Ndlela Yo Tirhisa Buku Leyi Nge “Ku Hlamulana Hi Matsalwa”
Ntila lowu nga landzeriwaka eku pfuneni ka vanhu van’wana leswaku va twisisa Bibele, hi lowu boxiweke hi Yesu Kreste ni vaapostola vakwe. Loko a hlamula swivutiso, Yesu a a tshaha matsalwa naswona minkarhi yin’wana a a tirhisa swifaniso leswi faneleke leswi a swi ta pfuna vanhu va timbilu letinene leswaku va amukela leswi Bibele yi swi vulaka. (Mt. 12:1-12) Muapostola Pawulo u swi endle mukhuva ku ‘hlamula hi Matsalwa, a hlamusela ni ku kombisa hi tinhlamuselo’ leswi a a swi dyondzisa. (Mint. 17:2, 3) Mhaka leyi tameriweke hi buku leyi yi nga ku pfuna ku endla leswi fanaka.
Ematshan’weni yo hlanganisa mhaka yin’wana ni yin’wana hi ku anama ka yona, hi laha yi nga ha kona, buku leyi leyi nge Ku Hlamulana Hi Matsalwa, yi kambisisa ngopfu swivutiso leswi vutisiwaka hi vanhu vo tala sweswi.
Buku leyi a yi endleriwanga xikongomelo xa ku pfuna un’wana ni un’wana leswaku a “hlula minkaneto” ya vanhu lava nga wu xiximiki ntiyiso. Ematshan’weni ya sweswo, yi nyika rungula ra nkoka leri faneleke ri tirhiseriwa ku hlamulana ni vanhu lava nga ta pfumela leswaku mi vulavurisana. Van’wana va nga ha vutisa swivutiso leswi va lavaka tinhlamulo ta swona leti enerisaka hakunene. Van’wana, loko mi ri karhi mi bula, va nga ha boxa tidyondzo ta vona naswona va nga ha swi endla hi xivindzi. Kambe xana i vanhu lavanene lava tsakelaka ku twa mavonelo man’wana? Loko swi ri tano, u nga va byela leswi Bibele yi swi vulaka, u swi endla u ri ni ntshembo wa leswaku swi ta amukeriwa hi timbilu ta lava rhandzaka ntiyiso.
Ebukwini leyi, xana u nga yi kumisa ku yini mhaka leyi u yi lavaka? Hakanyingi u nga yi kuma hi ku olova loko wo pfula eka xihloko-nkulu lexi yimelaka mhaka leyi hlamuseriwaka. Ehansi ka swihloko-nkulu hinkwaswo, swa olova ku vona swivutiso leswikulu; swi tsariwe hi maletere ya ntima lama taleleke etlhelweni ra ximatsi. Loko u nga swi kumi hi xihatla leswi u swi lavaka, languta Xikombo emakun’wini ya buku.
Ku lunghiselela bulo ka ha ri emahlweni swa pfuna nkarhi hinkwawo. Kambe loko u nga si tolovelana ni swiyenge swo karhi swa buku leyi, hambi ku ri swona u nga ha swi tirhisa kahle. Njhani? Loko u kuma xivutiso lexi yelanaka ngopfu ni yinhla leyi u lavaka ku bula ha yona, languta swihlokwana leswi nga ekusuhi na xona. Swihlokwana leswi swi tsariwe hi marito ya ntima lama voyameke, naswona swi avanyisiwe hi ku ya hi swivutiso leswi swi swi hlamulaka. Loko mhaka ya kona se u yi tivanyana, ku kambisisa swihlokwana swoleswo ni ku langutanyana tinhla ta swona swi nga ha ku pfuna, hikuva swi longoloxa tinhla leti ti nga tirhisiwaka. U nga kanakani ku phofula mhaka leyi hi marito ya wena.
