Rifuwo Ra Hina, Vutirheli Bya Manguva Lawa Bya Ku Dzunisa
“Kambe hina hi nyikiweke ku rhwala xuma lexi, hi fana ni timbita ta vumba; swi komba leswaku matimba lamakulu lawa, lama tlulaka hinkwaswo, ma huma eka Xikwembu, a ma humi eka hina.”—2 VAKORINTO 4:7.
1. (a) Hi rihi rifuwo leri vangamaka leri hi nga ha vaka na rona naswona ha yini? (b) Xana Bibele yi ku hlamusela njhani ku humesiwa ka Nawu wa Muxe?
VUTIRHELI bya ku chumayela “Evhangeli leyi ya Mfumo” emakun’wini ya mafambiselo ya swilo i rifuwo hakunene, nchumu wa nkoka swinene. Hi mhaka ya leswi Yehova a nga Xikwembu xo kwetsima, ku tirhela Xikwembu i vutirheli byo kwetsima, xisweswo i rifuwo. (Matewu 24:14; 2 Vakorinto 3:18–4:1) Malunghana ni ku humesiwa loku kwetsimaka ka Nawu wa Muxe, swi tsariwile eka Eksoda 34:29, 30: “Kutani kute loko Muše a relele nṭhav̌eni ya Sinai a ri ni maribye mambiri ya v̌umboni e v̌okweni ra yena, kambe Muše a a nga tiv̌i leŝaku nhlonge ya mombo wa yena yi hatima, loko a a ri kari a v̌ulav̌ula na Yehova; kutani Arone ni v̌ana v̌a Israel hikwav̌o, loko v̌a languta Muŝe, v̌a v̌ona nhlonge ya mombo wa yena y[i] hatima, kutani v̌a tšhav̌a ku ṅwi ṭhinelela.”
2. Xana ntirho wa Nawu wa Muxe a wu fanekisela yini naswona ha yini vutirheli bya le ndzhakunyana byi kwetsima swinene?
2 Tindzimana 32 ku ya ka 34 ta engetela: “E nḍaku ka ŝona, v̌ana v̌a Israel hikwav̌o v̌a ṭhinelela, kutani a v̌a lerisa timhaka hikwato leti Yehova a ṅwi byeleke tona e nṭhav̌eni ya Sinai. Kute loko Moše a hetile ku v̌ulav̌ula na v̌ona, a tifunengeta mombo hi nguv̌u. Kutani loko Muše a nghena e mahlweni ka Yehova e ku v̌ulav̌ula na yena, a susa nguv̌u a ko a huma.” Ntirho wolowo wa Nawu wa Muxe a wu fanekisela vutirheli bya ntwanano lowuntshwa hi Muhlanganisi, Yesu Kriste. Hikwalaho, loko vutirheli lebyi bya khale a a byi kwetsima, vona ndlela leyi “ku vangama loku tisiwaka hi Moya” ka le ndzhaku, ku wu tlulaka swinene hi ku kwetsima ha yona! (2 Vakorinto 3:7-11) Ka kwetsima swinene hikuva ku na ku vangama loku tshamaka hi masiku, naswona valandzeri va Yesu va avelana kona.—Varhoma 12:11.
3. (a) I yini leswi faneleke swi ri ntiyiso hi vutirheli bya Timbhoni ta Yehova, kambe ha yini leswi swi nga vonaki eka vanhu vo tala? (b) I yini lexi kombisaka leswaku Muxe a a ri eka vukona lebyi vangamaka bya Yehova?
