naswona ri vula leswi hambaneke ekule ni leswi hakanyingi ri tirhisiwaka eka swona. (Nhlav. 16:14, 16) Bibele yi tlhela yi kombisa leswaku ku ni swilo leswi hi nga swi endlaka leswaku hi pona. (Sof. 2:2, 3)’ (Nakambe vona matluka 29-33, ehansi ka xihloko-nkulu lexi nge “Armagedoni.”)

BIBELE/XIKWEMBU

● ‘Xewani. Ndzi ku endzele swa nkarhinyana ndzi ta ku rungulela mhaka ya nkoka. Ndzi kombela u twa leswaku yi ri yini laha Bibeleni. (Hlaya tsalwa, ro tanihi Nhlavutelo 21:3, 4.) Xana u ri yini ha swona? Xana wa swi tsakela sweswo?’

● ‘Hi vulavurisana ni vaakelani va hina leswaku xana mpfuno lowunene wa ku langutana ni swiphiqo swa vutomi hi nga wu kuma kwihi. Enkarhini lowu hundzeke, vanhu vo tala a va tirhisa Bibele. Kambe hi hanya enkarhini lowu langutelo ra vanhu ri hundzukaka. Xana u titwisa ku yini ha swona? Xana wa pfumela leswaku Bibele i Rito ra Xikwembu kumbe u vona onge yo va ntsena buku leyinene leyi tsariweke hi vanhu? . . . Loko yi huma eka Xikwembu, xana u vona onge munhu a nga tiyiseka njhani hi sweswo?’ (Vona matluka 39-48, ehansi ka xihloko-nkulu lexi nge “Bibele.”)

● ‘Ndza tsaka ku ku kuma u ri ekaya. Ndzi rungulela vaakelani va mina mhaka leyi khutazaka leyi humaka eBibeleni (kumbe, eMatsalweni yo Kwetsima). Xana u tshame u tivutisa leswaku: . . . ? (Vutisa xivutiso lexi ku yisaka eka nhloko-mhaka ya wena ya bulo.)’

● ‘Hi khutaza vanhu leswaku va hlaya Tibibele ta vona. Tinhlamulo leti yi ti nyikelaka eka swivutiso swa nkoka hakanyingi ti hlamarisa vanhu. Hi xikombiso: . . . (Ps. 104:5; kumbe Dan. 2:44; kumbe matsalwa man’wana).’

● ‘Namuntlha hi endzela vaakelani va hina swa nkarhinyana. Vanhu van’wana lava hi vulavulaka na vona va pfumela eka Xikwembu. Van’wana swa va nonon’hwela ku pfumela eka xona. Wena u titwisa ku yini? . . . Bibele yi hi khutaza leswaku hi langutisisa nkoka wa vuako lebyi hi nga eka byona. (Ps. 19:1) Yena Loyi milawu ya yena yi lawulaka swivumbiwa swa le tilweni u hi nyike ni nkongomiso wa ntikelo swinene. (Ps. 19:7-9)’ (Nakambe vona matluka 409-15, 212-16, ehansi ka swihloko-nkulu leswi nge “Xikwembu” na “Ntumbuluko.”)

DYONDZO YA LE KAYA YA BIBELE

● ‘Ndzi endzela ku ta kombela ku ku fambisela dyondzo ya le kaya ya Bibele ya mahala. Loko swi koteka, ndzi nga tsakela ku tirhisa timinete ti nga ri tingani ndzi ku komba ndlela leyi vanhu va le matikweni ya kwalomu ka 200 va bulaka ha yona hi Bibele tanihi mindyangu. Hi nga tirhisa yihi na yihi ya tinhloko-mhaka leti tanihi xisekelo xa bulo. (N’wi kombe tluka ra leswi nga endzeni, eka buku leyi mi nga ta dyondza ha yona.) Hi yihi leyi u yi tsakelaka ngopfu?’

● ‘Hi famba hi komba vaakelani va hina xipfuneto lexi xa dyondzo ya Bibele. (Xi humese.) Xana u tshama u xi vona? . . . Loko u ri ni nkarhinyana, ndzi tsakela ku ku kombisa ndlela leyi u nga xi tirhisaka ha yona kun’we ni Bibele ya wena.’

