“Ku vona ku hetiseka ka vuprofeta bya Bibele lebyi tsariweke hi vavanuna lava huhuteriweke ni lava tinyiketeleke hi malembe xidzana yo tala lama hundzeke eka rixaka ra mina.”

Kavula, swirho swa rixaka ra mina ehandle ka nhlengeletano ya le tilweni, swi hundzuke hi ku kongoma ngopfu hi laha Photo-Drama of Creation ya 1914 yi vuleke leswaku swi ta va ha kona: varhandzi va mali, varhandzi va ntsako ni varhandzi va ku dzuneka. Hina lava hi nga endzeni ka nhlengeletano ya Hosi hi ringetile, hi tindlela hinkwato leti kotekaka, ku hundzulela mianakanyo ya vona eka rungula ra vutomi. Hi tirhise ku huwelela, switiviso leswi tateke tluka, xiya-ni-moya, timovha ta mpfumawulo, tigramafomo leti rhwalekaka, mintsombano leyikulu, mintlawa ya varhwali va marungula lava nga ni swikombiso, ni vuthu leri kulaka ra vatirheli va yindlu na yindlu. Ntirho lowu wu tirhe ku hambanisa vanhu—lava tsakelaka Mfumo wa Xikwembu lowu simekiweke etlhelweni rin’wana, ni lava lwisanaka na wona etlhelweni rin’wana. Lowu a wu ri ntirho lowu vhumbiweke hi Yesu wa rixaka ra mina!—Matewu 25:31-46.

Ku fikela loko ‘mbilu ya mina leyi karhaleke’ yi ba ra makumu, yi ta hambeta yi ba hi ku tlangela ka lunghelo leri ndzi ri tsakeleke ra ku va eka rixaka ra nkoka. Yi ta hambeta yi ba hi ku nyanyuka ehenhla ka lunghelo leri ndzi nga na rona ro vona timiliyoni ta swikandza leswi n’wayitelaka leswi tshembisiweke ku tshama swi n’wayitela hi laha ku nga heriki.

Muntshwa A Dzunisa Yehova

MINKARHI yo tala yo veka vumbhoni yi pfulekile eka vantshwa loko va ri ni ku navela loku tiyeke ko tirhela Yehova. Leswi swi voniwile eka ntokoto wa mufana wa malembe ya ntlhanu hi vukhale evupela-dyambu bya Kenya.—Eklesiasta 12:1.

Mana wakwe u n’wi vutisile: “U lava ku va yini loko u kurile?” Mufana a a xiyile phayona ro hlawuleka ebandlheni ivi a hlamula: “Ndzi lava ku va phayona ro hlawuleka ku fana na Makwerhu F——.” Manana u hlamurile: “Kambe leswi a swi olovi; u nga ka u nga vi hambi ku ri phayona ra nkarhi hinkwawo hikuva a wu na yona dyondzo ya Bibele.” Mufana u vutisile: “Xana ndzi nga endla yini?” Mana wakwe u n’wi byele ku ringeta ku dyondzisa vatlangi-kulobye Buku Yanga ya Timhaka Ta Bibele.

N’wana wa malembe ya ntlhanu u kume buku yakwe ya Timhaka Ta Bibele ivi a ya a ya vitana vanghana vakwe, a va rhambela ku dyondza Bibele na yena. Vuyelo ku ve byihi?

U vumbe ntlawa wa khume leswaku a dyondza na vona. U tirhise swifaniso swinene, a pfuxa swivutiso swo tala leswi kambisisaka, naswona a vutisa swivutiso swa mpfuxeto emakumu ka dyondzo. Loko va nga ha tsundzuki, a a tlhela a hlaya mhaka na vona. Manana u hlamusele leswaku a ku ri ntsako hakunene ku vona vana lava hinkwavo lava tshameke ehansi emahlweni ka yindlu yakwe va dyondza kun’we! A ku ri na mufana wakwe wa malembe ya ntlhanu a ri karhi a vutisa swivutiso, kutani mavoko hinkwawo a ya tlakuka leswaku ya hlamula.

Nakambe a ku ri ntsako eka manana, kun’we ni le bandlheni, ku vona nhungu wa vana lava va va kona eminhlanganweni ya bandlha. Lavan’wana vambirhi a va ri vantsongo swinene. Hinkwaswo leswi swi humelerile hikuva n’wana wa malembe ya ntlhanu a a lava ku dzunisa Yehova ni ku pfuna van’wana.