3 Hikwalaho, swa twala leswi vutirheli bya Timbhoni ta Yehova byi nga lebyi kwetsimaka. Hambi swi ri tano, leswi a swi tano eka vanhu vo tala lava va pfariweke mahlo hi vukhongeri bya mavunwa. Hambi loko vo tala va ri ni Bibele naswona swi nga ha endleka va yi hlaya, va hava ‘mahlo lama vonaka.’ (2 Petro 1:5-9) Leswaku nguvu leyi nga emahlweni ka vona yi susiwa, va fanele va hundzukela eka Yehova Xikwembu hi ripfumelo, hikuva loko Muxe a humelele emahlweni ka Yehova, u suse nguvu leyi a yi pfale xikandza xa yena eka Vayuda. (2 Vakorinto 3:16) Vaisrayele a va ngheniwe hi ku chava swinene loko va vona ku vangama ka Xikwembu exikandzeni xa muhlanganisi wa vona ivi va kombela leswaku xi funengetiwa va nga xi voni. Tanihi leswi xivoni xi humesaka ku vonakala emunyameni loko xi langutane ni rivoni, kutani Muxe, muhlanganisi wa vona, a a humesa ku vangama ka Yehova, ku kombisa leswaku a a ri emahlweni ka Yehova.
4. Xana vanhu lava nga pfumeriki namuntlha va va tekelela njhani Vayuda va khale, kambe i yini lexi valandzeri va Muxe Lonkulu va nga xi chaviki?
4 Muxe a a fanekisela Muprofeta lonkulu wa Xikwembu, Yesu Kriste. Ku fana ni muyimeri wa yena, Muxe loyi Lonkulu a nga chavi ku languta ku kwetsima ka Yehova hi ku kongoma. Hambi swi ri tano, ku ta fikela namuntlha, vanhu lava nga pfumeriki lava pfariweke mahlo hi Diyavulosi ni vukhongeri bya yena bya Vubabilona va tekelela Vayuda volavo va khale kutani va ala ku vona, kumbe ku twisisa, ku kwetsima ka Muxe Lonkulu, Yesu Kriste. (2 Vakorinto 3:12-15) Hambi swi ri tano, valandzeri va yena va ntiyiso a va chavi ku languta ku vangama ka ku kwetsima ka Yehova loku humaka exikandzeni xa Yesu Kriste. Leswi va ntshunxiweke enkucetelweni wa Babilona, va nyikiwe xivindzi xo kombisa ku kwetsima ka Xikwembu. “Hikokwalaho,” ku tsale Pawulo, “leswi hi nga ni ku tshemba loko tano, hi vulavula hi tiyile nhlana swinene.”—2 Vakorinto 3:12.
Vakombisi Va Ku Vangama Ka Xikwembu
5. Xana hi nga ku kombisa njhani ku vangama ka Xikwembu ivi hi fana na Muxe emaninginingini ya ntshava eka vukona bya Yehova?
5 Yesu Kriste u suse nguvu hi ku paluxa ni ku twarisa Yehova Xikwembu eka hina. (Yohane 1:14, 17, 18) Kutani hi fanele hi vangama, ivi xisweswo ku vangama ka Xikwembu ku voninga hi “Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu,” lama hi faneleke ku ma twarisa. Miseve ya wona i “[vutivi bya xona lebyi] vangamaka enghoheni ya Kriste.” Hi fanele hi kombisa ku kwetsima loku hi ku vulavula hi ku kwetsima ka Yehova ni ku vangama ka Mfumo wa yena hi N’wana wa yena. (2 Vakorinto 4:4-6) Tanihi Muxe emaninginingini ya ntshava eka vukona bya Yehova, Timbhoni ta Yena emisaveni a ti ti funengeti timbilu ta tona eka ku vangama ka Yehova. Va hlamala ku vangama loku kombisiwaka exikandzeni xa N’wana ni Hosi ya Yehova, Yesu Kriste. Xisweswo, va fanele va avelana ni van’wana ku vonakala malunghana ni ku kwetsima ka Xikwembu.
6. Xana Pawulo u byi hlamusela njhani vutirheli bya hina bya ku dzuneka eka 2 Vakorinto 3:18, naswona xisweswo va ‘hundzuriwa’ hi ndlela yini?