MASIKU YA MAKUMU

● ‘Hi ku endzerile ku ta bula na wena hi nhlamuselo ya leswi humelelaka emisaveni namuntlha. Vanhu vo tala a va ha ri na mhaka ni Xikwembu kun’we ni mimpimanyeto ya xona ya vutomi leyi tsariweke eBibeleni. Leswi swi yi khumbile swinene ndlela leyi vanhu va langutanaka ha yona. Ndzi kombela ku ku hlayela nhlamuselo leyi tsariweke laha eka 2 Timotiya 3:1-5 ivi u ndzi byela loko u vona onge yi fambisana ni misava namuntlha. (Hlaya) . . . Xana xi kona xivangelo lexi twalaka xa ku langutela ku va ni swiyimo swo antswa enkarhini lowu taka? (2 Pet. 3:13)’

● ‘Vanhu vo tala va anakanya leswaku misava leyi yi heleriwa hi nkarhi. Va vula leswaku nkarhi wa hina i ‘masiku ya makumu.’ Kambe xana u swi lemukile leswaku Bibele yi hi komba ndlela leyi hi nga ponaka ha yona emakun’wini ya misava leyi kutani hi hanya emisaveni leyi nga ta endliwa paradeyisi? (Sof. 2:2, 3)’ (Nakambe vona matluka 123-32, ehansi ka xihloko-nkulu lexi nge “Masiku Ya Makumu.”)

Nakambe vona xihlokwana lexi nge “Swiendlakalo Swa Sweswinyana” eka nxaxamelo lowu wa swingheniso leswi ringanyetiweke.

MFUMO

● ‘Loko ndzi vulavula ni vaakelani vanga, ndzi xiye leswaku vunyingi bya vona va navela ku hanya ehansi ka hulumendhe leyi hakunene yi nga kotaka ku tlhantlha swiphiqo leswikulu leswi hi langutaneke na swona namuntlha—vugevenga ni ku durha ka swilo (kumbe yini na yini lexi nga emianakanyweni ya vanhu vo tala). Sweswo swi nga tsakisa, a swi tano ke? . . . Xana yi kona hulumendhe yo tano namuntlha? . . . Entiyisweni vanhu vo tala va yi khongelerile hulumendhe leyi nga endlaka swilo leswi. Handle ko kanakana na wena u yi khongelerile, kambe a hi vangani lava anakanyaka leswaku i hulumendhe ya xiviri. (Dan. 2:44; Ps. 67:6, 7; Mik. 4:4)’ (Nakambe vona matluka 137-45 na 52-6, ehansi ka swihloko-nkulu leswi nge “Mfumo” na “Hulumendhe.”)

● ‘Hi vutisa vaakelani va hina xivutiso. Hi nga tsakela ku twa nhlamulo ya wena eka xona. Ina, Yesu u hi dyondzise ku khongelela Mfumo wa Xikwembu leswaku wu ta, ni leswaku ku rhandza ka xona ku endliwa emisaveni ku kotisa etilweni. Xana u ehleketa leswaku xikhongelo lexi xi ta kala xi hlamuriwa kutani ku rhandza ka Xikwembu ku endliwa hakunene laha misaveni? . . . (Esa. 55:10, 11; Nhlav. 21:3-5)’

● ‘Ndzi bula ni vaakelani va mina hi mhaka leyi hinkwerhu hi faneleke hi langutana na yona: Xana hi lava hulumendhe ya Xikwembu, kumbe hi hlawula vulawuri bya munhu? Loko hi languta swiyimo leswi nga kona emisaveni namuntlha, xana u vona onge hi lava swin’wana swo tlula leswi vanhu va swi endleke? . . . (Mt. 6:9, 10; Ps. 146:3-5)’

NDYANGU/VANA

● ‘Hi vulavurisana ni vanhu lava tsakelaka ku tiva ndlela leyi hi nga langutanaka ku antswa ha yona ni swiphiqo swa vutomi bya ndyangu. Hinkwerhu hi ringeta ku endla leswi hi nga swi kotaka, kambe loko ku ri ni xilo lexi xi nga hi pfunaka hi humelela kahle, ha xi tsakela, a swi tano ke? . . . (Kol. 3:12, 18-21) Bibele yi hi nyika ntshembo lowu nyikaka vumundzuku bya ntiyiso eka mindyangu ya hina. (Nhlav. 21:3, 4)’

● ‘Hinkwerhu hi lava leswaku vana va hina va va ni vutomi lebyi tsakeke. Xana u vona onge ku ni xivangelo lexi twalaka xa ku langutela vuyelo lebyi tsakisaka eka maxangu lawa misava yi nga eka wona namuntlha? . . . Kutani, xana u ehleketa leswaku vana va hina va ta langutana ni misava ya njhani loko va kula? . . . Bibele yi komba leswaku Xikwembu xi ta endla misava leyi yi va ndhawu yo saseka ya ku hanya eka yona. (Ps. 37:10, 11) Kambe leswaku vana va hina va nghena eka yona swi ta titshega ngopfu hi nhlawulo lowu hi wu endlaka. (Det. 30:19)’