Xana u vona onge u lava ku kuma swo tala—kumbexana matsalwa ya kona hi ku kongoma, tinhlamuselo leti u nga ti tirhisaka malunghana ni matsalwa lawa, swifaniso swa ku ku pfuna leswaku u andlala mongo wa leswi Bibele yi swi vulaka ni swin’wana? Loko swi ri tano, u nga ha komba munhu loyi u vulavulaka na yena leswi u nga na swona ebukwini leyi kutani mi hlaya swin’we xiyenge lexi hlamulaka xivutiso lexi a xi vutiseke. Hambi loko mhaka ya kona u nga yi dyondzanga ka ha ri emahlweni, u nga yi tirhisa ku nyika nhlamulo leyi enerisaka. Xin’wana ni xin’wana xi kona kwala bukwini, xi vekiwe hi mukhuva wo olova, lowu baka nhloko ya mhaka.
U nga rivali leswaku buku leyi yo va xipfuneto ntsena. Bibele hi yona xihlovo lexikulu. Hi yona yi nga Rito ra Xikwembu. Loko ku tshaha loku nga ebukwini leyi ku huma eBibeleni, kandziyisa mhaka yoleyo eka lava u vulavulaka na vona. Laha swi kotekaka kona, va kombele leswaku va teka Tibibele ta vona ivi va languta matsalwa, va ta vona leswaku leswi u swi vulaka swi kona ebukwini ya vona ya Matsalwa. Loko vuhundzuluxeri byin’wana bya Bibele lebyi tirhisiwaka ngopfu byi hlamula tinhla-nkulu ta tindzimana tin’wana hi ndlela leyi hambaneke, hakanyingi swi fanele swi kambisisiwa, ivi ku langutiwa tinhlamuselo leti humaka eka vuhundzuluxeri byo hambana-hambana, ku ringanisiwa na byona.
Hi ku pfumelelana ni xikombiso lexi vekiweke hi muapostola Pawulo loko a vulavula hi altari ya “Xikwembu lexi nga tiviwiki” ni loko a tshaha tibuku tin’wana ta tiko leti toloveriweke, loko a chumayela eka Vaatena (Mint. 17:22-28), buku leyi a yi ku tirhisi ngopfu ku tshaha ka matimu ya tiko, minsonga-vutivi, tibuku ta tinhlamuselo ta vukhongeri ni tibuku ta ririmi ra Bibele. Hi xikombiso, ematshan’weni yo nyika vuxokoxoko bya masungulo ya swiendlo swa vukhongeri bya mavunwa, masungulo ya tidyondzo to karhi ni tinhlamuselo ta marito ya Xiheveru ni ya Xigriki, buku leyi yi kombisa swivangelo swa tinhlamuselo leti nyikeriwaka. Hambi swi ri tano, yi kombisa Bibele tanihi xona xihlovo lexikulu xa ntiyiso.
Tanihi swipfuneto swin’wana swo pfula ndlela yo avelana ni van’wana ntiyiso wa Bibele, swiyenge swo rhanga swa buku leyi swi xaxameta “Swingheniso Swa Ku Swi Tirhisa eVutirhelini Bya Nsimu” ni xikatsa xa swiringanyeto swa “Ndlela Leyi U Nga Angulaka Ha Yona Eka Lava Lavaka Ku Siva Bulo.” Van’wana vo tala lava lavaka “ku siva bulo” va tirhisa tidyondzo to karhi, kutani tona ti hlamuseriwa emakun’wini ya xiyenge xin’wana ni xin’wana lexikulu lexi hlamuselaka tidyondzo teto. Xikongomelo a hi leswaku u tiva tinhlamulo leti hi nhloko, kambe handle ko kanakana swi ta ku pfuna ku kambisisa ndlela leyi van’wana va ti tirhiseke ha yona hi laha ku humelelaka; kutani u vula mhaka yoleyo hi marito ya wena.
Ku tirhisa buku leyi swi fanele swi ku pfuna ku kurisa vuswikoti byo hlamulana ni van’wana hi Matsalwa ni ku ma tirhisa hi laha ku humelelaka, u pfuna van’wana va dyondza hi “mintirho leyikulu ya Xikwembu.”—Mint. 2:11.