6 Eka timbhoni-kulorhi hinkwato ta ku vangama ka Yehova, muapostola Pawulo u swi veka hi marito lawa: “Hina hinkwerhu lava kombaka ku vangama ka [Yehova] ku fana ni xivoni, hi mimombo leyi fununguriweke, hi hundzukile lava fanaka na yena, hi ku vangama loku ngangamukaka ku ya emahlweni. [Yehova u] endlile sweswo, [a] nga Moya.” (2 Vakorinto 3:18) Loko hi ya hi amukela ku vangama ka ku vonakala loku, hi fanele hi ya hi humesa ko tala naswona xisweswo hi ya hi hundzuriwa. Mianakanyo ya antswisiwa ni ku pfuxetiwa, hambi loko ku nga vonaki ku cinca ka miri kumbe ka xikandza. I ku vonakala ka rungula leri kwetsimaka loku hi ku humesaka loku tisaka ku cinca eka hina. Vutomi bya hina byi cinciwa byi fana na Kriste, loko hi tiyimisele ku hetisisa ntirho wa nkoka wa ku hangalasa ku vonakala loku kwetsimaka eka van’wana.—Vaheveru 13:15.
7. Xana ku kwetsima ka xiviri ku huma eka xihlovo xihi naswona xana ku kwetsima ko tano hi nga ku kombisa njhani?
7 Ku hundzuka koloko hinkwako ku hikwalaho ka moya kumbe matimba lama tirhaka ya Xikwembu. Vafundhisi va Vujagana a va ku kombisi ku kwetsima ka Yehova Xikwembu kambe va kombisa xivumbeko xa vukanganyisi leswaku va koka mahlo. Ku vangama a hi ku vangama ka hina, naswona a hi fanelanga hi tiambexa swiambalo leswi kokaka mahlo swa vufundhisi swa silika, nsuku ni swin’wetsin’wetsi leswi vangamaka. Ku vangama ka xiviri ku huma eka moya wa Xikwembu naswona ku kombisiwa hi ku nyikela vumbhoni lebyi kwetsimaka malunghana na Yehova la nga Moya.
Vabyarhi Hinkwavo Va Ku Vonakala Lava Nga Ni Lunghelo
8, 9. Hi xihi xikhutazo lexi Pawulo a hi nyikaka xona eka 2 Vakorinto 4:1, 2, naswona xana xi lava ku tiyimisela kwihi eka hina?
8 Eka 2 Vakorinto 4:1, 2 ha hlaya: “Hikokwalaho leswi Xikwembu, hi tintswalo ta xona, xi nga hi rhuma ku tirha ntirho wolowo, a hi heli mbilu, hi tshikile mintirho hinkwayo ya munyama ni ya tingana; a hi hanyi hi ku xisetela vanhu; a hi soholoti Rito ra Xikwembu; kambe hi humesela ntiyiso erivaleni, kutani hi tikomba hi ri lava nkhensekaka eripfalweni ra un’wana ni un’wana, ne mahlweni ka Xikwembu.” Xikwembu xi ve ni tintswalo eka hina hi ku hi avela vutirheli lebyi. Lexi i xikhongotelo xo hi khutaza leswaku hi ya emahlweni hi xivindzi naswona leswi hi ta swi endla! Tanihi leswi hi katekisiweke hi ku vonakala ko huma eRitweni ra Xikwembu, hi bohekile ku voningela van’wana ha rona.—Ringanisa Matewu 5:14-16.
9 Swilo leswi vanhu va nga ni tingana ha swona swo tanihi vuxisi, swi tumbela hi vukanganyisi ni vuxisi. Kambe a hi na xivangelo xo va ni tingana hi mhaka ya leswi rungula ni ntirho wa hina swi nga riki na vuxisi kambe swi lulamile naswona i ntiyiso. Hikwalaho, hi nga voninga ku vangama loku taleke ka ku vonakala. A hi tameli Rito ra Xikwembu hi vuxisi. Ku endla tano a swi ta vula ku ri khoma hi ndlela ya vutianakanyi ya ku vuyeriwa, ku vangama, ku bindzula ni matimba ya misava swa munhu hi xiyexe ni ku balekela nkaneto ni nxaniso wo huma emisaveni. Lava va nga chaviki ku ya eka Yehova ni swikandza leswi nga funengetiwangiki ni ku languta ku vonakala loku vangamaka ka ntiyiso hi ku fanana a va nge chavi ku langutana ni vutihlamuleri bya vona. Va ta pfumelela ku vonakala ku kombisiwa eka vona.