NTIRHO/NDHAWU YO TSHAMA

● ‘A hi vulavula ni vaakelani va wena leswaku i yini lexi nga endliwaka leswaku un’wana ni un’wana a kuma ntirho ni ndhawu yo tshama. Xana u vona onge swa fanela ku langutela leswaku tihulumendhe ta vanhu ti endla leswi? . . . Kambe u kona un’wana loyi a tivaka ku tlhantlha swiphiqo leswi; yena i Muvumbi wa vanhu. (Esa. 65:21-23)’

● ‘Hi vulavula ni vaakelani va hina hi mhaka ya hulumendhe leyinene. Vanhu vo tala va tsakela ku kuma hulumendhe leyi nga riki na vubihi, leyi nyikaka un’wana ni un’wana ntirho ni ndhawu leyinene yo tshama ka yona. Xana u vona onge i hulumendhe ya muxaka muni leyi nga endlaka sweswo? . . . (Ps. 97:1, 2; Esa. 65:21-23)’ (Nakambe vona matluka 52-6, ehansi ka xihloko-nkulu lexi nge “Hulumendhe.”)

NYIMPI/KU RHULA

● ‘Vanhu vo tala swinene va vilerisiwa hi nxungeto wa nyimpi ya nyutliya. Xana u vona onge ku rhula ka ntiyiso ku ta kala ku va kona emisaveni leyi? . . . (Ps. 46:8, 9; Esa. 9:6, 7)’

● ‘Ndzi famba ndzi lava vanhu lava tsakelaka ku hanya emisaveni leyi nga riki na nyimpi. Eka lembe xidzana leri ntsena ku ve ni madzana ya tinyimpi, ku katsa ni tinyimpi timbirhi ta misava. Sweswi hi langutane ni nxungeto wa nyimpi ya nyutliya. Xana u vona onge i yini lexi lavekaka leswaku ku siveriwa nyimpi yoleyo? . . . I mani loyi a nga tisaka misava ya ku rhula? . . . (Mik. 4:2-4)’

● ‘Hi kuma leswaku vanhu hinkwavo va lava ku rhula ka misava. Varhangeri vo tala va misava va vula sweswo na vona. Kutani, ha yini swi nonon’hwa ku ku kuma? . . . (Nhlav. 12:7-12)’

RIRHANDZU/MUSA

● ‘Hi kume leswaku vanhu vo tala va karhatiwa ngopfu hi ku pfumaleka ka rirhandzu ra ntiyiso emisaveni. Xana na wena wa karhateka? . . . Ha yini u ehleketa leswaku vanhu vo tala va titwa hi ndlela yoleyo? . . . Xana wa swi tiva leswaku Bibele yi vhumbhe xiyimo lexi ka ha ri emahlweni? (2 Tim. 3:1-4) Yi tlhela yi hlamusela xivangelo xa kona. (1 Yoh. 4:8)’

● ‘Vito hi mina——. Ndzi un’wana wa vaakelani va wena. Ndzi endla riendzo ro koma ntsena ndzi vulavurisana ni vaakelani va mina hi xin’wana lexi xi ndzi karhataka ngopfu, naswona ndza tshemba leswaku na wena u xi lemukile. Musa a wu xaviwi, kambe wu tikomba wu kala ngopfu namuntlha. Xana u tshama u tivutisa leswaku ha yini xiyimo lexi xi ri kona? . . . (Mt. 24:12; 1 Yoh. 4:8)’

SWIENDLAKALO SWA SWESWINYANA

● ‘Ri perile. Vito hi mina——. Ndzi muakelani wa wena, ndzi tshama (vula xitarata kumbe ndhawu). Xana u ma vonile mahungu eka TV tolo ni madyambu? . . . Xiviko lexiya xa (boxa mhaka leyi humeleleke leyi vilerisaka vanhu)—u ri yini ha swona? . . . Swi tolovelekile ku twa vanhu va vutisa va ku, Xana misava leyi yi kongome kwihi? Hina tanihi Timbhoni ta Yehovha hi pfumela leswaku hi hanya enkarhini lowu Bibele yi wu vulaka ‘masiku ya makumu.’ Xiya nhlamuselo leyi yi anameke eka 2 Timotiya 3:1-5.’ (Nakambe vona matluka 123-32.)

● ‘Xana u swi hlayile leswi eka phepha-hungu vhiki leri? (Kombisa xiphephana lexi u xi tsemeke eka phepha-hungu.) Xana u ehleketa yini . . . ?’

● ‘Ndzi rhandza ku ku vutisa xivutiso. Loko a wo swi kota ku hlawula, eka swiphiqo swo tala leswi langutaneke ni misava, hi xihi lexi a wu ta lava leswaku ku tlhantlhiwa xona ku sungula? (Loko se u tiva nchumu lowu n’wini wa muti a karhatekaka ha wona ngopfu, wu tirhise tanihi xisekelo xa bulo ra wena.)’

VUBIHI/KU XANISEKA

● ‘Xana u tshama u tivutisa: Xana hakunene Xikwembu xi ni mhaka ni vubihi ni ku xaniseka loku karhataka vanhu? . . . (Ekl. 4:1; Ps. 72:12-14)’ (Nakambe vona swihloko-nkulu leswi nge “Ku Xaniseka” na “Xikhutazo.”)

VUDYUHARI/RIFU

● ‘Xana u tshama u tivutisa leswaku ha yini hi dyuhala ni ku fa? Timfutsu tin’wana ta le lwandle ti hanya madzana ya malembe. Mirhi yin’wana yi hanye magidi ya malembe. Kambe vanhu va hanya malembe ya 70 kumbe 80 ntsena ivi va fa. Xana u tshama u tivutisa leswaku swi vangiwa hi yini? . . . (Rhom. 5:12) Xana xiyimo xexo xi ta kala xi hundzuka? . . . (Nhlav. 21:3, 4)’

● ‘Xana u tshama u vutisa u ku: Xana rifu i makumu ya hinkwaswo? Kumbe xana ku na swin’wana endzhaku ka rifu? . . . Bibele yi hlamula xivutiso xihi na xihi lexi hi nga vaka na xona malunghana ni rifu. (Ekl. 9:5, 10) Yi tlhela yi kombisa leswaku ku ni ntshembo wa ntiyiso eka vanhu lava nga ni ripfumelo. (Yoh. 11:25)’ (Nakambe vona matluka 222-8 na 406, ehansi ka swihloko leswi nge “Rifu” na “Xikhutazo.”)

VUGEVENGA/VUHLAYISEKI

● ‘Xewani. Hi vulavula ni vanhu hi mhaka ya ku hlayiseka ka vanhu. Hi rhendzeriwe hi vugevenga byo tala naswona byi khumba vutomi bya hina. Xana u ehleketa leswaku wu ta fika nkarhi lowu vanhu vo fana na mina na wena va nga ta kota ku famba eswitarateni ni vusiku kambe va titwa va hlayisekile? (Kumbe, Xana u vona onge u kona la nga ni ntlhantlho wa ntiyiso wa xiphiqo lexi?) . . . (Swiv. 15:3; Ps. 37:10, 11)’

● ‘Vito hi mina——. Ndzi tshama eka muganga wolowu. Loko ndzi ri endleleni mixo lowu, ndzi xiye leswaku un’wana ni un’wana u vulavula hi (boxa vugevenga lebyi bya ha ku humelelaka endhawini yoleyo kumbe mhaka yin’wana leyi vilerisaka vanhu va ndhawu yoleyo). Xana u ri yini ha swona? . . . Xana u vona onge xi kona lexi nga pfunaka ku endla vutomi bya hina byi sirheleleka ku antswa? . . . (Swiv. 1:33; 3:5, 6)’

VUMUNDZUKU/NSIRHELELO

● ‘Avuxeni. Minjhani? . . . Hi tikarhatela ku avelana ni vaakelani va hina langutelo leri tiyeke mayelana ni vumundzuku. Xana hi yona ndlela leyi u ringetaka ku languta vutomi ha yona? . . . Xana swiyimo swin’wana swi endla leswaku swi ku nonon’hwela ku endla leswi? . . . Ndzi kume leswaku Bibele ya pfuna swinene emhakeni leyi. Yi kombisa swiyimo leswi nga kona namuntlha, kambe yi tlhela yi hlamusela leswi swi vulaka swona, yi vula ni vuyelo bya kona. (Lk. 21:10, 11, 31)’

● ‘Xewani. Vito hi mina——. Wena u mani? . . . Ndzi khutaza vantshwa vo kota wena leswaku va xiya vumundzuku byo tsakisa lebyi Bibele yi hi tshembisaka byona. (Hlaya tsalwa, ro tanihi Nhlavutelo 21:3, 4.) Xana wa swi tsakela sweswo?’