10. Hikokwalaho ka yini ku nga ri xihoxo xa Timbhoni ta Yehova loko mahungu lamanene ma tumbetiwile eka vanhu van’wana?
10 Loko vahi na vahi va pfariwe mahlo leswaku va nga ma voni mahungu lamanene ya Mfumo, a hi xihoxo xa Timbhoni ta Yehova, i xihoxo xa vona vini. Mahungu lamanene ya mfumo a ma tumbetiwanga. Ntirho wo chumayela wa misava hinkwayo wa Timbhoni ta Yehova wu tiveka swinene. Xisweswo, va nga vula hi laha muapostola Pawulo a vuleke ha kona a ku: “Hikuva a ti humelelanga exihundleni.” Hakunene, hi laha a tsaleke ha kona, mahungu lamanene ma “twarisiwile eka swivumbiwa hinkwaswo leswi nge hansi ka tilo.”—Mintirho 26:26; Vakolosa 1:23.
11. Ha yini mahungu lamanene ma tumbetiwile eka vanhu vo tala swinene?
11 Lava mahungu lamanene ya Mfumo wa Xikwembu ma tumbetiweke eka vona i vakaneti, lava pfariweke mahlo hi Diyavulosi. (Ringanisa Matewu 12:30.) Loko va nga chupuli eka vukhongeri bya mavunwa ni le mintlhan’wini ya Diyavulosi, va le nxaxamelweni wo ya eku lovisiweni. Ehansi ka nkucetelo wa mademona, vanhu vo tano va tipfale hi nguvu emahlweni ya vona, hikuva muapostola Pawulo eka 2 Vakorinto 4:3-5 u ri: “Hikuva loko Mahungu Lamanene ya hina ma fihlekile, ma fihlekile ntsena eka lava yaka eku loveni; xikwembu xa misava leyi xi pfarile miehleketo ya vanhu lava va nga pfumeriki; xi va sive mahlo leswaku va nga voni ku vangama ka Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu. Hina a hi titwarisi, kambe hi twarisa Kriste Yesu, hi ku: I Hosi! Kutani hina hi tivula malandza ya n’wina hikwalaho ka Yesu.”
12. Ku hambana ni lava pfariweke mianakanyo, xana vanhu va Yehova va hlamurisa ku yini eka marito ya 2 Vakorinto 4:6?
12 Lava pfariweke mianakanyo a va swi lavi ku pfumela. Ku nga pfumeli ka vona ku pfula mianakanyo ya vona leswaku yi hlaseriwa hi mademona. (1 Timotiya 4:1) A va nge ku voni ku vangama ka Yehova kumbe ku vangama ka yena exikandzeni xa Yesu, Muxe Lonkulu. Vanhu va Yehova va amukela ku vonakala loku vangamaka loku humaka eBibeleni ivi va ku yisa eka van’wana. Kutani malandza hinkwawo ya Xikwembu i vabyarhi va ku vonakala kutani Xikwembu xi lerisa ku vonakala leswaku ku voninga. Ku vonakala ku fanele ku vonakala eka vanhu va Xikwembu ivi ku voninga eka van’wana lava nga emunyameni, lava nga ekhombyeni ra ku lovisiwa. Leswi swi hi laha 2 Vakorinto 4:6 yi swi vekaka ha kona: “Hikuva xona Xikwembu lexi nga te: ‘Ku vonakala a ku vangame emunyameni!’ Hi xona lexi nga vangamisa ku vonakala etimbilwini ta hina, hi ta tiva ku kwetsima ka xona loku vangamaka enghoheni ya Kriste.” Hikwalaho ka leswi, Timbhoni ta Yehova ti yingisa xileriso xa Xikwembu naswona ti endla ku vonakala ka tona ku voninga eka van’wana, ku yisa ku dzuneka eka Xikwembu.
Rifuwo Leri Kwetsimaka Eka Swibya Swa Rivovo
13. Xana ku veka ntirho lowu katekisiweke wa ku va vabyarhi va ku vonakala eka swivumbiwa swa nyama swi tisa yini?
13 Eka lunghelo leri ra ntirho leri nga hlamuselekiki, i swa nkoka swinene leswaku vabyarhi va ku vonakala va tikombisa va fanelekela ku va na ku vonakala hi ku hlayisa vutshembeki bya vona eka Xikwembu. Leswaku va hetisisa lunghelo leri ro hlamarisa ra ntirho, Xikwembu a xi tirhisanga tintsumi to kwetsima, leti a ti navela ku endla swilo leswi, kambe xi veke ntirho lowu lowu katekisiweke eka swivumbiwa swa nyama. (1 Petro 1:12) Leswi xi swi endlele ku kombisa matimba ya xona ehenhla ka ku tsana ka vanhu. Hi laha 2 Vakorinto 4:7 yi vulaka ha kona: “Kambe hina hi nyikiweke ku rhwala xuma lexi, hi fana ni timbita ta vumba; swi komba leswaku matimba lamakulu lawa, lama tlulaka hinkwaswo, ma huma eka Xikwembu, a ma humi eka hina.”
14. (a) Xana ‘xuma lexi xi nga eswibyeni swa vumba’ i yini? (b) Ha yini Muxe na Yesu Kriste va ri swikombiso swa vutlhari eka hina malunghana ni rifuwo?
14 Swibya eminkarhini ya khale hakanyingi a swi tirhisiwa tanihi swo khoma swilo swa nkoka. I yini rifuwo leri ro kwetsima leri Timbhoni ta Yehova ti nga na rona eka swibya swa rivovo, swa vumba—hi swoxe, tanihi swivumbiwa leswi tsaneke swo huma entshurini wa misava? Rifuwo leri a ro va ntsena ku vonakala loku voningeke etimbilwini ta vona. I vutirheli bya ku vonakala koloko, vutirheli kumbe ntirho lowu faneleke wu endliwa hi mimiri ya vona ya laha misaveni. Vutirheli i ku humesiwa ka ku vonakala loku Xikwembu xi ku ngheniseke etimbilwini ta vona. Vutirheli lebyi i rifuwo lerinene lerova i lunghelo lerikulu ra ntirho leri nga kumiwiki hi masalela lama totiweke ntsena ya “ntlhambinyana” kambe na hi “ntshungu lowukulu wa “tinyimpfu tin’wana” ta Murisi Lonene, Yesu Kriste. (Luka 12:32; Yohane 10:14-16; Nhlavutelo 7:9) Muxe ni muyimeri wa yena, Yesu Kriste, i swikombiso leswinene eka hina, ku veka timbilu ta hina eka rifuwo ra ntirho wa Xikwembu, “hikuva laha xuma xa wena xi nga kona, hi laha mbilu ya wena yi nga ta va kona na yona.”—Matewu 6:19-21; Vaheveru 11:26.
15, 16. (a) Xana matimba lamakulu ma kombisiwa njhani ma ri lama humaka eka Xikwembu naswona hayi eka hina? (b) Ha yini nkaneto hinkwawo wa misava wu tsandzeka ku herisa swibya swa vumba swa Xikwembu?