VUTOMI/NTSAKO

● ‘Hi endzela vaakelani va hina leswaku hi kuma vanhu lava karhatekaka swinene hi leswi vutomi byi vulaka swona. Vanhu vo tala va na wona ntsako wo karhi. Kambe ni swiphiqo swa vona swi tele. Loko hi ya hi kula hi malembe, hi xiya leswaku vutomi byi kome ngopfu. Xana hi swona leswi vutomi byi nga swona? Xana u titwisa ku yini ha swona? . . . (Hlamusela xikongomelo xo rhanga xa Xikwembu hi laha xi kombisiweke ha kona aEdeni; kutani u hlamusela Yohane 17:3 na Nhlavutelo 21:3, 4.)’ (Nakambe vona matluka 388-93, ehansi ka xihloko-nkulu lexi nge “Vutomi.”)

● ‘Namuntlha hi vutisa vaakelani va hina leswaku i yini lexi va xi anakanyaka loko va hlaya eTibibeleni ta vona, va kuma marito lama nge “vutomi lebyi nga heriki.” I swa nkoka hikuva marito wolawo ma humelela minkarhi ya kwalomu ka 40 eBibeleni. Vutomi byebyo byi nga ha vula yini eka hina? . . . Hi nga byi kumisa ku yini? (Yoh. 17:3; Nhlav. 21:4)’

● ‘Hi vulavula ni vanhu lava karhatekaka hakunene hi nkoka wa vutomi namuntlha. Vunyingi bya hina ha tsaka hi leswi hi hanyaka, kambe vo tala va tivutisa, Xana vutomi lebyi tsakisaka hi xiviri byi nga va kona? Xana u ri yini hi sweswo? . . . Xana u anakanya leswaku hi xihi xin’wana xa swihinga leswikulu swa ntsako namuntlha? . . . (Ps. 1:1, 2; hlamusela tindzimana tin’wana leti fanelaka swilo leswi vilerisaka n’wini wa muti)’

LOKO VANHU VO TALA VA KU: ‘NDZI NI VUKHONGERI BYA MINA’

● ‘Avuxeni. Hi endzela mindyangu hinkwayo ya muganga lowu wa n’wina (kumbe, ndhawu leyi), naswona hi kuma leswaku yo tala ya yona yi ni vukhongeri bya yona. Handle ko kanakana na wena u na byona. . . . Kambe, ku nga khathariseki vukhongeri bya hina, hi khumbiwa hi swiphiqo swo tala leswi fanaka—ku durha ka swilo, vugevenga, vuvabyi—a swi tano ke? . . . Xana u vona onge wu kona ntlhantlho wa ntiyiso wa swilo leswi? . . . (2 Pet. 3:13; ni man’wana)’

LOKO VANHU VO TALA VA KU: ‘NDZI KHOMEKILE’

● ‘Xewani. Hi endzela un’wana ni un’wana eka ndhawu leyi, hi khome rungula ra nkoka. Ndza swi vona leswaku u munhu la khomekeke, kutani ndzi ta komisa.’

● ‘Hi xewetile. Vito hi mina——. Xikongomelo xa ku ta ka mina i ku ta bula na n’wina hi mikateko ya Mfumo wa Xikwembu ni ndlela leyi hi nga yi kumaka ha yona. Kambe ndza swi vona leswaku mi khomeke ngopfu (kumbe, mi yime hi milenge). Xana ndzi nga mi chumbutela mhakanyana yitsongo?’

ENSIN’WINI LEYI TIRHIWAKA NKARHI NA NKARHI

● ‘Ndza tsaka ku ku kuma u ri ekaya. Hi endla maendzo ya hina ya vhiki na vhiki eka vaakelani va hina, naswona hi na swin’wana leswi hi nga mi avelaka swona malunghana ni swilo swo saseka leswi Mfumo wa Xikwembu wu nga ta swi endlela vanhu.’

● ‘Xewani. Ndzi tsakela ku tlhela ndzi mi vona. . . . Xana hinkwenu mi pfuke kahle laha kaya? . . . Ndzi tele ku ta mi byela mhaka leyi . . . ’

● ‘Avuxeni. Minjhani? . . . A ndzi lava ku tlhela ndzi kuma nkarhi wun’wana wo vulavula na n’wina. (Kutani u boxa mhaka leyi u lavaka ku bula ha yona.)’