15 Kutani ke, xana matimba lamakulu ma kombisiwa njhani ma ri lama humaka eka Xikwembu naswona hayi eka hina? Hi ndlela leyi: Swibya swo tano swa rivovo swa vumba swo tanihi hina leswi endlaka ntirho ni xileriso xo tano xa nkoka a swi faneriwi, kutani a hi nge titekeli ku dzuneka ko tano. Ku tlula kwalaho, hina Timbhoni ta Yehova hi le hansi ka tinxaka hinkwato ta ntshikilelo wa nala wo ringeta ku hi wisa ivi a hi hlanhla leswaku hi nga fanelekeli ku byarha ntirho wa Xikwembu. Hikwalaho, ku fanele ku ri matimba ya Mulerisi Lonkulu lama hi pfunaka ku hlula ku xanisiwa lokukulu hi misava leyi ni ku khomelela entirhweni naswona hi tikombisa hi fanelekela ku hlayisiwa entirhweni wa xona. Xisweswo, ku kaneta hinkwako ka misava ku ta tsandzeka ku faya swibya swa vumba swa Xikwembu ni ku swi tekela rifuwo ra swona ra nkoka, hikuva ku tsariwile eka 2 Vakorinto 4:8-12:
16 “Hi kamanyetiwa hi matlhelo hinkwawo, kambe a hi manyiwanga; hi le ku kanakaneni, kambe a hi heli mbilu; ha hlotiwa, kambe a hi tshikiwanga ekhombyeni; ha tlumbiwa, kambe a hi herisiwi; minkarhi hinkwayo hi rhwala rifu ra Yesu emirini wa hina, leswaku vutomi bya Yesu na byona byi vonaka emirini wa hina. Hikuva hina, hambileswi hi nga lava hanyaka, hi nyiketiwa eku dlaweni minkarhi hinkwayo hikwalaho ka Yesu, leswaku vutomi bya Yesu byi vonaka entumbulukweni wa hina lowu faka. Kutani ke, rifu ra tirha eka hina, kambe vutomi [hi ku chumayela mahungu lamanene ya Mfumo] bya tirha eka n’wina.”
Ntshungu Lowukulu Wu Tlangela Swinene “Rifuwo Leri”
17. Xana ntshungu lowukulu wu ri tekisa ku yini ‘rifuwo leri’ ra vutirheli bya ku dzuneka?
17 “Rifu ra tirha eka hina, kambe vutomi bya tirha eka n’wina.” Marito lawa ma tirha eka Vakriste lava totiweke hi moya. Kambe, hi laha ku fanelaka ma nga hi endla hi anakanya hi vuxaka bya masalela lama totiweke ya Xikwembu ni ntshungu lowukulu wa tinyimpfu tin’wana. Vatotiwa va swi tiva leswaku eku heteleleni va fanele va heta vutomi bya vona bya laha misaveni hi ku fa hi laha Yesu a endleke ha kona, kambe va ni vanghana vo avelana na vona rifuwo ro vangama ra ntirho, ku va pfuna hi ku endla ntirho wo tala wa ku chumayela mahungu lamanene ya Mfumo. Ku fana ni masalela lama totiweke, ntshungu lowukulu wa tinyimpfu tin’wana namuntlha hi ku hlawuleka wa swi twisisa leswaku rifuwo leri nga rona ntsena ri nga ta pona nyimpi ya vukarhi ya Armagedoni ivi ri pona ri nga vavuriwanga naswona ri nga hisiwanga ri hela ri nghena emisaveni leyintshwa i rifuwo leri ra vutirheli lebyi katekisiweke, ku tirhela Yehova Xikwembu ni Hosi ya yena leyi kwetsimaka, Yesu Kriste. Ntshungu lowukulu wu ta hambeta wu wu endla, “[wu] tirhela [Xikwembu] vusiku ni nhlekanhi eTempeleni ya xona.”—Nhlavutelo 7:15.
18. (a) I yini lexi hi ku hatlisa xi nga humelela eka ku dzuneka ka vuxisi ka misava leyi? (b) Hi kwihi “ku dzuneka” loku Yesu a ku aleke naswona u kume ku dzuneka lokukulu hi ku endla yini?
18 Hi ku hatlisa, Xikwembu xi ta herisa ku dzuneka ka vuxisi ka mafambiselo yo biha ya swilo ya namuntlha—“ku dzuneka” loku ku veke kona ku sukela loko Sathana Diyavulosi a yise Yesu entshaveni yo tlakuka ivi a n’wi komba mimfumo hinkwayo ya misava ni “ku dzuneka ka [yona].” (Luka 4:5, 6) Yesu u yi arile nyiko ya ku dzuneka yo huma eka munhu wo tano ivi a hambeta a landzelela goza leri Xikwembu xi ri amukelaka emisaveni. Hi ku endla tano, a a ta ambexiwa ku dzuneka loku tlulaka swinene hambi ku ri ku dzuneka loku yena, N’wana wa Xikwembu la tswariweke a ri yexe, a ku tsakeleke etilweni a nga si amukela xiavelo xa yena xa laha misaveni hi laha swi andlariweke ha kona hi Yehova.—Yohane 5:36; 17:5; Vafilipiya 2:9-11.
19. Hi rihi lunghelo leri dzunekaka ra ntirho leri tshinelelaka ku hetiseka ka rona loku taleke, naswona hi kwihi ku tiyimisela ka hina emhakeni leyi?
19 Makumu lama vhumbiweke ya mafambiselo lawa ya swilo ya vudiyavulosi a ma nge ti vumbhoni bya Mfumo byi nga si nyikeriwa emisaveni hinkwayo tanihi makumu lama xiyekaka ya ntirho wa valandzeri va Yesu Kriste, Timbhoni ta Yehova. (Matewu 24:14) Vumbhoni bya Mfumo sweswi se byi nyikeriwe ku ringana tikotara tinharhu ta lembe xidzana naswona hi laha swi kombisiweke ha kona hi xiyimo xa misava xa nkarhi wa hina, makumu wolawo lama vhumbiweke ma fanele ma ri ekusuhi. Eku heteleleni, lunghelo leri xiximekaka ra ku hlanganyela evutirhelini bya hulumendhe ya vuhosi, leyo kwetsima, ri fanele ri tshinelela ku hetisisiwa ka rona loku taleke. (Matewu, tindzima 24, 25; Marka, ndzima 13; Luka, ndzima 21) Lunghelo ra hina ra ku hlanganyela eku nyikeleni ka vumbhoni bya misava hinkwayo bya Mfumo lowu simekiweke i rifuwo leri kwetsimaka hakunene leri Timbhoni ta Yehova, tanihi valandzeri va N’wana wa yena la vekiweke exiluvelweni, Yesu Kriste, ti ri tlangelaka swinene. Hi ku tiyimisela va navela ku wu namarhela ku kondza vumbhoni bya Mfumo byi hetiwa ivi Xikwembu xa Matimba hinkwawo, Yehova, xi ambexa xiyimo xa vuako hinkwabyo hi vumbhoni bya xona n’wini eka vuhosi bya xona bya vuako hinkwabyo.—Sofonia 3:8.
Tinhlamulo Ta Wena Hi Tihi?
◻ Ha yini vutirheli bya Timbhoni ta Yehova byi ri lebyi vangamaka?
◻ Ha yini mahungu lamanene ma tumbetiwile eka vo tala swinene namuntlha?
◻ ‘Rifuwo leri ri nga eswibyeni swa vumba’ i yini?
◻ Ha yini Xikwembu xi tirhise swibya swa rivovo, swa vumba entirhweni wa xona wa nkoka?
◻ Xana vanhu va Yehova va ri tekisa ku yini “rifuwo leri,” naswona ha yini?
[Xifaniso lexi nga eka tluka 17]
Ku dzuneka ka Xikwembu ku kombisiwa hi xiyimo xa Yesu Kriste, Muxe Lonkulu. Timbhoni ta Yehova ti na lunghelo ro amukela ku vonakala loku vangamaka ka Xikwembu eBibeleni ni ku ku yisa eka van’wana